ꓫꓳ ꓠꓱ ꓞꓶ(reflection)

Monday, April 03, 2023

ꓬꓲꓼ ꓤ ꓠꓬꓲ ꓤ ꓐꓴ‐ꓳ ꓕꓱꓽ ꓕꓲꓽ ꓠ ꓟ ꓠꓬ ꓢꓲ ꓫꓬ ꓟ ꓠꓽ ꓕꓲꓽ ꓠꓽ ꓟ ꓗꓪ ꓓꓵꓽ ꓡ ꓟ ꓑꓶ. ꓓꓴ ꓡ ꓠ, ꓟ ꓠꓽ ꓦꓬꓼ ꓠꓬꓲ ꓠꓬ ꓣꓳꓽ ꓢꓯꓼ ꓬꓲꓼ ꓡ ꓑꓮꓲꓽ ꓛꓲ ꓡ ꓟ ꓥꓳ꓿ ꓢꓲ ꓒ ꓬꓰ‐ꓢꓴ 40 ꓦꓬꓽ 40 ꓠꓬꓲ ꓜ ꓚꓲ. ꓚꓲ. ꓟ ꓡꓰ ꓐꓰ ꓣꓳꓽ ꓗ‐ꓔꓳ‐ꓡꓲ ꓐꓴ ꓥˍ ꓟꓲ 40 ꓦꓬꓼ 40 ꓠꓬ ꓜ ꓚꓲ. ꓧꓪꓽ ꓚꓲ. ꓗꓳ. ꓡ ꓟ ꓠꓬ ꓮ ꓟꓶ ꓮ ꓘꓶ. ꓟꓽ ꓟꓶ ꓫꓵ ꓕꓯ ꓠꓬ ꓢꓯ. ꓬꓲꓼ ꓡ ꓑꓮꓲꓽ ꓛꓲ ꓡ ꓓꓴ ꓥꓳ꓿ ꓕꓱ ꓕꓲꓽ ꓠꓽ ꓟ ꓔꓯ ꓠꓬ ꓮ ꓘꓶ. ꓬꓮꓳ ꓚꓲˍ ꓟ ꓢꓲ ꓫꓬ ꓟ ꓕꓲꓽ ꓫꓵꓽ ꓠ ꓐꓯ ꓢꓲ ꓚꓰ, ꓔ ꓟ ꓥꓳ꓿

ꓠꓬꓲ ꓠꓬꓲ ꓟ ꓢꓲ ꓫꓬ ꓕꓳ ꓶ 12ꓽ 10‐11 ꓗꓪ ꓤ ꓟꓶ ꓤ ꓕꓲꓽ ꓣꓳ ꓠꓬ ꓢꓲ ꓒ ꓬꓰ‐ꓢꓴ ꓛꓲ ꓒꓯ ꓗꓪ ꓮ ꓘꓶ. ꓒꓴˍ ꓟ ꓫꓳ ꓠꓱ ꓞꓶ ꓡꓰ ꓟꓰ ꓖꓶꓽ ꓢꓲ ꓠꓬꓲ ꓬꓲ. ꓪꓴ. ꓞꓱ ꓡꓰ ꓫꓵ, ꓖꓶꓽ ꓟ ꓔꓯ ꓣꓳꓽ ꓑ, ꓙ ꓡꓳ꓿

ꓬꓴ‐ꓓ ꓡ ꓞꓳ ꓐꓴ ꓠꓬ ꓞꓳ ꓤ ꓫꓵˍ ꓕꓯ ꓠꓬ ꓕꓱ ꓡꓱ ꓫꓵꓽ ꓫꓳ ꓠꓱ ꓞꓶ ꓟꓰ ꓖꓶꓽ ꓟ ꓡꓰ ꓐꓰ ꓢꓲ ꓒ ꓬꓰ‐ꓢꓴ ꓥˍ ꓟꓲ ꓟꓽ ꓟꓶ ꓫꓵ ꓕꓯ ꓬꓲ. ꓫꓵˍ ꓟ ꓔꓯ ꓟꓳ. ꓖꓶꓽ ꓠ, ꓟ ꓤ ꓟꓶ ꓤ ꓖꓳꓽ ꓕꓲꓽ ꓣꓳ ꓔꓯ ꓢꓲ ꓫꓬ ꓟ ꓦ ꓡꓰ ꓫꓳ ꓠꓱ ꓞꓶ ꓟꓰ, ꓖꓶꓽ ꓠ, ꓟ ꓕꓵꓼ ꓪ ꓖꓶꓽˍ ꓟꓲ ꓥꓳ꓿ ꓢꓯ. ꓬꓲꓼ ꓡ ꓠ, ꓟ ꓠꓬ ꓧꓶ. ꓕꓯ ꓫꓵꓻ ꓪ. ꓡꓳ ꓟꓽ ꓥ ꓡ?

ꓘ ꓡꓲꓳ ꓒ ꓬꓴ‐ꓓ ꓠꓬ ꓤ ꓟꓶ ꓤ ꓔꓯ ꓗꓽ ꓕ ꓠꓲ, ꓫꓵ ꓡꓳ꓿ ꓮ ꓘꓶ. ꓒꓵꓽˍ ꓟ ꓫꓳ ꓠꓱ ꓞꓶ ꓕꓱ ꓟ ꓔꓯ ꓮ ꓫꓵꓽ ꓑꓶ. ꓓꓴ ꓒꓬ, ꓡ? ꓐꓰ ꓐꓯ ꓠꓲ, ꓫꓵ ꓡꓳ꓿ ꓕꓱ ꓟ ꓠꓬ ꓬꓲ. ꓠꓬ ꓒꓴ ꓫꓺ ꓢꓴ ꓕꓲꓽ ꓣꓳ ꓥ ꓢꓲ꓾ ꓒꓴ ꓘꓴꓽ ꓒ ꓥ ꓟ ꓑꓶ. ꓓꓴ ꓒꓴ ꓔꓯ ꓟꓬꓺ ꓠꓯ. ꓟ ꓗꓪ ꓐꓰ ꓥꓳ꓿

ꓠꓬꓲ. ꓠꓬꓲ ꓟ. ꓟꓲꓽ ꓗꓪ ꓐꓰ ꓣꓳꓽ ꓔꓯ ꓟꓳ. ꓖꓶꓽ ꓡ ꓔꓬ, ꓟ ꓠꓬ ꓢꓲ ꓒ ꓬꓰ‐ꓢꓴ ꓐꓱ ꓶ ꓒꓴ ꓣꓱꓽ ꓖꓴ ꓓꓳꓺ ꓡ ꓕꓯ ꓕꓽ ꓙ ꓖꓳꓼ ꓠ, ꓟ꓾ ꓢꓲ ꓒ ꓬꓰ‐ꓢꓴ ꓠꓬ ꓬꓲ. ꓟꓽ ꓟ ꓫꓵ ꓕꓯ ꓫꓵꓻ ꓪ ꓟ ꓑꓶ. ꓓꓴ ꓟꓰ ꓞꓶ ꓟꓰˍ ꓟ ꓘꓳ, ꓟ ꓣꓳꓽ ꓔꓯ ꓢꓷ. ꓡꓰ ꓝꓲˍ ꓟ ꓥꓳ꓿

ꓢꓲ ꓒ ꓬꓰ‐ꓢꓴ ꓢꓯ. ꓬꓲꓼ ꓡ ꓟ ꓑꓮꓲꓽ ꓗꓪ ꓣꓳꓽ ꓐꓴ ꓥˍ ꓟꓲ ꓒꓵꓽ ꓒꓵꓽ ꓡꓰ ꓔ, ꓬꓰ ꓐ, ꓡ ꓠ, ꓟ ꓐꓱ ꓶ ꓣꓳꓽ ꓥˍ ꓟꓲ ꓣꓳꓽ ꓚꓲ. ꓛꓬ ꓗꓪ ꓣꓳꓽ ꓫꓵˍ ꓠ, ꓟ ꓢꓯꓼ ꓕꓵꓼ ꓙꓰ ꓡꓯ꓿