ꓛꓳꓽ ꓒꓯꓹ ꓞꓲ ꓠꓬꓲꓽ ꓣꓳ ꓔꓯ ꓝꓲ ꓩꓴ ꓗꓷˍ ꓟ

ꓬꓲꓼ ꓤ ꓠꓬꓲ ꓤ ꓐꓴꓳ꓾ ꓮ ꓙꓵꓽ ꓢꓴ ꓔꓯ ꓧꓪꓸ ꓧꓪꓸꓼ= ꓠꓬꓲꓸ ꓠꓬꓲ ꓣꓳ ꓑ ꓙꓽ ꓪˍ ꓟ ꓟꓸ ꓟꓲꓽ ꓠꓬ ꓟ-ꓕꓲ 10ꓽ7-15 ꓥ ꓡꓳ=  ꓢꓲ ꓒ ꓬꓰ-ꓢꓴ ꓠꓬ ꓬꓲ ꓝꓲ ꓓꓴ ꓐꓴ ꓔꓯ ꓝꓲ ꓩꓴ ꓗꓷˍ ꓟ ꓟꓸ ꓟꓲꓽ ꓥ ꓡꓳ= ꓢꓲ ꓒ ꓬꓰ-ꓢꓴ ꓠꓬ ꓬꓲ ꓝꓲ ꓓꓴ ꓐꓴ ꓔꓯ “ꓠꓴ ꓪ ꓙꓰ ꓢꓲ ꓠꓬꓲ ꓪꓴ-ꓢ ꓗꓴꓷꓼ ꓠꓬ ꓠꓶꓽ ꓡꓻꓳ꓾ ꓐꓰ ꓟꓸ ꓟꓲꓽ ꓚ= ꓟꓸ ꓟꓲꓽ ꓚ ꓙꓰ ꓢꓲ ꓠꓲꓽ ꓢ ꓓꓯ ꓔꓯ ꓖꓼ ꓓꓳ= ꓠꓻ ꓢꓴ ꓒꓬꓽ ꓢꓴ ꓐꓴ ꓔꓯ ꓓꓻ ꓡꓰ ꓝꓲ=” ꓐꓰ ꓐꓯ ꓢꓲ ꓝꓲ ꓩꓴ ꓗꓷˍ ꓡꓳ= “ꓝꓮꓲ ꓒꓴ ꓫꓵꓺ ꓥˍ ꓟꓲ ꓕ ꓔꓯꓹ ꓙꓰ= ꓙꓽ ꓥꓳꓽˍ ꓟꓲ ꓕ ꓔꓯꓹ= ꓮ ꓫꓵꓽ ꓥ ꓟꓲ ꓕꓽ ꓔꓯꓹ” ꓐꓯ ꓢꓲ ꓠꓬꓲ ꓝꓲ ꓩꓴ ꓗꓷˍ ꓡꓳ= ꓕꓱ ꓟ ꓡꓰꓽ ꓟꓽ ꓞꓲꓺ “ꓠꓴ ꓪ ꓙꓰ ꓛꓲ ꓬꓰˍ ꓟ ꓥ ꓕ ꓑꓳꓸꓼ ꓗꓪ꓾ ꓠꓴ ꓪ ꓢꓲ ꓡꓲ ꓟ ꓙꓳ ꓝꓲ꓾ ꓐꓰ ꓐꓯ” ꓐꓰ ꓢꓲ ꓒ ꓬꓰ-ꓢꓴ ꓡꓰ ꓬꓲ ꓪ ꓔꓯ ꓕꓵꓼ ꓪ ꓖꓶˍ ꓡꓳ=

ꓬꓲꓼ ꓤ ꓠꓬꓲ ꓤ ꓐꓴꓳ꓾ ꓝꓲ ꓓꓴ ꓐꓴ ꓐꓯ ꓟ ꓠꓬ ꓮ ꓡꓰ ꓥ ꓡ꓾ ꓐꓯ ꓟ ꓣꓳ ꓔꓯ ꓐꓯ ꓟꓸ ꓖꓶ ꓡ ꓔꓬ ꓡꓳ= ꓬꓲ ꓪꓴꓸ ꓕꓲ ꓙꓰꓽ ꓟ ꓠꓬ ꓢꓲ ꓒ ꓬꓰ-ꓢꓴ ꓬꓲ ꓗ ꓠꓯꓸ ꓛꓳ ꓢꓴ ꓔꓯ ꓬꓲ ꓠꓬ ꓓꓵꓽ ꓙ ꓮ’ ꓡꓰ ꓓꓴ ꓟꓬꓱꓽ ꓬꓰ ꓐ ꓡˍ ꓟ ꓣꓱꓽ ꓛꓰꓽ ꓖꓶ ꓔ ꓡꓳ꓾ ꓙꓵꓽ ꓪ ꓖꓶ ꓔ ꓡꓳ ꓐꓯ ꓟ ꓣꓳ ꓢꓷꓸ ꓪ ꓡꓳ= ꓢꓲ ꓒ ꓬꓰ-ꓢꓴ ꓔꓯ ꓛꓳ ꓢꓴ ꓝꓲ ꓓꓴ ꓐꓴ ꓥ ꓕꓯ ꓠꓽ ꓕꓱ ꓡꓱ ꓫꓵꓽ ꓓꓵꓽ ꓙ ꓮ’ ꓡꓰ ꓓꓴ ꓟꓬꓱꓽ ꓔꓯ ꓬꓰ ꓐ ꓡˍ ꓡꓳ= ꓪꓽ ꓘꓴˍ ꓟ ꓗꓪ ꓐꓰ ꓠꓻ ꓢꓴ ꓔꓯ ꓓꓻ ꓡꓰ ꓝꓲˍ ꓟ ꓣꓱꓽ ꓛꓰꓽ꓾ ꓪꓽ ꓘꓴˍ ꓟ ꓗꓪ ꓐꓰ ꓠꓲꓹ ꓫ ꓟꓬ ꓫ ꓢꓴ ꓔꓯ ꓠꓲꓹ ꓟ ꓗꓴ ꓟꓶˍ ꓟ ꓥꓳ ꓡꓳꓸ ꓓꓴ ꓟꓶˍ ꓟ ꓣꓱꓽ ꓛꓰꓽ꓾ ꓝꓮꓲ ꓠꓱꓸ ꓐꓯ ꓓꓵꓽ ꓙ ꓟꓶ ꓓꓴ ꓟꓬꓱꓽ ꓮ ꓟꓬꓹ ꓔꓯ ꓬꓰ ꓐ ꓡˍ ꓡꓳ= ꓮ ꓡꓲꓳ ꓐꓯ ꓠꓬ ꓢꓲ ꓒ ꓬꓰ-ꓢꓴ ꓠꓬ ꓬꓲ ꓝꓲ ꓓꓴ ꓐꓴ ꓔꓯ ꓙꓵꓽ ꓪ ꓖꓶ ꓔ ꓡꓳ= ꓠꓬꓲꓸ ꓠꓬꓲ ꓢꓲꓽ ꓫꓬ ꓕꓳ ꓶ ꓗꓪ ꓓꓹ ꓟ ꓡꓰ ꓐꓰ ꓬꓲ ꓝꓲ ꓓꓴ ꓔꓯ ꓙꓵꓽ ꓪ ꓖꓶ ꓔ ꓟ ꓕꓲ ꓡꓰꓹ ꓬꓲ ꓔꓯ ꓛꓳ ꓢꓴ꓾ ꓬꓲ ꓟꓬꓱꓽ ꓬꓰ ꓢꓴ ꓥ ꓕ ꓑꓳꓸꓼ ꓔꓯ ꓥˍ ꓟꓲ ꓙꓵꓽ ꓪ ꓕꓱ ꓟ ꓖꓶ ꓔ ꓡꓳ=

ꓝꓮꓲ ꓠꓬꓲꓽ ꓙꓰꓽ ꓕꓲ ꓙꓰꓽ ꓠꓬ ꓬꓰ-ꓢꓴ ꓬꓲ ꓝꓲ ꓓꓴ ꓐꓯ ꓟ ꓠꓬ ꓒꓴ꓾ ꓫꓵꓺ ꓔꓯ ꓥꓳ ꓡꓳꓸ ꓢꓲ ꓠꓬꓲ ꓟꓬꓱꓽ ꓬꓰ ꓟꓽ ꓓ= ꓢꓲ ꓒ ꓬꓰ-ꓢꓴ ꓡꓰ ꓕꓱ ꓡꓱ ꓐꓯ ꓔ ꓡꓳ= ꓙꓽ ꓥꓳꓽ ꓔꓯˍ ꓟꓲ ꓕ ꓔꓯꓹ= ꓛꓲ ꓠꓲ ꓔꓯˍ ꓟꓲ ꓮ ꓟꓬꓹ ꓕ ꓣꓴ꓾ ꓮ ꓫꓵꓽ ꓥˍ ꓟꓲ ꓕ ꓣꓴ ꓐꓯ ꓢꓲ ꓬꓲ ꓡꓰ ꓝꓲ ꓩꓴˍ ꓡꓳ= ꓕꓲ ꓚꓱꓹ ꓐꓯ ꓪ ꓠꓬ ꓢꓲ ꓒ ꓬꓰ-ꓢꓴ ꓔꓯ ꓛꓳꓻ ꓢꓴ ꓐꓴ ꓠꓬ ꓒꓴ ꓫꓵꓺ ꓔꓯ ꓡꓰꓽ ꓠꓲꓹ ꓥꓳ ꓢꓲ꓾ ꓥꓳ ꓡꓳꓸ ꓢꓲ ꓠꓬꓲ ꓟꓬꓱꓽ ꓬꓰ ꓟꓽ ꓓ= ꓣꓳ ꓥꓳ ꓡꓳꓸ ꓖꓴ꓾ ꓣꓳ ꓠꓲꓹ ꓟ ꓒꓵꓽ ꓶ ꓠꓬ ꓪꓴ-ꓢ ꓔꓬ ꓗꓪ ꓡꓰꓽ ꓗꓷ ꓔ ꓠꓯꓹ ꓟ ꓥ ꓡꓳ꓾ ꓐꓰ ꓢꓲ ꓒ ꓬꓰ-ꓢꓴ ꓡꓰ ꓐꓯ ꓔ ꓡꓳ= ꓔꓯꓺ ꓥꓳꓽ꓾ ꓪꓴ-ꓢ ꓟꓬꓱꓽ ꓬꓰ ꓢꓴ ꓕꓲ ꓣꓳ ꓠꓬ ꓒꓴ ꓫꓵꓺ ꓔꓯ ꓮ ꓘꓶꓸ ꓟꓬ ꓠꓯꓸˍ ꓕꓯ꓾ ꓒꓴˍ ꓡꓰꓽ ꓮ ꓟꓬꓹ ꓙꓳˍ ꓕꓯ ꓪꓴ-ꓢ ꓔꓯ ꓟꓽ ꓣꓱꓽ ꓞꓹꓳ꓾ ꓪꓴ-ꓢ ꓣꓱꓽ ꓛꓰꓽ ꓡꓰꓸ ꓟꓽ ꓞˍꓳ= ꓒꓴ ꓮ ꓟꓬꓹ ꓙꓳˍ ꓟ ꓑꓶꓸ ꓓꓴ ꓕꓲ ꓠꓲꓹ ꓟ ꓡꓱꓸꓼ ꓠꓬ ꓒꓴ ꓕꓯꓽ ꓢꓲ ꓗꓪ ꓡꓰꓽ ꓓꓹ ꓡꓳ= ꓖꓳ ꓟ ꓑꓶꓸ ꓓꓴ ꓠꓬꓲꓸ ꓠꓬꓲ ꓢꓲ ꓫꓬ ꓕꓳ ꓶ ꓗꓪ ꓢꓲ ꓒ ꓬꓰ-ꓢꓴ ꓠꓬ ꓬꓲ ꓝꓲ ꓓꓴ ꓕꓲ ꓣꓳ ꓥꓳ ꓐꓯ ꓠꓬ ꓒꓴ ꓫꓵꓺ ꓔꓯ ꓟꓽ ꓠꓲꓹ ꓥꓳ ꓥꓳ꓾ ꓪꓴ-ꓢ ꓔꓯ ꓡꓰꓽ ꓥꓳ ꓡꓳꓸ ꓢꓲ ꓙꓰ ꓠꓹ ꓟ ꓬꓲ ꓡꓰ ꓣꓳ ꓔꓯ ꓐꓯ ꓟꓸ ꓖꓶ ꓡ ꓔꓬ ꓡꓳ=

ꓢ ꓙꓰꓽ ꓕꓲ ꓙꓰꓽ ꓠꓬ꓾ ꓙꓰ ꓛꓲ ꓬꓰˍ ꓟ ꓥ ꓕ ꓑꓳꓸꓼ ꓗꓪ ꓠꓴ ꓪ ꓢꓲ ꓡꓲ ꓟ ꓟꓶ ꓝꓲ ꓐꓰ ꓐꓯ꓾ ꓐꓰ ꓢꓲ ꓒ ꓬꓰ-ꓢꓴ ꓡꓰ ꓐꓯ ꓔ ꓡꓳ= ꓢꓲ ꓡꓲ ꓟ ꓟꓶ ꓝꓲ ꓐꓯ ꓟ ꓐꓯ ꓘꓶꓽ ꓠꓬ ꓣꓳ ꓠꓲꓹ ꓟ ꓠꓯꓸꓼ ꓗꓪ ꓙꓲˍ ꓟ ꓡꓰꓽ ꓖꓶ ꓠꓹ ꓟ ꓬꓳꓸ ꓚꓵˍ ꓡꓳ= ꓢꓴ ꓡꓰ ꓣꓳ ꓔꓯ ꓮ ꓡꓲ ꓐꓯ ꓡˍ ꓥ ꓟꓲ꓾ ꓮ ꓡꓲ ꓑꓳꓹ ꓕ ꓡˍ ꓥ ꓟꓲ꓾ ꓣꓳ ꓠꓲꓹ ꓟ ꓠꓯꓸꓼ ꓗꓪ ꓠꓬ ꓣꓳ ꓠꓬ ꓢꓲ ꓒ ꓬꓰ-ꓢꓴ ꓬꓲ ꓝꓲ ꓓꓴ ꓥ ꓟ ꓑꓶꓸ ꓓꓴ ꓢꓲ ꓒ ꓬꓰ-ꓢꓴ ꓒꓬꓱꓽ ꓟꓬ ꓡꓳꓸ ꓠꓬꓲ ꓢꓲ ꓠꓬꓲ ꓢꓯꓼ ꓕꓵꓼ ꓙꓰˍ ꓥꓳ ꓐꓯ ꓠꓬ꓾ ꓣꓳ ꓠꓽ ꓢꓲ ꓒ ꓬꓰ-ꓢꓴ ꓬꓲ ꓝꓲ ꓓꓴ ꓚꓵ ꓥ ꓡꓳ꓾ ꓐꓯ ꓟ ꓣꓳ ꓔꓯ ꓐꓯ ꓟꓸ ꓖꓶ ꓡ ꓔꓬ ꓡꓳ=

ꓢꓴ ꓡꓰ ꓣꓳ ꓔꓯ ꓮ ꓡꓲ ꓘꓶꓻ ꓡˍ ꓥ ꓟꓲ꓾ ꓣꓳ ꓠꓲꓹ ꓟ ꓠꓯꓸꓼ ꓗꓪ ꓠꓬ ꓠꓵꓻ ꓠꓲꓹ ꓗꓪ ꓐꓰ ꓛꓳ ꓫꓱꓽ ꓠꓹ ꓟ ꓣꓳ ꓔꓯ ꓐꓯ ꓖꓶ ꓡ ꓔꓬ ꓡꓳ= ꓣꓳ ꓖꓶˍ ꓟ ꓠꓵꓻ ꓠꓲꓹ ꓔꓯ ꓬꓲ ꓟꓽ ꓘꓳꓹ ꓣꓴ ꓐꓯ ꓕꓯ ꓠꓽ ꓠꓵꓻ ꓠꓲꓹ ꓖꓳ ꓟ ꓣꓳ ꓔꓯ ꓚꓱꓹ ꓬꓲꓼ ꓡˍ ꓥꓳ꓾ ꓐꓰ ꓢꓲ ꓒ ꓬꓰ-ꓢꓴ ꓡꓰ ꓐꓯ ꓖꓶ ꓡ ꓔꓬ ꓡꓳ= ꓖꓳ ꓡꓱ ꓠꓬꓲ ꓢꓲ ꓒ ꓬꓰ-ꓢꓴ ꓔꓯ ꓛꓳ ꓢꓴ ꓠꓬ ꓢꓴ ꓡꓰ ꓣꓳ ꓔꓯ ꓮ ꓡꓲ ꓬꓰ ꓡˍ ꓥ ꓟꓲ ꓙꓵꓻ ꓠꓲꓹ ꓡꓰ ꓣꓳ ꓠꓬ ꓬꓲ ꓪ ꓔꓯ ꓠꓲꓹ ꓠꓵꓻ ꓖꓶ ꓠꓹ ꓟ꓾ ꓙꓲˍ ꓟ ꓖꓶ ꓠꓹ ꓟ ꓥ ꓡꓳ꓾ ꓐꓰ ꓬꓲ ꓝꓲ ꓓꓴ ꓣꓱꓽ ꓢꓴ ꓐꓴ ꓔꓯ ꓐꓯ ꓟꓳꓸ ꓖꓶˍ ꓟ ꓥ ꓡꓳ=

ꓬꓲꓼ ꓤ ꓠꓬꓲ ꓤ ꓐꓴꓳ꓾ ꓢꓲ ꓒ ꓬꓰ-ꓢꓴ ꓔꓯ ꓛꓳ ꓢꓴ ꓕꓲ ꓣꓳ ꓠꓬ ꓓꓵꓽ ꓙ ꓮ’ ꓡꓰ ꓓꓴ ꓟꓬꓱꓽ ꓬꓰ ꓐ ꓡˍ ꓥꓳ= ꓠꓻ ꓢꓴ ꓒꓬꓽ ꓢꓴ ꓐꓴ ꓔꓯ ꓠꓻ ꓓꓻ ꓡꓰ ꓝꓲ ꓐ ꓡˍ ꓥꓳ= ꓢꓲ ꓒ ꓬꓰ-ꓢꓴ ꓟꓬꓱꓺ ꓗꓪ ꓐꓰ ꓬꓲ ꓠꓬ ꓓꓵꓽ ꓙ ꓮ’ ꓡꓰ ꓓꓴ ꓟꓬꓱꓽ  ꓬꓰ ꓐ ꓡˍ ꓥꓳ= ꓠꓬꓲꓽ ꓫꓵꓽ ꓕꓲ ꓫꓵꓽ ꓠꓬ ꓬꓲ ꓠꓲꓹ ꓟ ꓒꓵꓽ ꓶ ꓠꓬ ꓢꓲ ꓒ ꓬꓰ-ꓢꓴ ꓔꓯ ꓡꓰꓽ ꓗꓷ ꓔ ꓥꓳ= ꓒꓴ ꓫꓵꓺ ꓐꓱ ꓶ ꓟꓬꓱꓽ ꓬꓰˍ ꓟ ꓟꓽ ꓥ ꓠꓬ ꓬꓲ ꓠꓲꓹ ꓟ ꓠꓬ ꓒꓴ ꓫꓵꓺ ꓗꓪ ꓡꓰꓽ ꓟꓽ ꓠꓲꓹ ꓥꓳ ꓔ=  ꓢ ꓫꓵꓽ ꓕꓲ ꓫꓵꓽ ꓠꓬ ꓮꓽ ꓟ ꓮ ꓡꓲ ꓗꓪ ꓮ ꓡꓲ ꓫꓵꓽ ꓬꓰ ꓖꓶ ꓡˍ ꓥ ꓟꓲ ꓠꓲꓹ ꓟ ꓠꓯꓸꓼ ꓗꓪ ꓙꓲˍ ꓟ ꓡꓰꓽ ꓬꓰ ꓖꓶ ꓢꓲ ꓠꓬꓲ ꓬꓲ ꓠꓬ ꓣꓱꓽ ꓛꓰꓽ ꓧꓪ ꓢꓴ ꓥ ꓡꓳ꓾ ꓐꓰ ꓢꓲ ꓒ ꓬꓰ-ꓢꓴ ꓬꓲ ꓝꓲ ꓓꓴ ꓥ ꓟ ꓣꓳ ꓥˍ ꓟꓲ ꓢꓲ ꓒ ꓬꓰ-ꓢꓴ ꓔꓯ ꓛꓳ ꓢꓴ ꓥ ꓟ ꓑꓶꓸ ꓓꓴ ꓢꓲ ꓒ ꓬꓰ-ꓢꓴ ꓐꓯ ꓟ ꓡꓰ ꓢꓯꓼ ꓕꓵꓼ ꓙꓰ ꓡꓯ= ꓮ ꓙꓵꓽ ꓔꓯ ꓫ ꓟꓳ=