ꓔꓲꓺ ꓒ ꓓꓽ Cardinal Charles Bo ꓡꓰ ꓢꓯꓸ ꓬꓲꓼ ꓡ ꓑꓮꓲꓽ ꓦꓬꓼ ꓠꓬꓲ ꓐꓱ ꓶ ꓶꓼ ꓓꓳꓽ ꓫꓱꓹ ꓓꓳꓽ ꓘꓶꓽ ꓖꓶꓽ ꓩꓴ ꓡꓻˍ ꓟ

ꓮ ꓟꓴꓸ ꓟꓴꓻ ꓗꓪ ꓡꓳꓸ ꓔ ꓢꓲ꓾ ꓥꓳ ꓡꓳˍ ꓟ ꓐꓰ ꓕꓲꓽ ꓪ “ ꓮ-ꓡꓰ-ꓡꓴ-ꓬ꓾ ꓬꓰ-ꓢꓴ ꓠꓬ ꓚꓵꓺ ꓚꓵꓺ ꓢꓯꓸ ꓬꓲꓼ ꓡꓻꓳ”꓾ ꓐꓰ ꓘꓴ ꓔꓴꓺ ꓡꓯ=

ꓬꓰ-ꓢꓴ ꓠꓯꓸꓼ ꓗꓪ ꓠꓲꓹ ꓠꓵˍ ꓟ ꓬꓲꓼ ꓤ ꓠꓬꓲ ꓤ ꓐꓴ ꓔꓯ ꓗꓹ ꓛꓲˍ ꓟ ꓢꓯꓸ ꓬꓲꓼ ꓡ ꓑꓮꓲꓽ ꓧꓮꓑꓑꓬ ꓰꓮꓢꓔꓰꓣ ꓐꓯ ꓢꓲ꓾ ꓧꓪꓸ ꓧꓪꓸꓼ ꓐꓯ ꓩꓴ ꓡˍ ꓥꓳ=

ꓢꓯꓸ ꓬꓲꓼ ꓡ ꓗꓷ ꓟ ꓬꓰ-ꓢꓴ ꓔꓯ ꓥꓳ ꓡꓳꓸ ꓓꓴ ꓠꓬ ꓟꓲꓽ ꓕꓯ ꓢꓲꓺ ꓟ ꓣꓳ ꓙ ꓖꓴ ꓗꓪ ꓡꓬꓸ ꓔꓬ ꓝꓲ= ꓗꓹ ꓛꓲ ꓠꓲꓹ ꓡꓰ “ꓮ-ꓡꓰ-ꓡꓴ-ꓬ ꓬꓰ-ꓢꓴ ꓠꓬ ꓢꓯꓸ ꓬꓲꓼ ꓡˍ ꓳ ” ꓐꓰ ꓐꓯ ꓡꓯ=ꓢꓯꓸ ꓬꓲꓼ ꓡˍ ꓟ ꓠꓬ ꓣꓳ ꓙꓵꓻ ꓠꓲꓹ ꓥ ꓡꓳ꓾ ꓣꓳ ꓥꓳ ꓡꓳꓸ ꓓꓴ ꓥ ꓡꓳ= 2020 ꓘꓳꓼ ꓗꓪ ꓠꓬ ꓣꓳ ꓐꓴ ꓥꓳ ꓡꓳꓸ ꓓꓴ ꓐꓰ ꓙꓵꓻ ꓠꓲꓹ ꓔꓯ ꓟꓬꓽ ꓠꓬꓲ ꓣꓱꓽ ꓞꓹ ꓡꓳ=

ꓥ ꓡꓳ꓾ ꓟ ꓟꓶ ꓠꓬ ꓠꓯꓺ ꓞꓲꓹ ꓟ ꓬꓲꓸ ꓙꓵꓹ ꓥ ꓟ ꓮ ꓘꓶꓸ ꓙꓳꓻ ꓛꓱꓽ ꓓꓴ ꓙꓳˍ ꓟ ꓟꓴ ꓗꓴꓸ ꓠꓬ ꓞꓳ ꓤ ꓮ ꓙꓵꓽ ꓡꓱꓸꓼ ꓔꓯ ꓪꓸ ꓔ ꓡꓳ꓾ ꓑꓲꓸ ꓔ ꓡꓳ= ꓙꓲꓻ ꓫꓬ ꓢꓴ ꓙꓳꓧꓠ ꓳꓝ ꓔꓧꓰ ꓚꓣꓳꓢꓢ ꓡꓰ ꓔꓳꓹ ꓜꓳꓽ ꓗꓳꓸ ꓗꓷ ꓟ ꓠꓯꓺ ꓞꓲꓹ ꓟ_ ꓡꓰ ꓐꓰ ꓾ ꓞꓳ ꓤ ꓕꓲꓽ ꓟ ꓡꓱꓸꓼ ꓥꓳ ꓡꓳꓸ ꓓꓴ ꓠꓬ ꓚꓳꓦꓲꓓ-19 ꓐꓰ ꓟꓬꓱꓺ ꓔ ꓟ ꓠꓻ ꓗꓪ ꓐꓰ ꓡˍ ꓟ ꓥꓳ ꓡꓳꓸ ꓓꓴ ꓟꓽ ꓙꓳ ꓠꓯꓺ ꓞꓲꓹ ꓟ ꓗꓪ ꓓꓵꓽ ꓙꓰ ꓪ ꓡꓰꓳ= ꓕꓱ ꓟ ꓠꓬ ꓮ ꓘꓶꓸ ꓫꓸ ꓟ ꓬꓲꓸ ꓙꓵꓹ꓾ ꓗꓳꓸ ꓡˍ ꓟ ꓡꓰ ꓟꓽ ꓥ ꓟ ꓬꓲꓸ ꓙꓵꓹ ꓥ ꓡꓳ= ꓦꓬꓼ ꓠꓬꓲ ꓕꓱ ꓟ ꓠꓬ ꓣꓳ ꓐꓴ ꓕꓶꓻ ꓞꓹ ꓟ꓾ ꓟꓲꓽ ꓕꓯꓽ ꓢꓲꓺ ꓐꓱ ꓶ ꓥꓳ ꓡꓳꓸ ꓓꓴ꓾ꓪꓴ-ꓢ ꓔꓯ ꓟꓳꓸ ꓙꓵꓻ ꓠꓲꓹ ꓐꓰ꓾ ꓙꓵꓻ ꓠꓲꓹ ꓕꓯꓽ ꓢꓲꓺ ꓗꓪ ꓗꓳꓸ ꓘꓳ ꓙꓰˍ ꓟ ꓙꓵꓻ ꓠꓲꓹ ꓦꓬꓼ ꓠꓬꓲ ꓥ ꓡꓳ= ꓟꓲꓺ ꓠꓯꓺ ꓗꓪ ꓞꓳꓻ ꓤ ꓕꓲꓽ ꓐꓶꓻ ꓛꓲ ꓠꓬ ꓠꓻ ꓗꓪ ꓐꓰ ꓫꓸ ꓙꓵ ꓔꓬꓹ ꓢꓲ꓾ ꓞꓳ ꓤ 22000 ꓟꓽ ꓛꓲꓺ ꓫꓵꓻ ꓗꓷ ꓢꓲ ꓠꓬꓲ꓾ ꓗꓴꓷꓼ 200 ꓐꓴ ꓠꓬ ꓠꓻ ꓫꓵꓽ ꓔꓯ ꓘꓳꓹ ꓣꓴ ꓔꓬꓹ ꓪˍ ꓡꓳ=ꓲ-ꓔ-ꓡꓲ ꓗꓪ ꓞꓳ ꓠꓻ ꓐꓴ ꓔꓯ ꓗꓪꓼ ꓫꓵꓼ ꓢꓴ ꓔꓲꓺ ꓒ 63 ꓣꓳ ꓐꓰ ꓠꓻ ꓫꓬꓹ ꓖꓶꓽ ꓢꓴ ꓠꓯꓺ ꓞꓲꓼ ꓟꓸ ꓒ ꓓꓳꓚꓔꓳꓣ 20 ꓣꓳ ꓟꓽ ꓛꓲꓺ ꓫꓵꓻ ꓗꓷ ꓟ ꓥ ꓡꓳ=Apocalypse ꓬꓲꓸ ꓮꓸ ꓟꓳꓽ ꓜꓶꓽ ꓒ ꓽ ꓓꓽ ꓒ 4 ꓣꓳ ꓛꓲꓺ ꓡ ꓗꓷ ꓟˍ ꓡꓰ ꓐꓰ ꓥꓳ=

ꓣꓳꓽ ꓠꓬ ꓗꓹ ꓛꓲ ꓠꓲꓹ ꓡꓰ “ ꓬꓰ-ꓢꓴ ꓠꓬ ꓢꓯꓸ ꓬꓲꓼ ꓡˍꓳ꓾ ꓮ-ꓡꓰ-ꓡꓴ-ꓬ” ꓐꓰ ꓘꓴ ꓔꓴꓻ ꓡꓯ=

ꓚꓳꓦꓲꓓ-19 ꓠꓬ ꓞꓳ ꓤ ꓐꓴ ꓐꓱ ꓶ ꓡꓯꓼ ꓐꓳꓻ ꓔꓶ ꓓꓴ ꓙꓻ ꓖꓴ ꓥ ꓡꓳ=ꓟꓬꓻ ꓢꓶꓽ ꓡꓰ ꓟꓳꓻ ꓟꓽ ꓓ ꓟ ꓐꓲꓽ ꓓꓲˍ ꓕꓲꓽ ꓫꓵꓽ ꓪꓴꓸ ꓠꓬꓲ ꓞꓳ ꓤ ꓮ ꓟꓬꓹ ꓠꓬ ꓘꓶꓻ ꓙꓵ ꓢꓲ ꓢꓰꓼˍ ꓟ ꓟꓶ ꓗꓷꓳ=ꓗꓴꓷꓼ ꓮ ꓟꓬꓹ ꓗꓪ ꓟ ꓞꓳ ꓤ ꓬꓲꓸ ꓔꓴꓺ ꓟꓽ ꓛꓲ ꓠꓬ ꓡꓯꓼ ꓐꓳ ꓔꓶꓸ ꓓꓴ ꓙꓻ ꓖꓴ ꓗꓪ ꓫꓱꓽ ꓔꓬꓹ ꓡꓳ= ꓡꓯꓼ ꓐꓳ ꓔꓶ ꓓꓴ ꓙꓻ ꓖꓴ ꓠꓬ ꓢꓯꓸ ꓬꓲꓼ ꓡˍ ꓟ ꓗꓪ ꓡꓳꓹ ꓬꓰˍ ꓥꓳ ꓐꓰ ꓙꓵꓻˍ ꓟ ꓙꓵꓻ ꓠꓲꓹ ꓗꓪ ꓐꓰ ꓞꓳ ꓤ ꓮ ꓟꓬꓹ ꓠꓬ ꓬꓲꓸ ꓪ ꓫꓸ ꓙꓵ ꓔꓬꓹ ꓟ ꓡꓯꓼ ꓐꓳ ꓔꓶꓸ ꓓꓴ ꓙꓻ ꓖꓴ ꓗꓪ ꓠꓲꓹ ꓪꓴꓽ ꓪꓴꓽ ꓡꓰ ꓫꓱꓽ ꓙꓰ ꓐ ꓡ ꓠꓹ ꓟ ꓥꓪ ꓠꓴꓽ ꓪꓽ ꓘꓴˍ ꓡꓳ=

ꓖꓳ ꓟ ꓪꓴꓸ ꓠꓬꓲ꓾ ꓣꓳꓽ ꓔꓯ ꓤ ꓠꓬꓲ ꓔꓬꓹ ꓟ ꓗꓪ ꓐꓰ ꓾ ꓬꓰ-ꓢꓴ ꓢꓯꓸ ꓬꓲꓼ ꓡˍꓳ꓾ ꓮ-ꓡꓰ-ꓡꓴ-ꓬ ꓐꓰ ꓘꓴ ꓔꓴꓺ ꓡꓯ=

ꓖꓳ ꓡꓱ ꓥˍ ꓟꓲ꓾ ꓚꓳꓦꓲꓓ-19 ꓠꓻ ꓫꓵꓽ ꓠꓬ ꓣꓳꓽ ꓙꓵꓻ ꓠꓲꓹ ꓔꓯ ꓤ ꓠꓬꓲ ꓔꓬꓹ ꓡꓳ= ꓗ-ꓔꓳ-ꓡꓲ ꓘꓴ ꓜꓲꓼ ꓞꓳ ꓠꓬ ꓙꓻ ꓡꓯꓽ ꓘꓳˍ ꓟ ꓚꓱꓹ ꓥ ꓡꓳ= ꓗꓹ ꓛꓲˍ ꓟ ꓐꓰ ꓙꓻ ꓡꓯꓽ ꓘꓳꓹ ꓟ ꓗꓪ ꓐꓰ ꓙꓻ ꓡꓯꓽ ꓘꓳˍ ꓟ ꓔꓯ ꓬꓰ ꓠꓹ ꓟ ꓐꓰ ꓖꓳ ꓟ ꓔꓯ ꓐꓲ ꓡ ꓠꓹ ꓟ ꓐꓱ ꓶ ꓣꓳꓽ ꓐꓴ ꓠꓬ ꓟꓲ-ꓢ ꓗꓪ ꓜꓲꓼ ꓡꓳꓽ ꓔꓬꓹ ꓟ ꓥ ꓡꓳ=ꓣꓳꓽ ꓟꓬꓱꓽ ꓠꓬ ꓙꓻ ꓡꓯ ꓘꓳˍ ꓟ ꓔꓯ ꓫꓬꓹ ꓔꓶꓻ ꓠꓹ ꓟ ꓥ ꓡꓳ= ꓖꓳ ꓡꓱ ꓥˍ ꓟꓲ ꓕꓱ ꓡꓰ ꓐꓰ ꓫꓸ ꓙꓵ ꓓꓴ ꓔꓳꓹ ꓜꓳꓽ ꓔꓬꓹ ꓟ ꓙꓵꓹ ꓗꓪ ꓠꓬ ꓣꓳ ꓚꓲꓸ ꓛꓬ ꓕꓲꓽ ꓣꓳˍ ꓡꓰꓽ ꓔꓬꓹ ꓓꓴ ꓥꓳ=ꓝꓮꓲꓸ ꓕꓲꓽ ꓚꓱꓹ ꓐꓯˍ ꓠꓬ꓾ ꓣꓳꓽ ꓕꓲꓽ ꓣꓳ ꓐꓰ ꓕꓲꓽ ꓣꓳ ꓶꓽ ꓤ ꓔꓬꓹ ꓟ ꓠꓬ꓾ ꓕꓲꓽ ꓣꓳ ꓛꓳꓽ ꓕꓲꓽ ꓣꓳ ꓚꓵꓺ ꓚꓵꓺ ꓙ ꓡꓯ ꓘꓳˍ ꓟ ꓥ ꓡꓳ꓾ ꓠꓲꓹ ꓠꓵꓹ ꓟ ꓔꓯ ꓟꓳꓸ ꓖꓶꓽˍ ꓟ ꓥ ꓡꓳ= ꓮ ꓡꓲꓳ ꓐꓯˍ ꓠꓬ ꓣꓳꓽ ꓠꓽ꓾ ꓣꓳꓽ ꓔꓯ ꓫꓵꓻ ꓝꓲ ꓐ ꓡˍ ꓟ ꓠꓻ ꓫꓵꓽ ꓔꓯ ꓠꓽ ꓗꓷ ꓝꓲ ꓠꓲꓹ ꓫꓵˍ ꓟ ꓗꓪ ꓐꓰ ꓥ ꓡꓳ=

ꓟꓬꓻ ꓠꓬꓲ ꓙꓽ ꓫꓸ ꓡꓰ ꓝꓲ ꓓꓴ ꓕꓲꓽ ꓫꓵꓽ ꓠꓬ ꓪꓽ ꓘꓴ ꓦꓲꓻ ꓮ ꓙꓵꓽ ꓔꓯ ꓚꓵꓸ ꓗꓷ ꓟ ꓥ ꓡꓳ= ꓔꓲꓺ ꓒ ꓪ ꓔꓲ ꓕꓲꓽ ꓧꓪꓹ ꓐꓯˍ ꓟ ꓠꓬ꓾ “ꓪꓽ ꓘꓴ ꓦꓲꓻ ꓠꓬ ꓠꓻ ꓫꓬꓹ ꓖꓶꓽ ꓖꓴ ꓕꓲꓽ ꓟ ꓡꓰ ꓐꓰ ꓒꓬꓱꓼ ꓠ ꓗˍ ꓡꓳ꓾ ꓖꓳ ꓗꓪ ꓠꓬ ꓞꓳ ꓤ ꓐꓴ ꓠꓻ ꓓꓴ ꓐꓰ ꓢꓯꓼ ꓐꓽ ꓢꓴ ꓮ ꓙꓵꓽ ꓠꓬ ꓟꓹ ꓟ ꓘꓴ ꓜꓲꓼ ꓞꓳ ꓡꓰ ꓠꓻ ꓫꓬꓹ ꓖꓶꓽˍ ꓟ ꓣꓱꓽ ꓞꓹ ꓟ ꓔꓯ ꓟꓶ ꓪ ꓓˍ ꓟ ꓪꓽ ꓘꓴ ꓦꓲꓻ ꓒꓬꓱꓼ ꓠ ꓗˍ ꓡꓳ=ꓖꓳ ꓡꓱ ꓥˍ ꓟꓲ ꓣꓳꓽ ꓪꓴ-ꓢ ꓔꓯ ꓧꓪꓺ ꓖꓴ ꓐꓰ ꓠꓲꓹ ꓟ ꓐꓶꓽ ꓢꓲ ꓟꓽ ꓪꓳꓹ ꓐꓰ ꓟꓬ ꓐꓰ ꓓꓳˍ ꓕꓯ ꓣꓳꓽ ꓫꓸ ꓑꓬ ꓖꓴ ꓐꓰ ꓙꓻ ꓡꓯ ꓘꓳ ꓖꓴ ꓐꓴ ꓠꓬ ꓮ ꓙꓵꓽ ꓚꓵꓸ ꓗꓷꓳ=ꓦꓮꓔꓲꓚꓮꓠ ꓔꓯˍ ꓟꓲ ꓚꓵꓸ ꓔ ꓡꓳ= ꓗꓴꓷꓼ ꓮ ꓟꓬꓹ ꓗꓪ ꓙꓻ ꓡꓯ ꓘꓳˍ ꓟ ꓚꓵꓺ ꓘꓶ ꓾ ꓢꓲꓺ ꓫꓬ ꓑ ꓑ ꓑꓶꓻ ꓖꓶꓽˍ ꓟˍ ꓟꓲ ꓠꓽ ꓗꓷꓳ= ꓮ ꓡꓰ ꓫꓵꓽ ꓢꓰꓼ ꓡꓯꓽ ꓘꓳ ꓓꓴ ꓐꓰ ꓘꓶꓻ ꓙꓵ ꓓꓴ ꓠꓬ ꓮ ꓫꓵꓽ ꓟꓲ ꓬꓰ ꓟꓽ ꓐ ꓡ꓾  ꓮ ꓟꓬꓹ ꓟꓽ ꓬꓰ ꓗꓷ ꓥˍ ꓟꓲ ꓟꓳꓻ ꓟꓽ ꓓ ꓟ ꓐꓰ ꓓꓲꓹ ꓡꓰ ꓧꓪꓸ ꓡꓰꓳ=

ꓕꓱꓻ ꓟ ꓠꓬ ꓮ ꓘꓶꓸ ꓫ ꓓꓴ ꓥꓳ= ꓘꓴ ꓜꓲꓼ ꓞꓳ ꓠꓬ ꓫꓵꓻˍ ꓟ ꓶꓽ ꓥꓳꓽ ꓔꓯ ꓦꓴ ꓠꓬꓹ ꓔꓬꓹ ꓕꓯ ꓕꓱ ꓟ ꓠꓬ ꓮ ꓘꓶꓸ ꓫꓵˍ ꓟ ꓠꓽ ꓛꓳꓼ ꓠꓬꓲ ꓓꓽ ꓟ ꓥ ꓡꓳ= ꓠꓽ ꓛꓳꓼ ꓠꓬꓲ ꓓ ꓟ ꓐꓯˍ ꓟ ꓠꓬ꓾ ꓘꓴ ꓜꓲꓼ ꓞꓳ ꓠꓬ ꓢꓲꓽ ꓫꓬ ꓖꓳ ꓓꓱꓽ ꓑꓶꓻ ꓖꓶˍ ꓟ ꓔꓯ ꓠꓽ ꓔ ꓢꓲ꓾ ꓪꓴ-ꓢ ꓧꓪꓸ ꓡꓰˍ ꓟ ꓔꓯ ꓓꓵꓽ ꓙ ꓢꓲ ꓠꓬꓲ ꓬꓲꓸ ꓢꓯꓸ ꓬꓲꓼ ꓡˍ ꓟ ꓔꓯ ꓡꓳꓸ ꓠꓬ ꓔꓬꓹ ꓟ ꓦꓬꓼ ꓠꓬꓲ ꓔꓯ ꓐꓯˍ ꓡꓳ=

ꓣꓳ ꓗ-ꓔꓳ-ꓡꓲ ꓐꓴ ꓐꓰ ꓞꓳ ꓤ ꓮ ꓙꓵ ꓠꓬ꓾ ꓕꓱ ꓠꓽ ꓛꓳꓼ ꓠꓬꓲ ꓓꓽ ꓟ ꓠꓬ ꓧꓪꓸ ꓡꓰˍ ꓟ ꓰꓮꓢꓔꓰꓣ ꓐꓰ ꓡꓳꓹ ꓬꓰ ꓥꓳ ꓐꓰ ꓥꓳ ꓡꓳꓸ ꓢꓲ ꓡꓳꓸ ꓠꓬꓹ ꓔꓬ ꓖꓴˍ ꓡꓳ= ꓮ ꓘꓶꓸ ꓫꓵ ꓢꓲ ꓠꓯꓺ ꓞꓲꓹ ꓟ ꓟꓶꓽ ꓘꓶꓽ ꓠꓬ ꓟꓲꓽ ꓕꓯ ꓙꓲꓻ ꓡˍ ꓟ ꓐꓰ ꓕꓲꓽ ꓪ ꓒꓲꓼ ꓬꓰ ꓟꓶꓽ ꓬꓰˍ ꓥꓳ=ꓥꓶˍ ꓟ ꓠꓬ ꓡꓳꓹ ꓬꓰˍ ꓟ ꓬꓲꓸ ꓙꓵꓹ ꓙꓳˍ ꓡꓳ=ꓖꓳ ꓟ ꓪꓴꓸ ꓠꓬꓲ꓾  ꓗꓹ ꓛꓲꓽ ꓠꓲꓹ ꓐꓰ “ ꓮ-ꓡꓰ-ꓡꓴ-ꓬ ꓬꓰ-ꓢꓴ ꓠꓬ ꓢꓯꓸ ꓬꓲꓼ ꓡꓻꓳ” ꓐꓰ ꓐꓯ ꓡꓯ=

ꓟꓴꓽ ꓖꓪ ꓐꓳ ꓢꓴ ꓐꓰ ꓕꓲꓽ ꓪꓺꓽ ꓕꓱ ꓡꓰ ꓐꓰ ꓫꓸ ꓙꓵꓹ ꓟ ꓦꓬꓼ ꓠꓬꓲ ꓬꓲꓹ ꓙꓵꓹ ꓗꓪ ꓥꓳ ꓡꓳꓸˍ ꓟ ꓐꓰ ꓖꓪ ꓡꓯ꓾

ꓪꓴ-ꓢ  ꓥꓪ ꓠꓬꓲ ꓟꓳꓻ ꓓꓴˍ ꓐꓰ ꓥꓪ ꓢꓯꓼ ꓟꓬ ꓝꓸ ꓓꓴ ꓥ ꓡꓳ=ꓥꓪ ꓮꓽ ꓟ ꓔꓯ ꓙꓳꓺ ꓠꓯꓹ ꓡ? ꓢꓲ ꓒ ꓠꓬ ꓥꓪ ꓧꓪꓸ ꓒꓬꓱ ꓥ ꓡꓳ= ꓥꓪ ꓮꓽ ꓟ ꓔꓯ ꓛꓲꓸ ꓠꓯꓹ ꓡ?

ꓮ ꓡꓲꓳ ꓐꓯˍ ꓠꓬ ꓫ ꓙꓵˍ ꓟ ꓦꓬꓼ ꓠꓬꓲ ꓗꓪ ꓬꓲ ꓡꓰ ꓥꓪ ꓔꓯ ꓖꓳ ꓗꓪ ꓮ ꓫꓵꓽ ꓟꓽ ꓘꓳ ꓟꓽ ꓟꓳ ꓔꓬ ꓝꓲˍ ꓥꓳ= ꓬꓲ ꓫ ꓑꓬ ꓖꓴ ꓗꓪ ꓥꓪ ꓔꓯ ꓚꓵ ꓔ ꓥꓳ= ꓟꓴˍ ꓟ ꓡꓳ ꓓꓰ ꓕꓯꓽ ꓢꓲ ꓗꓪ ꓬꓲ ꓥꓪ ꓔꓯ ꓦꓰꓼ ꓔ ꓝꓲˍ ꓥꓳ= (ꓟꓴ-ꓖꓪ 27ꓽ 1ꓹ 5)

ꓞꓳ ꓤ ꓐꓴ ꓐꓰ ꓘꓴ ꓜꓲꓼ ꓞꓳ ꓠꓬ ꓧꓶꓸ ꓕꓯ ꓟ ꓕꓯ ꓢꓲꓺ ꓮ ꓘꓶꓸ ꓫꓸ ꓙꓵ ꓔꓬꓹ ꓡꓳ= ꓢꓲꓽ ꓫꓬ ꓟꓸ ꓟꓲꓽ ꓗꓪ ꓟꓳꓸ ꓖꓶꓽ ꓔ ꓟ ꓫꓸ ꓘꓶꓽ ꓓꓴ ꓬꓲꓸ ꓫꓵꓽ ꓬꓲ ꓙꓰ ꓔꓯ ꓣꓳ ꓟꓳꓻ ꓪ ꓓˍ ꓡꓳ= ꓮꓓ 400 ꓘꓳꓼ ꓟ ꓛꓲ ꓐꓰ 1500 ꓘꓳꓼ ꓠꓬꓲꓽ ꓗꓴꓸ ꓚꓸꓼ ꓗꓪ ꓐꓡꓮꓚꓗꓰ ꓑꓡꓮꓖꓴꓰ ꓠꓻ ꓓꓽ ꓟ ꓒꓬꓱꓼˍ ꓕꓯ ꓰꓴꓣꓳꓑꓰꓮꓠ ꓗꓪ ꓔꓬꓹ ꓟ ꓞꓳꓽ ꓫꓵꓽ ꓐꓴ ꓕꓲꓽ ꓐꓶꓽ ꓟꓽ ꓛꓲ ꓫꓵꓻ ꓗꓷꓳ= ꓢꓑꓮꓲꓠ ꓗꓴꓷꓼ ꓗꓪ ꓒꓬꓱꓼ ꓪꓴꓸ ꓔꓴˍ ꓟ ꓔꓳꓸ-ꓗꓴꓬ ꓠꓻ ꓪꓴꓸ ꓠꓬꓲ ꓟꓲꓺ ꓠꓯ ꓗꓪ ꓟ ꓞꓳ ꓤ 500 ꓫꓬꓹ ꓟꓽ ꓛꓲ ꓫꓵꓻ ꓗꓷ ꓟ ꓥ ꓡꓳ=

ꓚꓳꓦꓲꓓ-19 ꓟꓲ ꓖꓳ ꓟ ꓡꓰ ꓐꓰ ꓥꓳ=ꓟꓳꓸ ꓖꓶꓽ ꓓꓴ ꓕꓳꓽ ꓶ ꓗꓪ ꓟ ꓔꓳꓹ ꓠꓷꓼ ꓓꓴ ꓫꓵꓽ ꓟ ꓕꓲ ꓟˍ ꓡꓰ ꓐꓰ꓾ ꓢꓯꓼ ꓟꓬ ꓣꓴˍ ꓟ ꓟꓴ ꓗꓪ ꓝꓲ ꓓꓴ ꓠꓬ ꓐꓬꓺ ꓡꓰˍ ꓟ ꓓꓳꓽ ꓔꓯ ꓔꓯꓺ ꓖꓶꓽ ꓡˍ ꓡꓳ= ꓝꓮꓲꓸ ꓕꓲꓽ ꓧꓪꓹ ꓕꓱ ꓟ ꓡꓰ ꓐꓰ ꓟꓽ ꓒꓬꓱꓼ ꓡꓻꓳ= ꓣꓳꓽ ꓦ ꓡꓱꓻ ꓚꓱꓹ ꓾ ꓕꓲꓽ ꓣꓳ ꓛꓳ ꓕꓲꓽ ꓣꓳ ꓙꓻ ꓡꓯ ꓘꓳ ꓚꓱꓹ ꓾ ꓣꓳꓽ ꓣꓱꓽ ꓬꓰ ꓚꓱꓹ ꓮ ꓙꓵꓽ ꓠꓬ ꓡꓶꓸ ꓗꓷˍ ꓥꓳ= ꓣꓳꓽ ꓐꓴ ꓠꓬ ꓩ ꓔ ꓢꓲ ꓡꓰꓽ ꓔꓬꓹ ꓪˍ ꓡꓳ= ꓐꓬꓺ ꓡꓰ ꓛꓵꓽ ꓡꓰ ꓢꓹ ꓟ ꓞꓳ ꓜꓴꓻ ꓡꓰ ꓐꓰ ꓣꓳꓽ ꓠꓬ ꓣꓳꓽ ꓤꓶꓻ ꓔꓯ ꓒꓳꓹ ꓡꓶꓸ ꓗꓷꓳ= ꓕꓲꓽ ꓣꓳ ꓡꓰ ꓕꓲꓽ ꓡꓰ ꓶꓽ ꓤ ꓔꓬꓹ ꓟ ꓠꓬ ꓣꓳ ꓔꓯ ꓙꓳꓺ ꓡꓰ ꓝꓲˍ ꓡꓳ꓾ ꓠꓬꓲꓽ ꓢ ꓫꓵꓸ ꓐꓴ ꓔꓯ ꓙꓳꓺ ꓡꓰ ꓝꓲˍ ꓡꓳ= ꓖꓳ ꓟ ꓑꓶꓸ ꓓꓴ ꓕꓲꓽ ꓣꓳ ꓛꓳ ꓕꓲꓽ ꓣꓳ ꓠꓲꓸ ꓠꓵ ꓡꓯꓽ ꓘꓳꓹ ꓟ ꓗꓪ ꓧꓳꓽ ꓟꓳꓸ ꓖꓶꓽ ꓠꓹ ꓟ ꓔꓯ ꓓꓰꓽ ꓠ ꓗˍ ꓡꓳ=

ꓟꓳꓻ ꓟꓽ ꓓ ꓟ ꓚꓳꓦꓲꓓ-19 ꓠꓻ ꓔꓯ ꓟꓳꓸ ꓢꓷꓸ ꓫꓵꓽ ꓢꓷꓸ ꓙꓰ ꓐꓴ ꓔꓯ ꓠꓬ ꓮ ꓙꓵꓽ ꓔꓯ ꓢꓷꓸ ꓙ ꓟꓳ ꓙ ꓗꓳꓸ ꓗꓷꓳ=ꓒꓴꓻ ꓫꓵꓺ ꓮ ꓟꓬꓹ ꓙꓳˍ ꓟ ꓗꓴꓷꓼ ꓐꓴ ꓐꓰ ꓪꓽ ꓠꓬꓲˍ ꓟ ꓗꓴꓷꓼ ꓐꓴ ꓠꓬ ꓐꓵꓼ ꓟꓵꓻ ꓠꓻ ꓫꓵꓽ ꓪꓴꓸ ꓠꓬꓲ ꓛꓲꓺ ꓝꓲꓸ ꓖꓶꓽ ꓠ ꓗꓷ ꓡꓰꓳ=ꓪꓽ ꓠꓬꓲˍ ꓟ ꓠꓬ ꓐꓬꓺ ꓡꓰ ꓢꓹ ꓟ ꓥ ꓢꓲ꓾ ꓕꓲꓽ ꓣꓳ ꓛꓳ ꓕꓲꓽ ꓣꓳ ꓙꓽ ꓣꓳˍ ꓟ ꓠꓲꓹ ꓟ ꓡꓰ ꓠꓲꓹ ꓠꓵ ꓡꓯ ꓘꓳ ꓠꓹ ꓟ ꓢꓳꓻ ꓣꓴ ꓡꓯ= ꓮ ꓙꓵꓽ ꓟ ꓕꓯ ꓢꓲꓺ ꓾ ꓙꓵꓽ ꓪ ꓮ ꓙꓵꓽ ꓕꓯꓽ ꓢꓲꓺ ꓪꓽ ꓠꓬꓲˍ ꓟ ꓕꓲꓽ ꓫꓵꓽ ꓙꓳ ꓔꓬꓹ ꓟ ꓔꓯ ꓢꓷꓸ ꓔ ꓠ ꓗꓹ ꓡꓳ=ꓢꓰꓼ ꓡꓯꓽ ꓘꓳꓹ ꓟ ꓟꓯꓼ ꓜꓴꓻ ꓐꓴ ꓠꓬ ꓞꓳꓻ ꓤ ꓢꓯꓼ ꓟꓬ ꓚꓬꓴꓸˍ ꓟ ꓠꓯꓺ ꓞꓲꓼ ꓟꓸ ꓒ ꓟꓸ ꓟ ꓕꓯꓽ ꓢꓲꓺ ꓮ ꓟꓬꓹ ꓟꓬꓽ ꓓ ꓟ ꓔꓯ ꓗꓴꓷꓼ ꓮ ꓙꓵꓽ ꓐꓴ ꓢꓷꓸ ꓡꓻꓳ꓾ ꓡꓳꓸ ꓟꓳ ꓡꓻꓳ= ꓞꓳ ꓤ ꓮ ꓟꓬꓹ ꓐꓴ ꓠꓬ ꓚꓲꓸ ꓛꓬ ꓡꓯꓼ ꓐꓳꓻ ꓔꓶꓸ ꓓꓴ ꓙꓻ ꓖꓴ ꓗꓪ ꓫꓱꓽ ꓔꓬꓹ ꓖꓴˍ ꓡꓳ=ꓡꓯꓼ ꓐꓳꓻ ꓔꓶꓸ ꓓꓴ ꓕꓱ ꓟ ꓠꓬ ꓞꓳ ꓤ ꓮ ꓙꓵꓽ ꓐꓴ ꓔꓯ ꓢꓰꓼ ꓡꓯꓽ ꓘꓳꓹ ꓟ ꓗꓪ ꓧꓳꓽ ꓪꓴꓸ ꓔꓬꓹ ꓡꓳ=ꓮ ꓟꓶ ꓘꓴ ꓜꓲꓼ ꓞꓳ ꓠꓬ ꓢꓯꓸ ꓬꓲꓼ ꓡˍ ꓟ ꓦꓬꓼ ꓠꓬꓲ ꓕꓱ ꓟ ꓗꓪ ꓞꓳ ꓤ ꓐꓴ ꓐꓱ ꓶ ꓔꓱˍ ꓟ ꓐꓰ ꓞꓳ ꓤ ꓕꓲꓽ ꓠꓲꓹ ꓕꓲꓽ ꓪ ꓗꓷ ꓡꓰ ꓠꓹ ꓟ ꓕꓲꓽ ꓟꓲ ꓠꓯ ꓡꓱꓸꓼ ꓐꓰ ꓔꓹ ꓠꓹ ꓟ ꓬꓲꓸ ꓙꓵꓹ ꓥ ꓡꓳ=

ꓔꓲꓺ ꓒ ꓪ ꓔꓲ ꓝꓣꓮꓠꓚꓲꓢ ꓠꓬ ꓞꓳ ꓤ ꓫꓸ ꓙꓵ ꓔꓬꓹ ꓟ ꓐꓰ ꓪꓽ ꓘꓴ ꓦꓲꓻ ꓚꓵꓸ ꓗꓷˍ ꓟ ꓪꓴꓸ ꓠꓬꓲ ꓬꓲꓸ ꓔꓯ ꓮ ꓘꓶꓸ ꓙꓽ ꓫꓸ ꓝꓲˍ ꓡꓳ=

ꓔꓲ ꓒ ꓪ ꓔꓲ ꓐꓯ ꓔ ꓟ ꓠꓬ꓾ ꓣꓳꓽ ꓐꓴ ꓠꓬ ꓕꓲꓽ ꓣꓳ ꓐꓰ ꓕꓲꓽ ꓣꓳ ꓙꓻ ꓡꓯꓽ ꓘꓳ ꓓꓴ ꓥꓳ= ꓕꓱ ꓟ ꓠꓬ ꓢꓯꓸ ꓬꓲꓼ ꓡ ꓑꓮꓲ  ꓰꓮꓢꓔꓰꓣ ꓐꓱ ꓶ ꓶꓼ ꓓꓳꓽ ꓫꓱꓹ ꓓꓳꓽ ꓘꓶꓽ ꓥ ꓡꓳ=

ꓣꓳ ꓐꓴ ꓠꓬ ꓫꓸ ꓙꓵ ꓓꓴ ꓕꓲꓽ ꓟ ꓠꓯꓸꓼ ꓗꓪ ꓔꓳꓹ ꓜꓳꓽ ꓔꓬꓹ ꓟ ꓞꓳ ꓤ ꓡꓰꓽ ꓥ ꓢꓲ꓾ ꓕꓱ ꓟ ꓔꓯ ꓢꓷ ꓡꓰ ꓠꓬ ꓣꓳ ꓐꓴ ꓠꓲꓹ ꓟ ꓟꓽ ꓙꓬ ꓡꓰ ꓡꓰ ꓐꓰ ꓕꓲꓽ ꓠꓲꓹ ꓕꓲꓽ ꓪꓺꓽ ꓬꓰ ꓢꓲ ꓔꓳꓹ ꓜꓳꓽ ꓔꓬꓹ ꓟ ꓫꓸ ꓙꓵ ꓓꓴ ꓗꓪ ꓐꓰ ꓡꓲꓹ ꓙꓰ ꓠꓹ ꓟ ꓢꓯꓼ ꓕꓵꓼ ꓙꓰ ꓡꓯ= “ꓥꓪ ꓠꓴꓽ ꓠꓽ ꓫꓵꓻˍ ꓥꓳ ꓐꓰ ꓙꓳꓺ ꓛꓱꓽˍ ꓟ ꓢꓯꓼ ꓡꓰ ꓬꓰ-ꓢꓴ ꓔꓯ ꓬꓲꓸ ꓝꓲ ꓓꓴ ꓮ ꓙꓵꓽ ꓐꓯ ꓖꓶˍ ꓟ ꓡꓰ ꓐꓰ꓾ ꓣꓳꓽ ꓐꓴ ꓠꓬ ꓚꓲꓸ ꓛꓬ ꓐꓱ ꓶꓼ ꓡꓰꓽ ꓓꓵꓽ ꓙ ꓟ ꓟꓽ ꓥ ꓥ꓾ ꓕꓲꓽ ꓠꓲꓹ ꓕꓲꓽ ꓪ ꓬꓰ ꓐꓻ ꓡˍ ꓥꓳ꓾ ꓐꓯ ꓟ ꓔꓯ ꓢꓷꓸ ꓔ ꓠ ꓗˍ ꓡꓳ=

ꓞꓳ ꓤ ꓕꓲꓽ ꓠꓲꓹ ꓕꓲꓽ ꓪ ꓬꓰˍ ꓟ ꓐꓰ ꓠꓵ ꓠꓲꓹ ꓗꓴꓷꓼ ꓫꓵꓼ ꓗꓪ ꓬꓲꓸ ꓫꓵꓼ ꓟ ꓰꓮꓢꓔꓰꓣ ꓔꓯ ꓝꓮꓲ ꓕꓲꓽ ꓧꓪ ꓙꓳ ꓝꓲ ꓡꓯ=

ꓖꓳ ꓟ ꓪꓴꓸ ꓠꓬꓲ ꓮ ꓟꓴꓸ ꓟꓴꓻ ꓗꓪ ꓡꓳꓸ ꓔ ꓢꓲ꓾ ꓥꓳ ꓡꓳˍ ꓟ ꓐꓰ ꓕꓲꓽ ꓪ “ ꓮ-ꓡꓰ-ꓡꓴ-ꓬ꓾ ꓬꓰ-ꓢꓴ ꓠꓬ ꓚꓵꓺ ꓚꓵꓺ ꓢꓯꓸ ꓬꓲꓼ ꓡꓻꓳ”꓾ ꓐꓰ ꓘꓴ ꓔꓴꓺ ꓡꓯ=

ꓔꓲꓺ ꓒ ꓓꓽ Cardinal Charles Bo

Add new comment

1 + 5 =

Please wait while the page is loading