ꓬꓰ-ꓢꓴ ꓬꓲꓻ ꓙꓬ ꓕꓯꓽ ꓢꓲ ꓫꓱꓽˍ ꓟ

ꓕꓲ ꓠꓬꓲ ꓙꓳˍ ꓕꓯ ꓢꓲꓺ ꓒ ꓬꓰ-ꓢꓴ ꓠꓬ ꓪꓽ ꓘꓴ ꓠꓹ ꓟ ꓢꓲ ꓡꓲ ꓡꓲˍ ꓐꓰ ꓪ ꓚꓲꓺ ꓕꓯꓽ ꓢꓲ ꓗꓪ ꓙꓰˍ ꓡꓳ= ꓬꓲ ꓠꓬ ꓬꓲ ꓝꓲ ꓓꓴ ꓐꓴ ꓔꓯ ꓬꓲꓻ ꓐꓱ ꓖꓳ ꓐ ꓢꓲ ꓗꓪ ꓙꓰ ꓝꓲˍ ꓡꓳ= ꓬꓲ ꓝꓲ ꓓꓴ ꓐꓴ ꓠꓬ ꓡꓲꓺ ꓗꓪ ꓓꓵꓽ ꓢꓲ ꓬꓲꓻ ꓐꓱ ꓖꓳ ꓐꓽ ꓢꓲ ꓗꓪ ꓙꓰ ꓔꓬ ꓕꓯ  ꓔꓱꓹ ꓫꓵ ꓠꓯꓸꓼ ꓗꓪ ꓛꓲ ꓬꓰˍ ꓕꓯ ꓠꓬ ꓟꓲꓽ ꓦꓲ ꓕꓳꓽ ꓥꓳꓽ ꓓ ꓟ ꓙꓱꓼ ꓢꓲ ꓠꓬꓲ ꓶꓽ ꓤ ꓗꓪ ꓐꓰ ꓒꓴ ꓛ ꓛ ꓡꓰꓽ ꓞꓳ ꓤ ꓕꓲ ꓣꓳ ꓡ ꓔꓬ ꓟ ꓔꓯ ꓟꓳˍ ꓡꓳ= ꓬꓲ ꓪ ꓠꓬ ꓫꓵꓻ ꓗꓴꓸ ꓫꓵꓻ ꓦ ꓥ ꓡꓳ ꓐꓰ ꓓꓵꓽ ꓙ ꓢꓲ ꓠꓬꓲ ꓮ ꓘꓶꓸ ꓙꓳꓺˍ ꓡꓳ=  ꓖꓳ ꓡꓱ ꓥ ꓟꓲ ꓢꓲꓺ ꓒ ꓬꓰ-ꓢꓴ ꓠꓬ ꓕꓽ ꓙꓳꓺ꓾ ꓥꓪ ꓥ ꓡꓳ꓾ ꓐꓰ ꓐꓯ ꓖꓶˍ ꓟ ꓠꓬꓲꓸ ꓠꓬꓲ ꓟꓸ ꓟꓲꓽ ꓗꓪ ꓣꓳ ꓑ ꓙꓽ ꓪˍ ꓡꓳ=

ꓒꓲ-ꓕꓱ ꓠꓬ ꓢꓲꓺ ꓒ ꓠꓴ ꓥ ꓕꓯ ꓠꓽ ꓥꓪ ꓔꓯ ꓠꓴ ꓔꓬ ꓗꓪ ꓡ ꓠꓹ ꓟ ꓘꓴ ꓡꓯ꓾ ꓐꓰ ꓐꓯ ꓕꓯ ꓢꓲꓺ ꓒ ꓬꓰ-ꓢꓴ ꓡꓰ ꓬꓲ ꓔꓯ ꓥꓪ ꓔꓬ ꓗꓪ ꓡꓯ꓾ ꓐꓰ ꓐꓯ ꓡꓳ= ꓖꓳ ꓕꓯ ꓒꓲ-ꓕꓱ ꓡꓰ ꓬꓲꓻ ꓙꓬ ꓕꓯꓽ ꓢꓲ ꓗꓪ ꓙ ꓖꓴ ꓫꓱꓽ ꓔꓴ ꓡˍ ꓡꓳ= ꓬꓲ ꓠꓬ ꓢꓲꓺ ꓒ ꓬꓰ-ꓢꓴ ꓔꓬ ꓗꓪ ꓙꓰ ꓠꓹ ꓟ ꓬꓲꓻ ꓙꓬ ꓕꓯꓽ ꓢꓲ ꓗꓪ ꓙ ꓖꓴ ꓫꓱꓽ ꓢꓲ ꓙꓰˍ ꓡꓳ= ꓖꓳ ꓡꓱ ꓥˍ ꓟꓲ ꓟꓲꓽ ꓦꓲ ꓕꓳꓽ ꓥꓳꓽ  ꓓꓽ ꓟ ꓔꓯ ꓟꓳˍ ꓟ ꓐꓰ ꓬꓲꓻ ꓙꓬ ꓠꓬ ꓙꓳꓺ ꓓꓴ ꓧˍ ꓟ ꓔꓯ ꓟꓳˍ ꓕꓯ ꓬꓲ ꓠꓬ ꓙꓳꓺ ꓢꓲ ꓠꓬꓲ ꓬꓲꓻ ꓙꓬ ꓘꓴꓽ ꓗꓪ ꓠꓬꓲꓸ ꓓꓵꓽ ꓙꓰꓳ= 

ꓖꓳ ꓕꓯ ꓢꓲꓺ ꓒ ꓬꓰ-ꓢꓴ ꓡꓰ ꓬꓲ ꓔꓯ ꓬꓲ ꓡꓯꓽ ꓒꓯꓹ ꓔꓯ ꓖꓳ ꓢꓲ ꓙꓵꓻ ꓠꓲꓹ ꓟꓽ ꓙꓳ ꓢꓴ꓾ ꓮ ꓫꓵꓽ ꓑꓶꓸ ꓓꓴ ꓟꓽ ꓙꓵꓻ ꓬꓰˍ ꓡ ꓐꓰ ꓬꓲ ꓔꓯ ꓟꓸ ꓖꓶˍ ꓡꓳ= ꓖꓳ ꓡꓱ ꓠꓬꓲ ꓡꓲ ꓕꓯꓽ ꓢꓲ ꓗꓪ ꓔꓬ ꓟ ꓬꓲ ꓝꓲ ꓓꓴ ꓐꓴ ꓮ ꓙꓵꓽ ꓠꓬ ꓓꓵꓽ ꓙ ꓮ' ꓡꓰ ꓢꓲ ꓠꓬꓲ ꓢꓲꓺ ꓒ ꓬꓰ-ꓢꓴ ꓔꓯ ꓙꓵꓻ ꓡꓰˍ ꓡꓳ ꓐꓯ ꓟ ꓬꓲ ꓟꓸ ꓟꓲꓽ ꓠꓬꓲꓸ ꓠꓬꓲ ꓣꓳ ꓑ ꓙ ꓪˍ ꓟ ꓥ ꓡꓳ=

ꓟꓸ ꓟꓲꓽ ꓕꓱ ꓟ ꓗꓪ ꓐꓰ ꓣꓳ ꓔꓯ ꓐꓯ ꓖꓶ ꓡˍ ꓟ ꓠꓬ ꓢꓲꓺ ꓒ ꓬꓰ-ꓢꓴ ꓠꓬ ꓮ ꓫꓵꓽ ꓟꓲ ꓬꓰ ꓐ ꓡ ꓢꓴ ꓥ ꓡꓳ= ꓬꓲ ꓠꓬ ꓟꓴꓽ ꓗꓪ ꓟꓲ ꓠꓯ ꓮ ꓙꓵꓽ ꓔꓯ ꓚꓰꓼ ꓢꓴ ꓥ ꓢꓲ ꓠꓬꓲ ꓬꓲ ꓬꓰ ꓟꓽ ꓐ ꓡ ꓟ ꓕꓲ ꓫꓵꓽˍ ꓟꓲ ꓟꓽ ꓙꓳ= ꓖꓳ ꓡꓱ ꓠꓬꓲ ꓣꓳ ꓟꓲ ꓠꓯ ꓕꓱ ꓟ ꓗꓪ ꓔꓬ ꓕꓯ ꓠꓲꓹ ꓫ ꓟꓬ ꓫ ꓓꓴ꓾ ꓠꓲꓹ ꓟ ꓐꓶꓽ ꓡꓰ ꓢꓴ ꓬꓲ ꓫꓵꓽ ꓬꓲ ꓙꓰꓽ ꓮ ꓟꓬꓹ ꓔꓳꓹ ꓜꓳꓽˍ ꓥ ꓟꓲ ꓣꓳ ꓢꓲꓺ ꓒ ꓬꓰ-ꓢꓴ ꓠꓬ ꓮ ꓫꓵꓽ ꓔꓯˍ ꓟꓲ ꓬꓰ ꓐ ꓡ ꓢꓴ ꓥ ꓟ ꓑꓶꓸ ꓓꓴ ꓬꓲ ꓔꓯ ꓦ ꓡꓱ ꓔ ꓠ ꓗˍ ꓡꓳ ꓐꓰ ꓣꓳ ꓔꓯ ꓢꓷꓸ ꓝꓲˍ ꓟ ꓥ ꓡꓳ=

ꓠꓬꓲꓽ ꓫꓵꓽ ꓕꓲ ꓫꓵꓽ ꓠꓬ꓾ ꓒꓲ-ꓕꓱ ꓠꓬ ꓬꓲꓻ ꓙꓬ ꓕꓯꓽ ꓢꓲ ꓙ ꓖꓴ ꓫꓱꓽ ꓙꓰˍ ꓟ ꓡꓰ ꓐꓰ ꓣꓳ ꓥˍ ꓟꓲ ꓢꓲꓺ ꓒ ꓬꓰ-ꓢꓴ ꓔꓯ ꓙꓵꓻˍ ꓕꓯ꓾ ꓢꓲꓺ ꓒ ꓬꓰ-ꓢꓴ ꓒꓬꓱꓽ ꓟꓬ ꓔꓯ ꓡꓳꓸ ꓢꓲ ꓙ ꓫꓱꓽ ꓙꓰˍ ꓕꓯ ꓣꓳ ꓒꓬꓱꓼ ꓡ ꓟꓽ ꓓ ꓐꓰ ꓓꓵꓽ ꓙ ꓔ ꓟ ꓥˍ ꓟꓲ ꓒꓬꓱꓼ ꓡ ꓓˍ ꓡꓳ= ꓣꓳ ꓟꓲ ꓠꓯ ꓞꓳ ꓤ ꓕꓲ ꓛꓱꓽ ꓔꓯ ꓟꓳꓸ ꓒꓬꓱꓼ ꓡ ꓟꓽ ꓓ ꓫꓵꓽ ꓥ ꓡꓳ ꓐꓰ ꓚꓬꓹ ꓔ ꓟ ꓥ ꓟꓲ꓾ ꓢꓲꓺ ꓒ ꓬꓰ-ꓢꓴ ꓔꓯ ꓙꓵꓻ ꓢꓲ ꓢꓲꓺ ꓒ ꓬꓰ-ꓢꓴ ꓔꓯ ꓡꓳꓸ ꓢꓲ ꓕꓶꓺ ꓕꓶꓺ ꓡꓰꓽ ꓔꓵꓹ ꓢꓲ ꓙꓰˍ ꓕꓯ ꓠꓬ ꓒꓬꓱꓼ ꓡ ꓓˍ ꓡꓳ ꓐꓯ ꓟ ꓠꓬꓲꓸ ꓠꓬꓲ ꓟꓸ ꓟꓲꓽ ꓗꓪ ꓐꓰ ꓣꓳ ꓔꓯ ꓟꓳꓸ ꓖꓶ ꓡˍ ꓡꓳ=

ꓖꓳ ꓡꓱ ꓠꓬꓲ ꓣꓳ ꓕꓲ ꓠꓬꓲ ꓕꓲ ꓠꓬꓲ ꓛꓳ ꓫꓱꓽ ꓔꓬ ꓕꓯ ꓮ ꓫꓵꓽ ꓫ ꓓꓴ ꓟꓷꓼ ꓓꓴ ꓔꓳꓹ ꓜꓳꓽ ꓡˍ ꓥ ꓟꓲ ꓮ ꓡꓲ ꓫꓵꓽ ꓦꓬꓼ ꓠꓬꓲ ꓗꓳꓸ ꓔꓬ ꓥˍ ꓟꓲ ꓢꓲꓺ ꓒ ꓬꓰ-ꓢꓴ ꓔꓯ ꓙꓵꓻ ꓢꓲ ꓠꓬꓲ꓾ ꓢꓲꓺ ꓒ ꓬꓰ-ꓢꓴ ꓔꓬ ꓡꓳ ꓐꓯ ꓟ ꓔꓯ ꓣꓳ ꓕꓶꓺ ꓕꓶꓺ ꓡꓰ ꓙꓵꓻ ꓢꓲ ꓠꓬꓲ ꓟꓲ ꓙꓬ ꓙꓰˍ ꓥꓳ ꓐꓯ ꓠꓬ ꓪꓴ-ꓢ ꓠꓬ ꓣꓳ ꓔꓯ ꓪ ꓜꓲ ꓶ ꓥꓳꓽ ꓙꓱꓽ ꓖꓶ ꓡˍ ꓥꓳ= ꓖꓳ ꓟ ꓡꓰꓽ ꓟꓽ ꓞꓲꓺ ꓣꓳ ꓕꓱ ꓡꓰ ꓛꓳ ꓫꓱꓽ ꓔꓬ ꓕꓯ ꓣꓳ ꓕꓲ ꓖ ꓕꓲ ꓧꓪꓹ ꓧꓪꓸ ꓟꓽ ꓓ꓾ ꓥ ꓠꓬ꓾ ꓬꓰ ꓟꓽ ꓘꓴ ꓢꓲ ꓬꓲꓻ ꓙꓬ ꓘꓴꓽ ꓗꓪ ꓠꓬꓲꓸ ꓓꓵꓽ ꓙꓰˍ ꓥ ꓟꓲ ꓢꓲꓺ ꓒ ꓬꓰ-ꓢꓴ ꓠꓬ ꓣꓳ ꓔꓯ ꓚꓬꓴꓸ ꓙ ꓠꓹ ꓟ ꓬꓲ ꓡꓯ ꓒꓯꓹ ꓔꓯ ꓮ ꓕꓯˍ ꓟꓲ ꓛꓱ ꓔꓴ ꓔ ꓡꓳ ꓐꓯ ꓟ ꓔꓯ ꓢꓷꓸ ꓠ ꓗꓹ ꓡꓳ=

ꓬꓲ ꓠꓬ ꓣꓳ ꓔꓯ ꓬꓰ ꓙ ꓠꓹ ꓟ ꓮ ꓕꓯˍ ꓟꓲ ꓔꓬ ꓡꓳ= ꓖꓳ ꓡꓱ ꓠꓬꓲ ꓟꓽ ꓙꓳꓺ ꓙꓳꓺ ꓬꓰ ꓗꓴꓸ ꓠꓹ  ꓟ꓾ ꓬꓰ ꓘꓴ ꓠꓹ ꓟ ꓪꓴ-ꓢ ꓡꓰ ꓣꓳ ꓔꓯ ꓢꓯꓼ ꓪ ꓖꓶ ꓔꓬ ꓟ ꓥ ꓡꓳ= ꓮ ꓡꓲ ꓫꓵꓽ ꓦꓬꓼ ꓠꓬꓲ ꓔꓳꓹ ꓜꓳꓽ ꓡˍ ꓥ ꓟꓲ ꓢꓲꓺ ꓒ ꓐꓰ ꓕꓲ ꓪ ꓛꓳ ꓫꓱꓽ ꓢꓲ ꓠꓬꓲ ꓮ ꓫꓵꓽ ꓬꓰˍ ꓥ ꓟꓲ꓾ ꓮ ꓗꓪ ꓙꓰˍ ꓥ ꓟꓲ ꓑꓶꓸ ꓑꓶꓸ ꓡꓰꓽ ꓬꓰ ꓑꓶꓸ꓾ ꓙꓰ ꓑꓶꓸ꓾ ꓐꓯ ꓑꓶꓸ ꓢꓲ ꓠꓬꓲ ꓟꓲꓽ ꓙꓬ ꓙꓰˍ ꓥꓳ ꓐꓯ ꓠꓬ ꓪꓴ-ꓢ ꓡꓰ ꓣꓳ ꓔꓯ ꓟꓬꓽ ꓠꓬꓲ ꓶꓼ ꓤ ꓫꓱꓹ ꓤ ꓮ ꓟꓬꓹ ꓖꓶ ꓡˍ ꓥꓳ꓾ ꓐꓰ ꓠꓬꓲꓸ ꓠꓬꓲ ꓟꓸ ꓟꓲꓽ ꓗꓪ ꓐꓰ ꓣꓳ ꓔꓯ ꓐꓯ ꓟꓳꓸ ꓖꓶ ꓡˍ ꓟ ꓥ ꓡꓳ=