ꓥꓪꓸ ꓮ ꓟꓬꓹ ꓓꓳꓽ ꓟꓶˍ ꓟ

 ꓠꓲꓹ ꓠꓵˍ ꓟ ꓬꓲꓼ ꓤ ꓠꓬꓲ ꓤ ꓐꓴꓳ꓾ ꓠꓬꓲꓸ ꓠꓬꓲ ꓟ ꓢꓲꓽ ꓫꓬ ꓕꓳꓽ ꓶ ꓗꓪ ꓐꓰ ꓢꓲꓺ ꓒ ꓬꓰ-ꓢꓴ ꓠꓬ ꓣꓳ ꓔꓯ ꓟꓲ ꓠꓯ ꓞꓳ ꓤ ꓣꓱꓽ ꓬꓰ ꓟꓽ ꓐ ꓡ ꓟ꓾ ꓟꓲ ꓠꓯ ꓞꓳ ꓤ ꓓꓵꓽ ꓙ ꓛꓲ ꓟꓽ ꓐ ꓡ ꓟ ꓮ ꓙꓵꓽ ꓔꓯ ꓠꓬ ꓪꓴ-ꓢ ꓡꓰ ꓣꓱꓽ ꓬꓰ ꓐ ꓡˍ ꓡꓳ꓾ ꓐꓯ ꓟ ꓔꓯ ꓣꓳ ꓙꓵꓻ ꓠꓹ ꓟ ꓠꓬꓲ ꓠꓬꓲ ꓟ ꓢꓲꓽ ꓫꓬ ꓕꓳ ꓶ ꓗꓪ ꓐꓰ ꓣꓳ ꓔꓯ ꓐꓯ ꓟꓸ ꓖꓶ ꓡ ꓔꓬ ꓟ ꓥ ꓡꓳ=

ꓠꓬꓲꓸ ꓠꓬꓲ ꓟ ꓢꓲꓽ ꓫꓬ ꓕꓳ ꓶ ꓗꓪ ꓒꓲ-ꓕꓱ ꓠꓬ ꓕꓲꓽ ꓦꓬꓽ ꓡꓱꓸꓼ ꓥꓪꓸ ꓓꓳꓽˍ ꓟꓲ ꓥꓪꓸ ꓕꓲ ꓟˍ ꓟꓲ ꓓꓳꓽ ꓟꓽ ꓟꓶ= ꓖꓳ ꓕꓯ ꓠꓬ ꓢꓲꓺ ꓒ ꓬꓰ-ꓢꓴ ꓡꓰ ꓡ ꓢꓲ ꓠꓬꓲ ꓒꓲ-ꓕꓱ ꓔꓯ ꓕꓱ ꓡꓱ ꓐꓯ ꓡꓳ= ꓒꓲ-ꓕꓱꓳ꓾ ꓠꓯꓸ ꓟ ꓬꓲꓻ ꓙꓬ ꓘꓴꓽ ꓠꓯꓸꓼ ꓗꓪ ꓥꓪꓸ ꓓꓳꓽ ꓩꓴ ꓗꓷ꓾ꓟ ꓐꓯ ꓕꓯ ꓬꓲ ꓡꓰ ꓬꓰ-ꓢꓴ ꓔꓯ ꓢꓲꓺ ꓒ ꓳ ꓥꓪ ꓠꓴꓽ ꓠꓬ ꓕꓲ ꓦꓬꓽ ꓡꓱꓸꓼ ꓥꓪꓸ ꓓꓳꓽˍ ꓟꓲ ꓕꓲ ꓟˍ ꓟꓲ ꓓꓳꓽ ꓟꓽ ꓟꓶ= ꓖꓳ ꓡꓱ ꓥˍ ꓟꓲ ꓠꓴ ꓐꓯ ꓟ ꓡꓰ ꓥꓪ ꓠꓴꓽ ꓬꓰˍ ꓥꓳ꓾ ꓐꓯ ꓢꓲ ꓓꓳꓽ ꓗꓷ ꓠꓬ ꓥꓪꓸ ꓠꓬ ꓥꓪꓸ ꓑꓱꓸ ꓧꓽ ꓡꓰˍ ꓗꓪ ꓛꓲ ꓓꓳꓽ ꓟꓶˍ ꓡꓳ=

ꓠꓲꓹ ꓠꓵˍ ꓟ ꓬꓲꓼ ꓤ ꓠꓬꓲ ꓤ ꓐꓴꓳ꓾ ꓣꓳ ꓓꓵꓽ ꓙ ꓠꓬꓲ ꓓꓴ ꓕꓲ ꓫꓵꓽ ꓠꓬ꓾ ꓒꓲ-ꓕꓱ ꓠꓽ ꓬꓲ ꓞꓲꓼ ꓣꓳˍ ꓕꓯ ꓡꓰ ꓪꓴꓽ ꓡˍ ꓗꓪ ꓛꓲ ꓕꓲ ꓤꓶꓻ ꓡꓱꓸꓼ ꓥꓪꓸ ꓓꓳꓽ ꓢꓴ ꓥ ꓡꓳ= ꓥꓪꓸ ꓮ ꓡꓰ ꓗꓪ ꓔꓬ ꓡ꓾ ꓮ ꓡꓰ ꓕꓲ ꓣꓳꓸ ꓗꓪ ꓟꓬꓽ ꓠꓬꓲ ꓟꓶˍ ꓡ ꓐꓯ ꓟ ꓬꓲ ꓟꓬꓽ ꓠꓬꓲ ꓢꓷꓸ ꓡꓳ= ꓖꓳ ꓡꓱ ꓥˍ ꓟꓲ ꓬꓰ-ꓢꓴ ꓠꓬ ꓥꓪꓸ ꓕꓲ ꓧꓪꓹˍ ꓟꓲ ꓓꓳꓽ ꓠꓬꓲ ꓢꓴ ꓟꓽ ꓥ= ꓬꓰ-ꓢꓴ ꓠꓬ ꓡꓯꓼ ꓟꓬꓱꓽ ꓣꓱꓽ ꓜꓽ ꓢꓴ ꓥ ꓡꓳ= ꓕꓱ ꓡꓱ ꓫꓵꓽ ꓡ ꓞꓳ ꓕꓲ ꓣꓳ ꓠꓬ ꓒꓲ-ꓕꓱ ꓔꓯ ꓡ ꓢꓲ꓾ ꓕꓱ ꓗꓪ ꓥꓪꓸ ꓓꓹ ꓡꓳ꓾ ꓕꓱ ꓗꓪ ꓥꓪꓸ ꓓꓳꓽ ꓡꓯ ꓐꓰ ꓐꓯ ꓕꓯ ꓠꓽ ꓒꓲ-ꓕꓱ ꓠꓲꓹ ꓟ ꓗꓪ ꓓꓵꓽ ꓙ ꓟꓶ ꓓꓴ ꓥꓳ= ꓖꓳ ꓡꓱ ꓥˍ ꓟꓲ ꓒꓲ-ꓕꓱ ꓠꓬ ꓢꓲꓺ ꓒ ꓬꓰ-ꓢꓴ ꓐꓯ ꓘꓶꓽ ꓔꓯ ꓠ ꓠꓹ ꓢꓲ ꓙꓵꓻ ꓢꓲ ꓠꓬꓲ ꓥꓪꓸ ꓓꓳꓽ ꓗꓷˍ ꓕꓯ ꓥꓪꓸ ꓮ ꓟꓬꓹ ꓓꓳꓽ ꓟꓶ ꓡꓰꓳ꓾ ꓣꓳ ꓢꓷꓸ ꓪˍ ꓡꓳ=

ꓖꓳ ꓟ ꓕꓲ ꓡꓰꓹ ꓣꓳ ꓤꓶꓻ ꓠꓯꓸꓼ ꓗꓪ ꓥˍ ꓟꓲ ꓣꓳ ꓟꓽ ꓐ ꓡ꓾ ꓓꓵꓽ ꓙ ꓟꓽ ꓛꓲ꓾ ꓬꓰ ꓟꓽ ꓐ ꓡ ꓟ ꓟꓬꓱꓽ ꓐꓬꓱꓽ ꓘꓶꓽ ꓮ ꓙꓵꓽ ꓠꓬ ꓪꓴ-ꓢ ꓔꓯ ꓡꓯꓼ ꓙꓱꓻ ꓢꓲ ꓠꓬꓲ꓾ ꓪꓴ-ꓢ ꓡꓰ ꓬꓰ ꓐ ꓡˍ ꓟ ꓔꓯ ꓙꓵꓻ ꓠ ꓗꓹ ꓡꓳ= ꓳ ꓥꓪ ꓕꓱ ꓘꓶ ꓛꓲ ꓣꓱꓽ ꓬꓰ ꓔꓬ ꓥˍ ꓟꓲ꓾ ꓥꓪ ꓕꓱ ꓘꓶ ꓛꓲ ꓫꓪꓸ ꓔ ꓥˍ ꓟꓲ ꓪꓴ-ꓢ ꓡꓰ ꓮ ꓫꓵꓽ ꓪꓴꓸ ꓠꓬꓲ ꓟꓽ ꓖꓶ ꓡ ꓡ= ꓥꓪ ꓔꓯ ꓟꓽ ꓐꓲ ꓜꓲꓼ ꓝꓲ ꓡ ꓐꓰ ꓣꓳ ꓠꓲꓹ ꓟ ꓠꓯꓸꓼ ꓗꓪ ꓙꓵꓻ ꓠꓲꓹ ꓐꓽ ꓢꓲ ꓠꓬꓲ ꓔꓬ ꓟ ꓔꓯ ꓐꓯ ꓟꓳꓸ ꓖꓶ ꓡ ꓔꓬ ꓡꓳ=

ꓖꓳ ꓡꓱ ꓠꓬꓲ ꓙꓵꓻ ꓠꓲꓹ ꓣꓳˍ ꓟ ꓙꓵꓻ ꓠꓲꓹ ꓐꓽˍ ꓟ ꓟꓽ ꓥ ꓥ ꓐꓰ ꓢꓲꓺ ꓒ ꓬꓰ-ꓢꓴ ꓔꓯ ꓙꓵꓻ ꓠꓲꓹ ꓟ꓾ ꓣꓳ ꓠꓲꓹ ꓟ ꓠꓯꓸꓼ ꓗꓪ ꓬꓰ-ꓢꓴ ꓔꓯ ꓘꓳꓹ ꓣꓴ ꓠꓹ ꓟ ꓥ ꓡꓳ= ꓟꓽ ꓥ ꓠꓬ ꓬꓰ-ꓢꓴ ꓣꓳꓽ ꓠꓯꓸꓼ ꓗꓪ ꓟꓽ ꓔꓬ ꓡ= ꓮ ꓫꓵꓽˍ ꓟꓲ ꓣꓳ ꓣꓱꓽ ꓬꓰ ꓟꓽ ꓐ ꓡ= ꓟꓬꓽ ꓠꓬꓲ ꓠꓬ ꓣꓳ ꓦꓻ ꓢꓯꓼ ꓪ ꓐꓱ ꓶ ꓢꓲꓺ ꓒ ꓬꓰ-ꓢꓴ ꓬꓲ ꓣꓱꓽ ꓛꓰꓽ ꓟꓽ ꓟꓶ ꓠꓬ ꓮ ꓕꓯ ꓟꓲ ꓦꓻ ꓐꓱ ꓶ ꓓꓵꓽ ꓙ ꓟꓽ ꓐ ꓡ=