ꓞꓳ ꓤ ꓒꓬꓱꓼ ꓡˍꓟ ꓬꓲ ꓔꓶꓻ ꓙꓱꓼ

Wednesday, February 22, 2023

ꓟꓲ ꓠꓯ ꓗꓪ ꓞꓳ ꓤ ꓒꓬꓱꓼ ꓡ ꓟ ꓬꓲ ꓔꓶꓻ ꓙꓱꓼ ꓔꓯ ꓕꓲ ꓐꓱ ꓠꓬ ꓟꓲ ꓡꓰ ꓔꓬ ꓡꓳ= ꓟꓬ ꓠꓬꓲ ꓞꓳ ꓡꓱ ꓐꓴ ꓬꓲ ꓪ ꓬꓰ ꓠꓲꓹ ꓫꓵ_ ꓟ ꓟꓬꓱꓽ ꓬꓰ꓾ ꓟꓬꓱꓽ ꓬꓲ ꓔꓶꓸ ꓕꓲ ꓟ ꓗꓪ ꓟꓶ ꓤ ꓗꓷ ꓡꓰ ꓠꓬ ꓝꓮꓲ ꓕꓲ ꓟꓬꓱꓽ ꓔꓯ ꓬꓰ ꓙꓰ꓾ ꓕꓱ ꓟꓬꓱꓽ ꓗꓪ ꓒꓴ ꓮ ꓟꓬꓹ ꓟꓽ ꓪ_ ꓠꓬ ꓒꓴ ꓮ ꓟꓬꓹ ꓪ_ ꓟ ꓟꓬꓱꓽ ꓔꓯ ꓬꓰ ꓙꓰ ꓕꓱ ꓡꓱ ꓬꓰ ꓢꓲ꓾ ꓬꓲ ꓪ ꓤꓶꓸꓹ ꓔꓯ ꓗꓹ ꓛꓲ ꓔꓬ ꓡꓳ= ꓞꓳ ꓡꓱ ꓐꓴ ꓬꓲ ꓪ ꓔꓶꓻ ꓙꓱꓼ ꓠꓬ ꓒꓴ ꓪ ꓓꓴ ꓔꓯ ꓡꓰ ꓓꓵꓽ ꓙ ꓟ ꓪꓴꓸ ꓠꓬꓲ ꓕꓱ ꓡꓱ ꓬꓰ ꓔꓬ ꓟ ꓥ ꓡꓳ=

ꓪ ꓡ ꓟ ꓒꓴ ꓫꓵꓸꓸ ꓔꓯ ꓠꓬ ꓬꓲ ꓪ ꓗꓹ ꓛꓲ ꓓꓴ ꓐꓱ ꓶ ꓣꓱꓽ ꓓꓴ ꓥ ꓢꓲ ꓞꓳ ꓡꓱ ꓐꓴ ꓠꓲꓹ ꓟ ꓗꓪ ꓕꓱ ꓡꓱ ꓬꓰ ꓟ ꓠꓬ ꓙꓲ ꓖꓴ ꓟꓽ ꓙꓳˍ ꓟ ꓔꓯ ꓬꓲ ꓪ ꓟꓽ ꓢꓷꓸ ꓔꓬ꓾ ꓢꓯꓼ ꓙꓳˍ ꓟ ꓕꓲ ꓙꓵꓹ ꓗꓪ ꓕꓱ ꓡꓱ ꓗꓹ ꓛꓲ ꓛꓲ ꓔꓬ ꓮ ꓫꓵ ꓥ ꓟꓲ ꓙꓬ ꓫꓸ ꓓꓴ ꓟꓽ ꓙꓳ ꓗꓹ ꓛꓲ ꓟ ꓐꓰ ꓠꓲꓹ ꓘꓪ ꓫꓵꓺ ꓓ_ ꓟ ꓦꓯꓼ ꓠꓬꓲ ꓥꓳ ꓐꓯ ꓥ ꓟꓲ ꓞꓲꓼ ꓟꓳ ꓡ ꓕꓯ ꓮ ꓡꓰ ꓕꓲ ꓣꓳ ꓥ ꓟꓲ ꓬꓲ ꓬꓰ ꓢꓲ ꓙꓳ_ ꓟ ꓤꓶꓸꓹ ꓔꓯ ꓠꓲꓹ ꓥꓳ_ ꓡꓳ=

ꓬꓲ ꓬꓰ ꓢꓲ ꓙꓳˍ ꓟ ꓞꓳ ꓤ ꓤꓶꓸꓹ ꓐꓯ ꓟ ꓠꓬ ꓠꓬ ꓮ ꓫꓵ ꓥ ꓡ? ꓙꓲ_ ꓟ ꓟꓬꓱꓽ ꓔꓯ ꓬꓰ ꓢꓲ꓾ ꓡ ꓠꓹ ꓟ ꓣꓳ ꓤ ꓣꓳ ꓠꓱ ꓐꓱ ꓶ ꓬꓲ ꓒꓴ ꓙꓳˍ ꓟ ꓕꓲ ꓫꓵꓽ ꓫꓵꓽ ꓛꓹ ꓖꓶ ꓠ ꓔ ꓟ ꓥ ꓡꓳ= ꓖꓳ ꓕꓯ ꓢꓲ ꓣꓳ ꓧꓪ ꓖꓳ ꓓꓱꓽ ꓡꓳꓹ ꓬꓰ ꓟ ꓙꓵꓹ ꓛꓲ ꓡ ꓕꓯ ꓥꓪ ꓤ ꓥꓪ ꓠꓱ ꓐꓱ ꓶ ꓥꓪ ꓢꓯꓼ ꓕꓵꓼ ꓗꓷꓳ ꓐꓯ ꓢꓲ ꓗꓹ ꓛꓲ ꓓꓴ ꓥꓳ=

ꓞꓳ ꓡꓱ ꓕꓲ ꓐꓱ ꓠꓬ ꓕꓱ ꓡꓱ ꓢꓯꓼ ꓖꓶ ꓘꓶꓽ ꓔꓯ ꓟꓽ ꓠꓲꓹ ꓫꓵ ꓡꓰ ꓟꓽ ꓢꓷꓸ ꓖꓳ ꓡꓱ ꓐꓯ ꓥ ꓟꓲ ꓥꓪ ꓠ ꓙꓲ ꓖꓴ ꓙꓳˍ ꓟ ꓟꓬꓱꓽ ꓬꓰ ꓢꓲ꓾ ꓕꓲ ꓠꓬꓲ ꓟꓲ ꓕꓯ ꓙꓰ ꓡ ꓟ ꓔꓯ ꓮ ꓘꓶꓸ ꓗꓹ ꓛꓲ ꓡꓳ= ꓙ ꓟꓶ ꓖꓴꓸ ꓔ ꓢꓴ ꓞꓳ ꓡꓱ ꓐꓴ ꓕꓲ ꓐꓱ ꓠꓬ ꓥꓪ ꓡꓰ ꓢꓯꓼ ꓖꓶ ꓘꓶꓽ ꓔꓯ ꓠꓲꓹ ꓫꓵ ꓐꓭ ꓥꓳ=