ꓪꓳꓽ ꓒꓬꓽ ꓪꓰ ꓔꓶ ꓚꓱꓹ

ꓪꓳꓽ ꓒꓬꓽ ꓪꓰ ꓘꓴꓽ ꓗꓪ ꓬꓲ ꓒꓴ ꓒꓴ ꓝꓳꓽ꓾ ꓬꓲꓸ ꓫꓵꓽ ꓫꓵꓽ ꓝꓳꓽ꓾ ꓬꓲꓸ ꓧꓪꓼ ꓧꓪꓼ ꓝꓳꓽ ꓐꓰ ꓬꓲꓸ ꓠꓲꓹ ꓛꓵꓼ ꓝꓳꓽ ꓐꓯ ꓢꓲ 4 ꓙꓰꓽ ꓙꓳˍ ꓟ ꓥ ꓡꓳ=

Broccoli ꓐꓯ ꓟ ꓪꓳꓽ ꓒꓬ ꓪꓰ ꓠꓲꓹ ꓛꓵꓼ ꓠꓬ ꓙꓬꓻ ꓢꓯꓼ ꓧꓳˍ ꓟ꓾ ꓙꓬ ꓢꓯꓼ ꓠꓵˍ ꓟ ꓪꓳꓽ ꓒꓬꓽ ꓜꓲ ꓥ ꓢꓲ ꓬꓲ ꓜꓲ ꓠꓬ 2’ ꓛꓲ ꓟꓴˍ ꓡꓳ=

ꓲ-ꓔ-ꓡꓲ ꓗꓴꓷꓼ ꓗꓪ ꓮ ꓘꓶꓸ ꓜꓽ ꓟꓬꓽˍ ꓟ ꓥ ꓢꓲ ꓗꓳꓸ ꓗꓷ ꓟ 20 ꓘꓳꓼ ꓗꓪ ꓐꓰ ꓪꓴꓸ ꓔꓴ ꓢꓲ ꓟꓵꓽ ꓗꓳꓹ ꓓꓵ ꓓꓵ ꓗꓪ ꓔꓶ ꓜꓽ ꓩꓴ ꓡ ꓗꓷ ꓟ ꓥꓳ=

ꓬꓲ ꓪꓰ ꓗꓪ ꓧꓪꓽ ꓖꓳ ꓓꓱꓽ ꓐꓱ ꓶ ꓙꓲꓻ ꓖꓴ ꓙꓳˍ ꓟ ꓢꓯꓼ ꓮ ꓟꓬꓹ ꓐꓻˍ ꓟ ꓥ ꓢꓲ ꓚꓮꓠꓚꓰꓣ ꓠꓻ ꓔꓯˍ ꓟꓲ ꓗꓽ ꓕꓸ ꓐ ꓡꓹ ꓡꓳ= ꓬꓲ ꓪꓰ ꓔꓯ ꓠꓬ ꓬꓲ ꓜꓲꓽ꓾ ꓬꓲ ꓟꓲꓺ ꓜꓽ ꓐ ꓡˍ ꓡꓳ=

ꓪꓳꓽ ꓒꓬ ꓪꓰ ꓠꓬ ꓙꓬꓻ ꓝꓲ ꓗꓪ ꓔꓶ ꓒꓬꓱꓼ ꓡ ꓢꓹ ꓡꓳ= ꓟꓶꓽ ꓦ ꓦ ꓝꓲ ꓕꓯ ꓬꓲ ꓪꓰ ꓪꓰ ꓡ ꓝꓲ ꓠꓲꓹ ꓫꓵˍ ꓠꓬ ꓞꓻ ꓝꓲ ꓡꓳꓹ ꓬꓰ ꓔꓬ ꓕꓯ ꓔꓶ ꓐ ꓡ ꓢꓲ꓾ ꓞꓻ ꓝꓲ ꓓꓵꓽ ꓡ ꓕꓯ ꓪꓰ ꓡ ꓝꓲ ꓠꓲꓹ ꓫꓵˍ ꓠꓬ ꓟꓶꓽ ꓦ ꓦ ꓝꓲ ꓕꓯ ꓔꓶ ꓐ ꓡꓹ ꓡꓳ=

ꓐꓯ ꓠꓲꓹ ꓫꓵˍ ꓟ ꓠꓬ ꓞꓻ ꓝꓲ ꓡꓳꓹ ꓬꓰ ꓔꓬ ꓕꓯ ꓔꓶ ꓔ ꓠꓬ ꓟꓶꓽ ꓦ ꓦ ꓝꓲ ꓕꓯ ꓬꓲ ꓪꓰ ꓪꓰ ꓡ ꓢꓲ꓾ ꓟꓶꓽ ꓦ ꓦ ꓝꓲ ꓕꓯ ꓔꓶ ꓔ ꓠꓬ ꓞꓻ ꓝꓲ ꓓꓵꓽ ꓡꓹ ꓕꓯ ꓬꓲꓸ ꓪꓰ ꓪꓰ ꓡˍ ꓡꓳ=

ꓬꓲ ꓟꓲꓺ ꓗꓪ Nitrogen ꓢꓯꓼ꓾ Phosphorus ꓢꓯꓼ ꓐꓰ Calcium ꓢꓯꓼ ꓮ ꓟꓬꓹ ꓙꓳˍ ꓟ ꓬꓲ ꓟꓲꓺ ꓗꓪ ꓠꓬ ꓟꓬꓽ ꓠꓬꓲ ꓔꓶ ꓒꓬꓱꓼ ꓡ ꓓꓹ ꓡꓳ= ꓟꓽ ꓔꓶ ꓧꓶꓸ ꓕꓯ ꓔꓶ ꓓꓴ ꓙ ꓖꓶ ꓔ ꓟ ꓬꓲ ꓟꓲ ꓕꓯ ꓢꓲꓺ ꓗꓪ ꓩꓲꓸ ꓛꓲꓻ ꓟꓵꓽ ꓛꓵꓽ ꓐꓴ ꓔꓯ 2” ꓛꓲꓺ ꓧꓳꓽ ꓖꓶ ꓠ ꓗꓹ ꓡꓳ= ꓩꓲꓸ ꓛꓲꓻ ꓧꓳꓽ ꓓꓳ ꓡꓰ ꓠꓬ ꓬꓲꓸ ꓘꓴ ꓕꓲ ꓘꓴ ꓗꓪ ꓬꓲꓸ ꓫꓵꓸ ꓢꓺ ꓢꓶꓽ ꓕꓲ ꓝꓳꓹ ꓔꓶ ꓠ ꓔ ꓡꓳ= ꓬꓲ ꓫꓵꓸ ꓫꓵꓸ ꓔ ꓟ ꓬꓲ ꓘꓴ ꓬꓲ ꓝꓳꓹ ꓕꓲ ꓝꓳꓹ ꓐꓰ ꓕꓲ ꓝꓳꓹ ꓠꓬꓲꓽ ꓗꓴꓸ ꓝꓸꓼ ꓗꓪ 18” ꓗꓶꓹ ꓶꓽ ꓝꓲ ꓢꓲ꓾ ꓕꓲ ꓚꓬꓸ ꓐꓰ ꓕꓲ ꓚꓬꓸ ꓠꓬꓲꓽ ꓗꓴꓸ ꓝꓸꓼ ꓗꓪ 3’ ꓛꓲꓺ ꓗꓶꓹ ꓶꓽ ꓝꓲ ꓠ ꓔ ꓡꓳ=

ꓬꓲ ꓜꓲ ꓡꓲꓸ ꓤ ꓣꓱꓻ ꓓꓳ ꓡ ꓗꓸ ꓠꓯꓸ ꓬꓲ ꓟꓲ ꓗꓪ ꓟꓳꓼ ꓫꓬꓹ ꓡꓲꓸ ꓖꓶˍ ꓕꓯ ꓬꓲ ꓜꓲ ꓔꓯ ꓟꓽ ꓠ ꓡꓰ ꓝꓲ ꓠ ꓤ ꓟꓳ ꓠ ꓔ ꓡꓳ=

ꓔꓶ ꓗꓷ ꓗꓸ ꓠꓯꓸ ꓢꓺ ꓠꓽ ꓙꓳ ꓡˍ ꓕꓯ ꓬꓲ ꓟꓲꓺ ꓗꓪ ꓩꓲꓸ ꓛꓲꓻ ꓧꓳꓽ ꓖꓶ ꓠꓯꓹ ꓡꓳ= ꓢꓺ ꓠꓽ ꓕꓲ ꓧꓪꓹ ꓧꓳꓽ ꓖꓶ ꓠꓯꓹ ꓟ ꓥꓳ= ꓬꓲ ꓜꓲ ꓡꓲꓸ ꓤ ꓪꓴꓽ ꓡ ꓔꓬ ꓕꓯ꓾ ꓬꓲ ꓜꓲ ꓗꓪ ꓬꓲ ꓒꓬꓽ 3 ꓒꓬꓽ ꓡꓲꓺ ꓒꓬꓽ ꓠꓱꓽ ꓡ ꓔꓬ ꓕꓯ ꓬꓲꓸ ꓝꓳꓹ ꓕꓲ ꓝꓳꓹ ꓗꓪ ꓪꓴꓽˍ ꓟ ꓬꓲ ꓜꓲ ꓔꓯ ꓚꓰꓺ ꓔ ꓢꓲ ꓠꓱꓸ ꓐꓯꓼ ꓬꓲ ꓜꓲ ꓤ ꓤ ꓔꓯ ꓚꓵꓹ ꓦ ꓗꓷ=

ꓟꓵꓽ ꓘꓳꓼ ꓮ ꓘꓶꓸ ꓙꓬꓻˍ ꓠꓬ꓾ ꓩꓲꓸ ꓛꓲꓻ ꓠꓲꓸ ꓡꓰ ꓠꓬ ꓬꓲ ꓪꓰ ꓣꓳꓺ ꓡꓰ ꓗꓴˍ ꓡꓳ= Phosphorus ꓢꓯꓼ ꓠꓲꓸ ꓡꓰˍ ꓟꓲ ꓬꓲ ꓒꓬꓽ ꓠꓬ ꓠꓲꓹ ꓛꓵꓼ ꓗꓪ ꓐꓰ ꓬꓲꓸ ꓫꓵꓽ ꓫꓵꓽ ꓔꓯꓸ ꓟꓳꓸ ꓑꓲꓸ ꓡꓰ ꓗꓴˍ ꓡꓳ=

ꓬꓲ ꓜꓲ ꓗꓪ ꓬꓲ ꓪꓰ ꓪꓰ ꓡ ꓢꓲ ꓬꓲ ꓧꓪꓼ ꓧꓪꓼ ꓪꓰ ꓟꓳ ꓡ ꓠꓬ ꓶꓼ ꓫ ꓓ ꓡꓻꓳ= ꓕꓯ ꓢꓲ ꓗꓪ ꓟ ꓬꓲ ꓪꓰ ꓘꓴꓸ ꓔꓯ ꓶꓼ ꓗꓷ ꓢꓲ ꓗꓸ ꓠꓯꓸ ꓓꓳ ꓡꓹ ꓟ ꓬꓲ ꓡꓯꓼ ꓐꓵꓼˍ ꓟꓲ ꓶꓼ ꓜꓽ ꓓꓹ ꓡꓳ=