ꓣꓳ ꓬꓰˍ ꓟ ꓮ ꓙꓵꓽ ꓠꓬ ꓢꓲꓽ ꓫꓬꓹ ꓟ ꓠꓲꓹ ꓟ꓾ ꓙ ꓣꓳˍ ꓟ ꓠꓲꓹ ꓟ ꓙꓳ ꓝꓲ

ꓠꓬꓲꓸ ꓠꓬꓲ ꓗꓪ ꓣꓳ ꓠ ꓠꓹ ꓪˍ ꓟ ꓪꓴ-ꓢ ꓢꓲꓽ ꓫꓬ ꓕꓳꓽ ꓶ ꓠꓬ ꓟ-ꓕꓲ 23ꓽ23-26 ꓥ ꓡꓳ= ꓟꓸ ꓟꓲꓽ ꓕꓳ ꓶ ꓗꓪ ꓣꓳ ꓑ ꓙ ꓪˍ ꓟ ꓠꓬ ꓢꓲ ꓒ ꓬꓰ-ꓢꓴ ꓠꓬ ꓙꓵꓽ ꓗ ꓟꓸ ꓒ ꓐꓰ ꓒ-ꓡꓲ-ꓢꓷ ꓐꓴ ꓔꓯ ꓐꓯ ꓟꓸ ꓖꓶˍ ꓟ ꓟꓸ ꓟꓲꓽ ꓥ ꓡꓳ= ꓢꓲ ꓒ ꓬꓰ-ꓢꓴ ꓡꓰ ꓬꓲ ꓪ ꓔꓯ꓾ ꓠꓴ ꓪ ꓠꓬ ꓡꓴ ꓗꓶꓸ ꓐꓰ ꓐꓯ ꓬꓲ ꓕꓯꓽ ꓢꓲ ꓕꓲ ꓒꓳꓹ ꓔꓯ ꓫꓬ ꓫꓬ ꓡꓰꓽ ꓞꓲꓽ ꓢꓴˍ ꓡꓰ ꓐꓰ ꓗꓹ ꓡꓳ= ꓖꓳ ꓡꓱ ꓥˍ ꓟꓲ ꓠꓴ ꓪ ꓠꓯꓸꓼ ꓗꓪ ꓟ ꓠꓽ ꓚꓲ ꓛꓬ ꓔꓯ ꓛꓵꓽ ꓟꓽ ꓐ ꓡ ꓟ ꓐꓰ ꓢꓴ ꓔꓯ ꓘꓳꓹ ꓜꓽˍ ꓟ ꓡꓰꓽ ꓐꓲ ꓞꓹ ꓡꓳ꓾ ꓐꓰ ꓢꓲ ꓒ ꓬꓰ-ꓢꓴ ꓡꓰ ꓒ-ꓡꓲ-ꓢꓷ ꓐꓴ ꓐꓰ ꓙꓵꓽ ꓗ ꓟꓸ ꓒ ꓐꓴ ꓔꓯ ꓕꓰ ꓡꓰ ꓐꓯ ꓖꓶˍ ꓡꓳ=

ꓒ-ꓡꓲ-ꓢꓷ ꓐꓴ ꓐꓰ ꓙꓵꓽ ꓗ ꓟꓸ ꓒ ꓐꓴ ꓠꓬ ꓮ ꓕꓯ ꓟꓲ ꓪꓽ ꓘꓴ ꓢꓴ ꓥ ꓡꓳ= ꓞꓳ ꓤ ꓔꓯ ꓧꓳꓽ ꓣꓱꓽ ꓢꓴ ꓥ ꓡꓳ= ꓞꓳ ꓤ ꓠꓬ ꓬꓲ ꓪ ꓔꓯ ꓮ ꓘꓶꓸ ꓙꓳꓺ ꓒꓵꓽˍ ꓡꓳ= ꓮ ꓡꓲꓳ ꓐꓯ ꓠꓬ ꓬꓲ ꓪ ꓠꓬ ꓪꓴ-ꓢ ꓡ ꓞꓳ ꓥ ꓡꓳ ꓐꓰ ꓬꓲ ꓪ ꓘꓳꓹ ꓣꓴ ꓔ ꓡꓳ= ꓬꓲ ꓪ ꓠꓬ ꓪꓴ-ꓢ ꓡ ꓞꓳ ꓥ ꓟ ꓑꓶꓸ ꓓꓴ ꓪꓴ-ꓢ ꓐꓰ ꓒ ꓕꓲ ꓔꓬ ꓡꓳ= ꓪꓴ-ꓢ ꓐꓰ ꓕꓲ ꓠꓬꓲ ꓕꓲ ꓠꓬꓲ ꓙ ꓡꓯ ꓘꓳꓹ ꓡꓳ= ꓖꓳ ꓡꓱ ꓠꓬꓲ ꓑ ꓫꓬ ꓐꓴ ꓬꓲ ꓪ ꓔꓯ ꓮ ꓘꓶꓸ ꓒꓵꓽˍ ꓡꓳ= ꓖꓳ ꓡꓱ ꓥ ꓟꓲ ꓒ-ꓡꓲ-ꓢꓷ ꓐꓴ ꓐꓰ ꓙꓵꓽ ꓗ ꓟꓸ ꓒ ꓐꓴ ꓠꓬ ꓬꓲ ꓪ ꓬꓰˍ ꓟ ꓮ ꓙꓵꓽ ꓠꓬ ꓞꓳ ꓤ ꓡꓰ ꓬꓲ ꓪ ꓔꓯ ꓫꓱꓸ ꓖꓶ ꓠꓹ ꓟ꓾ ꓞꓳ ꓤ ꓡꓰ ꓬꓲ ꓪ ꓔꓯ ꓒꓵꓽ ꓗ ꓬꓰ ꓠꓹ ꓟ ꓡꓰꓽ ꓥ ꓡꓳ= ꓪꓴ-ꓢ ꓔꓯ ꓚꓵ ꓚꓵ ꓫꓱꓸ ꓖꓶˍ ꓟ꓾ ꓪꓴ-ꓢ ꓔꓯ ꓚꓵ ꓚꓵ ꓠꓲꓹ ꓠꓵˍ ꓟ ꓑꓶꓸ ꓓꓴ ꓬꓰ ꓔꓬ ꓫꓵꓽ ꓕꓲ ꓫꓵꓽˍ ꓟꓲ ꓟꓽ ꓙꓳ=

ꓖꓳ ꓡꓱ ꓠꓬꓲ ꓢꓲ ꓒ ꓬꓰ-ꓢꓴ ꓡꓰ ꓬꓲ ꓪ ꓔꓯ ꓕꓰ ꓡꓰ ꓐꓯ ꓖꓶˍ ꓟ ꓥ ꓡꓳ= ꓠꓴ ꓪ ꓠꓬ ꓡꓴ ꓗꓶꓸ ꓕꓯꓽ ꓢꓲ꓾ ꓐꓯ ꓕꓯꓽ ꓢꓲ ꓗꓪ ꓡꓰꓽ ꓞꓲꓽˍ ꓡꓳ= ꓬꓲ ꓘꓴꓽ ꓗꓪ ꓠꓬ ꓚꓲꓸ ꓛꓬ ꓛꓳ ꓚꓲꓸ ꓛꓬ ꓙꓵꓽ ꓟꓽ ꓐ ꓡ= ꓢꓴ ꓔꓯ ꓘꓳꓹ ꓜꓽˍ ꓟ ꓡꓰꓽ ꓬꓰˍ ꓡꓳ꓾ ꓐꓰ ꓢꓲ ꓒ ꓬꓰ-ꓢꓴ ꓫꓬꓽ ꓫꓬꓽ ꓡꓰꓽ ꓟꓸ ꓖꓶˍ ꓡꓳ=

ꓣꓳ ꓥˍ ꓟꓲ ꓒ-ꓡꓲ-ꓢꓷ ꓐꓴˍ ꓡꓰ ꓐꓰ ꓕꓲ ꓖ ꓕꓲ ꓧꓪꓹ ꓗꓷ ꓡꓰ ꓗꓴꓸˍ ꓡꓳ= ꓣꓳ ꓠꓬ ꓬꓲ ꓕꓯꓽ ꓢꓲ ꓔꓯ ꓟꓳꓸ ꓜꓳꓽ ꓜꓳꓽ ꓬꓰ ꓔꓬ ꓥˍ ꓟꓲ ꓠꓯꓸꓼ ꓗꓪ ꓮ ꓫꓵꓽ ꓑꓶꓸ ꓓꓴ ꓬꓰ ꓔꓬ ꓡ꓾ ꓐꓯ ꓟ ꓔꓯ ꓟꓽ ꓓꓵꓽ ꓙ ꓠꓬꓲ ꓕꓽ ꓬꓰ= ꓣꓳ ꓥˍ ꓟꓲ ꓒ-ꓡꓲ-ꓢꓷ ꓐꓴˍ ꓡꓰ ꓐꓰ ꓕꓲ ꓖ ꓕꓲ ꓧꓪꓹ ꓗꓷ ꓡꓰ ꓗꓴꓸˍ ꓡꓳ= ꓮ ꓡꓲ ꓗꓷ ꓡꓰˍ ꓡ= ꓣꓳ ꓬꓰˍ ꓟ ꓠꓬ ꓪꓴ-ꓢ ꓟꓬꓱ ꓓꓳꓽ ꓐꓰ ꓐꓯ ꓢꓲ ꓟꓽ ꓬꓰ ꓬꓰ ꓚꓲꓸ ꓛꓬ ꓟꓬꓱꓺ ꓓꓳꓽ ꓬꓰ ꓠꓹ ꓟ꓾ ꓡ ꓞꓳ ꓡꓰ ꓣꓳꓽ ꓔꓯ ꓫꓱꓸ ꓖꓶ ꓠꓹ ꓟ꓾ ꓣꓳ ꓬꓰˍ ꓟ ꓮ ꓙꓵꓽ ꓞꓳ ꓤ ꓟꓬꓱꓺ ꓓꓳꓽ ꓟꓶ ꓠꓹ ꓟ꓾ ꓕꓰ ꓡꓰ ꓢꓯꓼ ꓕꓵꓼ ꓔꓬ ꓠꓬ ꓒ-ꓡꓲ-ꓢꓷ ꓐꓴˍ ꓡꓰ ꓐꓰ ꓗꓷ ꓡꓰˍ ꓥꓳ=

ꓢꓲ ꓒ ꓬꓰ-ꓢꓴ ꓠꓬ ꓠꓲꓹ ꓟ ꓔꓯ ꓡꓳꓸ ꓢꓴ ꓥ ꓡꓳ= ꓢꓲ ꓒ ꓬꓰ-ꓢꓴ ꓠꓬ ꓣꓳ ꓮ ꓫꓵꓽ ꓬꓰˍ ꓡ ꓐꓯ ꓟ ꓢꓶꓸ ꓟꓽ ꓞꓲ꓾ ꓣꓳ ꓠꓬ ꓣꓳ ꓠꓲꓹ ꓟ ꓮ ꓡꓰ ꓐꓰ ꓗꓷ ꓔ ꓢꓲ ꓣꓱꓽ ꓬꓰˍ ꓡ? ꓮ ꓡꓰ ꓐꓰ ꓬꓰ ꓔꓬ ꓡ ꓐꓯ ꓟ ꓔꓯ꓾ ꓣꓳ ꓬꓲ ꓔꓶ ꓙꓱꓼ ꓔꓯ ꓬꓲ ꓡꓳꓸ ꓠꓬꓲˍ ꓡꓳ= ꓒ-ꓡꓲ-ꓢꓷ ꓐꓴ ꓐꓰ ꓙꓵꓽ ꓗ ꓟꓸ ꓒ ꓐꓴ ꓠꓬ ꓬꓲ ꓪ ꓬꓰˍ ꓟ ꓮ ꓙꓵꓽ ꓠꓬ ꓞꓳ ꓤ ꓔꓯ ꓚꓵꓹ ꓣꓴ ꓠꓹ ꓟ꓾ ꓞꓳ ꓤ ꓡꓰ ꓫꓱꓸ ꓖꓶ ꓟꓶ ꓠꓹ ꓟ ꓬꓰˍ ꓡꓳ=

ꓖꓳ ꓡꓱ ꓠꓬꓲ ꓣꓳ ꓠꓬꓲꓸ ꓠꓬꓲ ꓕꓲ ꓠꓬꓲ ꓐꓱ ꓶ ꓓꓵꓽ ꓙ ꓠꓬꓲ ꓡꓯ= ꓣꓳ ꓠꓬ ꓣꓳ ꓟꓬꓱꓽ ꓬꓰˍ ꓟ꓾ ꓥ ꓠꓬ꓾ ꓣꓳ ꓙꓲˍ ꓟ ꓬꓰˍ ꓟ꓾ ꓪꓽ ꓘꓴˍ ꓟ꓾ ꓣꓳ ꓡꓰ ꓢꓴ ꓖꓶˍ ꓟ ꓡꓴꓹˍ ꓟ꓾ ꓒꓴ ꓫꓵꓺ ꓤ ꓡꓴꓹˍ ꓟ ꓮ ꓙꓵꓽ ꓠꓬ ꓮ ꓫꓵꓽ ꓑꓶꓸ ꓓꓴ ꓬꓰˍ ꓡ꓾ ꓐꓯ ꓟ ꓔꓯ ꓓꓵꓽ ꓙ ꓠꓬꓲ ꓓꓴ ꓥ ꓡꓳ= ꓣꓳ ꓚꓲ ꓛꓬ ꓣꓳ ꓟꓽ ꓗꓶꓸ ꓗꓶꓸ ꓐꓰ ꓣꓳ ꓬꓰˍ ꓟ ꓠꓬ ꓪꓴ-ꓢ ꓔꓯ ꓠꓲꓹ ꓠꓵˍ ꓟ ꓑꓶꓸ ꓓꓴ ꓥꓳ= ꓣꓳ ꓬꓰˍ ꓟ ꓠꓬ ꓠꓶꓽ ꓛꓳ ꓕꓲ ꓛꓳ ꓔꓯ ꓠꓲꓹ ꓠꓵˍ ꓟ ꓑꓶꓸ ꓓꓴ ꓥꓳ꓾ ꓐꓰ ꓬꓲ ꓔꓶ ꓙꓱꓼ ꓗꓷ ꓐ ꓡ ꓠꓹ ꓟ ꓣꓳ ꓢꓯꓼ ꓕꓵꓼ ꓠ ꓗꓹ ꓡꓳ= ꓟꓽ ꓥ ꓠꓬ ꓣꓳ ꓠꓽ ꓒ-ꓡꓲ-ꓢꓷ ꓐꓴ ꓙꓵꓽ ꓗ ꓟꓸ ꓒ ꓐꓴ ꓡꓰ ꓐꓰ ꓣꓳ ꓬꓰˍ ꓟ ꓮ ꓙꓵꓽ ꓠꓬ ꓢꓴ ꓡꓰ ꓫꓱꓸ ꓖꓶ ꓠꓹ ꓟ꓾ ꓓꓴ ꓡꓰ ꓣꓳ ꓔꓯ ꓓꓻˍ ꓡꓳ꓾ ꓢꓴ ꓡꓰ ꓣꓳ ꓔꓯ ꓙꓲˍ ꓡꓳ꓾ ꓐꓰ ꓫꓱꓸ ꓖꓶ ꓠꓹ ꓟ ꓔꓯ ꓧꓪ ꓔꓬ ꓥꓳ ꓐꓯ ꓠꓬ ꓟꓴꓽ ꓗꓪ ꓡꓯꓼ ꓫꓴ ꓟꓽ ꓟꓶ=

ꓖꓳ ꓡꓱ ꓠꓬꓲ ꓣꓳ ꓬꓰˍ ꓟ ꓮ ꓙꓵꓽ ꓠꓬ ꓢꓲꓽ ꓫꓬꓹ ꓟ ꓠꓲꓹ ꓟ꓾ ꓙ ꓣꓳꓽˍ ꓟ ꓠꓲꓹ ꓟ ꓡꓰ ꓬꓰ ꓐ ꓡˍ ꓥꓳ ꓐꓯ ꓠꓬ ꓢꓲ ꓒ ꓬꓰ-ꓢꓴ ꓡꓰ ꓣꓳ ꓔꓯ ꓶꓼ ꓥꓳ ꓙꓱ ꓖꓶˍ ꓥꓳ꓾ ꓐꓰ ꓦ ꓢꓯꓼ ꓪ ꓖꓶ ꓩꓴ ꓡˍ ꓥꓳ=