ꓪꓴ-ꓢ ꓠꓬ ꓣꓳ ꓢꓯꓼ ꓪ (reflection)

ꓡ ꓞꓳ ꓕꓲ ꓣꓳ ꓔꓯ ꓬꓲ ꓢꓯꓼ ꓪ ꓠꓬ ꓮ ꓗꓪ ꓙꓳˍ ꓡ ꓐꓰ ꓠ ꓠꓬꓲ ꓠꓬ꓾ꓬꓲ ꓠꓬ ꓬꓲ ꓖꓳ ꓓꓱꓽ ꓗꓪ꓾ ꓬꓲ ꓡꓯ ꓪꓵꓽ ꓗꓪ꓾ ꓬꓲ ꓧꓪꓽ ꓖꓳ ꓓꓱꓽ ꓗꓪ ꓙꓳˍ ꓡꓳ ꓐꓰ ꓐꓯ ꓥꓳ=ꓮ ꓫꓵ ꓑꓶꓸ ꓓꓴ ꓥ ꓡ?=ꓮ ꓡꓲ ꓗꓪ ꓮ ꓫꓵꓽ ꓟꓬꓱꓽ ꓬꓰˍ ꓥ ꓟꓲ ꓢꓯꓼ ꓪ ꓧꓳꓽ ꓗꓷˍ ꓟ ꓑꓶꓸ ꓓꓴ ꓢꓯꓼ ꓪ ꓠꓬ ꓧꓪꓽ ꓖꓳ ꓓꓱꓽ ꓗꓪ ꓙꓳˍ ꓡꓳ ꓐꓰ ꓒꓳꓹ ꓖꓶˍ ꓥꓳ=ꓖꓳ ꓡꓱ ꓐꓯ ꓥ ꓟꓲ ꓣꓳ ꓪꓴ-ꓢ ꓔꓯ ꓙꓵꓻ ꓢꓴ ꓙꓲ-ꓢꓴ ꓢꓲ ꓤ ꓐꓴ ꓮ ꓙꓵꓽ ꓠꓬ꓾ꓣꓳ ꓢꓯꓼ ꓪ ꓠꓬ ꓣꓳ ꓧꓪꓽ ꓖꓳ ꓓꓱꓽ ꓗꓪ ꓟꓽ ꓙꓳ= ꓮ ꓡꓲ ꓗꓪ ꓙꓳˍ ꓡ? ꓐꓯ ꓠꓬ꓾ ꓪꓴ-ꓢ ꓠꓯꓸꓼ ꓗꓪ ꓙꓳˍ ꓡꓳ= ꓪꓴ-ꓢ ꓠꓬ ꓣꓳ ꓢꓯꓼ ꓪ ꓥ ꓡꓳ=ꓖꓳ ꓡꓱ ꓠꓬꓲ ꓢꓯꓼ ꓪ ꓖꓳ ꓟ ꓔꓯ ꓣꓳ ꓮ ꓡꓲ ꓐꓰ ꓣꓱꓽˍ ꓡ?=

ꓣꓳ ꓕꓲ ꓫꓵꓽ ꓫꓵꓽ ꓬꓰˍ ꓥ ꓟꓲ ꓣꓳ ꓢꓯꓼ ꓪ ꓣꓱꓽˍ ꓠꓬ ꓣꓳ ꓧꓪꓽ ꓖꓳ ꓓꓱꓽ ꓗꓪ ꓣꓱꓽˍ ꓟ ꓡꓰ ꓐꓰ ꓪꓴ-ꓢ ꓗꓪ ꓐꓰ ꓦ ꓢꓯꓼ ꓪ ꓔꓯ ꓮ ꓡꓲ ꓐꓰ ꓣꓱꓽˍ ꓡ?=ꓣꓳ ꓠꓬ ꓪꓽ ꓘꓴˍ ꓟ ꓗꓪ ꓐꓰ ꓣꓱꓽˍ ꓡꓳ=ꓪꓽ ꓘꓴ ꓢꓲ ꓪꓴ-ꓢ ꓗꓪ ꓐꓰ ꓢꓯꓼ ꓪ ꓣꓴˍ ꓟ ꓥ ꓡꓳ=ꓣꓳ ꓣꓱꓽ ꓔꓬ ꓟ ꓑꓧꓳꓠꓰ ꓬꓲ ꓢꓯꓼ ꓖꓴ ꓡꓰ ꓠꓬ ꓮꓸ ꓔꓳꓸ ꓗꓪ ꓗꓸ ꓗꓷ ꓟ ꓡꓰ ꓐꓰ ꓣꓳ ꓢꓯꓼ ꓪ꓾ ꓕꓲ ꓚꓱꓹ ꓐꓯ ꓠꓬ ꓣꓳ ꓦ ꓢꓯꓼ ꓪ ꓖꓴ ꓡꓰ ꓐꓷꓹ ꓠꓬ ꓛꓲ ꓝꓲꓸ ꓖꓶ ꓢꓲ꓾ ꓪꓽ ꓘꓴˍ ꓠꓬ ꓪꓴ-ꓢ ꓗꓪ ꓐꓰ ꓢꓯꓼ ꓪ ꓟꓶˍ ꓥꓳ=

ꓖꓳ ꓡꓱ ꓠꓬꓲ ꓣꓳ ꓢꓯꓼ ꓪ ꓠꓬ ꓣꓳ ꓧꓪꓽ ꓖꓳ ꓓꓱꓽ ꓗꓪ ꓟꓽ ꓙꓳ= ꓣꓳ ꓡꓯ ꓪꓵꓽ ꓗꓪ ꓟꓽ ꓙꓳ=ꓮ ꓡꓲ ꓗꓪ ꓙꓳ ꓥꓺ ꓐꓯ ꓠꓬ ꓛꓲ ꓝꓲꓸ ꓖꓶ ꓢꓲ ꓪꓽ ꓘꓴˍ ꓟ ꓗꓪ ꓙꓳˍ ꓡꓳ=ꓖꓳ ꓡꓱ ꓠꓬꓲ ꓒꓲ-ꓡꓲ-ꓒꓲ ꓕꓳ ꓶ 4ꓽ13 ꓗꓪ ꓥꓪ ꓔꓯ ꓢꓯꓼ ꓪ ꓖꓶˍ ꓟ ꓪꓴ-ꓢ ꓗꓪ ꓐꓰ ꓥꓪ ꓮ ꓫꓵꓽ ꓟꓲ ꓬꓰ ꓐ ꓡˍ ꓡꓳ ꓐꓰ ꓢꓲꓽ ꓫꓬ ꓢꓴ ꓒꓳ-ꓡꓳ ꓡꓰ ꓐꓯ ꓔ ꓡꓳ=

ꓖꓳ ꓡꓱ ꓠꓬꓲ ꓬꓲ ꓤ ꓠꓬꓲ ꓤ ꓐꓴꓳ꓾ ꓣꓳ ꓬꓰ ꓟꓽ ꓐ ꓡꓺꓳ ꓫꓵꓽ ꓕꓲ ꓫꓵꓽˍ ꓟꓲ ꓟꓽ ꓙꓳ=ꓮ ꓫꓵ ꓑꓶꓸ ꓓꓴ ꓥ ꓐꓯˍ ꓠꓬ ꓪꓴ-ꓢ ꓠꓬ ꓣꓳ ꓦ ꓡꓱ ꓖꓴ ꓣꓳ ꓢꓯꓼ ꓪ ꓥꓳ=

ꓠꓬꓲꓸ ꓠꓬꓲ ꓕꓲ ꓠꓬꓲ ꓐꓱ ꓶ ꓓꓵꓽ ꓙ ꓓꓴ ꓠꓬ ꓟꓸ ꓟꓲꓽ ꓝꓲꓸ ꓕꓱ ꓕꓲ ꓝꓲꓸ ꓗꓪ ꓐꓰ ꓢꓯꓼ ꓪ ꓖꓶ ꓩꓴ ꓠꓲꓹ ꓫꓵˍ ꓡꓳ=ꓣꓳ ꓠꓬ ꓣꓳ ꓢꓯꓼ ꓪ ꓠꓬ ꓣꓳ ꓢꓷꓸ ꓠꓲꓹ ꓗꓪ ꓟꓽ ꓙꓳ=ꓣꓳ ꓗꓴꓸˍ ꓟ ꓗꓪ ꓣꓳ ꓢꓷꓸˍ ꓟ ꓗꓪ ꓟꓽ ꓙꓳ=ꓮ ꓙꓵꓽ ꓠꓬ ꓪꓴ-ꓢ ꓠꓯꓸꓼ ꓗꓪ ꓙꓳˍ ꓡꓳ=

ꓖꓳ ꓡꓱ ꓠꓬꓲ ꓕꓲꓽ ꓠꓬꓲ ꓕꓲꓽ ꓠꓬꓲ  ꓣꓳ ꓢꓯꓼ ꓪ ꓕꓱ ꓟ ꓪꓴ-ꓢ ꓢꓯꓼ ꓪ ꓔꓯ ꓣꓴ ꓢꓲ ꓠꓬꓲ ꓞꓳ ꓙꓳ ꓗꓴꓸˍ ꓟ ꓒꓬꓱꓼ ꓡ ꓝꓲ ꓐꓰ ꓮ ꓙꓵꓽ ꓔꓯ ꓬꓲꓼ ꓠꓬꓲꓸ ꓖꓶ ꓠꓲꓹ ꓫꓵˍ ꓡꓳ= ꓮ ꓙꓵꓽ ꓔꓯ ꓫꓸ ꓟꓳ=