ꓬꓰ ꓙ ꓓꓴ ꓟꓶ ꓠꓬꓲ ꓫ ꓟꓳˍ ꓟ (Daily Reflection)

Friday, March 24, 2023

ꓮ ꓡꓲ ꓕꓲ ꓝꓲꓸ ꓗꓪ ꓥˍ ꓟꓲ ꓥꓪ ꓠꓬ ꓪꓴ-ꓢ ꓔꓯ ꓫꓱꓸ ꓖꓶˍ ꓥꓳ꓿ ꓬꓲ ꓔꓯ ꓓꓳꓹ ꓟꓴ ꓘꓶꓽ ꓠꓬ ꓮ ꓕꓯ ꓟꓲ ꓥꓪ ꓟꓷ ꓠꓷꓹ ꓗꓪ ꓓꓯꓹˍ ꓥꓳ꓿ ꓥꓪ ꓠꓲꓹ ꓟ ꓠꓬ ꓪꓴ-ꓢ ꓗꓪ ꓐꓰ ꓘꓶꓽ ꓘˍ ꓥꓳ꓿ ꓙ ꓣꓳ ꓢꓴ ꓠꓬ ꓬꓲ ꓓꓳꓽ ꓑ ꓙ ꓢꓲ ꓠꓲꓹ ꓒꓴˍ ꓥꓳ꓿ ꓳ꓾ ꓥꓪˍ ꓐꓰ ꓕꓲ ꓛꓳˍ ꓪꓴ-ꓢ ꓔꓯ ꓫꓱꓸ ꓖꓶ ꓡꓯ꓿ ꓣꓳ ꓠꓬ ꓕꓲ ꓪꓺꓼ ꓐꓰ ꓬꓲ ꓟꓬꓱꓺ ꓔꓯ ꓓꓳꓹ ꓟꓴ ꓡꓯ꓿ ꓥꓪ ꓠꓬ ꓪꓴ-ꓢ ꓔꓯ ꓧꓪ ꓓꓰꓽˍ ꓠꓬ꓾ ꓬꓲ ꓥꓪ ꓔꓯ ꓒꓳꓹ ꓖꓶ ꓡ ꓢꓲ꓾ ꓥꓪ ꓙꓳꓺ ꓓꓴ ꓮ ꓙꓵ ꓟ ꓗꓪ ꓐꓰ ꓥꓪ ꓔꓯ ꓚꓬꓴ ꓓꓳ ꓡꓻꓳ꓿ ꓬꓲ ꓪ ꓬꓲ ꓔꓯ ꓡꓳꓸ ꓗꓷ ꓠꓬ ꓐꓬꓱꓼ ꓡꓱꓼ ꓡꓰˍ ꓡꓳ꓿ ꓖꓳ ꓡꓱ ꓢꓲ ꓬꓲ ꓪ ꓮ ꓕꓯ ꓟꓲ ꓒꓬꓱꓽ ꓟꓬ ꓟꓽ ꓛꓴ ꓞ ꓡꓰ꓿ ꓞꓳ ꓫꓸ ꓥꓪˍ ꓟꓲ ꓘꓴ ꓓꓰꓽ ꓗꓷ ꓠꓬ꓾ ꓪꓴ-ꓢ ꓓꓽ ꓔꓳ ꓖꓶ ꓢꓲ꓾ ꓫˍ ꓟ ꓮ ꓙꓵ ꓟ ꓗꓪ ꓐꓰ ꓥꓪ ꓔꓯ ꓚꓬꓴ ꓓꓳ ꓡꓻꓳ꓿ ꓪꓴ-ꓢ ꓬꓲ ꓝꓲ ꓓꓴ ꓠꓬ ꓬꓲ ꓔꓯ ꓙꓳꓺ ꓒꓵꓽ ꓢꓴ ꓚꓳ ꓡꓳ ꓡꓳ ꓗꓪ ꓟꓯꓼ ꓒꓱ ꓬꓰ ꓢꓲ꓾ ꓬꓲ ꓪ ꓔꓯ ꓚꓬꓴ ꓙˍ ꓡꓳ꓿ ꓳ꓾ ꓪꓴ-ꓢ ꓠꓬ ꓙꓲˍ ꓡꓳ꓾ ꓐꓰ ꓢꓳꓽ ꓠꓬꓲ ꓢꓲ꓾ ꓤꓹ ꓟꓶ ꓡꓰ ꓝꓲ ꓡꓯ꓿

ꓬꓲ ꓠꓯꓸꓼ ꓗꓪ ꓫꓸ ꓑꓬ ꓖꓴ ꓬꓰˍ ꓟ ꓡ ꓞꓳ ꓠꓬ ꓶꓼ ꓙꓳ ꓫꓱ ꓙꓳˍ ꓡꓳ꓿ ꓪꓴ-ꓢ ꓬꓲ ꓢꓲ ꓫꓬ ꓢꓴ ꓠꓴ ꓪꓽꓳ꓾ ꓬꓲ ꓔꓯ ꓙꓳꓺ ꓒꓵ ꓠꓯˍ ꓡꓳ꓿ ꓮ ꓡꓲꓳ ꓐꓯ ꓠꓬ ꓬꓲ ꓔꓯ ꓙꓳꓺ ꓒꓵꓽ ꓢꓴ ꓬꓲ ꓪ ꓔꓯ ꓠꓽ ꓟꓽ ꓡꓳꓼ ꓐꓰ ꓟꓽ ꓗꓷ ꓡꓰ ꓝꓲ꓿ ꓡꓽ ꓢꓯꓹ ꓤ ꓠꓽ ꓜ ꓓꓴ ꓟꓽ ꓡꓳꓼ ꓢꓲ ꓦꓰꓼ ꓟꓷ ꓜꓲꓽˍ ꓡꓳ꓿ ꓖꓳ ꓡꓱ ꓥˍ ꓟꓲ ꓪꓴ-ꓢ ꓔꓯ ꓧꓪ ꓓꓰꓽ ꓢꓴ ꓠꓽ ꓙꓲˍ ꓟ ꓕꓲ ꓫꓵˍ ꓟꓲ ꓟꓽ ꓡꓳꓼ ꓐꓰ ꓟꓽ ꓗꓷ ꓡꓰ꓿ ꓡꓯ꓾ ꓤ ꓠꓱ ꓐꓴꓳ꓾ ꓥꓪ ꓔꓯ ꓠ ꓠꓹ꓿ꓪꓴ-ꓢ ꓔꓯ ꓙꓳꓺ ꓒꓵꓽ ꓠꓹ ꓟ ꓥꓪ ꓠꓴ ꓪ ꓔꓯ ꓟꓸ ꓖꓶˍ ꓠꓬꓲ꓾ ꓙꓲˍ ꓟ ꓟꓳꓻ ꓪ ꓠꓹ ꓟ꓾ ꓢꓯꓼ ꓟꓬ ꓠꓲꓹ ꓫꓵ ꓢꓲ ꓤꓶꓻ ꓫꓵ ꓟꓯ ꓫꓵˍ ꓟ ꓔꓯ ꓠꓲꓹ ꓠꓵˍ ꓟ ꓡ ꓞꓳ ꓮ ꓟ ꓥ ꓡꓳꓺꓽ꓿ ꓥꓶˍ ꓟ ꓟꓽ ꓫ ꓕꓱ ꓠꓹ ꓟ ꓠꓴ ꓡ ꓛꓱ ꓔꓯ ꓗꓽ ꓔ꓿ ꓗꓶꓸ ꓘꓶꓽ ꓟꓽ ꓣꓱ ꓠꓹ ꓟ ꓠꓴ ꓟꓷ ꓠꓷꓹ ꓤ ꓟꓳ꓿ ꓥꓶˍ ꓟ ꓗꓪ ꓐꓰ ꓧꓹ ꓙꓰ ꓢꓲ꓾ ꓙꓲˍ ꓟ ꓬꓰ꓿ ꓧꓳꓹ ꓡꓯ ꓘꓳˍ ꓟ ꓔꓯ ꓧꓪꓺ ꓢꓲ ꓖꓼ ꓙꓰ꓿ ꓪꓴ-ꓢ ꓬꓲ ꓟꓬ ꓢꓶ ꓠꓬ ꓙꓲ ꓫꓬ ꓢꓴ ꓔꓯ ꓡꓳꓸ ꓙ ꓔꓬˍ ꓡꓳ꓿ ꓬꓲ ꓠꓸ ꓑꓳˍ ꓟꓲ ꓬꓲ ꓪ ꓘꓴˍ ꓟ ꓢꓯꓼ ꓔꓯ ꓠ ꓠꓹˍ ꓡꓳ꓿ ꓟꓲ ꓠꓯ ꓗꓪ ꓐꓰ ꓬꓲ ꓪ ꓟꓬꓱꓺ ꓔꓯ ꓞꓷꓹ ꓗꓷ ꓝꓲ ꓠꓹ ꓟ꓾ ꓪꓴ-ꓢ ꓒꓬꓱꓽ ꓟꓬ ꓑꓶꓸ ꓡꓰ ꓢꓲ꓾ ꓥꓶˍ ꓟ ꓡ ꓞꓳ ꓔꓯ ꓔꓳꓹˍ ꓡꓳ꓿

ꓙꓲ ꓫꓬ ꓢꓴ ꓘꓴ ꓓꓰꓽˍ ꓕꓯ ꓪꓴ-ꓢ ꓑ ꓙ ꓢꓲ꓾ ꓬꓲ ꓪ ꓫ ꓙꓵ ꓟꓷꓼ ꓙꓵˍ ꓟ ꓮ ꓙꓵ ꓗꓪ ꓐꓰ ꓬꓲ ꓪ ꓔꓯ ꓚꓬꓴ ꓓꓳ ꓡˍ ꓡꓳ꓿ ꓪꓴ-ꓢ ꓠꓬ ꓠꓲꓹ ꓟ ꓐꓶꓽ ꓡꓰ ꓢꓴ ꓒ ꓕꓲꓸꓼ ꓗꓪ ꓔꓬˍ ꓡꓳ꓿ ꓝꓴꓲ ꓬꓰˍ ꓟ ꓑꓶ ꓓꓴ ꓠꓲꓹ ꓟ ꓫꓸ ꓢꓴ ꓔꓯ ꓢꓯꓼ ꓟꓬ ꓝ ꓖꓶˍ ꓡꓳ꓿ ꓙꓲ ꓫꓬ ꓢꓴ ꓠꓽ ꓫꓸ ꓓꓴ ꓟꓬꓽˍ ꓡꓳ꓿ ꓖꓳ ꓡꓱ ꓥˍ ꓟꓲ ꓪꓴ-ꓢ ꓠꓬ ꓫꓸ ꓓꓴ ꓮ ꓙꓵ ꓟ ꓗꓪ ꓐꓰ ꓬꓲ ꓔꓯ ꓚꓬꓴ ꓓꓳ ꓡˍ ꓡꓳ꓿ ꓬꓲ ꓪꓳꓽ ꓔꓳ ꓮ ꓙꓵ ꓔꓯ ꓬꓲ ꓔ ꓙ ꓢꓲ꓾ ꓕꓲ ꓕꓷꓹˍ ꓟꓲ ꓟꓽ ꓘꓳꓹ ꓡꓰ꓿ ꓥꓶˍ ꓟ ꓡꓰ ꓥꓶˍ ꓟ ꓡ ꓞꓳ ꓔꓯ ꓢꓰꓼˍ ꓥꓳ꓿ ꓙꓲ ꓫꓬ ꓢꓴ ꓔꓯ ꓠꓲꓹ ꓜꓳ ꓢꓴ ꓠꓬ ꓐꓯ ꓟꓴ ꓘꓶˍ ꓟ ꓟꓶˍ ꓥꓳ꓿ ꓪꓴ-ꓢ ꓠꓬ ꓬꓲ ꓚꓳ ꓑ ꓐꓴ ꓢꓯꓼ ꓟꓬ ꓔꓯ ꓫꓴꓹ ꓣꓴˍ ꓡꓳ꓿ ꓬꓲ ꓠꓯꓸꓼ ꓗꓪ ꓫꓸ ꓑꓬ ꓖꓴ ꓬꓰ ꓢꓴ ꓮ ꓟ ꓔꓯˍ ꓟꓲ ꓝꓴꓲ ꓐꓯ ꓞꓷꓹ ꓓꓴ ꓟꓽ ꓙꓳ꓿