ꓦ-ꓓꓴꓽ-ꓢꓶꓽ ꓔꓶ ꓚꓱꓹ

ꓦ-ꓓꓴꓽ-ꓢꓶꓽ ꓔꓯ ꓬꓲꓸ ꓗꓳꓸ ꓝꓳꓽ꓾ ꓜ ꓚꓬꓸ ꓦꓲꓻ ꓗꓪ ꓣꓱꓽˍ ꓟ table type꓾ cherry type  ꓐꓰ processing type ꓐꓯ ꓢꓲ ꓔꓶ ꓔꓬ ꓟ ꓥꓳ= ꓬꓲꓸ ꓗꓳꓸ ꓜꓲ ꓗꓪ ꓠꓬ ꓝꓱꓻ ꓢꓯꓼ ꓮ ꓟꓬꓹ ꓙꓳ ꓢꓲ ꓬꓲ ꓢꓶꓽ ꓣꓳˍ ꓟ꓾ ꓬꓲ ꓗꓴꓹ ꓙꓲꓻ ꓐꓽˍ ꓟ ꓐꓰ ꓬꓲꓸ ꓠꓲꓹ ꓟ ꓮ ꓟꓬꓹ ꓙꓳˍ ꓟ ꓟꓵꓽ ꓘꓳꓼ ꓞꓹ ꓟ ꓙꓬˍ ꓟ ꓔꓯ ꓠꓱꓸ ꓐꓯꓼ ꓕꓯꓽ ꓢꓲ ꓜꓲꓽ ꓘꓴˍ ꓟ ꓪꓴꓸ ꓠꓬꓲ ꓬꓲꓸ ꓫꓵꓸ ꓝˍ ꓟ ꓗꓪ ꓣꓱꓽ ꓬꓯꓼˍ ꓡꓳ=

ꓜ ꓚꓬꓸ ꓦꓲꓻ ꓗꓪ ꓣꓱꓽˍ ꓟ ꓐꓰ table type ꓦ-ꓓꓴꓽ-ꓢꓶꓽ ꓐꓴ ꓠꓬ ꓬꓲꓸ ꓢꓶꓽ ꓪꓴꓽˍ ꓗꓪ ꓛꓲꓺ ꓙꓳ ꓢꓲ ꓬꓲ ꓠꓲꓹ ꓟˍ ꓟꓲ ꓮ ꓟꓬꓹ ꓟꓽ ꓙꓳ= ꓟꓵꓽ ꓘꓳꓼ ꓮ ꓘꓶꓸ ꓟꓽ ꓙꓬꓻ ꓟ ꓗꓪ ꓪ ꓙꓲ ꓔꓶ ꓒꓬꓱꓼ ꓡˍ ꓡꓳ= Cherry type ꓦ-ꓓꓴꓽ-ꓢꓶꓽ ꓗꓪ ꓛꓵꓻ ꓢꓯꓼ ꓮ ꓟꓬꓹ ꓙꓳˍ ꓡꓳ=

ꓬꓲ ꓜꓲ ꓗꓪ ꓠꓬ ꓬꓲ ꓞꓳꓹ ꓓ ꓞꓳꓹ ꓖꓶˍ ꓟ ꓐꓰ ꓬꓲ ꓓꓹ ꓞꓳꓹ ꓖꓶ ꓟꓽ ꓛꓵꓺ ꓟ ꓐꓯ ꓢꓲ ꓠꓬꓲꓽ ꓙꓰꓽ ꓙꓳˍ ꓟ ꓥꓳ=

ꓦ-ꓓꓴꓽ-ꓢꓶꓽ ꓜꓲ ꓔꓯ ꓟꓵꓽ ꓘꓳꓼ ꓡꓱꓻˍ ꓟ ꓗꓪ ꓔꓶ ꓒꓬꓱꓼ ꓡ ꓓꓹ ꓡꓳ=

ꓦ-ꓓꓴꓽ-ꓢꓶꓽ ꓜꓲ ꓠꓬ ꓡꓱꓻ ꓢꓯꓼ ꓔꓯ ꓧꓳˍ ꓡꓳ= ꓟꓵꓽ ꓘꓳꓼ ꓮ ꓘꓶꓸ ꓞꓹ ꓟ꓾ ꓟꓵꓽ ꓘꓳꓼ ꓮ ꓘꓶꓸ ꓙꓬꓻˍ ꓟ ꓗꓪ ꓬꓲ ꓜꓲ ꓫꓵꓻ ꓗꓴˍ ꓡꓳ= ꓦ-ꓓꓴꓽ-ꓢꓶꓽ ꓜꓲ ꓔꓯ ꓟꓵꓽ ꓟꓽ ꓢꓲꓺ ꓢꓲꓺ ꓔꓶ ꓒꓬꓱꓼ ꓡˍ ꓡꓳ= ꓖꓳ ꓡꓱ ꓥˍ ꓟꓲ ꓬꓲꓻ ꓙꓬ ꓐꓱ ꓖꓴ ꓗꓪ ꓠꓽ ꓔꓶ ꓟꓽ ꓓ=

ꓦ-ꓓꓴꓽ-ꓢꓶꓽ ꓗꓪ ꓠꓬ ꓮ ꓟꓬꓹ ꓝꓳꓽ ꓙꓳˍ ꓡꓳ= ꓬꓲ ꓢꓶꓽ ꓗꓪ ꓠꓬ ꓬꓲꓸ ꓫꓵꓽ ꓫꓵꓽ ꓐꓰ ꓬꓲꓸ ꓧꓪꓼ ꓧꓪꓼ ꓐꓯ ꓢꓲ ꓘꓶꓽ ꓔ ꓡꓳ=

ꓩꓲꓸ ꓛꓲꓻ ꓟꓵꓽ ꓛꓵꓽ ꓐꓴ ꓔꓯ ꓬꓲ ꓟꓲꓺ ꓫꓬꓹ ꓕꓯ ꓕꓲ ꓧꓪꓹ ꓧꓳꓽ ꓖꓶ ꓢꓲ ꓬꓲ ꓟꓲꓺ ꓗꓪ ꓟꓳꓼ ꓫꓬꓹ ꓖꓶꓽˍ ꓕꓯ ꓕꓲ ꓧꓪꓹ꓾ ꓬꓲ ꓪꓰ ꓪꓰˍ ꓕꓯ ꓕꓲ ꓧꓪꓹ꓾ ꓬꓲ ꓢꓶꓽ ꓓꓱꓼ ꓡˍ ꓕꓯ ꓕꓲ ꓧꓪꓹ꓾ ꓬꓲ ꓢꓶꓽ ꓬꓲ ꓪꓴꓸ ꓧꓼˍ ꓕꓯ ꓕꓲ ꓧꓪꓹ꓾ ꓬꓲ ꓢꓶꓽ ꓠꓬꓲꓽ ꓧꓪꓹ ꓕꓲ ꓧꓪꓹ ꓧꓼˍ ꓕꓯ ꓕꓲ ꓧꓪꓹ ꓧꓳꓽ ꓖꓶ ꓠꓯꓹ ꓡꓳ=

ꓦ-ꓓꓴꓽ-ꓢꓶꓽ ꓜꓲ ꓬꓲ ꓚꓰꓺ ꓠꓬ ꓟꓲ ꓛꓬ ꓠꓯꓸ ꓘꓪ ꓮ ꓠꓯꓸ ꓠꓯꓸ ꓚꓺ ꓓꓵꓽ ꓙꓰˍ ꓟ ꓑꓶꓸ ꓓꓴ ꓬꓲꓸ ꓟꓲꓺ ꓫꓬꓹ ꓕꓯ ꓠꓬ ꓟꓲꓺ ꓛꓬ ꓔꓯ  ꓮꓽ ꓠꓯꓸ ꓠꓯꓸ ꓘꓪꓻ ꓖꓶ ꓠ ꓔ ꓡꓳ=

ꓜꓳꓽ ꓜꓳꓽ ꓡꓰꓽ ꓫꓬꓹ ꓔ ꓟ ꓬꓲ ꓟꓲꓺ ꓗꓪ ꓕꓲ ꓚꓬꓸ ꓐꓰ ꓕꓲ ꓚꓬꓸ 2” ꓗꓶꓹ ꓢꓲ꓾ ꓬꓲ ꓫꓵꓸ ꓕꓲ ꓢꓶꓽ ꓐꓰ ꓕꓲ ꓢꓶꓽ ꓠꓬꓲꓽ ꓗꓴꓸ ꓝꓸꓼ ꓗꓪ 1” ꓛꓲꓺ ꓗꓶꓹ ꓢꓲ ꓬꓲꓸ ꓫꓵꓸ ꓫꓵꓸ ꓗꓷ ꓠꓯꓹ ꓥ= ꓫꓵꓸ ꓓꓳ ꓡꓰ ꓠꓬ ꓬꓲꓸ ꓫꓵꓸ ꓕꓯꓽ ꓢꓲ ꓗꓪ ꓩꓲꓸ ꓛꓲꓻ ꓟꓵꓽ ꓛꓵꓽ ꓐꓽ ꓐꓽˍ ꓡꓰꓽ ꓑꓲꓸ ꓗꓷ ꓖꓶ ꓠꓯꓹ ꓡꓳ= ꓝꓮꓲ ꓠꓬ ꓬꓲꓻ ꓙꓬ ꓮ ꓟꓬꓹ ꓧꓳꓽ ꓗꓷ ꓢꓲ ꓜ ꓜꓲ ꓬꓲ ꓙꓴꓺ꓾ ꓫꓵꓸ ꓙꓴꓺ ꓾ ꓚꓺ ꓒꓶꓽ ꓐꓴ ꓐꓰ ꓑꓲꓸ ꓗꓷ ꓠꓯꓹ ꓥ= ꓬꓲ ꓟꓲꓺ ꓗꓪ ꓬꓲꓻ ꓙꓬ ꓧꓳꓽ ꓖꓶˍ ꓕꓯ ꓠꓯꓼ ꓙꓵꓹ ꓕꓯꓽ ꓧꓳꓽ ꓖꓶˍ ꓠꓬ ꓪ ꓙꓲ ꓙꓲˍ ꓡꓳ=

ꓬꓲꓸ ꓫꓵꓸ ꓗꓪ ꓐꓰ ꓬꓲ ꓜꓲ ꓡꓲꓸ ꓤ ꓣꓱꓻ ꓓꓳ ꓡ ꓗꓸ ꓠꓯꓸ (30-35) ꓠꓬꓲ ꓾ ꓥ ꓠꓬ꓾ ꓬꓲ ꓜꓲ ꓡꓲꓸ ꓤ ꓗꓪ ꓬꓲꓸ ꓒꓬꓽ (6-8) ꓒꓬꓽ ꓛꓲꓺ ꓣꓱꓻ ꓓꓳ ꓡˍ ꓕꓯ ꓔꓶ ꓠꓯꓹ ꓟ ꓬꓲ ꓟꓲꓺ ꓗꓪ ꓚꓵꓹ ꓔꓶ ꓓ ꓡꓺꓳ= ꓬꓲ ꓜꓲ ꓡꓲꓸ ꓤ ꓚꓵꓹ ꓔꓶˍ ꓕꓯ ꓬꓲꓸ ꓚꓰꓺ ꓟꓽ ꓠꓻ ꓡꓰ ꓠ ꓤ ꓟꓳ ꓠ ꓔ ꓥ= ꓬꓲ ꓜꓲ ꓚꓵꓹ ꓔꓶ ꓙꓵꓹ ꓠꓬ ꓟꓶꓽ ꓘꓶꓽ ꓟꓶ ꓞ ꓡꓬꓼ ꓡꓰˍ ꓕꓯ ꓥ ꓠꓯꓹ ꓡꓳ=

ꓬꓲꓸ ꓜꓲ ꓚꓵꓹ ꓔꓶ ꓗꓷ ꓗꓸ ꓠꓯꓸ 15 ꓠꓬꓲ ꓙꓳ ꓡˍ ꓕꓯ ꓬꓲꓸ ꓪꓴꓸ ꓕꓲ ꓧꓪꓹ ꓬꓲ ꓟꓲꓺ ꓗꓪ ꓘꓪꓺ ꓫꓴ ꓗꓷ ꓢꓲ ꓩꓲꓸ ꓛꓲꓻ ꓧꓳꓽ ꓖꓶ ꓠꓯꓹ ꓡꓳ= ꓝꓮꓲ ꓠꓬ ꓔꓶ ꓔ ꓟ ꓦ-ꓓꓴꓽ-ꓢꓶ ꓜꓲ ꓠꓬ ꓬꓲꓸ ꓓ ꓞꓳꓹ ꓖꓶˍ ꓟ ꓬꓲ ꓜꓲ ꓥ ꓕꓯ ꓠꓽ ꓖꓳ ꓕꓲ ꓙꓵꓹ ꓗꓪ ꓬꓲ ꓓ ꓞꓳꓹ ꓖꓶ ꓠꓯꓹ ꓡꓳ=

ꓬꓲꓸ ꓢꓶꓽ ꓧꓼ ꓕꓯ ꓠꓬ ꓬꓲꓸ ꓢꓶꓽ ꓪꓴꓽ ꓡ ꓗꓸ ꓠꓯꓸ ꓠꓲꓹ ꓫꓵˍ ꓟ ꓕꓲ ꓙꓵꓹ ꓗꓪ ꓧꓼ ꓓꓹ ꓡꓳ=