ꓢꓲ ꓒ ꓬꓰ‐ꓢꓴ ꓔꓯ ꓠꓲ, ꓟ ꓠꓯ.ꓼ ꓗꓪ ꓔꓬ, ꓖꓴ ꓖꓶꓽ ꓠ, ꓟ

ꓠꓲ, ꓠꓵ ꓟ ꓬꓲꓼ ꓤ ꓠꓬꓲ ꓤ ꓐꓴ‐ꓳ ꓢꓲ ꓡꓰ ꓡꓰ ꓐꓰ ꓓˍ ꓟ ꓠꓯꓼ ꓠꓯꓼ ꓕꓲꓽ ꓙꓵ ꓗꓪ ꓪꓴ‐ꓢ ꓐꓯ ꓘꓶꓽ ꓗꓪ ꓐꓰ ꓢꓯꓼ ꓪ ꓣꓴ ꓓꓴ ꓬꓰ ꓡꓯ꓾ ꓠꓬꓲ. ꓠꓬꓲ ꓣꓳꓽ ꓑ ꓙ ꓪ. ꓟ ꓢꓲ ꓫꓬ ꓕꓳ ꓶ ꓠꓬ ꓟ‐ꓕꓲ ꓕꓳꓽ ꓶ 21ꓽ 33‐46 ꓗꓪ ꓛꓲ ꓥꓳ꓿

ꓢꓲ ꓫꓬ ꓕꓳ ꓶ ꓗꓪ ꓠꓬ ꓐꓱ ꓢꓲ ꓒ ꓕꓲ ꓣꓳ ꓙꓳ ꓟ ꓠꓬ ꓬꓲ. ꓐꓱ ꓗꓪ ꓛꓱꓼ ꓡꓱ ꓜꓲ ꓔꓶꓺ ꓗꓷ ꓢꓲ ꓠꓱ. ꓐꓯ ꓢꓴ ꓔꓯ ꓑꓯ ꓖꓶꓽ ꓔꓲ. ꓖꓶꓽ ꓡꓳ꓿ ꓢꓶ, ꓢꓶꓽ ꓟꓲ ꓡ ꓢꓲ ꓧꓼ ꓝꓲ. ꓛꓲ ꓡ ꓕꓯ ꓐꓱ ꓢꓲ ꓒ ꓠꓬ ꓬꓲ. ꓡ ꓞꓳ ꓔꓯ ꓐꓱꓻ ꓗꓪ ꓝꓲ ꓩꓴ ꓗꓷ ꓡꓳ꓿ ꓖꓳ ꓡꓱ ꓥˍ ꓟꓲ ꓐꓱ ꓑꓯ, ꓜ ꓢꓴ ꓠꓬ ꓐꓱ ꓢꓲ ꓒ ꓡꓰ ꓝꓲ ꓩꓴ ꓡ ꓢꓴ ꓮ ꓙꓵꓽ ꓔꓯ ꓢꓰꓼ ꓗꓷˍ ꓡꓳ꓿ ꓕꓱ ꓟ ꓡꓰ ꓐꓰ ꓐꓱꓻ ꓢꓲ ꓒ ꓠꓬ ꓠꓲ, ꓟ ꓟꓽ ꓙꓬꓺ ꓡꓰ ꓡꓰ ꓐꓰ ꓬꓲ. ꓡ ꓞꓳ ꓮ ꓟꓬꓽ ꓔꓯ ꓧꓶ. ꓕꓯ ꓟ ꓡꓰ ꓐꓰ ꓝꓲ ꓩꓴ ꓗꓷ ꓡꓳ꓿ ꓖꓳ ꓡꓱ ꓥˍ ꓟꓲ ꓐꓱꓻ ꓑꓯ, ꓜ ꓢꓴ ꓐꓱꓻ ꓥꓪ. ꓜ ꓢꓴ ꓖꓳ ꓕꓶ ꓠꓬ ꓧꓶ. ꓕꓯ ꓟ ꓡꓰ ꓐꓰ ꓢꓰꓼ ꓗꓷ ꓡꓳ꓿ ꓖꓳ ꓕꓯ ꓐꓱꓻ ꓢꓲ ꓒ ꓠꓬ ꓬꓲ. ꓪ ꓠꓬ ꓥꓪ ꓤꓽ ꓔꓯ ꓠꓬ ꓠꓻ ꓡꓳ. ꓥꓳ ꓐꓰ ꓓꓵꓽ ꓙ ꓢꓲ ꓬꓲ. ꓤ ꓔꓯ ꓝꓲ ꓩꓴ ꓗꓷ ꓡꓳ꓿ ꓬꓲ. ꓪ ꓠꓬ ꓬꓲ. ꓤ ꓔꓯ ꓟꓳˍ ꓕꓯ ꓧꓶ. ꓕꓯ ꓟ ꓢꓶ. ꓟꓽ ꓛꓲ ꓬꓰ ꓖꓶꓽ ꓡꓳ꓿ ꓬꓲ. ꓤ ꓔꓯ ꓢꓰꓼ ꓗꓷ ꓢꓲ ꓐꓱ ꓠꓱ. ꓫꓱ. ꓟ. ꓗꓪ ꓡꓳ ꓩꓴ ꓗꓷ ꓡꓳ꓿

 ꓢꓲ ꓒ ꓬꓰ‐ꓢꓴ ꓠꓬ ꓔꓯꓺ ꓥꓳꓽ ꓕꓱ ꓟ ꓔꓯ ꓬꓲ. ꓚꓲ. ꓛꓬ ꓬꓲ. ꓔꓯ ꓔꓯꓺ ꓢꓲ ꓐꓯ ꓔ ꓟ ꓥꓳ꓿ ꓢꓲ ꓒ ꓬꓰ‐ꓢꓴ ꓟꓲꓺ ꓠꓯꓺ ꓗꓪ ꓟꓽ ꓬꓯꓼ ꓡ ꓧꓶ. ꓕꓯ ꓗꓪ꓾ ꓪꓴ‐ꓢ ꓠꓬ ꓟꓷ ꓠꓷ ꓝ ꓢꓴ ꓐꓴ ꓮ ꓟꓬꓽ ꓔꓯ ꓝꓲ ꓩꓴ ꓖꓶꓽ ꓗꓷꓳ꓿ ꓖꓳ ꓡꓱ ꓐꓯ ꓥˍ ꓟꓲ ꓮ ꓙꓵꓽ ꓔꓯ ꓞꓳ ꓤ ꓐꓴ ꓠꓲ, ꓙꓳˍ ꓡꓳ꓿ ꓖꓳ ꓡꓱ ꓐꓯ ꓥˍ ꓟꓲ ꓬꓲ. ꓤ ꓔꓲ. ꓢꓲ ꓒ ꓬꓰ‐ꓢꓴ ꓔꓯ ꓞꓳ ꓤ ꓐꓴ ꓠꓻ ꓡꓳ. ꓓꓴ ꓥꓳ ꓐꓰ ꓓꓵꓽ ꓙ ꓢꓲ ꓬꓰ‐ꓢꓴ ꓔꓯ ꓝꓲ ꓩꓴ ꓗꓷˍ ꓕꓯ ꓬꓲ. ꓔꓯ ꓢꓰꓼ ꓗꓷꓳ꓿ ꓢꓲ ꓒ ꓬꓰ‐ꓢꓴ ꓠꓬ ꓔꓯꓺ ꓥꓳꓽ ꓗꓪ ꓐꓰ ꓣꓳꓽ ꓔꓯ ꓐꓯ ꓟꓳ. ꓖꓶꓽ ꓡ ꓔꓬ, ꓟ ꓥꓳ ꓔꓯꓺ ꓥꓳꓽ ꓗꓪ ꓐꓰ ꓣꓳꓽ ꓔꓯ ꓐꓯ ꓟꓳ. ꓖꓶꓽ ꓡ ꓔꓬ, ꓟ ꓠꓬ ꓣꓳꓽ ꓥˍ ꓟꓲ ꓛꓱꓼ ꓡꓱꓼ ꓐꓱꓻ ꓔꓯ ꓑꓯ, ꓜ ꓢꓴ ꓥꓳ꓾ ꓥꓪ. ꓜ ꓢꓴ ꓥꓳ꓾ ꓟꓲꓺ ꓠꓯꓺ ꓕꓱ ꓟ ꓗꓪ ꓣꓳꓽ ꓶꓻ ꓤ ꓮ ꓫꓵꓽ ˍ ꓟꓲ ꓟꓽ ꓙꓳ ꓟ ꓔꓯ ꓢꓷ. ꓡꓰ ꓓꓴ ꓥꓳ꓿

ꓝꓮꓲ꓾  ꓐ, ꓐ ꓪꓴ‐ꓢ ꓠꓬ ꓣꓳꓽ ꓐꓰ ꓙ ꓡꓯ ꓘꓳ ꓠ, ꓟ ꓬꓲ. ꓤ ꓔꓲ. ꓢꓲ ꓒ ꓔꓯ ꓟꓲ ꓠꓯ ꓕꓱ ꓟ ꓗꓪ ꓝꓲ ꓩꓴ ꓡ ꓗꓷꓳ꓿ ꓬꓲ. ꓔꓯ ꓣꓳꓽ ꓠꓲ, ꓟ ꓠꓯ.ꓼ ꓗꓪ ꓘꓳ ꓣꓴ ꓐ, ꓡ ꓡ? ꓐꓯ ꓟ ꓓꓵꓽ ꓙ ꓠꓬꓲ ꓓꓴ ꓥꓳ꓿ ꓣꓳꓽ ꓠꓲ, ꓟ ꓠꓬ ꓛꓱꓼ ꓡꓱꓼ ꓐꓱ ꓥꓳ꓿ ꓬꓲ. ꓠꓲ, ꓟ ꓗꓪ ꓬꓲ. ꓔꓯ ꓙꓵꓽ ꓝꓲˍ ꓕꓯ ꓣꓳꓽ ꓪꓴ‐ꓢ ꓣꓳꓽ ꓔꓯ ꓣꓱꓽ ꓛꓰ ꓖꓶꓽ ꓡ ꓥꓳ꓿

 ꓖꓳ ꓡꓱ ꓠꓬꓲ꓾ ꓠꓬꓲ. ꓠꓬꓲ ꓣꓳꓽ ꓐꓴ ꓠꓲ, ꓟ ꓠꓯ.ꓼ ꓗꓪ ꓢꓲ ꓒ ꓔꓯ ꓘꓴ ꓢꓲ꓾ ꓢꓲ ꓒ ꓔꓯ ꓔꓬ, ꓖꓴ ꓖꓶꓽ ꓢꓲ ꓟꓬꓱꓽ ꓬꓰ ꓡꓯ꓿ ꓕꓱ ꓡꓱ ꓬꓰ ꓥꓳ ꓐꓯ ꓠꓬ ꓣꓳꓽ ꓬꓰ ꓟ ꓮ ꓙꓵꓽ ꓬꓲ. ꓬꓲ ꓢꓲ ꓙꓳ ꓢꓲ꓾ ꓬꓲ. ꓢꓲꓽ ꓓꓱꓼ ꓡ ꓥꓳ  ꓣꓳ ꓠꓲ, ꓟ ꓠꓯꓼ ꓗꓪ ꓡ ꓟ ꓢꓲ ꓒ ꓬꓰ‐ꓢꓴ ꓔꓯ ꓕꓽ ꓖꓼ ꓓꓳꓺ ꓖꓶꓽ ꓡꓯ꓿ ꓬꓲ. ꓔꓯ ꓘꓳ ꓣꓴ ꓡꓯ꓿ ꓮ ꓡꓲꓳ ꓐꓯ ꓠꓬ ꓢꓲ ꓒ ꓬꓰ‐ꓢꓴ ꓐꓰ ꓙ ꓡꓯ ꓘꓳ ꓟꓶˍ ꓕꓯ ꓐ, ꓐ ꓪꓴ‐ꓢ ꓐꓰ ꓢꓲ‐ꓫꓬ‐ꓟ‐ꓦ ꓔꓯ ꓥˍ ꓟꓲ ꓙ ꓡꓯ ꓘꓳ ꓔꓬ, ꓟ ꓥꓳ ꓢꓲ ꓒ ꓐꓰ ꓕꓲꓽ ꓪ ꓛꓳ ꓫꓱ, ꓙꓰ ꓡꓯ꓿ ꓫ ꓟꓳ꓿