ꓠꓵ ꓠꓲ, ꓢꓲ ꓒ (reflection)

ꓞꓳ ꓤ ꓐꓯ ꓟ ꓠꓬ ꓟꓬꓱꓺ ꓓꓳꓽ ꓪꓴˍ ꓫꓵꓽ꓾ ꓮ ꓟ ꓥˍ ꓟꓲ ꓢꓷ. ꓫꓵꓽ ꓕꓲꓽ ꓣꓳ ꓔꓯ꓾ ꓣꓳꓽ ꓟ ꓧꓳ, ꓡ ꓕꓯ ꓬꓲ. ꓔꓯ ꓠꓬꓲ. ꓛꓰ ꓠ, ꓟ ꓐꓱ ꓶ ꓢꓯꓼ ꓩꓴ ꓗꓴ.ˍ ꓡꓳ꓿ ꓞꓳ ꓤ ꓮ ꓟꓬ ꓢꓷ. ꓢꓴ ꓟꓬꓱꓺ ꓓꓳꓽ ꓪꓴꓽ ꓢꓴ ꓖꓳ ꓕꓲꓽ ꓣꓳ ꓔꓯ ꓡꓳ. ꓠꓲ, ꓟꓽ ꓫꓵ ꓢꓴ ꓙꓳ ꓡ ꓕꓯ ꓬꓲ. ꓔꓯ ꓐꓬꓺ ꓡꓰ ꓝꓲ ꓠꓯ ꓟ ꓐꓱ ꓶ ꓢꓯꓼ ꓕꓵꓼ ꓗꓴ. ꓡꓳ꓿

ꓢꓲ ꓒ ꓬꓰ‐ꓢꓴ ꓓꓵꓽ ꓙ ꓟꓶ ꓓꓴ ꓟꓬꓱꓽ ꓮ ꓟꓬ ꓬꓰˍ ꓟ ꓑꓶ. ꓓꓴ ꓮ ꓙꓵꓽ ꓢꓴ ꓬꓲ. ꓔꓯ ꓢꓷ. ꓡꓰ ꓢꓴ ꓬꓲ. ꓔꓯ ꓠꓲ, ꓠꓵ ꓡꓰ ꓟ ꓥꓳ꓿ ꓕꓱ ꓟ ꓔꓯ ꓡꓳ. ꓟꓽ ꓠꓻ ꓢꓴ ꓠꓬ ꓒ‐ꓡꓰ‐ꓢꓷ ꓐꓴ ꓐꓰ ꓙꓵꓽ ꓗ ꓟ. ꓒ ꓐꓴ ꓥꓳ꓿ ꓬꓲ. ꓪ ꓠꓬ ꓢꓲ ꓒ ꓬꓰ‐ꓢꓴ ꓡꓱ. ꓙꓰ ꓠ, ꓟ ꓐꓱ ꓶ ꓕꓲꓽ ꓫꓵꓽ ꓟꓽ ꓥ ꓕꓲꓽ ꓫꓵꓽ ꓮ ꓕꓯˍ ꓟꓲ ꓓꓵꓽ ꓙ ꓔꓬ, ꓢꓴ ꓥꓳ꓿

ꓠꓬꓲ. ꓠꓬꓲ ꓣꓳꓽ ꓑ ꓙ ꓪ ꓟ ꓢꓲ ꓫꓬ ꓕꓳ ꓶ ꓗꓪ ꓬꓲ. ꓪ ꓠꓬ ꓦꓬꓽ ꓛꓳ ꓧꓪ ꓟ ꓗꓪ ꓐꓰ ꓣꓴ ꓟꓶ ꓔ ꓟ ꓤ ꓟꓶ ꓤ ꓕꓲꓽ ꓣꓳ ꓔꓯ ꓘꓴ ꓔꓯ, ꓡ ꓢꓲ꓾ ꓭ. ꓛꓲ ꓗꓪ ꓐꓰ ꓡꓳꓺ ꓢꓰꓼ ꓠꓯ ꓡ? ꓐꓰ ꓢꓲ ꓒ ꓬꓰ‐ꓢꓴ ꓔꓯ ꓠꓻ ꓠꓬꓲ. ꓡꓳ꓿ ꓢꓲ ꓒ ꓬꓰ‐ꓢꓴ ꓡꓰ ꓕꓽ ꓢꓰꓼ ꓐꓰ ꓐꓯˍ ꓠꓬ ꓟꓳ‐ꓫꓲ ꓙꓵꓽ ꓗꓪ ꓔꓯ ꓒꓳ, ꓔꓳ ꓟ ꓗꓷ ꓡꓰˍ ꓥꓳ꓿ ꓢꓰꓼ ꓗꓷˍ ꓐꓰ ꓐꓯ ꓠꓬ ꓣꓳ‐ꓟ ꓡ ꓞꓳ ꓔꓯ ꓒꓳ, ꓔꓳ ꓟ ꓗꓷ ꓡꓰ ꓥꓳ꓿ ꓮ ꓡꓰꓳ ꓐꓯ ꓠꓬ ꓬꓴ‐ꓓ ꓡ ꓞꓳ ꓐꓴ ꓠꓬ ꓡ ꓞꓳ ꓕꓲꓽ ꓣꓳ ꓔꓯ ꓢꓰꓼ ꓠ, ꓟ ꓙꓵꓽ ꓪ ꓟꓽ ꓙꓳ꓿ ꓕꓱ ꓟ ꓔꓯ ꓢꓲ ꓒ ꓬꓰ‐ꓢꓴ ꓢꓷ. ꓠꓬꓲ ꓠꓴ ꓪ ꓗꓪ ꓟ ꓝꓴꓲ. ꓟꓽ ꓙꓳ ꓢꓴ ꓧꓶ. ꓕꓯ ꓭ. ꓛꓲ ꓗꓪ ꓐꓰ ꓡꓳꓺ ꓐꓰ ꓐꓯ ꓖꓶˍ ꓡꓳ꓿

ꓛꓳ ꓤ ꓠꓬ ꓐꓯ ꓟꓴ ꓘꓶꓽ ꓠ, ꓟ ꓡꓰ ꓓꓵꓽ ꓙˍ ꓡꓳ꓿ ꓝꓴꓲ. ꓧꓪ ꓠ, ꓟ ꓡꓰ ꓬꓰ ꓡꓳ꓿ ꓪꓴ‐ꓢ ꓠꓬ ꓖꓼ ꓖꓶꓽ ꓠ, ꓟ꓾ ꓠꓵ ꓠꓲ, ꓟꓳ. ꓖꓶꓽ ꓠ, ꓟ ꓡꓰ ꓬꓰ ꓡꓳ꓿ ꓢꓲ ꓒ ꓬꓰ‐ꓢꓴ ꓠꓬ ꓤ ꓟꓶ ꓤ ꓖꓳ ꓕꓲꓽ ꓣꓳ ꓔꓯ ꓖꓼ ꓖꓶꓽ ꓡꓳ꓿

ꓒ‐ꓡꓰ‐ꓢꓷ ꓐꓴ ꓮ ꓡꓰ ꓘꓶ. ꓛꓲ ꓢꓲ ꓒ ꓬꓰ‐ꓢꓴ ꓔꓯ ꓝꓴꓲ. ꓧꓪ ꓥˍ ꓟꓲ ꓢꓲ ꓒ ꓬꓰ‐ꓢꓴ ꓠꓬ ꓠꓵ ꓠꓲ, ꓟꓬꓱꓽ ꓡꓰ ꓬꓰˍ ꓟ ꓑꓶ. ꓓꓴ ꓬꓲ. ꓪ ꓠꓬ ꓬꓲ. ꓔꓯ ꓝꓴꓲ. ꓧꓪ, ꓟꓽ ꓠ꓿

ꓣꓳꓽ ꓥˍ ꓟꓲ ꓮ ꓡꓰ ꓫꓵꓽ ꓔꓳ, ꓙꓳ ꓡ ꓥˍ ꓟꓲ ꓠꓵ ꓠꓲ, ꓗꓪ ꓐꓰ ꓡꓰ ꓒꓳ, ꓖꓶꓽˍ ꓕꓯ ꓮ ꓟꓽ ꓥˍ ꓟꓲ ꓣꓳꓽ ꓔꓯ ꓗ. ꓧꓪ ꓟꓽ ꓐ ꓡ꓿

ꓠꓬꓲ. ꓠꓬꓲ ꓣꓳꓽ ꓠꓵ ꓠꓲ, ꓣꓱꓽ ꓢꓲ ꓢꓯꓼ ꓕꓵꓼ ꓙꓰ ꓡꓯ꓿