ꓬꓲꓻ ꓪꓴꓻ ꓘꓴꓽ (ꓑꓳꓽ ꓘꓴꓽ) ꓗꓪ ꓔꓶ ꓓꓴ ꓐꓱ ꓶ ꓟꓵꓽ ꓛꓲꓻ ꓫꓬꓹ ꓟ ꓚꓱꓹ

ꓧꓶꓸ ꓕꓯ ꓡꓲ-ꓢꓴ ꓡꓲ ꓪ ꓐꓴ ꓮ ꓒꓵꓽ ꓮ ꓑ ꓤꓶꓻ ꓗꓪ ꓔꓶ ꓖꓴ ꓟꓵꓽ ꓮ ꓟꓬꓹ ꓙꓳˍ ꓟ ꓪꓴꓸ ꓠꓬꓲ ꓪꓽ ꓙꓵꓽ ꓚꓵꓸ ꓔꓶ ꓜꓽˍ ꓟ ꓗꓪ ꓞꓲ ꓠꓲꓹ ꓕꓲ ꓘꓳꓼ ꓕꓱ ꓕꓲ ꓖ ꓗꓪ ꓔꓶ ꓗꓷ ꓠꓬ ꓝꓮꓲ ꓕꓲ ꓘꓳꓼ ꓛꓲ ꓡˍ ꓕꓯ ꓝꓮꓲ ꓕꓲ ꓖ ꓗꓪ ꓙꓰ ꓢꓲ ꓔꓶˍ ꓟ ꓥ ꓡꓳ= ꓕꓲ ꓖ ꓗꓪ ꓡꓰꓽ ꓬꓲ ꓘꓳꓼ ꓟꓶ ꓤ ꓟꓽ ꓔꓶ=

ꓖꓳ ꓡꓱ ꓥˍ ꓟꓲ ꓮ ꓟꓶ ꓟ ꓦꓬꓼ ꓠꓬꓲ ꓗꓪ ꓠꓬ ꓪ ꓙꓵꓽ ꓟꓵꓽ ꓗꓪ ꓔꓬ ꓢꓴ ꓮ ꓟꓬꓹ ꓠꓬ ꓡꓳ ꓒꓱ ꓓꓽ ꓟ ꓗꓪ ꓚꓵꓸ ꓛꓲ ꓡ ꓕꓯ ꓔꓶ ꓜ ꓔꓶ ꓓꓳ ꓖꓴ ꓐꓱ ꓶ ꓟꓵꓽ ꓮ ꓟꓬꓹ ꓫ ꓡꓰꓳ= ꓔꓶ ꓖꓴ ꓙꓳˍ ꓥ ꓟꓲ ꓬꓲ ꓟꓲ ꓕꓲ ꓟˍ ꓗꓪ ꓡꓰꓽ ꓮ ꓟꓬꓹ ꓘꓳꓼ ꓔꓶ ꓩꓴ ꓡ ꓗꓷ ꓟ ꓑꓶꓸ ꓓꓴ ꓟꓵꓽ ꓛꓲꓻˍ ꓟꓲ ꓟꓽ ꓙꓳ ꓗꓺ ꓡꓰ ꓖꓴ ꓢꓲ ꓧꓶꓸ ꓕꓯ ꓟ ꓡꓰ ꓔꓶ ꓜꓽ ꓟꓽ ꓠ ꓟ ꓮ ꓟꓬꓹ ꓔꓳꓽ ꓜꓳꓽ ꓔꓬ ꓪˍ ꓡꓳ=

ꓟꓵꓽ ꓛꓲꓻ ꓟꓽ ꓙꓳ ꓗꓷ ꓡꓰ ꓕꓯ ꓠꓬ ꓢꓴ ꓡꓰ ꓫꓬꓹ ꓢꓲ ꓪꓴꓽ ꓔꓬ ꓟ ꓠꓯꓼ ꓞꓲꓼ ꓐꓹ ꓟ ꓩꓲꓸ ꓛꓲꓻ ꓐꓴ ꓣꓱꓽ ꓔꓬ ꓪ ꓟ ꓑꓶꓸ ꓓꓴ ꓟꓵꓽ ꓠꓬ ꓪ ꓙꓲ ꓙꓴꓺ ꓡꓰ ꓔꓬ꓾ ꓟꓵꓽ ꓛꓲꓻˍ ꓟꓲ ꓕꓲ ꓔꓲˍ ꓡꓲꓸ ꓟꓽ ꓙꓳ ꓗꓷ ꓡꓰꓳ= ꓕꓲ ꓐꓱ ꓠꓬ ꓦꓲ ꓕꓯꓽ ꓢꓲ ꓗꓪ꓾ ꓦꓲ ꓡꓯꓼ ꓗꓪ ꓔꓶ ꓖꓴ ꓬꓲ ꓗꓳꓹ ꓫꓬꓹ ꓢꓲ ꓔꓶ ꓔꓬ ꓟˍ ꓟꓲ ꓙꓳ꓾ ꓕꓲ ꓐꓱ ꓶ ꓬꓲꓻ ꓪꓴ ꓗꓪ ꓧꓳꓽ ꓢꓲ ꓔꓶ ꓔꓬ ꓖꓴˍ ꓟ ꓥꓳ=

ꓖꓳ ꓡꓱ ꓠꓬꓲ ꓮ ꓟꓶ ꓠꓬ ꓬꓲꓻ ꓪꓴꓻ ꓗꓪ ꓔꓶ ꓢꓴ ꓐꓱ ꓶ꓾ ꓬꓲ ꓗꓳꓹ ꓫꓬꓹ ꓢꓲ ꓔꓶ ꓔꓬ ꓢꓴ ꓐꓱ ꓶ꓾ ꓟꓵꓽ ꓛꓲꓻ ꓗꓺ ꓡꓰ ꓙꓴꓺ ꓡꓰ ꓢꓲ ꓔꓶ ꓓꓴ ꓐꓱ ꓬꓰ ꓫ ꓔꓬ ꓢꓴ ꓐꓴ ꓐꓱ ꓶ ꓟꓵꓽ ꓛꓲꓻ ꓙꓳˍ ꓟ ꓠꓱꓸ ꓦꓱꓽ (ꓟꓲ ꓠꓯ ꓧꓪꓽ ꓾ ꓡꓸ ꓑ ꓛꓲꓽ) ꓫꓬꓹ ꓚꓱꓹ ꓔꓯ ꓐꓯ ꓟꓳꓸ ꓖꓶ ꓩꓴ ꓡꓹ ꓥꓳ=

1. ꓟꓵꓽ ꓛꓵꓽ ꓐꓯ ꓟ ꓠꓬ ꓢꓲꓹ ꓒꓬꓽ ꓐꓰ ꓟꓲ ꓠꓯ ꓧꓪꓽ (ꓡꓸ ꓑ ꓛꓲꓽ) ꓐꓴ ꓕꓲ ꓪꓽ ꓑꓯꓸ ꓡꓰ ꓫꓳꓽ ꓡꓰ ꓢꓲ ꓛꓵꓽ ꓡꓰ ꓟ ꓔꓯ ꓐꓯ ꓟ ꓥꓳ꓾ ꓐꓰ ꓐꓯ ꓓꓹ ꓡꓳ= ꓟꓵꓽ ꓛꓵꓽ ꓟꓽ ꓙꓳ ꓠꓬ ꓢꓲꓹ ꓒꓬꓽ ꓑꓲꓸ ꓓꓹ ꓟ ꓟꓵꓽ ꓗꓪ ꓟ ꓟꓲ ꓛꓬ ꓔꓯ ꓕꓯꓽ ꓢꓲ 3” ꓔꓯ 100 ꓗꓲ-ꓡꓳ ꓣꓴ ꓗꓷ= ꓕꓲ ꓦꓬꓻ ꓗꓲ-ꓡꓳ ꓠꓬ ꓦꓲꓻ ꓫꓬꓹ ꓟ ꓗꓪ ꓣꓱꓽˍ ꓟ ꓑꓲꓹ-ꓡꓯꓼ ꓟꓳ ꓠꓳ ꓠꓬꓲꓽ ꓟꓳ ꓠꓳ ꓙꓳˍ ꓡꓳ=
2. ꓗ ꓠꓯ ꓠꓬ ꓜ ꓚꓬꓸ ꓕꓯ ꓜ ꓒꓴ ꓬꓲ ꓪꓴꓸ ꓕꓲ ꓧꓪꓹ ꓞꓲꓽ ꓔ ꓟ ꓪꓴꓻ ꓬꓲ ꓔꓯ ꓬꓲ ꓕꓴꓽ (ꓥ ꓠꓬ) ꓬꓲꓻ ꓪꓴꓻ ꓗꓪ ꓧꓳꓽ ꓗꓷ ꓢꓲ ꓢꓽ ꓠꓬꓲ ꓛꓲ ꓗꓶ ꓔ=
3. ꓝꓮꓲ ꓐꓬꓽ-ꓠ-ꓕꓹ ꓬꓲ ꓠꓯꓺ ꓠꓯꓺ 25 ꓒꓯꓼ ꓛꓲ ꓔꓯ 2 ꓡꓲ-ꓔ ꓙꓳ ꓡ ꓠ ꓛꓲ ꓬꓲꓻ ꓙꓬ ꓧꓳꓽ ꓗꓷ ꓢꓲ ꓚꓬꓸ ꓗꓷ (ꓚꓺ ꓗꓷ)= ꓚꓬꓸ ꓓꓳ ꓡꓰ ꓚꓺ ꓓꓳ ꓡꓰ ꓠꓬ ꓬꓲ ꓕꓴꓽ ꓗꓪ ꓧꓳꓽ ꓗꓷ ꓢꓲ 3 ꓠꓬꓲ ꓛꓲ ꓫ ꓔ ꓠꓯꓹ ꓡꓳ=
4. ꓙꓱꓽ ꓤ ꓛꓲꓽ ꓮ ꓙꓵꓽ ꓔꓯ ꓬꓲ ꓧꓶꓽ ꓬꓰ ꓔ= ꓙꓱꓽ ꓤ ꓛꓲꓽ ꓐꓴ ꓔꓯ 2 ꓒꓰꓽ ꓗꓪ ꓐꓰ 4 ꓒꓰꓽ ꓗꓪ ꓛꓲ ꓣꓱꓽ ꓓꓹ ꓡꓳ=

ꓖꓳ ꓟ ꓡꓰꓽ ꓟꓽ ꓞꓲꓺ ꓗꓪꓺ ꓒꓴ ꓘꓴꓽ ꓦ ꓮ ꓠꓬꓲ ꓮ ꓚꓵꓹ ꓘꓳꓸ ꓘꓳꓸ 3 ꓕꓴꓽ ꓗꓪ ꓐꓰ 5 ꓕꓴꓽ ꓗꓪ ꓛꓲ

ꓫꓲꓸ-ꓧꓪꓰꓹ ꓒꓴꓻ 2 ꓕꓴꓽ ꓗꓪ ꓐꓰ 4 ꓕꓴꓽ

ꓮꓸ ꓭ ꓩꓴ (ꓯꓹ ꓩꓴ) ꓘꓳꓸ ꓛꓱꓸ 20 ꓟ ꓗꓪ ꓐꓰ 40 ꓟ

ꓢꓲꓹ ꓢꓶꓽ ꓮ ꓘꓶꓸ ꓟꓲꓺ ꓡꓰ ꓟ ꓔꓯˍ ꓟꓲ ꓧꓳꓽ ꓓꓹ ꓡꓳ= ꓝꓮꓲ ꓠꓬ ꓢꓲꓹ ꓒꓬꓽ ꓛꓵꓽ ꓔꓯˍ ꓟꓲ ꓣꓱꓽ ꓓꓹ ꓡꓳ=

ꓕꓱ ꓟ ꓮ ꓙꓵꓽ ꓔꓯ ꓑꓯꓸ ꓗꓷ ꓫꓳꓽ ꓗꓷ ꓢꓲ ꓕꓯ ꓢꓲ ꓗꓪ ꓥ ꓒꓬꓽ ꓐꓰ ꓑꓲꓸ ꓖꓶ ꓢꓲ ꓠꓬꓲ ꓞꓲꓺ ꓠꓬꓲ ꓙꓳ ꓡꓹ ꓕꓯ ꓣꓱꓽ ꓓ ꓡꓺꓳ=