ꓗ-ꓔꓳ-ꓡꓲꓗ ꓘꓴ ꓜꓲꓼ ꓞꓳ ꓗꓪ ꓟꓸ ꓟꓲꓽ ꓔꓯ ꓣꓳꓽ ꓮ ꓡꓰ ꓠꓵ ꓮ ꓡꓰ ꓒꓳ ꓟꓽ ꓠ ꓡ

ꓠꓲꓹ ꓠꓱ ꓟ ꓬꓲꓼ ꓤ ꓠꓬꓲ ꓤ ꓐꓴ ꓕꓱ ꓕꓲꓽ ꓠ ꓠꓺ ꓠꓬꓲˍ ꓟ ꓚꓱ ꓗꓪ ꓠꓬ ꓧꓶꓽ-ꓟꓵ ꓬꓴ-ꓠꓮꓠ ꓗꓪ ꓐꓰ ꓟꓮꓣꓬ ꓥꓪꓸ-ꓠ ꓡꓰ ꓠꓹ ꓠꓬꓲ ꓔ ꓟ ꓔꓯ ꓒꓳ ꓖꓶꓽ ꓠꓲꓹ ꓫꓵˍ ꓡꓳ= ꓬꓲꓸ ꓡꓰ ꓣꓳꓽ ꓗ-ꓔꓳ-ꓡꓲꓗ ꓘꓴ ꓜꓲꓼ ꓞꓳ ꓗꓪ ꓟꓸ ꓟꓲꓽ ꓔꓯ ꓣꓳꓽ ꓮ ꓡꓰ ꓠꓵ ꓮ ꓡꓰ ꓒꓳ ꓟꓽ ꓠ ꓡ? ꓐꓰ ꓠꓺ ꓠꓬꓲˍ ꓔ ꓡꓳ=

            ꓟꓮꓣꓬ ꓳ ꓧꓪꓸ ꓧꓪꓸ= ꓣꓳꓽ ꓗ-ꓔꓳ-ꓡꓲꓗ ꓘꓴ ꓜꓲꓼ ꓞꓳ ꓗꓪ ꓢꓲ ꓫꓬ ꓕꓳ ꓶ ꓔꓯ ꓮ ꓡꓰ ꓠꓱ ꓮ ꓡꓰ ꓒꓳ ꓟ ꓠ ꓡ ꓐꓰ ꓐꓯ ꓕꓯ ꓠꓬ ꓒꓳ ꓠꓸ ꓡꓳ ꓐꓯ ꓟꓲ ꓓˍ ꓡꓳ= ꓒꓳ ꓟ ꓠ ꓐꓯ ꓥˍ ꓟꓲ ꓬꓯꓼ ꓡꓳ= ꓮ ꓡꓰꓳ ꓐꓯ ꓠꓬ ꓣꓳꓽ ꓘꓴ ꓜꓲꓼ ꓞꓳ ꓡꓰ ꓚꓰꓺ ꓔ ꓖꓶꓽˍ ꓟ ꓙ ꓚꓱꓹ ꓘꓴꓽ ꓗꓪ ꓐꓰ ꓒꓳꓹ ꓠꓬ ꓬꓲ ꓓ ꓡꓳ= ꓖꓳ ꓡꓱ ꓥˍ ꓟꓲ ꓧꓶꓸ ꓧꓶꓸ ꓫꓵ ꓓꓵꓽ ꓙ ꓟꓽ ꓠ=

            ꓘꓴ ꓜꓲꓼ ꓞꓳ ꓡꓰ ꓚꓰꓺ ꓔ ꓖꓶꓽ ꓟ ꓠꓬ ꓣꓳꓽ ꓔꓯ ꓗꓶꓺ ꓣꓳꓺ ꓝꓲꓸ ꓫꓵꓽ ꓟꓽ ꓥ= ꓣꓳꓽ ꓓꓵꓽ ꓙ ꓚꓱ ꓔꓯ ꓠꓬꓲꓸ ꓛꓰ ꓫꓵꓽ ꓟ ꓥ= ꓬꓲꓸ ꓬꓲ ꓢꓲ ꓠꓬ ꓕꓱ ꓡꓱ ꓥ ꓐꓭ=

            ꓤ ꓠꓱ ꓤ ꓙ ꓖꓴ ꓫꓱꓽ ꓟ ꓗꓴꓸ ꓫꓵꓽ ꓕꓲꓽ ꓣꓳ  ꓔꓯ ꓐꓹ ꓐ ꓟꓹ ꓟ ꓣꓱꓽ ꓢꓴ ꓠꓬ ꓖꓳ ꓫꓱ ꓖꓶꓽ ꓠ ꓗˍ ꓡꓳ= ꓖꓳ ꓡꓱ ꓥˍ ꓟꓲ ꓤ ꓠꓱ ꓤ ꓖꓳ ꓟ ꓙ ꓖꓴ ꓫꓱꓽ ꓗꓴꓸ ꓡꓰ ꓕꓯ ꓐꓹ ꓐ ꓟꓹ ꓟ ꓣꓱꓽ ꓢꓴ ꓖꓳ ꓫꓱ ꓟꓽ ꓛꓵ ꓥˍ ꓟꓲ꓾ ꓙ ꓖꓴ ꓟꓸ ꓖꓶꓽ ꓠ ꓗˍ ꓡꓳ ꓟ ꓥ ꓡ? ꓙ ꓖꓴ ꓫꓱꓽ ꓗꓴꓸ ꓕꓲꓽ ꓖ ꓟꓽ ꓓ ꓢꓰ= ꓟꓬꓺ ꓑꓬꓺ ꓓꓴ ꓗꓪ ꓟꓽ ꓙꓰ ꓠꓹ ꓟ ꓐꓹ ꓐ ꓟꓹ ꓟ ꓣꓱꓽ ꓢꓴ ꓠꓬ ꓙ ꓖꓴ ꓟꓸ ꓖꓶꓽ ꓠ ꓗˍ ꓡꓳ=

            ꓕꓱ ꓟ ꓡꓰ ꓐꓰ ꓘꓴ ꓜꓲꓼ ꓞꓳ ꓥˍ ꓟꓲ ꓣꓳꓽ ꓓꓵꓽ ꓙ ꓚꓱ ꓟꓽ ꓧꓶꓸ ꓬꓰ ꓠꓹ ꓟ ꓙ ꓖꓴ ꓧꓳꓽ ꓟꓸ ꓖꓶꓽ ꓔꓬ ꓕꓲꓽ ꓖꓼ ꓥ ꓡꓳ= ꓢꓲ ꓫꓬ ꓕꓳ ꓶ ꓔꓯ ꓣꓳꓽ ꓬꓲꓸ ꓬꓲ ꓢꓲ ꓒꓳˍ ꓕꓯ ꓠꓽ ꓝꓲ ꓓꓴ ꓐꓴ ꓙꓵꓹ ꓠꓲ ꓪꓽ ꓘꓴ ꓘꓶꓽ ꓗꓪ ꓟ ꓔꓯ ꓟꓽ ꓔꓰꓺ ꓡꓰ꓾ ꓥ ꓠꓬ ꓟꓽ ꓧꓶꓸ ꓡꓰ ꓝꓲ ꓥꓳ ꓐꓯ ꓠꓬ ꓢꓲ ꓫꓬ ꓕꓳ ꓶ ꓔꓯ ꓒꓳ ꓠ ꓡꓳ ꓐꓰ ꓐꓯ ꓖꓶꓽ ꓠꓲꓹ ꓫꓵ ꓡꓳ= ꓫ ꓟꓳ=