ꓙꓵꓻ ꓢꓴ ꓠꓬ ꓬꓰ-ꓢꓴ ꓬꓲ ꓫꓵꓽ ꓬꓲ ꓧꓪ ꓥ ꓟ

ꓟꓬꓱ ꓓꓳꓽ ꓙꓳ ꓢꓴ ꓐꓴ꓾ ꓙꓵꓽ ꓪ ꓙꓳ ꓢꓴ ꓐꓴ ꓐꓰ ꓫꓵꓽ ꓤ ꓧꓪ ꓤ ꓒꓬꓱꓼ ꓪˍ ꓟ꓾ ꓬꓲ ꓪ ꓐꓴ ꓐꓰ ꓢꓷꓸ ꓡꓯ ꓘꓳˍ ꓟ ꓠꓬ ꓣꓳ ꓟꓲ ꓠꓯ ꓞꓳ ꓤ ꓐꓴ ꓮ ꓘꓶꓸ ꓟꓬꓱꓺ ꓓꓳ ꓪˍ ꓟ ꓥꓳ= ꓖꓳ ꓡꓱ ꓥˍ ꓟꓲ ꓕꓱ ꓡꓱ ꓟꓬꓱꓺ ꓓꓳꓽ ꓪˍ ꓟ꓾ ꓒꓴ ꓫꓵꓺ꓾ ꓙꓵꓽ ꓪ ꓕꓱ ꓟꓬꓽ ꓟ ꓠꓬ ꓟꓶ ꓤ ꓟꓽ ꓕꓶꓺ ꓞꓹ= ꓬꓲ ꓦꓬꓼ ꓠꓬꓲ ꓖꓴ ꓡꓰ ꓕꓯ ꓠꓬ ꓟꓶꓽ ꓬꓰˍ ꓥꓳ=

ꓖꓳ ꓡꓱ ꓥˍ ꓟꓲ ꓮ ꓙꓵꓽ ꓟ ꓕꓯꓽ ꓢꓲ ꓪꓽ ꓠꓬꓲ ꓢꓲ ꓕꓶꓺ ꓞꓹ ꓟ ꓠꓬ ꓪ ꓔꓲ ꓐꓴ ꓕꓯꓽ ꓢꓲ ꓟ ꓪ ꓔꓲ꓾ ꓟꓲ ꓠꓯ ꓗꓪ ꓙꓳˍ ꓟ ꓮ ꓙꓵꓽ ꓔꓯ ꓚꓰꓼ ꓔ ꓢꓴ ꓕꓲ ꓞꓲꓼ ꓕꓲ ꓑ ꓟ ꓢꓯꓼ ꓟꓬ ꓢꓲꓺ ꓒ ꓥ ꓟ ꓬꓰ-ꓢꓴ ꓐꓰ ꓫꓵꓽ ꓤ ꓧꓪ ꓤ ꓒꓬꓱꓼ ꓪˍ ꓟ꓾ ꓠꓶꓽ ꓛꓳꓽ ꓕꓲ ꓛꓳꓽ ꓒꓬꓱꓼ ꓪˍ ꓟ꓾ ꓬꓲꓼ ꓤ ꓠꓬꓲ ꓤ ꓒꓬꓱꓼ ꓪˍ ꓟ ꓙꓵꓽ ꓪ ꓡꓰꓽ ꓥ ꓡꓳ=

ꓪ ꓙꓵꓽ ꓪ ꓕꓱ ꓟ ꓔꓯ ꓮꓽ ꓟ ꓥˍ ꓟꓲ ꓟꓶ ꓐ ꓡˍ ꓟ ꓥ ꓡꓳ= ꓕꓲ ꓟˍ ꓟ ꓣꓱꓽ ꓬꓯꓼ ꓣꓱꓽ ꓞꓹ ꓟ ꓠꓬ ꓪꓴ-ꓢ ꓬꓲ ꓠꓲꓹ ꓡꓶꓽ ꓙꓳˍ ꓟ ꓔꓯ ꓚꓲꓸ ꓛꓬ ꓤꓶꓻ ꓗꓪ ꓬꓲ ꓪꓴꓸ ꓗꓪ ꓗꓷ ꓔ ꓢꓲ ꓢꓯꓼ ꓕꓵꓼ ꓢꓯꓸ ꓔꓬ ꓠꓹ ꓟ ꓡꓰꓽ ꓥ ꓡꓳ=

ꓪꓴ-ꓢ ꓡꓰ ꓣꓳ ꓔꓯ ꓪ ꓙꓵꓽ ꓪ ꓕꓱ ꓟ ꓔꓯ ꓖꓶ ꓢꓲ ꓘꓴ ꓔꓬꓹ ꓡꓳ= ꓬꓲ ꓤ ꓠꓱ ꓒꓬꓱꓼ ꓠꓹ ꓟ ꓣꓳ ꓐꓴ ꓠꓬ ꓮ ꓡꓰ ꓟꓬ ꓗꓪ ꓛꓲ ꓚꓲꓸ ꓛꓬ ꓠꓲꓹ ꓡꓶꓽ ꓔꓯ ꓡꓳꓺ ꓗꓷ ꓢꓲ ꓪꓴ-ꓢ ꓬꓲ ꓠꓲꓹ ꓡꓶꓽ ꓔꓯ ꓛꓳ ꓫꓱꓽ ꓔꓬ ꓡ? ꓐꓯ ꓟ ꓔꓯ ꓠꓬꓲꓸ ꓠꓬꓲ ꓗꓪ ꓓꓵꓽ ꓙ ꓠꓬꓲ ꓡꓯ=