ꓮꓸ ꓠꓬꓲꓽ ꓛꓲꓽ ꓗꓪ ꓒꓴ (ꓘꓴꓽ ꓦ) ꓩꓲꓸ-ꓛꓲꓻ

ꓮꓸ ꓠꓬꓲꓽ ꓛꓲꓽ ꓗꓪꓺ ꓒꓴ (ꓘꓴꓽ ꓦ) ꓔꓯ ꓣꓱꓽˍ ꓟ ꓠꓬ ꓪꓳꓽ ꓒꓬꓽ ꓪꓳ ꓟꓲꓸ ꓔꓶ ꓖꓴ ꓬꓲ ꓟꓲ ꓐꓴ ꓗꓪ ꓣꓱꓽ ꓞꓹ ꓟ ꓢꓯꓼ ꓐꓴ ꓟꓶ ꓠꓹ ꓟ ꓮ ꓠꓱ ꓕꓯ ꓡꓰ ꓣꓱꓽ ꓩꓴ ꓡˍ ꓟ ꓥ ꓡꓳ=

ꓮꓸ ꓠꓬꓲꓽ ꓛꓲꓽ ꓗꓪꓺ ꓒꓴ (ꓘꓴꓽ ꓦ) ꓠꓬ ꓟꓲꓽ ꓛꓬ ꓠꓱꓸ ꓦꓱꓽ ꓮ ꓘꓶꓸ ꓠꓬꓼ ꓡꓯꓼˍ ꓟ ꓐꓰ ꓮ ꓘꓶꓸ ꓝꓱˍ ꓟ ꓔꓯ ꓪ ꓙꓲ ꓙꓲꓻ ꓡ ꓝꓲˍ ꓡꓳ= ꓖꓳ ꓟ ꓡꓰꓽ ꓟꓽ ꓞꓲ ꓟꓲ ꓛꓬ ꓘꓴꓽ ꓗꓪ ꓔꓬ ꓟ ꓐꓶꓻ ꓓꓲ ꓐꓴ ꓔꓯˍ ꓟ ꓠꓲꓸ ꓡꓰ ꓝꓲ ꓐ ꓡˍ ꓡꓳ= ꓝꓮꓲ ꓟꓳꓼ ꓢꓶꓽ ꓫꓵꓸ ꓢꓶꓽ ꓐꓴ ꓔꓯ ꓐꓬ ꓡꓰ ꓝꓲˍ ꓟ ꓪꓴꓸ ꓠꓬꓲ ꓬꓲ ꓟꓲ ꓗꓪ ꓟꓳꓼ ꓮ ꓟꓬꓹ ꓫꓬꓹ ꓡꓲꓸ ꓟꓽ ꓛꓵꓺ= ꓮꓸ ꓠꓬꓲꓽ ꓛꓲꓽ ꓗꓪꓺ ꓒꓴ (ꓘꓴꓽ ꓦ) ꓔꓯ ꓪꓳꓽ ꓒꓬ ꓔꓶ ꓖꓴ ꓬꓲ ꓟꓲ ꓐꓰ ꓬꓲ ꓟꓲ ꓓꓽ ꓟ ꓗꓪ ꓣꓱꓽ ꓓꓹ ꓡꓳ=

ꓮꓸ ꓠꓬꓲꓽ ꓛꓲꓽ ꓗꓪꓺ ꓒꓴ (ꓘꓴꓽ ꓦ) ꓔꓯ ꓣꓱꓽˍ ꓟ ꓗꓪ ꓙꓲꓻ ꓖꓴ ꓮ ꓟꓬꓹ ꓙꓳˍ ꓡꓳ=

ꓬꓲ ꓟꓲ ꓗꓪ ꓟꓲ ꓛꓬ ꓠꓬꓼ ꓡꓯꓼˍ ꓟ ꓔꓯ ꓗꓽ ꓕꓸ ꓙ ꓢꓲ꓾ ꓬꓲ ꓜꓲ ꓐꓱ ꓶ ꓣꓱꓽ ꓞꓹ ꓟ ꓢꓯꓼ ꓐꓴ ꓔꓯˍ ꓟꓲ ꓖꓶ ꓐꓹ ꓡ ꓟ ꓪꓴꓸ ꓠꓬꓲ ꓬꓲ ꓫꓵꓸ ꓗꓪ ꓐꓰ ꓬꓲ ꓜꓲ ꓡꓲꓸ ꓤ ꓧꓶꓽ ꓧꓶꓽ ꓣꓱꓻ ꓓꓳ ꓡ ꓝꓲˍ ꓡꓳ= ꓬꓲ ꓜꓲ ꓔꓯˍ ꓟꓲ ꓪꓴꓽ ꓡ ꓝꓲˍ ꓡꓳ= ꓬꓲ ꓒꓬꓽ ꓐꓰ ꓬꓲ ꓚꓰꓺ ꓔꓯ ꓒꓬ ꓦꓹ ꓟ ꓐꓶꓻ ꓓꓲ ꓠꓻ ꓐꓴ ꓔꓯˍ ꓟꓲ ꓗꓽ ꓕꓸ ꓙˍ ꓡꓳ= ꓮꓸ ꓠꓬꓲꓽ ꓛꓲꓽ ꓗꓪ ꓐꓹ ꓟ꓾ ꓮꓸ ꓠꓬꓲꓽ ꓛꓲꓽ ꓗꓪ ꓚꓬꓼ ꓓꓹ ꓟ ꓟꓳꓼ ꓢꓶꓽ ꓐꓴ ꓔꓯˍ ꓟꓲ ꓮ ꓔꓳꓸ ꓞꓴ ꓦ ꓗꓷ ꓟ ꓑꓶꓸ ꓓꓴ ꓟꓳꓼ ꓮ ꓟꓬꓹ ꓟꓽ ꓣꓱꓻ ꓡ= ꓝꓮꓲ ꓠꓬ ꓩꓲꓸ-ꓛꓲꓻ ꓐꓱ ꓶˍ ꓟꓲ ꓒꓴ ꓮ ꓟꓬꓹ ꓟꓽ ꓖꓴ= ꓮꓸ ꓠꓬꓲꓽ ꓛꓲꓽ ꓗꓪꓺ ꓒꓴ (ꓘꓴꓽ ꓦ) ꓣꓱꓽ ꓢꓲ ꓔꓶ ꓔ ꓟ ꓪꓳꓽ ꓒꓬ ꓐꓴ ꓠꓬ ꓪꓴ ꓔ ꓟ ꓩꓲꓸ-ꓛꓲꓻ ꓣꓱꓽ ꓢꓲ ꓔꓶ ꓔ ꓟ ꓢꓲꓸ ꓟꓽ ꓞꓲꓺ ꓪ ꓙꓲ ꓜꓽ ꓙꓲꓻˍ ꓡꓳ=

ꓮꓸ ꓠꓬꓲꓽ ꓛꓲꓽ ꓗꓪꓺ ꓒꓴ (ꓘꓴꓽ ꓦ) ꓫꓬꓹ ꓟ ꓗꓪ ꓣꓱꓽ ꓞꓹ ꓟ ꓠꓬ꓾ ꓦ ꓐ ꓕꓲ ꓟ ꓛꓲ ꓬꓲ ꓙꓴꓺ ꓡꓱꓸ ꓔ ꓟ ꓮꓸ ꓠꓬꓲꓽ ꓛꓲꓽ ꓐꓴ ꓔꓯ ꓞꓴ ꓢꓲ ꓐꓬ ꓖꓴ ꓡꓰ ꓠꓬ ꓓꓳ ꓡˍ ꓟ ꓗꓪꓺ ꓒꓴ ꓘꓴꓽ ꓦ ꓐꓴ ꓔꓯ ꓣꓱꓽ ꓠ ꓗꓹ ꓡꓳ= ꓔꓶ ꓠ ꓔ ꓟ ꓬꓲ ꓟꓲ ꓠꓬ ꓠꓱꓸ ꓠꓬꓼ ꓡꓯꓼ ꓥ ꓕꓯ ꓠꓽ ꓬꓲ ꓟꓲ ꓕꓯ ꓢꓲ ꓕꓲꓽ ꓚꓳ ꓡꓳ ꓗꓪ ꓮꓸ ꓠꓬꓲꓽ ꓛꓲꓽ ꓙꓴꓺ ꓗꓶ ꓔ ꓢꓲ ꓕꓲ ꓦꓬꓽ ꓡꓱꓸꓼ ꓞꓴ ꓔ ꓠ ꓗꓹ ꓡꓳ= ꓔꓶ ꓠ ꓔ ꓟ ꓬꓲ ꓟꓲ ꓠꓬ ꓧꓶꓽ ꓚꓲ ꓟꓬꓽˍ ꓟ ꓟꓵꓽ ꓙꓴꓺ ꓥ ꓕꓯ ꓠꓽ ꓠꓱꓸ ꓐꓯꓼ ꓕꓲ ꓖ ꓗꓪ ꓮꓸ ꓠꓬꓲꓽ ꓛꓲꓽ ꓞꓴ ꓗꓷ ꓢꓲ ꓗꓪ ꓒꓴ ꓘꓴꓽ ꓦ ꓔꓯ ꓬꓲ ꓟꓲ ꓗꓪ ꓧꓳꓽ ꓖꓶ ꓠꓯꓹ ꓡꓳ=

ꓠꓯꓼ ꓙꓵꓹ ꓕꓯ ꓮꓸ ꓠꓬꓲꓽ ꓛꓲꓽ ꓗꓪꓺ ꓒꓴ (ꓘꓴꓽ ꓦ) ꓔꓯ ꓬꓲ ꓟꓲ ꓕꓯ ꓢꓲ ꓗꓪ ꓧꓳꓽ ꓗꓷ ꓢꓲ ꓮ ꓖꓳꓽ ꓣꓱꓽ ꓢꓲ ꓠꓬꓲ ꓬꓲ ꓟꓲ ꓗꓪ ꓟ ꓠꓱꓸ ꓦꓱꓽ ꓐꓰ ꓑꓯꓸ ꓗꓷ ꓫꓳꓽ ꓗꓷ ꓠ ꓗꓹ ꓡꓳ=ꓬꓲ ꓟꓲ ꓗꓪ ꓬꓲ ꓙꓬ ꓧꓳꓽ ꓖꓶˍ ꓕꓯ ꓬꓲꓻ ꓙꓬ ꓞꓼ ꓞꓼ ꓟꓽ ꓗ ꓡꓰ ꓠ ꓬꓲ ꓟꓲ ꓗꓪ ꓝꓮꓲ ꓕꓲ ꓧꓪꓹ ꓧꓳꓽ ꓖꓶ ꓠ ꓗꓹ ꓡꓳ=

ꓓꓳ ꓡꓰ ꓠꓬ ꓬꓲ ꓟꓲ ꓗꓪ ꓬꓲꓻ ꓙꓬ ꓧꓳꓽ ꓖꓶꓽ= ꓗꓸ ꓠꓯꓸ ꓕꓯ ꓠꓬ ꓬꓲ ꓫꓵꓸ ꓫꓵꓸ ꓐ ꓡˍ ꓡꓳ=

ꓕꓱ ꓗꓪ ꓢꓷ ꓔ ꓓꓴ ꓠꓬ꓾ ꓮꓸ ꓠꓬꓲꓽ ꓛꓲꓽ ꓗꓪꓺ ꓒꓴ (ꓘꓴꓽ ꓦ) ꓔꓯ ꓬꓲ ꓟꓲ ꓗꓪ 2” ꓗꓪ ꓛꓲˍ ꓡꓰ ꓧꓳꓽ ꓓꓹ ꓡꓳ= ꓟꓶ ꓦ ꓦ ꓝꓲ ꓕꓯ ꓟꓶˍ ꓟ ꓮꓸ ꓠꓬꓲꓽ ꓛꓲꓽ ꓔꓯ ꓣꓱꓽ ꓟꓽ ꓓ= ꓗꓪꓺ ꓒꓴ ꓘꓴꓽ ꓦ ꓐꓴ ꓠꓬ ꓟꓲꓽ ꓦꓲ ꓙꓱꓼ ꓖꓴ ꓡꓰ ꓗꓴꓸˍ ꓟ ꓪꓴꓸ ꓠꓬꓲ ꓟꓲꓽ ꓦꓲ ꓮ ꓘꓶꓸ ꓟꓽ ꓙꓱꓼ ꓟ ꓟꓶꓽ ꓘꓶꓽ ꓕꓯ ꓡꓰꓽ ꓮ ꓔꓳꓸ ꓞꓴ ꓠ ꓔ ꓡꓳ=