ꓬꓰ-ꓢꓴ ꓡꓰ ꓬꓳ-ꓦ ꓔꓯ ꓫꓱꓸ ꓖꓶˍ ꓟ

ꓠꓬꓲꓸ ꓠꓬꓲ ꓟ ꓢꓲꓽ ꓫꓬ ꓕꓳ ꓶ (ꓟ-ꓕꓲ=11ꓽ11-15)ꓗꓪ ꓠꓬ ꓢꓲꓺ ꓒ ꓬꓰ-ꓢꓴ ꓡꓰ ꓥꓪ ꓠꓴ ꓪ ꓔꓯ ꓔꓱꓹ ꓔꓱꓹ ꓐꓯ ꓖꓶˍ ꓠꓬꓲ ꓤ ꓟꓶ ꓤ ꓡꓰ ꓦꓵꓻ ꓔ ꓟ ꓗꓪ ꓠꓬ ꓖꓳ ꓓꓱꓽ ꓔꓲꓹ ꓖꓶ ꓢꓴ ꓬꓳ-ꓦ ꓕꓯꓽ ꓢꓲ ꓪꓴꓽˍ ꓟ ꓟꓽ ꓓꓳ ꓡ ꓠꓬꓲ= ꓖꓳ ꓡꓱ ꓥˍ ꓟꓲ ꓟꓴꓽ ꓗꓪ ꓗꓴꓷꓼ ꓠꓯꓸꓼ ꓗꓪ ꓮ ꓘꓶꓸ ꓣꓳˍ ꓟ ꓠꓬ ꓬꓲ ꓕꓯꓽ ꓢꓲ ꓪꓴꓽˍ ꓢꓰꓽ ꓡꓳ꓾ ꓐꓰ ꓐꓯ ꓔ ꓡꓳ=

ꓠꓲꓹ ꓠꓵˍ ꓟ ꓬꓲꓼ ꓤ ꓠꓬꓲ ꓤ ꓐꓴꓳ꓾ ꓖꓳ ꓓꓱꓽ ꓔꓲꓹ ꓒ ꓬꓳ-ꓦ ꓔꓯ ꓠꓬ ꓢꓲꓺ ꓒ ꓬꓰ-ꓢꓴ ꓬꓲ ꓚꓲꓸ ꓛꓬ ꓡꓰ ꓕꓱ ꓘꓶ ꓛꓲꓺ ꓓꓳ ꓟꓴꓹ ꓔ ꓡꓳ= ꓤ ꓟꓶ ꓤ ꓠꓯꓸꓼ ꓗꓪ ꓐꓰ ꓦꓵꓻ ꓡˍ ꓟ ꓮ ꓙꓵꓽ ꓟ ꓕꓯꓽ ꓢꓲ ꓗꓪ ꓠꓬ ꓖꓳ ꓓꓱꓽ ꓔꓲꓹ ꓒ ꓬꓳ-ꓦ ꓠꓬ ꓪꓴꓽ ꓓꓰˍ ꓡꓳ ꓐꓰ ꓐꓯ ꓔ ꓡꓳ= ꓮ ꓫꓵꓽ ꓪꓴꓸ ꓠꓬꓲ ꓥ ꓡ= ꓖꓳ ꓓꓱ ꓔꓲꓹ ꓒ ꓬꓳ-ꓦ ꓠꓬ ꓪꓴ-ꓢ ꓬꓲ ꓟꓷ ꓠꓷꓹ ꓝ ꓒ꓾ ꓬꓲ ꓚꓲ ꓛꓬ ꓖꓳ ꓓꓱꓽ ꓡꓰ ꓔꓱꓹ ꓚꓵˍ ꓟ ꓔꓯ ꓡꓰꓽ ꓠꓲꓹ ꓥꓳ ꓢꓲ ꓪꓴ-ꓢ ꓠꓲꓹ ꓒꓴˍ ꓟ ꓔꓯ ꓡꓰꓽ ꓬꓰ ꓢꓴ꓾ ꓪꓴ-ꓢ ꓙ ꓖꓴ ꓫꓬꓹ ꓔꓱꓹ ꓢꓴ꓾ ꓬꓲ ꓚꓲ ꓛꓬ ꓡꓰ ꓡꓲꓺ ꓛꓲꓺ ꓗꓪ ꓔꓬ ꓢꓲ ꓜꓽ ꓓꓴ ꓝꓲꓸ ꓢꓲ ꓠꓬꓲ ꓪꓽ ꓘꓴ ꓢꓴ ꓖꓳ ꓓꓱ ꓔꓲꓹ ꓒ ꓬꓳ-ꓦ ꓥ ꓡꓳ=

ꓬꓰ-ꓢꓴ ꓬꓲ ꓚꓲꓸ ꓛꓬ ꓡꓰ ꓕꓱ ꓘꓶ ꓛꓲ ꓪꓴꓽ ꓓꓰˍ ꓡꓳ ꓐꓰ ꓓꓳ ꓟꓴꓹ ꓔ ꓟ ꓖꓳ ꓓꓱꓽ ꓔꓲꓹ ꓒ ꓬꓳ-ꓦ ꓡꓲꓸ ꓟꓴꓽ ꓗꓪ ꓗꓴꓷꓼ ꓗꓪ ꓔꓬ ꓢꓴ ꓐꓴ ꓐꓰ ꓔꓯꓺ ꓗꓷ ꓠꓬ ꓟꓴ ꓗꓪ ꓗꓴꓷꓼ ꓗꓪ ꓮ ꓘꓶꓸ ꓣꓳˍ ꓟ ꓕꓲ ꓣꓳ ꓠꓬ ꓖꓳ ꓓꓱ ꓔꓲꓹ ꓒ ꓬꓳ-ꓦ ꓕꓯꓽ ꓢꓲ ꓪꓴꓽˍ ꓡꓳ꓾ ꓐꓰ ꓢꓲꓺ ꓒ ꓬꓰ-ꓢꓴ ꓡꓰ ꓔꓯꓺ ꓥꓳꓽ ꓖꓶˍ ꓡꓳ= ꓠꓲꓹ ꓠꓵˍ ꓟ ꓬꓲꓼ ꓤ ꓠꓬꓲ ꓤ ꓐꓴꓳ꓾ ꓕꓱ ꓟ ꓠꓬ ꓖꓳ ꓓꓱ ꓔꓲꓹ ꓒ ꓬꓳ-ꓦ ꓐꓱ ꓶ ꓟꓴꓽ ꓗꓪ ꓗꓴꓷꓼ ꓠꓬ ꓕꓱ ꓘꓶ ꓛꓲꓺ ꓫꓸ ꓠꓬ ꓣꓳ ꓐꓱ ꓶ ꓠꓽ ꓟꓬꓽ ꓠꓬꓲ ꓫˍ ꓟ ꓥ ꓡꓳ=

ꓢꓲꓺ ꓒ ꓬꓰ-ꓢꓴ ꓡꓰ ꓕꓱ ꓘꓶ ꓛꓲꓺ ꓓꓳ ꓟꓴꓹ ꓔ ꓟ ꓖꓳ ꓓꓱꓽ ꓔꓲꓹ ꓒ ꓬꓳ-ꓦ ꓠꓬ ꓟꓴꓽ ꓗꓪ ꓗꓴꓷꓼ ꓗꓪ ꓔꓬ ꓢꓴ ꓐꓴ ꓐꓰ ꓔꓯꓺ ꓗꓷ ꓕꓯ ꓟꓽ ꓓ ꓣꓳˍ ꓠꓬ꓾ ꓣꓳ ꓠꓽ ꓪ ꓜꓲ ꓣꓳˍ ꓟ ꓥ ꓡꓳ= ꓖꓳ ꓡꓱ ꓠꓬꓲ ꓢꓲꓺ ꓒ ꓬꓰ-ꓢꓴ ꓡꓰ ꓣꓳ ꓔꓯ ꓐꓯ ꓖꓶ ꓡ ꓔꓬ ꓟ ꓠꓬ ꓣꓳ ꓚꓲ ꓛꓬ ꓠꓲꓹ ꓟ ꓡꓰ ꓙ ꓣꓳ ꓢꓲ ꓠꓬꓲ꓾ ꓖꓳ ꓓꓱ ꓔꓲꓹ ꓒ ꓬꓳ-ꓦˍ ꓡꓰ ꓐꓰ ꓧˍ ꓟ ꓔꓱꓹ ꓚꓵˍ ꓟ ꓔꓯ ꓡꓰꓽ ꓧꓪ ꓢꓲ꓾ ꓜꓽ ꓓꓴ ꓝꓲꓸ ꓢꓲ ꓠꓬꓲ ꓪꓴ-ꓢ ꓐꓱ ꓶ ꓔꓱꓹ ꓚꓵˍ ꓟ ꓔꓯ ꓣꓳꓽ ꓧꓪ ꓠꓹ ꓟ ꓥ ꓡꓳ= ꓖꓳ ꓓꓱ ꓔꓲꓹ ꓒ ꓬꓳ-ꓦ ꓡꓰ ꓐꓰ ꓣꓳ ꓙꓲꓻ ꓫꓬꓹ ꓡ= ꓟꓽ ꓙꓲꓻ ꓫꓬ ꓐꓷˍ ꓠꓬ ꓬꓲ ꓡꓰ ꓐꓰ ꓣꓳ ꓛꓳ ꓫꓱꓽ ꓣꓱꓽ ꓬꓰ ꓠ ꓗˍ ꓡꓳ꓾ ꓐꓰ ꓢꓲꓺ ꓒ ꓬꓰ-ꓢꓴ ꓡꓰ ꓣꓳ ꓔꓯ ꓐꓯ ꓖꓶ ꓡ ꓔꓬ ꓡꓳ=

ꓮ ꓟꓶ ꓠꓬ Advent ꓐꓯ ꓟ ꓪꓴ-ꓢ ꓡˍ ꓟ ꓔꓯ ꓥꓳ ꓡꓳꓸ ꓔꓬ ꓟ ꓦꓬꓼ ꓠꓬꓲ ꓥ ꓟ ꓪꓴꓸ ꓠꓬꓲ ꓣꓳ ꓠꓲꓹ ꓟ ꓠꓯꓸꓼ ꓗꓪ ꓙ ꓣꓳ ꓢꓲ ꓓꓵꓽ ꓙ ꓒꓳꓹ ꓬꓲꓼ ꓡ ꓠꓹ ꓟ ꓢꓲꓺ ꓒ ꓬꓰ-ꓢꓴ ꓡꓰ ꓣꓳ ꓔꓯ ꓐꓯ ꓔꓬ ꓟ ꓥ ꓡꓳ= ꓖꓳ ꓓꓱꓽ ꓔꓲꓹ ꓒ ꓬꓳ-ꓦ ꓚꓲ ꓛꓬ ꓡꓰ ꓕꓱ ꓘꓶ ꓛꓲ ꓪꓴꓽ ꓓꓰꓺ ꓡꓰˍ ꓥˍ ꓟꓲ꓾ ꓟꓴꓽ ꓗꓪ ꓗꓴꓷꓼ ꓐꓰ ꓔꓯꓺ ꓗꓷ ꓠꓬ ꓬꓲ ꓠꓬ ꓮ ꓘꓶꓸ ꓣꓳ ꓓꓰꓺ ꓡꓰˍ ꓥꓳ ꓐꓯ ꓠꓬ ꓣꓳ ꓠꓽ ꓪ ꓜꓲ ꓢꓯꓼ ꓕꓵꓼ ꓠ ꓗˍ ꓟ꓾ ꓓꓵꓽ ꓙ ꓒꓳꓹ ꓬꓲꓼ ꓡ ꓠ ꓗˍ ꓟ꓾ ꓢꓲꓺ ꓒ ꓬꓰ-ꓢꓴ ꓡꓰ ꓣꓳꓽ ꓔꓯ ꓔꓯꓺ ꓟꓸ ꓖꓶ ꓡ ꓔꓬ ꓟ ꓥ ꓡꓳ=

ꓠꓲꓹ ꓠꓵˍ ꓟ ꓬꓲꓼ ꓤ ꓠꓬꓲ ꓤ ꓐꓴꓳ꓾ ꓠꓬꓲꓸ ꓠꓬꓲ ꓕꓲ ꓠꓬꓲ ꓡꓰ ꓕꓲ ꓠꓬꓲ ꓣꓳ ꓤꓶꓻ ꓠꓯꓸꓼ ꓗꓪ ꓥˍ ꓟꓲ ꓪꓴ-ꓢ ꓡꓰ ꓣꓳ ꓔꓯ ꓶꓼ ꓓꓳ ꓫꓱꓹ ꓓꓳ ꓐꓯ ꓟꓸ ꓖꓶ ꓡ ꓔꓬ ꓡꓳ= ꓟꓸ ꓟꓲꓽ ꓗꓪ ꓐꓰ ꓐꓯ ꓟꓸ ꓖꓶ ꓡ ꓔꓬ ꓡꓳ= ꓥ ꓠꓬ ꓣꓳꓽ ꓓꓵꓽ ꓙ ꓚꓱꓹ꓾ ꓪꓴ-ꓢ ꓡꓰ ꓠꓬꓲ ꓟꓳ ꓓꓴ ꓣꓴ ꓖꓶ ꓢꓲ ꓠꓬꓲ ꓣꓳ ꓔꓯ ꓓꓵꓽ ꓙ ꓒꓳꓹ ꓬꓲꓼ ꓡ ꓟ ꓐꓯ ꓖꓶ ꓡ ꓔꓬ ꓟ꓾ ꓥ ꓠꓬ꓾ ꓠꓱꓸ ꓐꓯ ꓠꓶꓽ ꓛꓳ ꓕꓲ ꓣꓳ ꓣꓳ ꓗꓪ ꓐꓰ ꓣꓳ ꓔꓯ ꓪꓴ-ꓢ ꓐꓯ ꓘꓶꓽ ꓔꓱꓹ ꓚꓵˍ ꓟ ꓔꓯ ꓐꓯ ꓖꓶ ꓡ ꓔꓬ ꓟˍ ꓟꓲ ꓙꓳˍ ꓡꓳ=

ꓖꓳ ꓟ ꓪꓴꓸ ꓠꓬꓲ ꓪꓴ-ꓢ ꓠꓬ ꓣꓳ ꓔꓯ ꓬꓲ ꓚꓱꓹ ꓮ ꓟꓬꓹ ꓗꓪ ꓐꓰ ꓣꓳ ꓔꓯ ꓓꓵꓽ ꓙ ꓒꓳꓹ ꓬꓲꓼ ꓡ ꓓꓴ꓾ ꓟꓸ ꓖꓶ ꓓꓴ ꓙꓳˍ ꓓꓰꓽ ꓡꓳ= ꓕꓱ ꓟ ꓣꓳ ꓡꓳꓸ ꓢꓲ ꓠꓬꓲ ꓣꓳ ꓓꓵꓽ ꓙ ꓒꓳꓹ ꓬꓲꓼ ꓡˍ ꓥꓳ ꓐꓯ ꓠꓬ꓾ ꓕꓱ ꓟ ꓠꓬ ꓡ ꓠꓹ ꓟ ꓘ-ꓣꓲ-ꓢ-ꓟꓮ ꓥ ꓠꓬ꓾ ꓪꓴ-ꓢ ꓣꓳ ꓠꓲꓹ ꓟ ꓠꓯꓸꓼ ꓗꓪ ꓓꓵꓽ ꓡ ꓠꓹ ꓟ ꓙ ꓖꓴ ꓫꓬꓹ ꓦꓲꓸ ꓔꓬ ꓟ ꓥ ꓡꓳ=

ꓖꓳ ꓓꓱꓽ ꓔꓲꓹ ꓒ ꓬꓳ-ꓦˍ ꓡꓰ ꓐꓰ ꓔꓱꓹ ꓚꓵˍ ꓟ ꓙꓲꓻ ꓫꓬ ꓢꓴ ꓕꓲ ꓣꓳ ꓒꓬꓱꓼ ꓡ ꓘꓴ ꓠꓹ ꓟ ꓣꓳ ꓢꓯꓼ ꓕꓵꓼ ꓙꓰ ꓡꓯ= ꓖꓳ ꓡꓱ ꓟꓽ ꓥ ꓠꓬ ꓟꓴꓽ ꓗꓪ ꓗꓴꓷꓼ ꓠꓬ ꓣꓳ ꓐꓰ ꓶ ꓤ ꓗꓷ ꓡꓰˍ ꓟ ꓥ ꓡꓳ=

Add new comment

9 + 3 =