ꓣꓦꓮ ꓡꓲ-ꓢꓴ ꓓꓳꓽ

1.Insein ꓡꓳ ꓒꓱ ꓗꓪ ꓢꓮꓲ-ꓗꓯ ꓜꓶꓽ ꓡ ꓟ ꓞꓳ ꓟꓳꓽ ꓕꓲ ꓣꓳ ꓔꓯ ꓞꓳ ꓡꓱ ꓕꓲ ꓜꓴ ꓡꓰ ꓮꓸ ꓕ ꓗꓸ ꓢꓲ ꓢꓮꓲ-ꓗꓯ ꓣꓴ ꓔꓯꓹ ꓙꓰ ꓟ ꓓꓳꓽ
ꓬꓮꓠ-ꓖꓳꓠ ꓟꓵꓽ ꓫꓴ ꓲꓠ-ꓢꓰꓲꓠ ꓡꓳ ꓒꓱ ꓗꓪ ꓡꓳꓹ ꓬꓰ ꓟ 2022 ꓘꓳꓼ 11 ꓦ ꓟ  6 ꓠꓬꓲ ꓕꓯ ꓢꓮꓲ-ꓗꓯ ꓜꓶꓽ ꓡ ꓟ ꓞꓳ ꓟꓳꓽ ꓕꓲ ꓣꓳ ꓔꓯ ꓞꓳ ꓡꓱ ꓕꓲ ꓜꓴ ꓡꓰ ꓮꓼ ꓕ ꓗꓸ ꓢꓲ꓾ ꓢꓮꓲ-ꓗꓯ ꓣꓴ ꓔꓯꓹ ꓙꓰˍ ꓡꓳ ꓐꓰ ꓢꓷꓸ ꓪ ꓡꓳ= ꓠꓸꓹ ꓓꓴ ꓡꓰ ꓟ ꓞꓳ ꓟꓳꓽ ꓠꓬ ꓫꓵꓽ ꓮ ꓘꓶꓸ ꓓꓳ ꓡꓰ ꓟ ꓑꓶꓸ ꓓꓴ ꓬꓰ ꓙ ꓢꓴ ꓜꓴ ꓐꓴ ꓡꓰ ꓲꓠ-ꓢꓰꓲꓠ ꓠꓯꓸꓹ ꓞꓲꓼ ꓦꓲꓸꓹ ꓗꓪ ꓧꓳꓽ ꓩꓴ ꓖꓶ ꓗꓷˍ ꓡꓳ ꓐꓰ ꓢꓷꓸ ꓪ ꓡꓳ= ꓗꓳꓸ ꓡꓳꓹ ꓡ ꓟ ꓦꓬꓼ ꓠꓬꓲ ꓗꓪ ꓥ ꓟꓲ ꓞꓳ ꓡꓱ ꓐꓴ ꓢꓮꓲ-ꓗꓮ ꓥꓪꓸ ꓔ ꓪ ꓡꓰ ꓬꓰ ꓢꓲ ꓣꓴ ꓔꓯꓹ ꓙꓰ ꓟ ꓙꓳˍ ꓡꓳ ꓐꓰ ꓬꓰ ꓙ ꓢꓴ ꓜꓴ ꓐꓴ ꓡꓰ ꓐꓯ ꓡꓳ ꓐꓰ ꓢꓷꓸ ꓪ ꓡꓳ=
2.11 ꓦ ꓟ 9 ꓠꓬꓲ ꓗꓪ ꓚꓳꓸ ꓪꓴꓸ ꓔꓴ ꓢꓲ ꓟꓬ-ꓟ ꓗꓴꓷꓼ ꓕꓲ ꓗꓴꓷꓼ ꓡꓱꓸꓼ ꓮ ꓘꓶꓸ ꓙꓬ ꓡ ꓓꓴ ꓥꓳ ꓐꓰ ꓐꓯ ꓟ ꓓꓳꓽ
11 ꓦ ꓟ 9 ꓠꓬꓲ ꓗꓪ ꓚꓳꓸ ꓪꓴꓸ ꓔꓴ ꓢꓲ ꓟꓬ-ꓟ ꓗꓴꓷꓼ ꓕꓲ ꓗꓴꓷꓼ ꓡꓱꓸꓼ ꓗꓳꓸ ꓡꓳꓹ ꓬꓰ ꓟ ꓘꓳꓼ ꓕꓯ ꓢꓲ ꓮ ꓘꓶꓸ ꓙꓬ ꓡ ꓓꓴ ꓥꓳ ꓐꓰ ꓟꓵꓽ ꓘꓳꓼ ꓚꓱꓹ ꓔꓯ ꓟꓳꓸ ꓢꓷꓸ ꓠꓲꓹ ꓓ ꓒ U Wei Phyo Han ꓡꓰ ꓐꓯ ꓡꓳ ꓐꓰ ꓢꓷꓸ ꓪ ꓡꓳ= ꓟꓬꓽ ꓠꓬꓲ ꓠꓬ ꓚꓧꓲꓠ ꓗꓴꓷꓼ ꓫꓴꓸꓸ ꓢꓧꓮꓠ ꓗꓴꓷꓼ ꓫꓴꓸꓸ ꓐꓶ ꓓꓳ ꓐꓰ ꓖꓴ ꓪꓴꓸ ꓗꓮꓚꓧꓲꓠ ꓗꓴꓷꓼ ꓫꓴꓸꓸ ꓐꓰ ꓢꓮ-ꓖꓮꓲ ꓗꓪ 11ꓦ ꓟ 9 ꓠꓬꓲ ꓗꓪ ꓐꓰ ꓪꓴꓸ ꓔꓴ ꓢꓲ꓾ ꓠꓯꓼ ꓠꓯꓼ ꓙꓵꓹ ꓕꓯ ꓮ ꓘꓶꓸ ꓙꓬ ꓡ ꓓꓴ ꓥ ꓡꓳ ꓐꓰ ꓢꓷꓸ ꓪ ꓡꓳ=
3.ꓚꓳꓦꓲꓓ-19 ꓠꓸꓹ ꓐꓶꓽ ꓓꓲꓻ ꓠꓬ ꓕꓱ ꓕꓲ ꓦ ꓟ ꓬꓲꓸ ꓘꓴꓽ ꓗꓪ ꓮ ꓘꓶꓸ ꓟꓽ ꓟꓬ ꓡ ꓟ ꓓꓳꓽ
ꓡꓳꓹ ꓬꓰ ꓟ ꓕꓲ ꓫꓵꓽ ꓠꓽ ꓬꓲꓸ ꓘꓴꓽ ꓗꓪ ꓐꓰ ꓪꓴꓸ ꓔꓴ ꓢꓲ ꓚꓳꓦꓲꓓ-19 ꓠꓸꓹ ꓐꓶꓽ ꓓꓲꓻ ꓑꓶꓸ ꓓꓴ ꓫꓵꓸꓹ ꓢꓴ ꓮ ꓘꓶꓸ ꓟꓽ ꓔꓬ ꓡꓳ ꓐꓰ 11 ꓦ ꓟ 7 ꓠꓬꓲ ꓕꓯ ꓠꓯꓸꓹ ꓞꓲꓼ ꓟꓬꓱꓽ ꓣꓱꓽ ꓜꓴ ꓐꓴ ꓡꓰ ꓐꓯ ꓡꓳ ꓐꓰ ꓢꓷꓸ ꓪ ꓡꓳ=  ꓡꓳꓹ ꓬꓰ ꓟ ꓕꓲ ꓙꓵꓹ ꓗꓪ ꓠꓬ ꓠꓸꓹ ꓐꓶꓽ ꓓꓲꓻ ꓑꓶꓸ ꓓꓴ ꓫꓵꓸꓹ ꓡꓰ ꓢꓴ ꓮ ꓘꓶꓸ ꓟꓬꓽˍ ꓥ ꓟꓲ ꓮ ꓟꓶ ꓠꓬ ꓠꓸꓹ ꓓꓴ ꓕꓱ ꓟ ꓠꓬ ꓮ ꓤ ꓤ ꓟꓶꓽ ꓡꓰ ꓔꓬ ꓡꓳ ꓐꓰ ꓢꓷꓸ ꓪ ꓡꓳ= ꓟꓬ-ꓟ ꓗꓴꓷꓼ ꓗꓪ ꓚꓳꓦꓲꓓ-19 ꓠꓸꓹ ꓐꓶꓽ ꓓꓲꓻ ꓠꓸꓹ ꓢꓴ ꓮ ꓙꓵꓽ ꓠꓬ 100 ꓣꓳ ꓠꓯꓸ ꓘꓪ ꓡꓰꓽ ꓥ ꓢꓲ ꓠꓬꓲꓸ ꓠꓬꓲ ꓗꓪ ꓥ ꓟꓲ ꓫꓵꓸꓹ ꓡꓰ ꓢꓴ ꓕꓲ ꓣꓳ ꓥ ꓟꓲ ꓟꓽ ꓙꓳ ꓐꓰ ꓠꓯꓸꓹ ꓞꓲꓼ ꓟꓬꓱꓽ ꓬꓰ ꓜꓴ ꓐꓴ ꓡꓰ ꓐꓯ ꓩꓴ ꓡ ꓡꓳ ꓐꓰ ꓢꓷꓸ ꓪ ꓡꓳ= 
4ꓸHalloween ꓑꓮꓲ ꓗꓪ ꓞꓳ ꓤ ꓮ ꓟꓬꓹ ꓫꓵꓻ ꓡꓰ ꓟ ꓔꓯ  Korea ꓔꓲꓺ ꓒ ꓓ ꓡꓰ ꓠꓲꓹ ꓟ ꓫꓸ ꓙ ꓔꓬ ꓢꓲ ꓪꓽ ꓘꓴ ꓙ ꓔꓬ ꓟ ꓓꓳꓽ
Halloween ꓑꓮꓲ ꓗꓪ ꓞꓳ ꓤ 150 ꓣꓳ ꓛꓲ ꓫꓵꓻ ꓡꓰ ꓟ ꓑꓶꓸ ꓓꓴ ꓠꓲꓹ ꓟ ꓫꓸ ꓙ ꓔꓬ ꓢꓲ꓾ ꓪꓽ ꓘꓴ ꓙ ꓔꓬ ꓟ ꓐꓰ ꓫꓵꓸꓹ ꓡꓰ ꓢꓴ ꓐꓴ ꓬꓲ ꓪ ꓕꓲ ꓦꓲꓸꓹ ꓢꓴ ꓐꓴ ꓮ ꓙꓵꓽ ꓢꓴ ꓐꓱ ꓶ ꓪꓽ ꓘꓴ ꓙ ꓔꓬ ꓡꓳ ꓐꓰ Korea ꓗ-ꓕꓳ-ꓡꓲꓗ ꓔꓲꓺ ꓒ ꓓꓽ Peter Chung Soon-Taick ꓡꓰ ꓐꓯ ꓡꓳ ꓐꓰ ꓢꓷꓸ ꓪ ꓡꓳ= ꓕꓱ ꓡꓱ ꓗꓷ ꓡꓰ ꓟ ꓗꓪ ꓘꓴ-ꓜꓲ- ꓞꓳ (7 )ꓜꓴ ꓙꓰ ꓢꓲ ꓡꓳꓸ ꓠꓬꓲ ꓗꓷꓳ ꓐꓰ ꓐꓯ ꓡꓳ= ꓖꓴ ꓟꓶꓸ Korea ꓗꓴꓷꓼ ꓙꓵꓽ ꓢꓲꓽ ꓒ ꓥ ꓟꓲ ꓠꓲꓹ ꓫ ꓟꓬ ꓫꓸ ꓔꓬ ꓢꓲ꓾ꓡ ꓠꓹ ꓟ ꓗꓪ ꓕꓱ ꓡꓱ ꓫꓵꓽ ꓗꓷ ꓡꓰ ꓝꓲ ꓟ ꓓ ꓐꓰ ꓐꓯ ꓩꓴ ꓡ ꓡꓳ ꓐꓰ ꓢꓷꓸ ꓪ ꓡꓳ=
                                        

          

 

Add new comment

5 + 2 =