ꓣꓳ ꓞꓲꓼ ꓣꓳ ꓤꓶꓸꓹ ꓗꓪ ꓗ, ꓛꓲ ꓛꓲ ꓔꓬ ꓠꓲꓹ ꓫꓵ ꓐꓭ ꓠꓬ ꓮꓽ ꓐꓽ ꓮ ꓟ ꓐꓯ ꓘꓶꓽ ꓠ ꓡꓳ, ꓢꓲ ꓢꓯꓼ ꓕꓵꓼ ꓙꓰ ꓡꓯ=

ꓮ: ꓐꓽ ꓮ ꓟ ꓣꓱꓽ ꓢꓴ ꓐꓴ ꓮ ꓙꓵ ꓠꓬ ꓣꓳ ꓤ ꓣꓳ ꓠꓱ ꓪꓴ: ꓡ ꓕꓯ ꓫ. ꓫ. ꓟꓶ ꓟꓶ ꓔꓬ ꓝꓲ ꓠꓲꓹ ꓟ: ꓫꓵ= ꓖꓳ ꓟ ꓪꓴ. ꓠꓬ ꓞꓲꓼ ꓣꓳ ꓟ ꓕꓲ ꓙꓵꓹ ꓗꓪ ꓟꓲ ꓠꓯ ꓢꓷꓸ ꓠꓲꓹ ꓔꓯ ꓢꓳꓸꓹ ꓠ, ꓟ ꓢꓯꓼ ꓖꓶ ꓡꓳ꓾ ꓬꓲ ꓚꓱ, ꓟꓳ. ꓖꓶ ꓡꓳ= ꓬꓲ ꓪ ꓟ: ꓜ ꓪ ꓡꓲ ꓟ: ꓛꓲ ꓥꓪ ꓤ ꓥꓪ ꓠꓱ ꓕꓳꓽ ꓶ ꓢꓳꓸꓹ ꓕꓯ ꓣꓱꓽ ꓓꓴ ꓐꓰ ꓓꓵ: ꓙ ꓢꓲ ꓒꓴ ꓔꓯ ꓠꓸ ꓦ ꓡꓳ= ꓢꓷꓸ ꓠꓲꓹ ꓢꓷꓸ ꓕꓯ ꓢꓲ ꓟꓲ ꓠꓯ ꓗꓪ ꓫꓸ ꓓꓴ ꓟ: ꓙꓳ ꓔꓬ ꓢ ꓡ ꓥꓳ= ꓮ: ꓐ: ꓮ ꓟ ꓣꓱꓽ ꓢꓴ ꓐꓴ ꓠꓬ ꓣꓳ ꓤ ꓣꓳ ꓠꓱ ꓔꓯ ꓬꓲ ꓪ ꓚꓲ ꓛꓬ ꓟꓬꓱꓽ ꓕꓲ ꓟ ꓪ ꓡꓰ ꓕꓯ ꓢꓲ ꓠꓲꓹ ꓘꓪꓽ ꓫꓵ ꓡꓳ=

ꓖꓳ ꓡꓱ ꓐꓯ ꓥ ꓟꓲ ꓤ ꓠꓱ ꓤ ꓐꓴ ꓮ ꓟꓬꓹ ꓠꓬ ꓮꓽ ꓐꓽ ꓮ ꓟ ꓐꓯ ꓘꓶꓽ ꓔꓯ ꓟꓽ ꓠ ꓠ,= ꓢꓷꓸ ꓠꓲꓹ ꓔꓯ ꓟꓽ ꓢꓯꓼ ꓕꓵꓼ ꓗꓹ ꓛꓲ ꓓꓴ ꓔꓯ ꓡꓰ ꓢꓯꓼ ꓪ ꓪꓽ ꓔꓬ ꓡꓳ= ꓢꓷꓸ ꓠꓲꓹ ꓢꓳꓸꓹ ꓠ ꓔ ꓟ ꓕꓲ ꓙꓵ, ꓗꓪ ꓢꓷꓸ ꓠꓲꓹ ꓔꓯ ꓟꓽ ꓢꓳꓸꓹ ꓮꓽ ꓔꓳ ꓔꓳ ꓦꓯꓼ ꓠꓬꓲ ꓗꓳ. ꓔꓬ ꓡꓳ= ꓮꓽ ꓐꓽ ꓮ ꓟ ꓐꓴ ꓡꓰ ꓙꓲ_ ꓟ ꓚꓱ, ꓗꓪ ꓖꓳ ꓟꓸ ꓥ ꓟꓲ ꓤ ꓠꓱ ꓤ ꓐꓴ ꓠꓬ ꓟꓽ ꓛꓳ ꓔꓬ= ꓬꓲ ꓪ ꓞꓲꓼ ꓪꓴ ꓡ ꓕꓯ ꓢꓷꓸ ꓠꓲꓹ ꓟꓽ ꓢꓷꓸ ꓬꓲ ꓪ ꓤꓶꓸꓹ ꓔꓯ ꓫꓸ ꓫꓸ ꓡꓰ ꓔꓬ ꓡꓳ=

ꓮ ꓟꓶ ꓬꓲ ꓪ ꓟꓲ ꓮꓽ ꓐꓽ ꓮ ꓟ ꓣꓱꓽ ꓢꓴ ꓐꓴ ꓒꓬꓱꓼ ꓡꓳ= ꓢꓷꓸ ꓠꓲꓹ ꓢꓳꓸꓹ ꓠ ꓔ ꓟ ꓕꓲ ꓙꓵ, ꓗꓪ ꓢꓷꓸ ꓠꓲꓹ ꓔꓯ ꓟꓽ ꓢꓳꓸꓹ ꓦꓲꓸꓹ ꓢꓲ ꓒꓽ ꓣꓴ ꓦꓲꓸꓹ ꓢꓲ ꓟ ꓣꓴ ꓬꓲ ꓪ ꓗꓪ ꓚꓳ ꓦꓱꓼ ꓡ ꓟ ꓤ ꓠꓱ ꓤ ꓐꓴ ꓥ ꓟꓲ ꓬꓲ ꓪ ꓡꓰ ꓐꓰ ꓕꓳꓽ ꓶ ꓟꓽ ꓢꓳꓸꓹ ꓐꓯ ꓘꓶꓽ ꓟꓽ ꓠ ꓠ, ꓕꓱ ꓡꓱ ꓗꓷ ꓡ ꓡꓳ= ꓬꓲ ꓤ ꓬꓲ ꓠꓱ ꓐꓴ ꓔꓯ ꓣꓳ ꓡꓰ ꓐꓰ ꓫꓸ ꓝꓲ ꓠꓲꓹ ꓟꓽ ꓫꓵ ꓟ ꓪꓴꓸ ꓠꓬꓲ ꓙꓲˍ ꓟ ꓚꓱ, ꓗꓪ ꓟꓸ ꓖꓶ ꓡꓳ= ꓖꓳ ꓡꓰ ꓐꓯ ꓥ ꓟꓲ ꓐꓯ ꓘꓶꓽ ꓟꓽ ꓠ ꓠ,= ꓕꓱ ꓟ ꓠꓬ ꓣꓳ ꓥ ꓟꓲ ꓗꓳ. ꓡꓳꓹ ꓬꓰ ꓟ ꓕꓲ ꓙꓵ, ꓗꓪ ꓮꓽ ꓐꓽ ꓮ ꓟ ꓐꓴ ꓐꓯ ꓖꓶ ꓔꓯ ꓟꓽ ꓠ ꓠꓹ ꓡꓳ, ꓬꓰ ꓗꓷ ꓟ ꓪꓴ ꓠꓬꓲ ꓮ ꓟꓶ ꓣꓳ ꓤꓶꓸꓹ ꓗꓪ ꓥ ꓟꓲ ꓕꓱ ꓡꓱ ꓔꓳ, ꓜꓳ ꓡ ꓟ ꓥ ꓡꓳ=

ꓕꓱ ꓡꓱ ꓫꓵ ꓠꓬ ꓮꓽ ꓠꓱ ꓕꓯ ꓡꓰ ꓙꓳ ꓢꓲ ꓡ ꓠ, ꓟ ꓗꓪ ꓥ ꓟꓲ ꓕꓱ ꓡꓱ ꓫꓵ ꓠꓬ ꓙꓳ ꓡ ꓥꓳ= ꓟꓲ ꓠꓯ ꓗꓪ ꓮ ꓕꓯ ꓥ ꓟꓲ ꓟꓽ ꓟꓶ ꓬꓰ=  ꓕꓱ ꓡꓱ ꓫꓵ ꓙꓳ ꓥˍ ꓟꓲ ꓣꓳ ꓠꓲꓹ ꓟ ꓡꓰ ꓚꓵ ꓚꓵ ꓙ ꓟꓶ ꓢꓲ ꓢꓯꓼ ꓕꓵꓼ ꓢꓴ ꓥ ꓟꓲ ꓙꓳ ꓡꓳ= ꓣꓳ ꓞꓲꓼ ꓣꓳ ꓤꓶꓸꓹ ꓗꓪ ꓗ, ꓛꓲ ꓛꓲ ꓔꓬ ꓠꓲꓹ ꓫꓵ ꓐꓭ ꓠꓬ ꓮꓽ ꓐꓽ ꓮ ꓟ ꓐꓯ ꓘꓶꓽ ꓠ ꓡꓳ, ꓢꓲ ꓢꓯꓼ ꓕꓵꓼ ꓙꓰ ꓡꓯ= ꓠ ꓡꓳ, ꓢꓲ ꓢꓯꓼ ꓕꓵꓼ ꓐꓭ ꓠꓬ ꓣꓳ ꓠꓯꓼ ꓗꓪ ꓐꓰ ꓦꓱꓼ ꓡ ꓟ ꓤ ꓠꓱ ꓐꓴ ꓥ ꓟꓲ ꓣꓳ ꓐꓯ ꓘꓶꓽ ꓔꓯ ꓠ ꓡꓳ, ꓢꓲ ꓣꓳ ꓡꓰ ꓙꓲ_ ꓟ ꓚꓱꓹ ꓖꓳ ꓟꓳ. ꓔ ꓟ ꓗꓪ ꓛꓳ ꓙꓰ ꓡ ꓥꓳ=