ꓚꓳꓣꓳꓠꓮ ꓠ ꓫꓵꓽ ꓦꓬꓼ ꓠꓬꓲ ꓠꓯꓸꓼ ꓗꓪ Mother Teresa ꓬꓲ ꓠꓲꓹ ꓟ ꓔꓯ ꓝꓮꓲ ꓕꓲ ꓧꓪꓹ ꓙꓳ ꓡ ꓝꓲ ꓠꓯꓹ ꓡꓳ꓾ ꓐꓰ ꓔꓲꓺ ꓒ ꓓꓽ Cardinal Tagle ꓡꓰ ꓐꓯ ꓖꓶ ꓗꓷ ꓟ

ꓔꓲꓺ ꓒ ꓓꓽ Cardinal Tagle

Mother Teresa ꓬꓲ ꓤꓶꓻ ꓠꓬ ꓟꓽ ꓙꓳ ꓞꓳ ꓤ ꓐꓴ ꓔꓯ ꓣꓱꓽ ꓙ ꓠꓹ ꓟ ꓥ ꓡꓳ=Calcutta ꓡꓳ ꓒꓱ ꓗꓪ ꓟ Mother Teresa ꓬꓲ ꓬꓰ ꓗꓷ ꓟ ꓙꓲˍ ꓟ ꓟꓬꓱꓽ ꓠꓬ ꓟꓵ ꓗꓳꓹ ꓓꓵ ꓓꓵ ꓗꓪ ꓔꓬ ꓟ ꓪꓴ-ꓢ ꓔꓯ ꓙꓵꓻ ꓢꓴ꓾ ꓟꓽ ꓙꓵꓻ ꓢꓴ ꓐꓴ ꓠꓲꓹ ꓟ ꓔꓯ ꓡꓵꓹ ꓫꓴ ꓖꓶˍ ꓟ ꓗꓪ ꓐꓰ ꓠꓽ ꓗꓷ ꓟꓽ ꓐ ꓡ=

ꓖꓳ ꓕꓲ ꓠꓬꓲ ꓔꓯ ꓟꓲ ꓠꓯ ꓕꓲ ꓚꓳ ꓡꓳ ꓗꓴꓷꓼ ꓜꓴꓻ  ꓗꓪ ꓐꓰ “ꓟꓵꓽ ꓗꓳꓹ ꓓꓵ ꓓꓵ ꓟ ꓠꓵ ꓠꓲꓹ ꓠꓬꓲ” ꓐꓰ ꓢꓷꓸ ꓙ ꓟꓳ ꓙ ꓔ ꓟ ꓥ ꓡꓳ= Mother Teresa ꓔꓯ ꓥˍ ꓟꓲ ꓣꓱꓽ ꓞꓹ ꓢꓴ ꓐꓴ ꓐꓱ ꓶ ꓠꓵ ꓠꓲꓹ ꓬꓲꓸ ꓢꓷꓸ ꓡꓰ ꓓꓴ ꓐꓯ ꓢꓲ ꓢꓷꓸ ꓙ ꓟꓳ ꓙ ꓔ ꓡꓳ= ꓠꓵ ꓠꓲꓹ ꓟꓬꓱꓽ ꓠꓬ ꓢꓲꓺ ꓡꓲꓺ ꓟ ꓔꓯ ꓫꓬꓹ ꓔꓶˍ ꓟ ꓥ ꓡꓳ=

ꓠꓵ ꓠꓲꓹ ꓠꓬ ꓕꓲ ꓠꓲꓹ ꓕꓲ ꓪꓽ ꓟ ꓐꓰ ꓢꓲꓺ ꓡꓲꓺ ꓟ ꓔꓯ ꓫꓬꓹ ꓔꓶˍ ꓟ ꓔꓯ  ꓝꓲꓸ ꓔ ꓢꓲ꓾ ꓟꓲ ꓠꓯ ꓕꓲ ꓚꓳ ꓡꓳ ꓗꓴꓷꓼ ꓜꓴꓻ ꓗꓪ ꓐꓰ ꓞꓳ ꓤ ꓐꓴ ꓐꓱ ꓶ ꓙꓲˍ ꓟ ꓔꓯ ꓒꓬꓱꓼ ꓡ ꓝꓲˍ ꓟ ꓟꓬꓱꓽ ꓔꓯ ꓬꓰ ꓢꓲ ꓣꓱꓽ ꓙ ꓠꓹ ꓟ ꓾ ꓟꓲ ꓠꓯ ꓕꓲ ꓚꓳ ꓡꓳ ꓗꓴꓷꓼ ꓜꓴꓻ ꓡꓰ ꓐꓰ ꓟꓲ ꓠꓯ ꓜꓴꓻ ꓓꓽ ꓟ ꓗꓪ ꓐꓰ Mother Teresa ꓫꓵꓻ ꓗꓷ ꓟ꓾ 9 ꓦ ꓟ 5ꓠꓬꓲ ꓔꓯ “ꓟꓵꓽ ꓗꓳꓹ ꓓꓵ ꓓꓵ ꓟ ꓠꓵ ꓠꓲꓹ ꓟꓬꓱꓽ ꓣꓱꓽ ꓙˍ ꓟ ꓠꓬꓲ” ꓐꓯ ꓢꓲ ꓢꓷꓸ ꓙ ꓟꓳ ꓙ ꓔ ꓟ ꓠꓬ ꓗ-ꓔꓳ-ꓡꓲ ꓘꓴ-ꓜꓲ-ꓞꓳ ꓐꓱ ꓶ ꓮ ꓘꓶꓸ ꓒꓵꓽˍ ꓟ ꓥ ꓡꓳ=

ꓮ ꓡꓲꓳ ꓐꓯˍ ꓠꓬ ꓘꓴ-ꓜꓲ-ꓞꓳ ꓮꓸ ꓟꓲꓽ ꓥ ꓟ Mother Teresa ꓔꓯ ꓒꓵꓽ ꓗ ꓬꓰ ꓔ ꓟ ꓪꓴꓸ ꓠꓬꓲ ꓥꓳ= ꓬꓲ ꓔꓯ ꓒꓵꓽ ꓗ ꓬꓰˍ ꓟ ꓠꓬ ꓾ ꓟꓵꓽ ꓗꓳꓹ ꓓꓵ ꓓꓵ ꓗꓪ ꓬꓲ ꓔꓯ ꓢꓲꓺ ꓡꓲꓺ ꓟ Nobel ꓡꓯꓼ ꓫꓴ ꓟꓶ ꓔ ꓢꓴ ꓕꓲꓽ ꓣꓳꓽ ꓥ ꓟ ꓡꓰꓽ ꓢꓷꓸ ꓔ ꓡꓳ= ꓡꓯꓼ ꓫꓴ ꓕꓱ ꓟ ꓔꓯ ꓟꓶ ꓗꓷ ꓟ ꓠꓬ ꓞꓳ ꓫ ꓐꓴ ꓔꓯ ꓣꓱꓽ ꓙ ꓗꓷ ꓟ ꓪꓴꓸ ꓠꓬꓲ ꓥ ꓟ ꓾ ꓞꓳ ꓤ ꓮ ꓟꓬꓹ ꓙꓲꓻ ꓓꓴ  ꓐꓱ ꓶ ꓟꓵꓽ ꓗꓳꓹ ꓓꓵ ꓓꓵ ꓗꓪ ꓟ ꓠꓵꓹ ꓠꓲꓹ ꓟꓬꓱꓽ ꓣꓱꓽ ꓜꓴꓻ ꓔꓯ ꓬꓰ ꓙˍ ꓟ ꓙꓲꓻ ꓫꓬ ꓢꓴ ꓐꓴ ꓜꓴꓻ ꓘꓴꓽ ꓗꓪ ꓟ ꓕꓲ ꓣꓳˍ ꓟꓲ ꓥ ꓡꓳ=

Mother Teresa ꓠꓬ 1950 ꓘꓳꓼ ꓗꓪ ꓬꓲꓸ ꓫꓬꓹ ꓔꓶꓻ ꓔ ꓟ “ꓠꓵ ꓠꓲꓹ ꓟꓬꓱꓽ ꓣꓱꓽ ꓢꓴ ꓔꓲꓺ ꓟ ꓐꓴ ꓜꓴꓻ” ꓔꓯ ꓔꓶꓻ ꓗꓷ ꓢꓲ꓾ ꓟꓵꓽ ꓗꓳꓹ ꓓꓵ ꓓꓵ ꓗꓪ ꓙꓳˍ ꓟ ꓫꓸ ꓢꓴ  ꓐꓴ ꓔꓯ ꓣꓱꓽ ꓙ ꓗꓷ ꓟ ꓥꓳ= ꓙꓲꓻ ꓫꓬ ꓢꓴ Mother Teresa ꓬꓲ ꓠꓵ ꓠꓲꓹ ꓟꓬꓱꓽ ꓠꓬ ꓮ ꓘꓶꓸ ꓣꓱꓽ ꓞꓹ ꓢꓴ ꓐꓴ ꓔꓯ ꓬꓲꓸ ꓓꓽ ꓟ ꓣꓱꓽ ꓙˍ ꓟ ꓡꓰꓼ ꓟꓽ ꓥ꓾ ꓟꓬꓱꓽ ꓤ ꓤ ꓬꓰˍ ꓟ ꓟꓲ ꓐˍ ꓡꓳ꓾ ꓐꓰ ꓐꓯ ꓔ ꓡꓳ=

ꓔꓱꓹ ꓚꓵˍ ꓟ ꓠꓵ ꓠꓲꓹ ꓟꓬꓱꓽ ꓠꓬ ꓠꓵ ꓠꓲꓹ ꓙꓳ ꓢꓴ ꓗꓪ ꓐꓰ ꓡꓰ ꓬꓲꓻ ꓓꓳ ꓡ ꓓꓹ ꓡꓳ= ꓠꓵ ꓠꓲꓹ ꓬꓲ ꓝꓳꓹ ꓟꓶ  ꓠꓬ ꓪꓴ-ꓢ ꓥ ꓡꓳ= ꓮ ꓡꓲꓳ ꓐꓯ ꓠꓬ “ꓪꓴ-ꓢ ꓠꓬ ꓠꓵ ꓠꓲꓹ ꓥ ꓡꓳ”꓾ ꓐꓰ 1 ꓬꓳ-ꓦ 4ꓽ8 ꓗꓪ ꓐꓳ ꓔ ꓡꓳ= ꓠꓵ ꓠꓲꓹ ꓠꓬ ꓪꓴ-ꓢ ꓬꓲ ꓒꓵꓽ ꓶ ꓥ ꓡꓳ= ꓪꓴ-ꓢ ꓠꓬ ꓢꓯꓼ ꓟꓬ ꓔꓯ ꓒꓬꓱꓼ ꓡ ꓝꓲ ꓢꓴ ꓥꓳ= ꓝꓴꓲꓸ ꓙꓳ ꓢꓴ ꓔꓯ ꓖꓼ ꓖꓶˍ ꓡꓳ= ꓢꓯꓼ ꓐꓽ ꓢꓴ ꓔꓯ ꓣꓱꓽ ꓙˍ ꓡꓳ= ꓟꓲ ꓠꓯ ꓔꓯ ꓟꓸ ꓖꓶ ꓑꓱ ꓖꓶˍ ꓡꓳ= ꓫꓸ ꓢꓴ ꓐꓰ ꓠꓲꓹ ꓫ ꓟꓬ ꓫ ꓢꓴ꓾ ꓡꓳꓺ ꓔ ꓟ ꓟꓶ ꓢꓴ ꓐꓴ ꓒ ꓕꓲꓸ ꓗꓪ ꓦꓰꓼ ꓞꓹ ꓢꓲ ꓬꓰ ꓙˍ ꓡꓳ= ꓬꓰ-ꓢꓴ ꓠꓯꓸꓼ ꓗꓪ ꓪꓴ-ꓢ ꓬꓲ ꓠꓵ ꓠꓲꓹ ꓠꓬ ꓫꓵꓻˍ ꓟ ꓔꓯ ꓧꓪꓸ ꓡꓰ ꓝꓲꓳ= ꓞꓳ ꓤ ꓮ ꓙꓵꓽ ꓠꓬ “ꓪꓴ-ꓢ ꓬꓲ ꓒꓬꓱꓽ ꓡꓰ ꓐꓰ ꓚꓰꓼ ꓔ ꓟ ꓟꓶ ꓗꓷꓳ= ꓚꓰꓼˍ ꓟ ꓬꓲꓸ ꓔꓶꓻ ꓙꓱꓼ ꓠꓬ ꓾ ꓟꓲ ꓠꓯ ꓗꓪ ꓪꓴ-ꓢ ꓠꓵ ꓠꓲꓹ ꓔꓯ ꓟꓳꓸ ꓖꓶ ꓠꓹ ꓟ ꓥ ꓡꓳ=”

Mother Teresa ꓠꓬ ꓪꓴ-ꓢ ꓬꓲ ꓠꓵ ꓠꓲꓹ ꓗꓪ ꓐꓰ ꓬꓲ ꓤꓶꓻ ꓔꓯ ꓒꓳꓹ ꓡꓶꓸ ꓗꓷꓳ= ꓖꓳ ꓡꓱ ꓡꓶꓸ ꓗꓷ ꓢꓲ ꓫꓸ ꓢꓴ  ꓐꓴ ꓔꓯ ꓣꓱꓽ ꓙ ꓢꓲ ꓠꓬꓲ꓾ ꓔꓱꓹ ꓚꓵˍ ꓟ ꓠꓵ ꓠꓲꓹ ꓔꓯ ꓬꓲ ꓬꓲꓸ ꓬꓰˍ ꓟ ꓟꓬꓱꓽ ꓗꓪ ꓐꓰ ꓢꓷꓸ ꓙ ꓟꓳ ꓙ ꓗꓷꓳ= Mother Teresa ꓬꓲꓸ ꓠꓲꓹ ꓟ ꓐꓰ ꓙꓲˍ ꓟ ꓢꓷꓸ ꓡꓰ ꓓꓴ꓾ ꓠꓵ ꓠꓲꓹ ꓟꓬꓱꓽ ꓣꓱꓽˍ ꓟ ꓔꓲꓺ ꓟ ꓐꓴ ꓠꓲꓹ ꓟˍ ꓡꓰ ꓐꓰ꓾ ꓮ ꓟꓶ ꓟ ꓦꓬꓼ ꓠꓬꓲ ꓗꓪ ꓔꓳꓹ ꓜꓳꓽ ꓔꓬꓹ ꓟ COVID-19 ꓦꓬꓼ ꓠꓬꓲ ꓗꓪ ꓣꓱꓽ ꓙ ꓖꓶ ꓐ ꓡˍ ꓡꓳ ꓐꓰ꓾ ꓠꓬꓲ ꓠꓬꓲ ꓟ “2020 ꓘꓳꓼ ꓟꓵꓽ ꓗꓳꓹ ꓓꓵ ꓓꓵ ꓠꓵ ꓠꓲꓹ ꓟꓬꓱꓽ ꓠꓬꓲ” ꓐꓱ ꓶ ꓐꓯ ꓔ ꓟ ꓥ ꓡꓳ=

ꓞꓳ ꓤ ꓮ ꓙꓵꓽ ꓠꓬ ꓠꓵ ꓠꓲꓹ ꓟꓬꓱꓽ ꓔꓯ ꓚꓲꓸ ꓛꓬ ꓐ ꓡꓹ ꓟ ꓕꓲꓽ ꓒꓳꓹ ꓗꓪ ꓐꓰ ꓬꓰ ꓢꓲ꓾ ꓚꓲꓸ ꓛꓬ ꓕꓲ ꓚꓳ ꓡꓳ ꓗꓪ ꓔꓬ ꓟ ꓫꓸ ꓢꓴ ꓐꓴ ꓔꓯ ꓣꓱꓽ ꓙ ꓢꓲ ꓠꓬꓲ꓾ ꓢꓲꓺ ꓡꓲꓺ ꓟ ꓔꓯ ꓫꓬꓹ ꓠ ꓗꓹ ꓡꓳ= ꓙꓲꓻ ꓫꓬ ꓢꓴ Mother Teresa ꓠꓲꓹ ꓟ ꓡꓰ ꓐꓰ ꓮ ꓟꓶ ꓟ “ꓟꓵꓽ ꓗꓳꓹ ꓓꓵ ꓓꓵ ꓗꓪ ꓟ ꓠꓵ ꓠꓲꓹ ꓦꓬꓼ ꓠꓬꓲ” ꓑꓮꓲꓽ ꓬꓰ ꓢꓲ꓾ “ꓥꓪ ꓠꓬ ꓮ ꓡꓲ ꓕꓲ ꓒꓳꓹ ꓗꓪ ꓟ ꓞꓳ ꓤ ꓥ ꓡ? ꓾ ꓞꓳ ꓡꓯꓸ ꓐꓴ ꓔꓯ ꓮ ꓡꓲ ꓡꓳ ꓫꓵꓽ ꓞꓳ ꓤ ꓒꓬꓱꓼ ꓡ ꓠꓹ ꓟ ꓬꓰ ꓖꓶ ꓔꓬ ꓡ? ꓾ ꓣꓳ ꓐꓰ ꓟꓽ ꓫꓱꓸ ꓡꓯ ꓘꓳ꓾ ꓟꓽ ꓪꓽ ꓡꓯ ꓘꓳ ꓟ ꓞꓳ ꓤ ꓐꓴ ꓔꓯ ꓒꓵꓽ ꓗ ꓬꓰ ꓗꓴˍ ꓡ? ꓾ ꓔꓳꓹ ꓜꓳꓽ ꓔꓬ ꓟ ꓠ ꓫꓵꓽ ꓪꓴꓸ ꓠꓬꓲ ꓒꓲꓼ ꓬꓰ ꓟꓶꓽ ꓬꓰ ꓔꓬ ꓟ ꓠꓵ ꓠꓲꓹ ꓔꓯ ꓡꓵꓹ ꓫꓴ ꓖꓶ ꓠꓹ ꓟ ꓬꓰ ꓔꓬ ꓡ? ꓾ ꓖꓳ ꓡꓱ ꓟꓽ ꓥ ꓥ ꓐꓰ ꓓꓵꓽ ꓙ ꓟ ꓕꓲ ꓒꓳꓹ ꓗꓪ ꓐꓰ ꓡꓰ ꓬꓰ ꓔꓬꓹ ꓡ? ꓾ ꓧꓶꓸ ꓕꓯ ꓟ ꓕꓯꓽ ꓢꓲ ꓣꓱꓽ ꓬꓰ ꓢꓲ꓾ ꓡꓯꓼ ꓕꓲꓺ ꓟꓬꓱꓽ ꓣꓱꓽˍ ꓟ꓾ ꓠꓵ ꓠꓲꓹ ꓟꓬꓱꓽ ꓣꓱꓽ ꓢꓴ ꓒꓬꓱꓼ ꓡ ꓠꓹ ꓟ ꓟꓽ ꓓ ꓣꓱꓽ ꓞꓹ ꓡꓳ ꓐꓰ ꓔꓲꓺ ꓒ ꓓꓽ Cardinal Tagle ꓡꓰ ꓐꓯ ꓖꓶ ꓗꓷ ꓟ ꓥ ꓡꓳ=

https://bit.ly/3bxRyTd

Add new comment

3 + 8 =