ꓠꓬꓲꓸ ꓠꓬꓲ ꓟ ꓓꓳꓽ

ꓗꓴꓷꓼ ꓘꓴꓽ ꓗꓪ ꓓꓴ ꓓꓳ ꓙꓰˍ ꓟ ꓗꓪ ꓟꓸ-ꓑꓳ-ꓔꓲ ꓐꓰ ꓶꓻ ꓤ (ꓚꓬ ꓢꓲ) ꓐꓴ ꓔꓯ ꓠ ꓠꓬꓲ ꓚꓬꓹ ꓠꓬꓲˍ ꓟ ꓪꓴꓸ ꓠꓬꓲ ꓓꓴ ꓓꓳˍ ꓟ ꓗꓪ ꓬꓲ ꓙꓵꓹ ꓟꓶ ꓫꓵˍ ꓟ ꓙꓳ ꓡˍ ꓟ

4 ꓦ ꓘꓴꓽ ꓗꓪ ꓓꓵꓽ ꓡ ꓔꓬꓹ ꓕꓯ ꓡꓰ ꓗꓴꓷꓼ ꓘꓴꓽ ꓗꓪ ꓓꓴ ꓓꓳ ꓙꓰˍ ꓠꓬ ꓕꓳꓽ ꓶ ꓒꓬꓽ ꓥ ꓠꓬ ꓟꓸ-ꓑꓳ-ꓔꓲ ꓟꓳꓸ ꓖꓶ ꓢꓲ ꓓꓴ ꓓꓳ ꓙꓰ ꓠ ꓗˍ ꓡꓳ꓾ ꓐꓰ ꓟꓯꓼ ꓐꓴ ꓡꓰ ꓐꓯ ꓑꓶ ꓔ ꓡꓳ=

ꓮ ꓟꓶ ꓬꓲꓻ ꓙꓬ ꓕꓲꓽ ꓑꓮꓲ ꓠꓶꓽ ꓡ ꓔꓬ ꓠꓬꓲ ꓓꓴ ꓓꓳ ꓙꓰ ꓢꓴ꓾ ꓗ ꓘꓶꓽ ꓓꓳ ꓢꓴ ꓟꓬꓽ ꓡˍ ꓟˍ ꓡꓰ ꓐꓰ ꓶꓻ ꓤ(ꓚꓬ ꓢꓲꓸ) ꓡꓯꓼ ꓘꓪ ꓩꓴˍ ꓟ ꓗꓪ ꓠ ꓠꓬꓲ ꓚꓬꓹ ꓠꓬꓲˍ ꓟ ꓗꓪˍ ꓟꓲ ꓬꓲ ꓙꓵꓹ ꓮ ꓟꓬꓹ ꓟꓶ ꓫꓵ ꓡˍ ꓟ ꓙꓳ ꓡˍ ꓡꓳ꓾ ꓐꓰ ꓢꓷꓸ ꓪˍ ꓡꓳ=

ꓬꓲꓻ ꓙꓬ ꓕꓲꓽ ꓑꓮꓲꓽ ꓠꓶꓽ ꓡˍ ꓟ ꓗꓪ ꓚꓲ ꓛꓬ ꓦꓲꓻ ꓗꓪ ꓡꓽ ꓙꓰˍ ꓟ꓾ ꓓꓴ ꓓꓳ ꓙꓰˍ ꓟ꓾ ꓗ ꓘꓶꓽ ꓓꓳ ꓙꓰˍ ꓟ ꓠꓬ 4 ꓦ ꓬꓲ ꓪꓴꓸ ꓔꓲ ꓠꓽ ꓘꓴꓽ ꓗꓪ ꓮ ꓟꓬꓹ ꓙꓳ ꓡ ꓟ ꓥꓳ= ꓗ ꓘꓶꓽ ꓓꓳ ꓢꓴ꓾ ꓓꓴ ꓓꓳ ꓢꓴ ꓮ ꓙꓵꓽ ꓠꓬ ꓚꓳꓦꓲꓓ ꓠꓻ ꓫꓵꓽ ꓗꓽ ꓕꓸ ꓓꓴ ꓠꓯꓻ ꓞꓲꓼ ꓗꓸ ꓔ ꓟ ꓕꓳꓽ ꓶꓽ ꓒꓬꓽ ꓐꓰ ꓟꓸ-ꓑꓳ-ꓔꓲ ꓔꓯ ꓠ ꓠꓬꓲ ꓚꓬꓹ ꓠꓬꓲ ꓔꓶꓸ ꓗꓪ ꓟꓸ ꓖꓶ ꓪˍ ꓟ ꓥ ꓡꓳ=

ꓕꓲ ꓖ ꓕꓲ ꓔꓳꓸ ꓗꓪ ꓠꓬ ꓟꓳ ꓓꓳ ꓑꓳꓹ ꓢꓴ ꓔꓯ ꓟꓬꓽ ꓠꓬꓲ ꓠ ꓠꓬꓲ ꓚꓬꓹ ꓠꓬꓲˍ ꓟ ꓥ ꓢꓲ꓾ ꓕꓲ ꓖ ꓕꓲ ꓔꓳꓸ ꓗꓪ ꓠꓬ ꓶꓻ ꓤ (ꓚꓬ ꓢꓲꓸ) ꓐꓴ ꓔꓯ ꓧꓶꓸ ꓕꓯ ꓦꓬꓼ ꓠꓬꓲ ꓟ ꓕꓯꓽ ꓢꓲꓺ ꓬꓲ ꓙꓵꓹ ꓮ ꓟꓬꓹ ꓣꓴ ꓢꓲ ꓠ ꓠꓬꓲ ꓚꓬꓹ ꓠꓬꓲˍ ꓟ ꓙꓳˍ ꓡꓳ= ꓕꓱ ꓟ ꓡꓰꓽ ꓟꓽ ꓞꓲꓺ ꓗ ꓘꓶꓽ ꓓꓳ ꓢꓴ꓾ ꓓꓴ ꓓꓳ ꓢꓴ ꓮ ꓙꓵꓽ ꓔꓯˍ ꓟꓲ ꓚꓬꓹ ꓠꓬꓲˍ ꓟ ꓙꓳˍ ꓡꓳ꓾ ꓐꓰ ꓐꓐꓚ ꓓꓳꓽ ꓗꓪ ꓐꓯ ꓔ ꓡꓳ=

ꓢꓲꓺ ꓡꓲˍ ꓟ ꓐꓰ ꓪꓽ ꓡꓯ ꓘꓳꓹ ꓟ ꓗꓳ-ꓟ-ꓫꓲ (JPC - MKN)  ꓐꓰ Humanity Institute (HI) ꓜꓴꓻ ꓐꓴ ꓡꓰ ꓧꓪꓺ ꓟꓰꓹ ꓠꓬꓲ ꓔ ꓟ ꓐꓰ ꓕꓵꓼ ꓪ ꓖꓶ ꓔ ꓟ ꓕꓳꓽ ꓶ ꓑꓷꓠꓽ ꓔꓯ ꓟꓲ-ꓚꓲ-ꓠꓽ ꓢ-ꓢꓶ-ꓠ ꓔꓯ ꓡꓯꓼ ꓙꓱˍ ꓟ ꓓꓳꓽ

ꓢꓲꓺ ꓡꓲˍ ꓟ ꓐꓰ ꓪꓽ ꓡꓯ ꓘꓳꓹ ꓟ ꓗꓳ-ꓟ-ꓫꓲ ((JPC – MKN) ꓜꓴꓻ ꓔꓯ ꓧꓳꓽ ꓪꓴꓸ ꓟꓴ ꓔꓬ ꓟ ꓔꓲꓺ ꓒ Vincent Shan Lum ꓐꓰ Director ꓟꓸ ꓒ Peter Mahka Myo Awng ꓐꓴ ꓡꓰ ꓧꓳꓽ ꓪꓴꓸ ꓟꓴ ꓢꓲ ꓕꓳꓽ ꓶ ꓫꓬꓹ ꓔ ꓟ ꓔꓯ ꓟꓲ-ꓚꓲ-ꓠ ꓢ-ꓢꓶ-ꓠ ꓗ-ꓕꓳ-ꓡꓲꓗ ꓘꓴ ꓜꓲ ꓞꓳ ꓗꓪ ꓟ ꓔꓲꓺ ꓒ Joseph Dr. Gawlu Yung Wa ꓡꓯꓽ ꓒꓯꓹ ꓗꓪ 4 ꓦ 7 ꓠꓬꓲ 2022 ꓘꓳꓼ꓾ ꓠꓯꓼ 9 ꓙꓵꓹ ꓕꓯ ꓡꓯꓼ ꓙꓱ ꓗꓷꓳ=

ꓕꓱ ꓕꓳ ꓶ ꓑꓷꓠꓽ ꓘꓴꓽ ꓗꓪ ꓐꓳ ꓔ ꓟ ꓠꓬ ꓟꓲ-ꓚꓲ-ꓠ ꓢ-ꓢꓶ-ꓠ ꓘꓴꓽ ꓗꓪ ꓔꓬ ꓟ ꓙꓲ-ꓢꓴ ꓢꓲꓺ ꓤ ꓐꓴ ꓘꓴꓽ ꓗꓪ ꓒꓬꓱꓼ ꓔꓬ ꓟ ꓫꓵꓽ ꓪꓴ ꓐꓰ ꓜ ꓓꓴ ꓓꓳ ꓓꓴ꓾ ꓟꓲ ꓠꓯ ꓢꓷꓸ ꓠꓲꓹ꓾ ꓶꓻ ꓡꓯ ꓬꓰ ꓚꓱꓹ ꓐꓰ ꓗꓴꓸ ꓙꓲ ꓙꓳˍ ꓟ ꓚꓱꓹ ꓮ ꓟꓬꓹ ꓐꓴ ꓥ ꓡꓳ= ꓕꓱ ꓟ ꓔꓯ 2021 7 ꓗꓪ ꓐꓰ ꓪꓴꓸ ꓔꓴ ꓢꓲ 2022 ꓘꓳꓼ 3 ꓦ ꓗꓪ ꓛꓲꓺ ꓧꓪ ꓟꓰꓹ ꓠꓬꓲ ꓢꓲ ꓐꓳ ꓔ ꓟ ꓥ ꓡꓳ꓾ ꓐꓰ ꓢꓷꓸ ꓪˍ ꓡꓳ=

ꓔ-ꓬꓯꓸ ꓡꓳ ꓒꓱ ꓗꓪ ꓟ ꓞꓳ ꓡꓱ ꓐꓴ ꓐꓱ ꓶ ꓪꓴ-ꓢ ꓟꓸ ꓟꓲꓽ ꓐꓰ ꓠꓲꓹ ꓟ ꓧꓪꓸ ꓛꓲꓽ ꓛꓵꓹ ꓔꓴ ꓖꓶˍ ꓟ ꓢꓳꓺ ꓜꓲꓼ ꓓꓴ ꓬꓰ ꓖꓶˍ ꓟ ꓓꓳꓽ

ꓑꓲ ꓢꓽ-ꓢꓶ-ꓠꓽ ꓔ-ꓬꓯꓸ ꓡꓳ ꓒꓱ ꓗꓪ ꓟ ꓞꓳ ꓡꓱ ꓐꓴ ꓐꓱ ꓶ ꓪꓴ-ꓢ ꓟꓸ ꓟꓲꓽ ꓐꓰ ꓠꓲꓹ ꓟ ꓧꓪꓸ ꓛꓲꓽ ꓛꓵꓹ ꓔꓴ ꓖꓶˍ ꓟ ꓢꓳꓺ ꓜꓲꓼ ꓓꓴ ꓔꓯ ꓔꓲꓺ ꓟ Christina May ꓡꓰ ꓧꓳꓽ ꓪꓴꓸ ꓟꓴ ꓢꓲ ꓔꓲꓺ ꓒ Benjamin Phyo Min꓾ ꓔꓲꓺ ꓟ Joana Hla Kyi꓾ ꓔꓲꓺ ꓟ Ann Thazin Aung꓾ ꓔꓲꓺ ꓟ Helen Thein Aung ꓐꓴ ꓡꓰ ꓔꓹ ꓙ ꓢꓲ ꓢꓳꓺ ꓜꓲꓼ ꓓꓴ ꓗꓪ ꓟꓸ ꓖꓶ ꓗꓷꓳ= ꓢꓳꓺ ꓜꓲꓼ ꓓꓴ ꓔꓯ ꓠꓬ 4 ꓦ 7 ꓠꓬꓲ 2022 ꓘꓳꓼ꓾ ꓠꓽ ꓡꓲꓸ ꓠꓬꓲ꓾ ꓮ ꓟꓰ ꓠꓯꓼ 8 ꓙꓵꓹ ꓕꓯ ꓙꓲꓻꓫꓬ ꓢꓴ ꓒꓳ-ꓡꓳ Cathedral ꓪꓽ ꓘꓴ ꓦꓲꓻ ꓗꓪ ꓟ ꓔꓲꓺ ꓒ Saw Robert ꓡꓰ ꓟꓲ-ꓢ ꓬꓰ ꓪꓽ ꓘꓴ ꓢꓲ ꓢꓳꓺ ꓜꓲꓼ ꓓꓴ ꓔꓯ ꓒꓴ ꓗꓷꓳ=

ꓟꓲ-ꓢ ꓬꓰ ꓪꓽ ꓘꓴ ꓓꓳ ꓡꓰ ꓕꓯ ꓚꓲꓸ ꓛꓬ ꓟꓬꓱꓺ ꓟꓸ ꓖꓶˍ ꓟ꓾ ꓘꓶꓽ ꓒꓴ ꓘꓶꓽ ꓫꓸ ꓕꓱˍ ꓟ꓾ ꓢꓯꓼ ꓖꓶ ꓪ ꓖꓶ ꓘꓶꓽ ꓫꓸ ꓕꓱ ꓢꓲ ꓢꓳꓺ ꓜꓲꓼ ꓓꓴ ꓒꓴˍ ꓟ ꓑꓮꓲꓽ ꓔꓯ ꓠꓽ ꓗꓷꓳ= ꓝ ꓢꓲ ꓠꓬꓲ 4 ꓠꓬꓲ ꓡꓱꓸ ꓔꓲꓺ ꓒ ꓔꓲꓺ ꓟ ꓐꓴ ꓗꓪ ꓐꓰ ꓟꓽ ꓫꓱꓸ ꓡꓯ ꓘꓳ ꓟ ꓚꓱꓹ ꓬꓲ ꓕꓲꓽ ꓟꓴ ꓗꓪ ꓐꓰ ꓝ ꓢꓲ ꓟꓸ ꓖꓶ ꓠꓹ ꓟ ꓥ ꓡꓳ꓾ ꓐꓰ ꓢꓷꓸ ꓪˍ ꓡꓳ=