ꓚꓴꓡꓔꓴꓣꓰ ꓪꓮꓦꓰ ꓐꓯ_ ꓟ ꓮ ꓫꓵ ꓥ ꓡ꓾

ꓚꓴꓡꓔꓴꓣꓰ ꓪꓮꓦꓰ ꓐꓯ_ ꓟ ꓮ ꓫꓵ ꓥ ꓡ꓾ ꓡꓲꓽ ꓒꓰꓼ ꓚꓱꓹ ꓕꓱ ꓟ ꓠꓬ꓾ ꓬꓲꓻ ꓙꓬ ꓡꓰ ꓐꓰ ꓟꓲꓽ ꓦꓲꓻ ꓡꓰ ꓐꓰ ꓬꓲ ꓙꓱ ꓬꓲꓸ ꓙꓱ ꓓ_ ꓫꓵ ꓥ ꓡꓳ꓾ ꓔꓯ ꓥꓳꓽ ꓐꓯ ꓠꓬ꓾ ꓬꓲꓻ ꓙꓬ ꓕꓲ ꓟ ꓙꓵꓽ ꓡ ꓕꓯ ꓬꓲ ꓙꓬ ꓬꓲ ꓚꓱꓹ ꓖꓳ ꓟ ꓕꓲ ꓚꓱꓹ ꓐꓰ ꓕꓲ ꓚꓱꓹ ꓡ_ ꓟ ꓡꓰ ꓐꓰ ꓟꓲꓽ ꓦꓲꓻ ꓓꓽ ꓟ ꓙꓱꓼ ꓡ ꓕꓯ ꓟꓲꓽ ꓦꓲ ꓬꓲ ꓚꓱꓹ ꓖꓳ ꓟ ꓠꓬ ꓕꓲ ꓚꓱꓹ ꓑꓶꓸ ꓕꓲ ꓚꓱꓹ ꓕꓱ ꓡꓱ ꓐꓰ ꓡ_ ꓟ ꓔꓯ ꓣꓳ ꓢꓷꓸ ꓪ ꓡꓳ= ꓕꓱ ꓟ ꓡꓰ ꓐꓰ ꓡꓲꓽ ꓒꓰꓼ ꓥ ꓟꓲ ꓪꓴꓽ ꓡ ꓕꓯ ꓞꓳ ꓫꓵ ꓕꓲ ꓫꓵ ꓬꓲ ꓡꓲꓽ ꓒꓰꓼ ꓪꓴꓽ ꓡ ꓕꓯ ꓟꓳ ꓡ ꓕꓯ ꓠꓱꓸ ꓐꓯꓼ ꓞꓳ ꓫꓵ ꓔꓯ ꓐꓲꓸ ꓔꓲꓸ ꓗꓷ_ ꓟ ꓬꓲꓻ ꓙꓬ ꓚꓱꓹ ꓡꓰ ꓐꓰ ꓡꓲꓽ ꓒꓰꓼ ꓞ ꓞ ꓐꓴ ꓔꓯ ꓠꓬꓲꓸ ꓔꓲꓸ ꓗꓷ_ ꓟ ꓬꓲ ꓡꓲꓽ ꓕꓲ ꓡꓱ ꓙꓳ_ ꓡꓳ= ꓖꓳ ꓡꓱ ꓠꓬꓲ ꓬꓲꓼ ꓤ ꓠꓬꓲ ꓤ ꓐꓴꓳ꓾ ꓡꓲꓽ ꓒꓰꓼ ꓚꓱꓹ ꓕꓲ ꓟ ꓠꓯꓼ ꓘꓴ ꓗꓪ ꓡꓲꓽ ꓒꓰꓼ ꓞ ꓞ ꓐꓴ ꓞꓳ ꓫꓵ ꓞ ꓞ ꓐꓴ ꓕꓷ ꓞꓸ ꓠꓹ ꓟ ꓟꓽ ꓡꓵ ꓡꓰ ꓠꓹ ꓟ ꓬꓲ ꓚꓰꓻ ꓟꓽ ꓑꓶ ꓙꓰ ꓠꓹ ꓟ ꓣꓳ ꓢꓯꓼ ꓕꓵꓼ ꓠ ꓔ ꓡꓳ= ꓣꓳ ꓡꓲ-ꓢꓴ ꓫꓵ ꓥ ꓟꓲ ꓞꓳ ꓫꓵ ꓞ ꓞ ꓘꓴꓽ ꓗꓪ ꓐꓰ ꓣꓳ ꓫꓵ ꓣꓳ ꓥꓳꓽ ꓔꓯ ꓟꓽ ꓒꓰꓼ ꓡꓰ ꓠꓹ ꓟ ꓠꓬ ꓣꓳꓸ ꓚꓵ ꓓꓰ ꓡꓰ_ ꓟ ꓥꓳ=

ꓖꓳ ꓡꓱ ꓠꓬꓲ ꓣꓳ ꓕꓲ ꓠꓬꓲ ꓡꓲ ꓕꓲ ꓠꓬꓲ ꓞꓳ ꓙꓳ ꓔꓬ ꓟ ꓦꓬꓼ ꓠꓬꓲ ꓗꓪ ꓚꓴꓡꓔꓴꓣꓰ ꓪꓮꓦꓰ ꓐꓯ_ ꓟ ꓡꓲꓽ ꓒꓰꓼ ꓬꓲ ꓚꓱꓹ ꓕꓱ ꓟ ꓕꓲ ꓠꓬꓲ ꓡꓲ ꓕꓲ ꓠꓬꓲ ꓣꓳ ꓔꓯ ꓙꓴ ꓡ ꓕꓯ ꓣꓳ ꓔꓬ ꓟ ꓦꓲꓻ ꓘꓴꓽ ꓗꓪ ꓐꓵ ꓓꓵ ꓡ ꓕꓯ ꓚꓲ ꓛꓬ ꓡꓲꓽ ꓒꓰꓼ ꓚꓲ ꓛꓬ ꓫꓵ ꓔꓯ ꓬꓲ ꓚꓰꓻ ꓟꓽ ꓑꓶ ꓙꓰ ꓠꓹ ꓟ ꓪꓳ ꓔ ꓠꓹ ꓟ ꓣꓳꓸ ꓚꓵ ꓓꓰ ꓡꓰ ꓟ ꓥ ꓡꓳ= ꓖꓳ ꓡꓱ ꓠꓬꓲ ꓕꓱ ꓟ ꓔꓯ ꓣꓳ ꓗꓽ ꓕ ꓠꓹ ꓟ ꓐꓱ ꓶ ꓠꓴ ꓠꓬ ꓚꓲ ꓛꓬ ꓥꓳꓽ ꓔꓯ ꓫꓸ ꓕꓱ ꓗꓴꓸ ꓠꓹ ꓟ ꓚꓲ ꓛꓬ ꓕꓳ ꓶ ꓔꓯ ꓢꓷꓸ ꓠꓹ ꓟ ꓢꓯꓼ ꓕꓵꓼ꓾ ꓚꓲ ꓛꓬ ꓡꓲꓽ ꓒꓰꓼ ꓔꓯ ꓚꓲ ꓛꓬ ꓖꓪ ꓫꓵ ꓖꓪ ꓙꓰ ꓔꓯ ꓥ ꓟꓲ ꓕꓽ ꓫꓸ ꓔꓳ꓾ ꓕꓱ ꓡꓱ ꓐꓰ ꓬꓰ ꓠꓬ ꓣꓳ ꓠꓬ ꓕꓲ ꓝꓸ ꓑꓶꓸ ꓕꓲ ꓝꓸ ꓡꓲ-ꓢꓴ ꓫꓵ ꓠꓬ ꓕꓶ ꓞꓸ ꓔꓬ ꓥꓳ꓾ ꓟꓽ ꓥ ꓠꓬ ꓣꓳ ꓠꓬ ꓚꓲ ꓛꓬ ꓥꓳꓽ ꓔꓯ ꓫꓸ ꓕꓱ ꓟ ꓚꓲ ꓛꓬ ꓶ ꓖꓪꓼ ꓔꓯ ꓫꓸ ꓔꓳ ꓔꓬ ꓥꓳ ꓐꓰ ꓚꓱꓹ ꓕꓱ ꓟ ꓠꓯꓼ ꓗꓪ ꓣꓳ ꓠꓬ ꓑꓲꓸ ꓔꓲ ꓬꓰ ꓢꓲ ꓟꓽ ꓟꓶ ꓫꓵ ꓠꓬ ꓣꓳ ꓫꓵ ꓠꓬ ꓟꓶꓽ ꓡꓰ ꓠꓹ ꓟ ꓬꓲ ꓚꓰꓻ ꓗꓷ ꓔꓬ ꓥꓳ=

ꓖꓳ ꓡꓱ ꓠꓬꓲ ꓬꓲꓼ ꓤ ꓠꓬꓲ ꓤ ꓐꓴꓳ꓾ ꓚꓲ ꓛꓬ ꓫꓵ ꓔꓯ ꓠꓲꓹ ꓠꓵꓻ ꓕꓯ ꓚꓲ ꓛꓬ ꓥꓳꓽ ꓔꓯ ꓠꓲꓹ ꓠꓵꓻ ꓕꓯ ꓫꓸ ꓕꓱ ꓚꓲ ꓛꓬ ꓶ ꓖꓪꓼ ꓔꓯ ꓖꓪ ꓖꓳ ꓡꓱ ꓬꓰ ꓠꓬ ꓮ ꓡꓰ ꓘꓶꓸ ꓪꓴꓽ_ ꓫꓵ ꓟꓲꓽ ꓦꓲ ꓓꓽ ꓟ ꓔꓯ ꓥ ꓟꓲ ꓣꓳ ꓠꓬ ꓗꓳꓸ ꓙꓰ ꓐ ꓡ ꓥꓳ꓾