ꓟꓴ ꓗꓪ ꓗꓴꓷꓼ ꓙ ꓖꓴ ꓠꓬ ꓮ ꓡꓲ ꓘꓶ ꓛꓲꓺ ꓫˍ ꓟ

ꓠꓬꓲꓸ ꓠꓬꓲ ꓟ ꓢꓲꓽ ꓫꓬ ꓕꓳ ꓶ ꓗꓪ ꓢꓲꓺ ꓒ ꓬꓰ-ꓢꓴ ꓡꓰ ꓣꓳ ꓔꓯ ꓟꓴ ꓗꓪ ꓗꓴꓷꓼ ꓙ ꓖꓴ ꓠꓬ ꓮ ꓡꓲ ꓘꓶ ꓛꓲꓺ ꓫˍ ꓟ꓾ ꓮ ꓡꓲ ꓐꓰ ꓙꓰ ꓠꓹ ꓟ ꓠꓬꓲꓸ ꓠꓬꓲ ꓟ ꓢꓲꓽ ꓫꓬ ꓕꓳꓽ ꓶ ꓗꓪ ꓣꓳ ꓔꓯ ꓬꓲ ꓡꓰ ꓠꓬꓲꓽ ꓚꓱꓹ ꓟꓸ ꓖꓶ ꓡˍ ꓡꓳ= ꓬꓲ ꓪꓴꓸ ꓕꓲ ꓟ ꓠꓬ ꓠꓴ ꓪ ꓟꓴꓽ ꓗꓪ ꓗꓴꓷ; ꓡꓯ ꓫꓴ ꓔꓯ ꓠꓵˍ ꓠꓬ꓾ ꓠꓴ ꓪ ꓪꓴ-ꓢ ꓔꓯ ꓠꓲꓹ ꓠꓵ ꓐꓷˍ ꓠꓬ ꓠꓴ ꓪ ꓕꓲ ꓣꓳ ꓛꓳ ꓕꓲ ꓣꓳ ꓠꓲꓹ ꓠꓵ ꓡꓯ ꓘꓳ꓾ ꓐꓰ ꓐꓯ ꓖꓶ ꓡ ꓔꓬ ꓡꓳ=

ꓮ ꓡꓲ ꓐꓰ ꓠꓲꓹ ꓠꓵ ꓠꓯꓹ ꓡꓯ ꓘꓳ ꓠ ꓗˍ ꓡ? ꓢꓲꓺ ꓒ ꓬꓰ-ꓢꓴ ꓡꓰ ꓕꓱ ꓡꓱ ꓐꓯ ꓡꓳ= ꓠꓴ ꓪ ꓗꓳ ꓡꓳ ꓗꓪ ꓟ ꓕꓲ ꓣꓳ ꓔꓯ ꓥꓪ ꓐꓱ ꓬꓲꓻ ꓙꓬ ꓕꓲ ꓗꓶꓸ ꓖꓶˍ ꓠꓬ ꓬꓲ ꓐꓱ ꓶ ꓠꓬ ꓟꓴꓽ ꓗꓪ ꓗꓴꓷꓼ ꓡꓯ ꓫꓴ ꓟꓶˍ ꓥꓳ꓾ ꓐꓰ ꓐꓯ ꓖꓶ ꓡ ꓔꓬ ꓟ ꓥ ꓡꓳ= ꓕꓱ ꓡꓱ ꓐꓯ ꓔꓬ ꓟ ꓠꓬ ꓫ ꓢꓴ ꓟꓷꓼ ꓢꓴ ꓔꓯ ꓠꓴ ꓪ ꓬꓰ ꓙˍ ꓠꓬ ꓥꓪ ꓔꓯ ꓬꓰ ꓙˍ ꓟ ꓥꓳ= ꓠꓴ ꓪ ꓠꓲꓹ ꓗꓴ ꓟꓬ ꓗꓴ ꓖꓶˍ ꓠꓬ ꓥꓪ ꓔꓯ ꓠꓲꓹ ꓗꓴ ꓟꓬ ꓗꓴ ꓖꓶ ꓔꓬ ꓟˍ ꓟꓲ ꓥ ꓡꓳ= ꓠꓴ ꓪ ꓙꓲˍ ꓟ ꓬꓰˍ ꓟ ꓠꓬ ꓥꓪ ꓔꓯ ꓬꓰ ꓖꓶ ꓔꓬ ꓟ ꓥ ꓡꓳ=

ꓖꓳ ꓡꓱ ꓠꓬꓲ ꓠꓴ ꓪ ꓟꓲ ꓠꓯ ꓗꓪ ꓔꓬ ꓕꓯ ꓕꓲ ꓣꓳ ꓛꓳ ꓕꓲ ꓣꓳ ꓠꓲꓹ ꓠꓵ ꓡꓯ ꓘꓳ ꓢꓲ ꓬꓰ ꓙ ꓔꓳꓹ ꓙˍ ꓠꓬ ꓠꓴ ꓪ ꓐꓱ ꓶ ꓟꓴꓽ ꓗꓪ ꓗꓴꓷꓼ ꓡꓯ ꓫꓴ ꓟꓶˍ ꓥꓳ꓾ ꓐꓰ ꓐꓯ ꓖꓶ ꓡ ꓔꓬ ꓡꓳ= ꓖꓳ ꓡꓱ ꓠꓬꓲ ꓠꓲꓹ ꓠꓵˍ ꓟ ꓬꓲꓼ ꓤ ꓠꓬꓲ ꓤ ꓐꓴꓳ꓾ ꓠꓴ ꓪ ꓮ ꓡꓲ ꓫꓵꓽ ꓟꓲ ꓠꓯ ꓡ ꓞꓳ ꓕꓲ ꓣꓳ ꓡꓲꓸ ꓣꓳ ꓪꓴ-ꓢ ꓒꓬꓱꓽ ꓡꓰ ꓐꓰ ꓬꓲ ꓪ ꓠꓯꓸꓼ ꓗꓪ ꓟꓳ ꓠ ꓗˍ ꓡꓳ= ꓖꓳ ꓡꓱ ꓟꓽ ꓥ ꓠꓬ ꓠꓴ ꓪ ꓪꓴ-ꓢ ꓔꓯ ꓟꓽ ꓟꓳ ꓗꓷ ꓡꓰˍ ꓥꓳ= ꓖꓳ ꓕꓯ ꓠꓬ ꓟꓴꓽ ꓗꓪ ꓗꓴꓷꓼ ꓡꓯ ꓫꓴ ꓟꓽ ꓙꓳ ꓗꓷ ꓡꓰˍ ꓥꓳ=

ꓪꓽ ꓘꓴ ꓦꓲꓻ ꓗꓪ ꓙꓰ ꓢꓲ ꓪꓴ-ꓢ ꓔꓯ ꓧꓪ ꓔꓬ ꓡ? ꓮ ꓡꓲ ꓗꓪ ꓙꓰ ꓢꓲ ꓪꓴ-ꓢ ꓔꓯ ꓧꓪ ꓔꓬ ꓡ? ꓠꓲꓹ ꓠꓵˍ ꓟ ꓬꓲꓼ ꓤ ꓠꓬꓲ ꓤ ꓐꓴꓳ꓾ ꓪꓴ-ꓢ ꓠꓬ ꓣꓳꓽ ꓒ ꓕꓲ꓾ ꓣꓳ ꓗꓳ ꓡꓳ ꓗꓪ ꓔꓬ ꓟ ꓠꓶꓽ ꓛꓳ ꓕꓲ ꓣꓳˍ ꓡꓰꓽ ꓥ ꓡꓳ= ꓖꓳ ꓟ ꓪꓴꓸ ꓠꓬꓲ ꓣꓳ ꓬꓲ ꓔꓯ ꓬꓰ ꓙ ꓔꓳꓹ ꓙ꓾ ꓠꓲꓹ ꓠꓵ ꓡꓯ ꓘꓳ ꓐꓰ ꓢꓲꓺ ꓒ ꓬꓰ-ꓢꓴ ꓡꓰ ꓐꓯ ꓟ ꓥ ꓡꓳ= ꓕꓱ ꓟ ꓡꓰꓽ ꓟꓽ ꓞꓲꓺ ꓝꓮꓲ ꓕꓲ ꓙꓰꓽ ꓠꓬ ꓟꓴꓽ ꓗꓪ ꓗꓴꓷꓼ ꓗꓪ ꓙꓰˍ ꓕꓯ ꓠꓴ ꓪ ꓟꓬ ꓢꓶꓽ ꓠꓬꓲꓽ ꓐꓽ ꓙꓳ ꓢꓲ ꓮ ꓔꓳꓸ ꓛꓬꓼ ꓟꓵꓽ ꓗꓪ ꓛꓲꓺ ꓬꓰˍ ꓟ ꓕꓯꓽ ꓢꓲꓺ ꓠꓴ ꓪ ꓟꓬ ꓢꓶꓽ ꓕꓲ ꓐꓽ꓾ ꓥ ꓠꓬ꓾ ꓟꓬ ꓢꓶꓽ ꓟꓽ ꓙꓳ ꓙꓳ ꓟꓴꓽ ꓗꓪ ꓗꓴꓷꓼ ꓗꓪ ꓛꓲꓺ ꓬꓰˍ ꓟ ꓠꓬ ꓪ ꓙꓲ ꓙꓲˍ ꓡꓳ= ꓕꓱ ꓟ ꓡꓰꓽ ꓟꓽ ꓞꓲꓺ ꓠꓴ ꓪ ꓡꓯ ꓒꓯꓹ ꓝꓴꓲꓸ ꓬꓰˍ ꓠꓬ ꓬꓰˍ ꓟ ꓕꓲ ꓒꓯꓹ ꓔꓯ ꓓꓶꓻ ꓞꓷꓹ ꓗꓷ= ꓠꓴ ꓪ ꓛꓲ ꓒꓯꓹ ꓠꓬ ꓟꓽ ꓙꓲꓻ ꓟ ꓝꓴꓲꓸ ꓗꓪ ꓧꓳꓽ ꓙꓰˍ ꓟ ꓖꓳ ꓕꓲ ꓐꓽ ꓔꓯ ꓓꓶꓻ ꓗꓷ꓾ ꓐꓰ ꓢꓲꓺ ꓒ ꓬꓰ-ꓢꓴ ꓡꓰ ꓐꓯ ꓖꓶ ꓡ ꓔꓬ ꓡꓳ=

ꓕꓱ ꓟ ꓮ ꓫꓵꓽ ꓔꓯ ꓐꓯ ꓔꓬ ꓡ? ꓢꓲꓺ ꓒ ꓬꓰ-ꓢꓴ ꓠꓬ ꓠꓴ ꓪ ꓛꓬ ꓗꓷ ꓠꓬ ꓠꓴ ꓪ ꓟꓬ ꓢꓶꓽ ꓔꓯ ꓗꓳꓸ ꓓꓳ ꓗꓷ= ꓠꓴ ꓪ ꓟꓽ ꓙꓲꓻ ꓟ ꓬꓰ ꓗꓷ ꓠꓬ ꓠꓴ ꓪ ꓡꓯ ꓒꓯꓹ ꓔꓯ ꓓꓶꓻ ꓞꓷꓹ ꓗꓷ꓾ ꓐꓯ ꓕꓯ ꓢꓲꓺ ꓒ ꓬꓰ-ꓢꓴ ꓐꓯ ꓟ ꓡꓰ ꓣꓳ ꓬꓰˍ ꓠꓬ ꓮ ꓟˍ ꓟꓲ ꓟꓬ ꓢꓶꓽ ꓟꓽ ꓙꓳ꓾ ꓡꓯ ꓒꓯꓹ ꓟꓽ ꓙꓳ꓾ ꓛꓲ ꓒꓯꓹ ꓟꓽ ꓙꓳ ꓗꓷ ꓡꓰˍ ꓥꓳ=

ꓕꓱ ꓗꓪ ꓬꓰ-ꓢꓴ ꓡꓰ ꓐꓯ ꓟ ꓠꓬ ꓚꓲ ꓛꓬ ꓟꓬ ꓢꓶꓽ꓾ ꓡꓯ ꓒꓯꓹ꓾ ꓛꓲ ꓒꓯꓹ ꓔꓯ ꓚꓵꓺ ꓚꓵꓺ ꓓꓶꓻ ꓝꓲˍ ꓟ ꓟꓽ ꓥ= ꓣꓳ ꓟꓬ ꓢꓶꓽ ꓠꓬ ꓝꓴꓲ ꓗꓪ ꓧꓳꓽ ꓓꓵꓽ ꓙꓰˍ ꓕꓯ ꓟꓽ ꓛꓳ ꓠꓹ ꓟ꓾ ꓣꓳ ꓡꓯ ꓒꓯꓹ ꓛꓲ ꓒꓯꓹ ꓗꓪ ꓐꓰ ꓝꓴꓲꓸ ꓬꓰ ꓪ ꓡꓰˍ ꓕꓯ ꓝꓴꓲꓸ ꓬꓰˍ ꓟ ꓠꓽ ꓗꓷ ꓢꓲ ꓓꓵꓽ ꓙ ꓒꓳꓹ ꓬꓲꓼ ꓡ ꓠꓹ ꓟ ꓔꓯ ꓐꓯ ꓔꓬ ꓟ ꓥ ꓡꓳ=

ꓖꓳ ꓡꓱ ꓠꓬꓲ ꓫ ꓙꓵ ꓟꓷꓽ ꓙꓵ ꓔꓬ ꓥˍ ꓟꓲ ꓪꓴ-ꓢ ꓐꓰ ꓕꓲ ꓪ ꓔꓬ ꓥꓳ ꓐꓯ ꓠꓬ ꓠꓴ ꓪ ꓐꓱ ꓶ ꓕꓲ ꓞꓲꓼ ꓕꓲ ꓑ ꓡꓯ ꓫꓴ ꓟꓶˍ ꓥꓳ= ꓕꓱ ꓡꓱ ꓟꓽ ꓥ ꓥ ꓝꓴꓲꓸ ꓠꓯꓸꓼ ꓗꓪ ꓡꓰꓽ ꓙꓰ ꓢꓲ ꓒꓴꓻ ꓫꓵꓺ ꓮ ꓟꓬꓹ ꓟꓶ ꓡꓰ ꓥˍ ꓟꓲ ꓟꓬ ꓢꓶꓽ ꓠꓬꓲꓽ ꓐꓽ ꓡꓱꓸꓼ ꓙꓳ ꓢꓲ ꓮ ꓔꓳꓸ ꓛꓬꓼ ꓟꓵꓽ ꓗꓪ ꓙꓰˍ ꓟ ꓕꓯꓽ ꓢꓲꓺ ꓫꓸ ꓫꓸ ꓡꓰꓽ ꓟꓴꓽ ꓗꓪ ꓗꓴꓷꓼ ꓗꓪ ꓙꓰˍ ꓟ ꓠꓬ ꓪ ꓙꓲ ꓙꓲˍ ꓡꓳ꓾ ꓐꓯ ꓟ ꓐꓯ ꓘꓶꓽ ꓔꓯ ꓣꓳ ꓮ ꓙꓵꓽ ꓠꓲꓹ ꓟ ꓘꓴꓽ ꓗꓪ ꓗꓷ ꓔ ꓡꓯ= ꓕꓱ ꓡꓱ ꓖꓳ ꓑꓳꓸꓼ ꓠꓬ ꓣꓳ ꓠꓶꓽ ꓛꓳ ꓕꓲ ꓛꓳ ꓔꓯ ꓠꓲꓹ ꓠꓵˍ ꓟ ꓠꓬ ꓣꓳ ꓪꓴ-ꓢ ꓔꓯ ꓠꓲꓹ ꓠꓵ ꓔꓬ ꓟ ꓥ ꓡꓳ= ꓕꓱ ꓡꓱ ꓖꓳ ꓑꓳꓸꓼ ꓠꓬ ꓝꓴꓲꓸ ꓕꓽ ꓬꓰ= ꓟꓴꓽ ꓗꓪ ꓗꓴꓷꓼ ꓡꓯ ꓫꓴ ꓠꓬ ꓣꓳ ꓐꓱ ꓶ ꓥ ꓡꓳ=