ꓚꓵ ꓚꓵ ꓣꓳ ꓖꓴ ꓙꓴꓽ ꓠꓬ ꓠꓵꓻ ꓠꓲꓹ ꓥ ꓡꓳ꓾

ꓠꓲꓹ ꓠꓵˍ ꓟ ꓬꓲꓼ ꓤ ꓠꓬꓲ ꓤ ꓐꓴꓳ꓾ ꓮ ꓙꓵꓽ ꓔꓯ ꓧꓪꓸ ꓧꓪꓸꓼ꓾

ꓠꓬꓲꓸ ꓠꓬꓲ ꓢꓲꓺ ꓒ ꓖꓶ ꓡˍ ꓟ ꓠꓬꓲ ꓕꓲ ꓠꓬꓲ ꓗꓪ ꓣꓳ ꓗꓹ ꓛꓲꓽ ꓡꓯ꓾ ꓣꓳ ꓠꓲꓹ ꓒꓴ ꓡꓯ꓾ ꓣꓳ ꓟꓴꓽ ꓖꓪ ꓖꓪ ꓡꓯ=

ꓫꓵꓻ ꓓꓴꓽ ꓐꓯ ꓟ ꓠꓬ ꓮ ꓫꓵꓽ ꓥ ꓡ? ꓞꓳ ꓤ ꓕꓲ ꓣꓳ ꓫꓵꓻˍ ꓐꓯ ꓟ ꓠꓬ ꓮ ꓡꓲ ꓟ ꓔꓯ ꓐꓯ ꓡ? ꓙꓲꓻ ꓫꓬ ꓢꓴ ꓡꓰ ꓕꓰ ꓡꓰ ꓐꓯ ꓔ ꓟ ꓙꓳˍ ꓡꓳ= ꓫꓵꓻˍ ꓟ ꓐꓯ ꓟ ꓠꓬ ꓣꓳ ꓣꓴ ꓔ ꓟ꓾ ꓣꓳ ꓧꓪ ꓔ ꓟ ꓮ ꓙꓵꓽ ꓔꓯ ꓡꓳ ꓗꓷ ꓠꓹ ꓟ ꓬꓲ ꓙꓵꓹ ꓥ ꓢꓲ꓾ ꓣꓳ ꓡꓰ ꓖꓶ ꓗꓷ ꓟ ꓮ ꓙꓵꓽ ꓔꓯ ꓣꓴ ꓠꓹ ꓟ ꓬꓲ ꓙꓵꓹ ꓥ ꓡꓳ꓾ ꓐꓰ ꓐꓯ ꓡꓳ= ꓞꓳ ꓤ ꓕꓲ ꓣꓳ ꓫꓵˍ ꓠꓬ ꓬꓲ ꓡꓰ ꓧꓪ ꓔ ꓟ ꓖꓴ ꓙꓴꓽ꓾  ꓬꓲ ꓟꓶ ꓔ ꓟ ꓟꓬꓱꓺ ꓓꓳꓽ ꓮ ꓙꓵꓽ ꓠꓬ ꓬꓲ ꓡꓳ ꓦ ꓔꓲꓸ ꓠ ꓗꓹ ꓡꓳ= ꓬꓲ ꓔꓯꓹ ꓙꓰ ꓪˍ ꓟ ꓖꓴ ꓙꓴꓽ ꓠꓬ ꓬꓲ ꓡꓰ ꓢꓴ ꓔꓯ ꓖꓶ ꓗꓷ ꓟ ꓢꓴ ꓔꓯ ꓟꓳꓸ ꓖꓶˍ ꓟ ꓠꓵꓻ ꓠꓲꓹ ꓡꓰ ꓬꓲ ꓔꓯꓹ ꓙꓰ ꓪˍ ꓟ ꓥ ꓡꓳ= ꓕꓱ ꓟ ꓠꓬ ꓞꓳ ꓤ ꓫꓵˍ ꓐꓯ ꓟ ꓬꓲꓸ ꓬꓲ ꓢꓲ ꓥ ꓡꓳ=

ꓣꓳ ꓠꓬ ꓣꓳ ꓖꓶꓽ ꓔ ꓟ ꓔꓯ ꓡꓰꓽ ꓣꓴ ꓢꓲ꓾ ꓣꓳ ꓣꓴ ꓔ ꓟ ꓮ ꓙꓵꓽ ꓔꓯ ꓡꓳ ꓦ ꓔꓲꓸ ꓠ ꓗꓹ ꓟ ꓠꓬ ꓫꓵꓻ ꓓꓴꓽ ꓕꓱ ꓟ ꓥꓳ= ꓖꓳ ꓡꓱ ꓠꓬꓲ ꓔꓶꓼ ꓐꓯ ꓕꓯ ꓠꓽ ꓣꓳ ꓖꓴ ꓙꓴꓽ ꓠꓬ ꓮ ꓡꓰ ꓟ ꓥ ꓐꓯ ꓕꓯ ꓠꓽ ꓣꓳꓽ ꓡꓰ ꓠꓵꓻ ꓠꓲꓹ ꓟꓳꓸ ꓖꓶˍ ꓟ꓾ ꓫꓸ ꓢꓴ ꓟꓷꓼ ꓢꓴ ꓔꓯ ꓬꓰ ꓙˍ ꓟ꓾ ꓟꓽ ꓥ ꓠꓬ ꓣꓳ ꓟꓷꓽ ꓠꓷꓹ ꓘꓶꓽ ꓗꓪ꓾ ꓣꓳ ꓟꓬ ꓢꓶꓽ ꓗꓪ ꓾ ꓣꓳ ꓓꓵꓽ ꓙˍ ꓟ ꓗꓪ꓾ ꓬꓰˍ ꓟ ꓮ ꓙꓵꓽ ꓡꓱꓸꓼ ꓗꓪ ꓠꓵꓻ ꓠꓲꓹ ꓕꓱ ꓟ ꓟꓽ ꓚꓬꓼ ꓕꓯ ꓠꓽ ꓣꓳ ꓬꓰˍ ꓟ ꓮ ꓙꓵꓽ ꓠꓬ ꓬꓲꓸ ꓖꓳꓽ ꓥꓳ=

ꓙꓲꓻ ꓫꓬ ꓢꓴ ꓒꓳ-ꓡꓳ ꓡꓰ ꓕꓱ ꓡꓱ ꓐꓯ ꓔ ꓡꓳ= ꓥꓪ ꓠꓬ ꓥꓪ ꓚꓲꓸ ꓛꓬ ꓮ ꓔꓳꓸ ꓛꓴ ꓐ ꓡˍ ꓗꓪ ꓛꓲ ꓙꓵꓻ ꓠꓲꓹ ꓙꓳˍ ꓥˍ ꓟꓲ ꓥꓪ ꓔꓯ ꓠꓵꓻ ꓠꓲꓹ ꓟꓽ ꓙꓳ ꓠꓬ ꓬꓲꓸ ꓖꓳꓽ ꓥꓳ꓾ ꓐꓰ ꓐꓯ ꓔ ꓡꓳ= ꓖꓳ ꓡꓱ ꓠꓬꓲ ꓠꓵꓻ ꓠꓲꓹ ꓕꓱ ꓟ ꓮ ꓡꓰ ꓟꓬ ꓛꓲ ꓬꓳꓸ ꓚꓵˍ ꓡ ꓐꓯ ꓟ ꓣꓳ ꓢꓷꓸ ꓪ ꓟ ꓥ ꓡꓳ= ꓠꓬꓲꓸ ꓠꓬꓲ ꓠꓬꓲ ꓫꓵꓼ ꓕꓲ ꓠꓬꓲ ꓗꓪ ꓠꓵꓻ ꓠꓲꓹ ꓔꓯ ꓮ ꓡꓰ ꓐꓰ ꓟꓳꓸ ꓖꓶˍ ꓡ= ꓒꓴꓻ ꓫꓵꓺ ꓢꓴ ꓔꓯ ꓬꓰ ꓙ ꓟꓽ ꓐ ꓡ ꓥˍ ꓟꓲ ꓠꓴꓽˍ ꓟ ꓫꓸ ꓕꓱ ꓘꓶꓽ꓾ ꓐꓽ ꓧꓶꓼ ꓧꓶꓼ ꓬꓰ ꓢꓲ ꓠꓬꓲ ꓫꓸ ꓕꓱˍ ꓟ ꓫꓸ ꓕꓱ ꓘꓶꓽ꓾ ꓫꓱꓸ ꓤ ꓗꓴꓸˍ ꓟ ꓟꓬ ꓢꓶꓽ ꓡꓰ ꓡꓳꓸˍ ꓟ ꓟꓬ ꓢꓶꓽ ꓙꓳ ꓠꓹ ꓟ ꓣꓳ ꓮ ꓡꓰ ꓐꓰ ꓬꓰˍ ꓡ ꓐꓯ ꓟ ꓓꓵꓽ ꓙ ꓠꓬꓲ ꓓꓴ ꓥꓳ=

ꓠꓬꓲꓸ ꓠꓬꓲ ꓣꓳ ꓓꓵꓽ ꓙ ꓓꓴ ꓠꓬ ꓙꓲꓻ ꓫꓬ ꓢꓴ Francis  ꓮssisi ꓥˍ ꓟꓲ ꓕꓱ ꓡꓱ ꓫꓵꓽ ꓡ ꓞꓳ ꓥꓳ= ꓬꓲ ꓟꓳꓻˍ ꓟ ꓞꓳ ꓤ ꓥ ꓕ ꓑꓳꓸ ꓔꓯ ꓠꓵꓻ ꓠꓲꓹ ꓟꓳꓸ ꓖꓶˍ ꓡꓳ= ꓬꓲ ꓔꓯ ꓓꓶꓽ ꓡ ꓔꓲꓸ ꓡ ꓢꓴ꓾ ꓬꓲ ꓔꓯ ꓗꓸ ꓧꓪ ꓡ ꓢꓴ ꓮ ꓙꓵꓽ ꓔꓯ ꓠꓵꓻ ꓠꓲꓹ ꓗꓪ ꓐꓰ ꓬꓲ ꓧꓪꓸ ꓡꓰ ꓠ ꓬꓰˍ ꓡꓳ= ꓞꓳ ꓤ ꓔꓯ ꓠꓵꓻ ꓠꓲꓹ ꓟꓳꓸ ꓖꓶˍ ꓟ ꓡꓰꓽ ꓟꓽ ꓞꓲꓺ ꓙꓱꓽ ꓤ ꓙꓱꓽ ꓟꓲ꓾ ꓢꓲꓹ ꓜꓲ ꓢꓲꓹ ꓟꓲ ꓔꓯ ꓥˍ ꓟꓲ ꓠꓵꓻ ꓠꓲꓹ ꓟꓳꓸ ꓖꓶˍ ꓡꓳ= ꓬꓲꓻ ꓙꓬ ꓗꓪ ꓔꓬꓹ ꓟ ꓥꓪꓸ ꓔꓯ ꓥ ꓟꓲ ꓟꓸ ꓟꓲꓽ ꓚ ꓟꓸ ꓖꓶˍ ꓡꓳ= ꓬꓲ ꓠꓬ ꓕꓱ ꓡꓱ ꓫꓵꓽ ꓡ ꓞꓳ ꓥ ꓡꓳ= ꓖꓳ ꓡꓱ ꓠꓬꓲ ꓣꓳ ꓔꓯ ꓒꓵꓽ ꓔꓬ ꓟ ꓗꓪ ꓐꓰ ꓣꓳ ꓥˍ ꓟꓲ ꓠꓵꓻ ꓠꓲꓹ ꓕꓱ ꓟ ꓔꓯ ꓪꓴꓽ ꓡ ꓝꓲ ꓠꓹ ꓟ ꓮ ꓡꓰ ꓢꓯꓼ ꓕꓵꓼ ꓠꓯꓹ ꓡ= ꓠꓵꓻ ꓠꓲꓹ ꓕꓱ ꓟ ꓬꓲ ꓢꓶꓽ ꓓꓱꓼ ꓡ ꓠꓹ ꓟ ꓮ ꓡꓰ ꓬꓰ ꓠꓯꓹ ꓡ=

ꓕꓲ ꓠꓬꓲ ꓕꓲ ꓠꓬꓲ ꓣꓳ ꓙ ꓫꓱꓽ ꓙꓰˍ ꓟ ꓗꓪ ꓚꓵ ꓚꓵ ꓣꓳ ꓖꓴ ꓙꓴꓽ ꓥ ꓟ꓾ ꓣꓳ ꓫꓵꓻˍ ꓕꓯ ꓣꓳ ꓐꓰ ꓛꓳꓻ ꓡˍ ꓟ  ꓖꓴ ꓙꓴꓽ ꓥ ꓟ ꓠꓵꓻ ꓠꓲꓹ ꓕꓱ ꓟ ꓔꓯ ꓣꓳ ꓮ ꓡꓰ ꓬꓰ ꓔꓬꓹ ꓡ ꓐꓯ ꓟ ꓠꓬꓲꓸ ꓠꓬꓲ ꓓꓵꓽ ꓙ ꓢꓲ ꓣꓳ ꓦ ꓢꓯꓼ ꓪ ꓣꓴ ꓓꓴ ꓬꓰ ꓡꓯ=