ꓪꓴ-ꓢ ꓠꓬ ꓞꓳ ꓤ ꓡꓲꓽ ꓒꓰꓼ ꓔꓯ ꓮ ꓡꓰ ꓐꓰ ꓚꓬꓹ ꓔ ꓖꓶ ꓡ꓾

Tuesday, May 07, 2024

ꓪꓴ-ꓢ ꓠꓬ ꓞꓳ ꓤ ꓡꓲꓽ ꓒꓰꓼ ꓔꓯ ꓮ ꓡꓰ ꓐꓰ ꓚꓬꓹ ꓔ ꓖꓶ ꓡ꓾ ꓮ ꓡꓰ ꓐꓰ ꓒꓵ ꓗꓹ ꓬꓰ ꓟ ꓔꓯ ꓠ ꓠ ꓹ ꓡꓯ꓾ ꓪꓴ-ꓢ ꓠꓬ ꓟꓲ ꓠꓯ ꓕꓱ ꓟ ꓗꓪ ꓞꓳ ꓫꓵ ꓞꓳ ꓙꓰ ꓮ ꓟꓬꓹ ꓔꓯ ꓚꓰꓼ ꓔ ꓡꓳ꓾ ꓟꓽ ꓪ ꓡꓯꓽ ꓘꓳ꓾ ꓟꓽ ꓫꓱꓹ ꓡꓯꓽ ꓘꓳ ꓟ ꓞꓳ ꓫꓵ ꓞꓳ ꓙꓰ ꓮ ꓟꓬꓹ ꓙꓳ_ ꓡꓳ꓾ ꓕꓱ ꓡꓱ ꓐꓰ ꓥꓳꓽ ꓫꓵ ꓥꓳꓽ ꓙꓰ꓾ ꓞꓳ ꓫꓵ ꓞꓳ ꓙꓰ ꓟꓽ ꓪ ꓡꓯꓽ ꓘꓳ꓾ ꓟꓽ ꓫꓱꓹ ꓡꓯ ꓘꓳ ꓟ ꓗꓪ ꓐꓰ ꓡꓲꓽ ꓒꓰꓼ ꓥ ꓟꓲ ꓟꓽ ꓪ ꓟꓽ ꓫꓱꓹ ꓡꓯꓽ ꓘꓳ꓾ ꓞꓳ ꓫꓵ ꓕꓲ ꓫꓵ ꓠꓬ ꓡꓲꓽ ꓒꓰꓼ ꓕꓲꓽ ꓟ ꓕꓱ ꓡꓱ ꓐꓰ ꓙꓳ_ ꓡꓳ= ꓠꓱꓸ ꓐꓯꓼ ꓔꓯ ꓟꓽ ꓪ ꓫꓵ ꓕꓱ ꓡꓱ ꓙꓳ_ ꓡꓳ꓾ ꓖꓳ ꓡꓱ ꓠꓬꓲ ꓪꓴ-ꓢ ꓠꓬ ꓡꓲꓽ ꓒꓰꓼ ꓕꓱ ꓟ ꓔꓯ ꓮ ꓡꓰ ꓐꓰ ꓬꓲ ꓕꓱ ꓡꓱ ꓐꓰ ꓚꓬꓹ ꓔ ꓖꓶ ꓡ ꓐꓰ ꓐꓯ ꓠꓬ꓾ ꓙꓲ_ ꓟ ꓔꓯ ꓠꓬ ꓬꓲ ꓒꓵꓽ ꓗꓹ ꓚꓰꓹ ꓖꓶ_ ꓡꓳ꓾ ꓐꓯ ꓟ ꓣꓳ ꓡꓳꓸ ꓟꓳ ꓪ ꓡꓳ꓾ ꓮ ꓡꓰ ꓐꓰ ꓡꓳꓸ ꓟꓳ ꓡ ꓐꓯ ꓠꓬ ꓢꓲꓺ ꓒ ꓬꓰ-ꓢꓴ ꓬꓲ ꓟꓲ ꓠꓯ ꓗꓪ ꓒꓬꓱꓽ ꓟꓳ ꓡ ꓕꓯ ꓬꓴ-ꓓ ꓡ ꓞꓳ ꓡꓲꓽ ꓗꓪ ꓬꓲ ꓠꓬ ꓒꓬꓱꓽ ꓟꓳ ꓡ ꓡꓳ꓾ ꓬꓴ-ꓓ ꓡ ꓞꓳ ꓕꓲ ꓣꓳ ꓡꓲꓽ ꓒꓰꓼ ꓔꓯ ꓬꓲ ꓠꓬ ꓖꓼ ꓛꓳ_ ꓡꓳ= ꓬꓴ-ꓓ ꓐꓴ ꓡꓲꓽ ꓒꓰꓼ ꓮ ꓡꓰ ꓥ ꓠꓬ ꓮ ꓡꓰ ꓬꓲ ꓖꓼ ꓛꓳ_ ꓡꓳ= ꓖꓳ ꓡꓱ ꓐꓯ ꓥ ꓟꓲ ꓟꓴ ꓗꓪ ꓗꓪ ꓐꓰ ꓪꓴ-ꓢ ꓬꓲ ꓶꓼ ꓓꓳ ꓫꓱꓸ ꓓꓳ ꓥ ꓟ ꓢꓲꓺ ꓒ ꓬꓰ-ꓢꓴ ꓠꓬ ꓪꓴ-ꓢ ꓡꓲꓽ ꓒꓰꓼ ꓔꓯ ꓞꓳ ꓫꓵ ꓡꓲꓽ ꓒꓰꓼ ꓠꓯꓼ ꓗꓪ ꓬꓲ ꓠꓬ ꓔꓶꓻ ꓗꓷ_ ꓡꓳ= ꓕꓱ ꓟ ꓠꓬ ꓮ ꓘꓶꓸ ꓣꓳꓸ ꓚꓵ ꓓꓰ ꓡꓰ_ ꓟ ꓥꓳ=

ꓬꓲꓼ ꓤ ꓠꓬꓲ ꓤ ꓐꓴꓳ꓾ ꓮ ꓠꓱ ꓕꓯ ꓡꓰ ꓙꓳ_ ꓟ ꓬꓴ-ꓓ ꓡꓲꓽ ꓒꓰꓼ ꓠꓬ ꓢꓲꓺ ꓒ ꓬꓰ-ꓢꓴ ꓬꓯꓼ ꓡ ꓗꓸ ꓠꓯꓸ ꓪꓴ-ꓢ ꓡꓲꓽ ꓒꓰꓼ ꓐꓰ ꓟꓽ ꓪ ꓟ꓾ ꓕꓲ ꓚꓱꓹ ꓐꓯ ꓠꓬ ꓶꓼ ꓓꓳ ꓫꓱꓸ ꓓꓳ ꓐꓰ ꓟꓽ ꓪ ꓟ ꓔꓯ ꓬꓲ ꓮ ꓙꓵ ꓒꓬꓹ ꓧꓶ ꓗꓷ_ ꓡꓳ= ꓖꓳ ꓡꓱ ꓠꓬꓲ ꓢꓲꓺ ꓒ ꓬꓰ-ꓢꓴ ꓠꓬ ꓬꓲ ꓶꓼ ꓓꓳ ꓫꓱꓸ ꓓꓳ ꓥ ꓟ ꓞꓳ ꓤ ꓔꓯ ꓧꓪ ꓖꓳ ꓓꓱ ꓠꓲꓹ ꓟ ꓢꓲ ꓫꓬ ꓡꓰ ꓝꓲ_ ꓟ꓾ ꓶꓼ ꓓꓳ ꓫꓱꓸ ꓓꓳ ꓕꓱ ꓟ ꓬꓴ-ꓓ ꓡꓲꓽ ꓒꓰꓼ ꓗꓪ ꓓꓵ ꓬꓰ ꓠꓹ ꓟ ꓬꓲ ꓢꓯꓼ ꓕꓵꓼ_ ꓡꓳ= ꓖꓳ ꓡꓱ ꓠꓬꓲ ꓢꓲꓺ ꓒ ꓬꓰ-ꓢꓴ ꓠꓬ ꓡꓲꓽ ꓒꓰꓼ ꓔꓯ ꓟꓽ ꓠꓲꓹ ꓜꓳ ꓖꓳ ꓡꓱ ꓐꓯ ꓥ ꓟꓲ ꓡꓲꓽ ꓒꓰꓼ ꓘꓴꓽ ꓗꓪ ꓓꓵ_ ꓟ ꓞꓳ ꓤ ꓠꓲꓹ ꓟ ꓔꓯ ꓟꓽ ꓢꓲ ꓫꓬ ꓡꓰ ꓝꓲ_ ꓟ꓾ ꓡꓲꓽ ꓒꓰꓼ ꓚꓱꓹ ꓮ ꓙꓵ ꓔꓯ ꓠꓬ ꓬꓲ ꓠꓬ ꓫꓬꓹ ꓔꓶꓻ ꓗꓷ_ ꓡꓳ=

ꓖꓳ ꓡꓱ ꓠꓬꓲ ꓠꓬꓲꓸ ꓠꓬꓲ ꓬꓲꓼ ꓤ ꓠꓬꓲ ꓤ ꓐꓴꓳ꓾ ꓣꓳ ꓡꓲ-ꓢꓴ ꓫꓵ ꓔꓯ ꓥ ꓟꓲ ꓡꓲꓽ ꓒꓰꓼ ꓙꓳ_ ꓡꓳ= ꓣꓳ ꓡꓲꓽ ꓒꓰꓼ ꓘꓴꓽ ꓗꓪ ꓣꓳ ꓡꓲꓽ ꓒꓰꓼ ꓔꓯ ꓢꓲꓺ ꓒ ꓬꓰ-ꓢꓴ ꓥ ꓟꓲ ꓠꓲꓹ ꓠꓵꓻ_ ꓡꓳ= ꓖꓳ ꓡꓱ ꓠꓬꓲ ꓣꓳ ꓡꓲꓽ ꓒꓰꓼ ꓘꓴꓽ ꓗꓪ ꓢꓲꓺ ꓒ ꓬꓰ-ꓢꓴ ꓬꓲ ꓶꓼ ꓓꓳ ꓫꓱꓸ ꓓꓳ ꓮ ꓡꓰ ꓐꓰ ꓓꓵ ꓡ ꓠꓹ ꓟ꓾ ꓢꓲꓺ ꓒ ꓬꓰ-ꓢꓴ ꓬꓲ ꓶꓼ ꓓꓳ ꓫꓱꓸ ꓓꓳ ꓗꓪ ꓐꓰ ꓮ ꓡꓰ ꓐꓰ ꓪꓴ ꓡ ꓟꓴ ꓡ ꓠꓹ ꓟ ꓠꓬ ꓣꓳ ꓢꓯꓼ ꓕꓵꓼ ꓠ ꓗꓹ ꓡꓳ= ꓣꓳ ꓬꓰ ꓚꓱꓹ ꓣꓳ ꓡꓲꓽ ꓒꓰꓼ ꓮ ꓙꓵ ꓗꓪ ꓪꓴ-ꓢ ꓶꓼ ꓓꓳ ꓫꓱꓸ ꓓꓳ ꓔꓯ ꓘꓳꓹ ꓣꓴ ꓐ ꓡ ꓠꓹ ꓟ ꓐꓱ ꓶ ꓬꓴ-ꓓ ꓡꓲꓽ ꓒꓰꓼ ꓘꓴꓽ ꓗꓪ ꓢꓲꓺ ꓒ ꓬꓰ-ꓢꓴ ꓬꓲ ꓶꓼ ꓓꓳ ꓫꓱꓸ ꓓꓳ ꓓꓵ ꓙꓰ ꓗꓸ ꓠꓯꓸ ꓢꓲꓺ ꓒ ꓬꓰ-ꓢꓴ ꓔꓯ ꓙꓵꓻ ꓢꓴ ꓬꓴ-ꓓ ꓡꓲꓽ ꓒꓰꓼ ꓠꓬ ꓕꓱ ꓡꓱ ꓐꓰ ꓒꓳꓹ ꓡꓶꓸ ꓡ ꓟ ꓡꓰ ꓐꓰ ꓣꓳ ꓡꓲ-ꓢꓴ ꓫꓵ ꓬꓲꓼ ꓤ ꓠꓬꓲ ꓤ ꓐꓴ ꓥ ꓟꓲ ꓢꓲꓺ ꓒ ꓬꓰ-ꓢꓴ ꓔꓯ ꓢꓷꓸ ꓡꓰ ꓗꓸ ꓠꓯꓸ ꓢꓲꓺ ꓒ ꓬꓰ-ꓢꓴ ꓬꓲ ꓡꓲꓽ ꓒꓰꓼ ꓥ ꓟ ꓶꓼ ꓓꓳ ꓫꓱꓸ ꓓꓳ ꓕꓱ ꓟ ꓝꓴꓲ ꓗꓪ ꓐꓰ ꓢꓲ ꓫꓬ ꓖꓶ_ ꓟ꓾ ꓡꓲꓽ ꓒꓰꓼ ꓕꓱ ꓟ ꓔꓯ ꓣꓳ ꓚꓲ ꓛꓬ ꓡꓲꓽ ꓒꓰꓼ ꓘꓴꓽ ꓗꓪ ꓮ ꓡꓰ ꓐꓰ ꓘꓳꓹ ꓣꓴ ꓢꓲ ꓠꓬꓲ ꓣꓳ ꓡꓲꓽ ꓒꓰꓼ ꓔꓯ ꓮ ꓡꓰ ꓐꓰ ꓢꓲ ꓫꓬ ꓡꓰ ꓝꓲ ꓠ ꓐꓯ ꓟ ꓠꓬ ꓣꓳ ꓠꓬꓲꓸ ꓠꓬꓲ ꓓꓵꓽ ꓙ ꓓꓴ ꓥ ꓡꓳ=

Add new comment

11 + 6 =

Quick Links