ꓢꓲꓽ ꓫꓬ ꓕꓳ ꓶ ꓔꓱ ꓕˍ ꓟ (Sunday reflection)

ꓣꓳꓺˍ ꓟ ꓗ ꓘꓶꓽ ꓗꓪ ꓓꓵꓽ ꓡꓰ ꓠꓯ,ˍ ꓟ 

ꓬꓰ-ꓢꓴ ꓠꓬ ꓙꓱ-ꓣꓴ-ꓢ-ꓡꓱ ꓗꓪ ꓙꓰˍ ꓕꓯ꓾ ꓬꓲ ꓗꓳꓸ ꓬꓯꓼˍ ꓟ ꓡꓳꓻ ꓒꓱ ꓘꓹ ꓒꓱ ꓗꓪ ꓟꓸ ꓟꓲꓽ ꓟꓸ ꓖꓶˍ ꓡꓳ꓿ 23 ꓡꓽ ꓞꓳ ꓕꓲ ꓣꓳ ꓡꓰ ꓬꓲ ꓔꓯ꓾ ꓢꓲ ꓒꓽꓳ꓾ ꓢꓯꓼ ꓟꓬ ꓝꓸ ꓟꓶ ꓢꓴ ꓠꓬ ꓠꓲꓸˍ ꓡ?꓾ ꓐꓰ ꓠ ꓠꓬꓲˍ ꓡꓳ꓿ 24 ꓖꓳ ꓕꓯ ꓬꓲ ꓡꓰ ꓬꓲ ꓪꓽ ꓔꓯ꓾ ꓠꓴ ꓪꓽ ꓔꓯ ꓥꓪ ꓐꓯ ꓖꓶˍ ꓠꓬꓲ꓾ ꓠꓴ ꓪꓽ ꓠꓬ ꓣꓳꓺˍ ꓟ ꓗ ꓘꓶꓽ ꓗꓪ ꓓꓵ ꓡꓰ ꓠꓹ ꓟ ꓢꓯꓼ ꓕꓵꓼ꓿ ꓮ ꓡꓲꓳ ꓐꓯ ꓠꓬ ꓢꓹ ꓖꓪ ꓓꓵꓽ ꓙꓰ ꓠꓲꓹ ꓫꓵˍ ꓟꓲ ꓓꓵꓽ ꓙꓰ ꓟꓽ ꓪ ꓢꓴ ꓮꓽ ꓟꓬꓹ ꓙꓳˍ ꓥꓳ꓿ 25 ꓦꓲ ꓢꓲ ꓒꓽ ꓔꓴ ꓡ ꓢꓲ ꓗ ꓘꓶꓽ ꓚꓵꓸ ꓗꓷ ꓠꓬ꓾ ꓠꓴ ꓪꓽ ꓠꓽ ꓠꓱ ꓫꓱꓸ ꓟS ꓗꓪ ꓦꓰꓼ ꓞ ꓢꓲ ꓠꓬꓲ꓾ ꓗ ꓘꓶꓽ ꓲ'ꓼ ꓔꓴ ꓡ ꓢꓲ꓾ ꓢꓲ ꓒꓽꓳ꓾ ꓥꓪ ꓠꓴꓽ ꓔꓯ ꓗ ꓘꓶꓽ ꓒꓴ ꓖꓶ ꓡꓯ꓾ ꓐꓯˍ ꓟꓲ꓾ ꓠꓴ ꓪꓽ ꓔꓯ ꓥꓪ ꓟꓽ ꓢꓷ꓾ ꓠꓴ ꓪꓽ ꓮ ꓡꓲ ꓗꓪ ꓐꓰ ꓡꓻ ꓟˍ ꓟꓲ ꓥꓪ ꓟꓽ ꓢꓷ꓾ ꓐꓰ ꓒꓳꓹ ꓖꓶ ꓡ ꓥꓳ꓿ 26 ꓖꓳ ꓕꓯ ꓠꓴ ꓪꓽ ꓠꓬ꓾ ꓥꓪ ꓠꓴꓽ ꓠꓽ ꓠꓴ ꓟꓲꓽ ꓙꓬ ꓗꓪ ꓜꓽ ꓠꓬꓲ ꓓꓳꓻ ꓠꓬꓲ ꓬꓰ ꓠꓬꓲꓳ꓿ ꓠꓴˍ ꓟꓲ ꓥꓪ ꓠꓴꓽ ꓔꓯ ꓙꓵꓺ ꓗꓪ ꓟꓸ ꓟꓲꓽ ꓟꓸ ꓖꓶ ꓡ ꓠꓬꓲꓳ꓾ ꓐꓰ ꓐꓯˍ ꓥꓳ꓿ 27 ꓖꓳ ꓡꓱ ꓥ ꓟꓲ ꓬꓲ ꓡꓰ꓾ ꓠꓴ ꓪꓽ ꓔꓯ ꓥꓪ ꓐꓯ ꓖꓶˍ ꓠꓬꓲ꓾ ꓠꓴ ꓪꓽ ꓮ ꓡꓲ ꓗꓪ ꓐꓰ ꓡꓻˍ ꓟ ꓥꓪ ꓟꓽ ꓢꓷ꓿ ꓟꓽ ꓙꓲ ꓟꓽ ꓜꓳꓽ ꓟ ꓬꓰ ꓢꓴ ꓠꓴ ꓪꓽ ꓮꓽ ꓙꓵ ꓠꓬ ꓥꓪ ꓔꓯˍ ꓐꓰ ꓧꓹ ꓙꓰ Gꓽ꓾ ꓐꓰ ꓐꓯ ꓖꓶ ꓡ ꓥꓳ꓿ 28 ꓠꓴ ꓪꓽ ꓠꓬ ꓮ-ꓐ-ꓡ-ꓦˍ ꓐꓰ ꓬꓲ-ꓢˍ ꓐꓰ ꓬ-ꓗꓴˍ ꓐꓰ ꓟꓷꓽ ꓠꓷꓹ ꓝꓸ ꓢꓴ ꓮ ꓙꓵ꓾ ꓪꓴ-ꓢ ꓗꓴꓷꓼ ꓗꓪ ꓔꓬ ꓟ ꓔꓯ ꓡꓳꓸ ꓟꓳꓻ ꓢꓲ꓾ ꓠꓴ ꓪꓽ ꓔꓯ ꓠꓽ ꓠꓱ ꓫꓱꓸ ꓟS ꓗꓪ ꓖꓼ ꓓꓳ ꓗꓷˍ ꓕꓯ꓾ ꓥꓴꓻ ꓠꓬꓲ ꓢꓶꓽ ꓛꓲꓽ ꓠꓬꓲ ꓗꓷ ꓡꓰˍ ꓥꓳ꓿ 29 ꓐꓶꓽ ꓓꓳ ꓐꓶ ꓓꓵꓽˍ ꓐꓰ꓾ ꓖꓴ ꓪꓴꓸ ꓖꓴ ꓟꓶꓸ ꓗꓪ ꓐꓰ ꓡꓽ ꓞꓳ ꓜꓲꓼ ꓡ ꓢꓲ꓾ ꓪꓴ-ꓢ ꓗꓴꓷꓼ ꓜꓻ ꓫꓳꓻˍ ꓟ ꓗꓪ ꓠꓬꓲꓸ ꓠꓸ ꓡ ꓥꓳ꓿ 30 ꓠ ꓠꓹ꓾ ꓟꓲꓸ ꓙꓬꓽ ꓢꓲ ꓢꓴ ꓕꓲ ꓐꓱ ꓠꓬ ꓗꓸ ꓠꓯꓸ ꓢꓲ ꓗꓷ ꓡꓰˍ ꓥꓳ꓿ ꓗꓸ ꓠꓯꓸ ꓢꓲ ꓢꓴ ꓕꓲ ꓐꓱ ꓠꓽ ꓟꓲꓸ ꓙꓬꓽ ꓢꓲ ꓗꓷ ꓡꓰˍ ꓥꓳ꓾ ꓐꓯˍ ꓡꓳ꓿

ꓠꓬꓲ. ꓠꓬꓲ ꓢꓲꓽ ꓫꓬ ꓕꓳ ꓶ ꓗꓪ ꓣꓳ ꓐꓴ ꓡꓳ. ꓟꓳ ꓟ ꓠꓬ ꓢꓲꓺ ꓒ ꓬꓰ‐ꓢꓴ ꓡꓰ ꓣꓳꓺˍꓟ ꓗ ꓘꓶꓽ ꓗꓪ ꓓꓵꓽ ꓡꓰ ꓠ, ꓟ ꓢꓯꓼ ꓕꓵꓼ ꓠ, ꓟ ꓐꓯ ꓟ. ꓖꓶ ꓟ ꓥ ꓡꓳ꓿ ꓬꓴ‐ꓔ ꓡ ꓞꓳ ꓐꓴ ꓠꓬ ꓢꓲꓺ ꓒ ꓬꓰ‐ꓢꓴ ꓔꓯ ꓟꓴ ꓗꓪ ꓗꓴꓷꓼ ꓗꓪ ꓛꓲ, ꓬꓰ ꓓꓽ ꓢꓴ ꓡ ꓞꓳ ꓐꓴ ꓠꓬ ꓮ ꓟꓬ, ꓙꓳ ꓡ ꓐꓰ ꓠ, ꓠꓬꓲˍ ꓡꓳ꓿ ꓬꓴ‐ꓔ ꓡ ꓞꓳ ꓐꓴ ꓠꓬ ꓟꓲ ꓠꓯ ꓗꓪ ꓔꓬ ꓟ ꓬꓴ‐ꓔ ꓡ ꓞꓳ ꓗꓪ ꓐꓰ ꓙ ꓡꓰ ꓢꓲ ꓠꓬꓲ ꓠꓱ ꓐꓯ ꓡ ꓞꓳ ꓐꓴ ꓟꓴ ꓗꓪ ꓗꓴꓷꓼ ꓗꓪ ꓛꓲ ꓬꓰ ꓟꓽ ꓓ ꓐꓰ ꓓꓴ ꓙ ꓟ ꓥˍ ꓡꓳ꓿ ꓢꓲꓺ ꓒ ꓬꓰ‐ꓢꓴ ꓡꓰ ꓣꓳ ꓔꓯ ꓟ. ꓖꓶ ꓡ ꓟ ꓠꓬ ꓟꓲ ꓠꓯ ꓗꓪ ꓔꓬ ꓟ ꓙꓵ, ꓗꓪ ꓣꓳꓺ ꓟ ꓗ ꓘꓶꓽ ꓗꓪ ꓞꓳ ꓫꓱ ꓠ, ꓟ ꓐꓯ ꓟ. ꓖꓶ ꓡ ꓡꓳ꓿ ꓣꓳꓺ ꓟ ꓗ ꓘꓶꓽ ꓐꓯ ꓟ ꓠꓬ ꓫ ꓓꓴ ꓟꓷꓼ ꓓꓴ ꓮ ꓟꓬ, ꓫꓵꓽ ꓔꓳ, ꓜꓳ ꓡ ꓓꓴ ꓥꓳ꓿ ꓖꓳ ꓡꓱ ꓥ ꓟꓲ ꓣꓳ ꓢꓲꓺ ꓒ ꓐꓰ ꓕꓲ ꓪ ꓞꓳ ꓫꓱ ꓠ, ꓟ ꓣꓳ ꓔꓯ ꓟ. ꓖꓶ ꓡ ꓟ ꓥ ꓡꓳ꓿ ꓢꓲꓺ ꓒ ꓬꓰ‐ꓢꓴ ꓐꓰ ꓕꓲ ꓪ ꓞꓳ ꓫꓱ ꓕꓯ ꓮ ꓫꓵꓽ ꓟꓬꓱꓽ ꓬꓰ ꓥ ꓟꓲ ꓮ ꓡꓰ ꓗꓪ ꓙꓰ ꓥ ꓟꓲ ꓣꓳ ꓔꓯ ꓪꓴ‐ꓢ ꓡꓳ ꓙ ꓔ ꓙ ꓡ ꓓꓴ ꓥꓳ꓿ ꓫ. ꓟꓳ ꓪ