ꓙꓵꓸꓹ ꓠꓲꓹ

ꓮꓽ ꓐ ꓮꓽ ꓟ ꓬꓲ ꓤ ꓠꓬꓲ ꓤ ꓐꓴꓳ꓾ ꓠꓬꓲꓸ ꓠꓬꓲ ꓦ ꓢꓯꓼ ꓪ ꓣꓴ ꓓꓴ ꓠꓬ ꓙꓵꓸꓹ ꓠꓲꓹ ꓐꓯˍ ꓟ ꓮ ꓫꓵꓽ ꓥ ꓡ? ꓐꓯ ꓟ ꓣꓳ ꓓꓵ ꓙ ꓠꓬꓲ ꓡꓯ= ꓦꓲ-ꓐꓱ-ꓣꓴ ꓕꓳꓽ ꓶ 11ꓽ 1 ꓗꓪ ꓙꓵꓸꓹ ꓠꓲꓹ ꓐꓯˍ ꓟ ꓠꓬ ꓣꓳ ꓥꓳ ꓡꓳꓸˍ ꓔ ꓟ ꓚꓵ ꓚꓵ ꓒꓬꓱꓼ ꓡ ꓥꓳ ꓐꓯˍ ꓟ ꓔꓯ ꓙꓲˍ ꓟ ꓥ ꓡꓳ ꓐꓰ ꓐꓯ ꓔ ꓡꓳ= ꓖꓳ ꓡꓰ ꓠꓬꓲ ꓙꓵꓸꓹ ꓠꓲꓹ ꓕꓱ ꓟ ꓠꓬ ꓣꓳ ꓥꓳ ꓡꓳꓸˍ ꓔ ꓟ ꓚꓵ ꓚꓵ ꓒꓬꓱꓼ ꓡ ꓥꓳ ꓐꓯ ꓟ ꓙꓲˍ ꓟ ꓑꓶꓸ ꓓꓴ ꓠꓬꓲꓸ ꓠꓬꓲ ꓠꓴ ꓥꓪ ꓣꓳ ꓙꓲˍ ꓟ ꓠꓬ ꓮ ꓫꓵꓽ ꓥ ꓡ? ꓖꓳ ꓟ ꓠꓬ ꓚꓵ ꓚꓵ ꓒꓬꓱꓼ ꓡ ꓥꓳ ꓐꓰ ꓐꓯ ꓟ ꓓꓵ ꓙ ꓠꓬꓲ ꓡꓯ= ꓢꓲꓽ ꓒ ꓬꓰ-ꓢꓴ ꓠꓬ ꓬꓲ ꓓꓵ ꓙ ꓟꓶ ꓓꓴ ꓬꓰ ꓕꓯ ꓬꓲ ꓡꓲ ꓢꓷꓸ ꓡꓰ ꓓꓴ ꓟꓸ ꓖꓶ ꓕꓯ ꓮ ꓕꓯ ꓟꓲ ꓠ ꓠꓬꓲ ꓔꓬ ꓟ ꓠꓬ ꓠꓴ ꓙꓲˍ ꓡ ꓐꓰ ꓠ ꓠꓬꓲ ꓡꓳ= ꓠꓴ ꓙꓵꓸꓹ ꓠꓲꓹ ꓠꓬ ꓠꓴ ꓔꓯ ꓓ ꓡꓰ ꓝꓲꓳ= ꓠꓴ ꓥꓪ ꓬꓰ ꓘꓴ ꓟ ꓙꓲˍ ꓡ ꓐꓰ ꓢꓲꓽ ꓒ ꓬꓰ-ꓢꓴ ꓠꓬ ꓕꓲ ꓒ ꓕꓲ ꓒ ꓠ ꓠꓬꓲ ꓡꓳ=

ꓖꓳ ꓡꓰ ꓟ ꓑꓶꓸ ꓓꓴ ꓙꓵꓸꓹ ꓠꓲꓹ ꓠꓬ ꓢꓷꓸ ꓡꓰ ꓓꓴ ꓓꓵ ꓙ ꓟꓶ ꓓꓴ ꓒꓬꓱꓼ ꓡ ꓟ ꓕꓲ ꓚꓱꓹ ꓟ ꓙ ꓖꓴ ꓥ ꓡꓳ= ꓙꓵꓸꓹ ꓠꓲꓹ ꓟꓽ ꓙꓳ ꓕꓯ ꓪꓴ-ꓢ ꓔꓯ ꓟꓽ ꓙꓵꓸꓹ ꓕꓯ ꓪꓴ-ꓢ ꓬꓰ ꓐ ꓡ ꓡꓳ ꓐꓯ ꓟ ꓔꓯ ꓟꓽ ꓙꓵꓸꓹ ꓕꓯ ꓮ ꓫꓵꓽ ꓟꓲ ꓟꓽ ꓒꓬꓱꓼ ꓡ= ꓖꓳ ꓡꓰ ꓠꓬꓲ ꓣꓳ ꓕꓲ ꓠꓬꓲ ꓡꓲ ꓕꓲ ꓠꓬꓲ ꓪꓽ ꓘꓴꓽ ꓟ ꓗꓪ ꓐꓰ ꓥ ꓟꓲ ꓮ ꓫꓵꓽ ꓬꓰ ꓟ ꓗꓪ ꓐꓰ ꓥ ꓟꓲ ꓪꓴ-ꓢ ꓠꓬ ꓬꓰ ꓐ ꓡ ꓡꓳ ꓐꓯ ꓟ ꓟꓽ ꓙꓵꓸꓹ ꓕꓯ ꓣꓳ ꓪꓽ ꓘꓴꓽ ꓥˍ ꓟꓲ ꓬꓲ ꓖꓳ ꓥꓳ= ꓖꓳ ꓡꓰ ꓠꓬꓲ ꓚꓲꓽ ꓛꓬ ꓙꓵꓸꓹ ꓠꓲꓹ ꓔꓯ ꓣꓳ ꓝꓮꓲ ꓕꓲ ꓧꓪ ꓓꓵ ꓙ ꓠꓬꓲ ꓡꓯ= ꓚꓵ ꓚꓵ ꓙꓵꓸꓹ ꓔꓬ ꓡ? ꓪꓽ ꓘꓴꓽ ꓠꓹ ꓟ ꓪꓴꓸ ꓠꓬꓲ ꓪꓽ ꓘꓴꓽ ꓔꓬ ꓡ? ꓟꓽ ꓥ ꓠꓬ ꓚꓵ ꓚꓵ ꓙꓲ ꓢꓲ꓾ ꓪꓽ ꓘꓴꓽ ꓔꓬ ꓡ? ꓐꓯ ꓟ ꓔꓯ ꓣꓳ ꓓꓵ ꓙ ꓠꓬꓲ ꓡꓯ= ꓪꓴ-ꓢ ꓠꓬ ꓮ ꓫꓵꓽ ꓟꓲ ꓬꓰ ꓐ ꓡ ꓟ ꓔꓯ ꓠꓲꓹ ꓟ ꓠꓯꓸꓼ ꓗꓪ ꓗꓷ ꓔ ꓢꓲ ꓠꓬꓲ ꓢꓯꓼ ꓪ ꓣꓴ ꓓꓴ ꓬꓰ ꓡꓯ꓾ ꓮ ꓡꓰꓳ ꓐꓯ ꓠꓬ ꓣꓳ ꓕꓲ ꓠꓬꓲ ꓕꓲ ꓠꓬꓲ ꓕꓱ ꓡꓱ ꓐꓰ ꓞꓳ ꓙꓳ ꓔꓬ ꓟ ꓟꓲ ꓠꓯ ꓕꓱ ꓟ ꓗꓪ ꓪꓴ-ꓢ ꓔꓯ ꓙꓵꓸꓹ ꓟ ꓪꓴ-ꓢ ꓣꓳ ꓔꓯ ꓠꓲꓹ ꓠꓵ ꓟ ꓪꓴ-ꓢ ꓬꓰ ꓐ ꓡ ꓟ ꓔꓯ ꓟꓽ ꓙꓵꓸꓹ ꓕꓯ ꓟꓲꓽ ꓦꓲꓸꓹ ꓮ ꓡꓰ ꓗꓪ ꓙꓰꓼ ꓮ ꓡꓰ ꓗꓪ ꓙꓰ ꓔꓬ ꓟ  ꓢꓲ ꓑꓬ ꓕꓲ ꓑꓬ ꓡꓰ ꓐꓰ  ꓗꓷ ꓡꓰˍ ꓥꓳ= ꓬꓲ. ꓚꓱꓸꓹ ꓙꓴꓽ ꓟꓽ ꓙꓳ ꓓꓲˍ ꓟ ꓢꓲ ꓜꓲꓼ ꓡꓰ ꓐꓰ ꓗꓷ ꓡꓰ ꓥꓳ= ꓟꓲꓽ ꓦꓲꓸꓹ ꓮ ꓔꓲꓸ ꓤ ꓙꓰꓼ ꓡ ꓠꓬ ꓐꓬ ꓬꓰ ꓡ ꓥꓳ=

ꓖꓳ ꓡꓰ ꓠꓬꓲ  ꓕꓱ ꓡꓱ ꓟꓽ ꓗꓷ ꓡꓰ ꓠꓹ ꓟ ꓙꓵꓸꓹ ꓠꓲꓹ ꓔꓯ ꓳ ꓔ ꓠ ꓗꓹ ꓡꓳ꓾ ꓙꓵꓸꓹ ꓠꓲꓹ ꓐꓯ ꓟ ꓠꓬ ꓪꓴ-ꓢ ꓠꓲꓹ ꓟ ꓔꓯ ꓕꓲꓸꓹ ꓡꓰ ꓝꓲ ꓟ ꓪꓴ-ꓢ ꓠꓲꓹ ꓟ ꓗꓪ ꓗꓹ ꓛꓲ ꓡꓰ ꓝꓲ ꓟ ꓙ ꓖꓴ ꓕꓲ ꓚꓱꓹ ꓥ ꓡꓳ= ꓣꓳ ꓒꓴ ꓒ ꓮ-ꓐ-ꓡ-ꓦ ꓥˍ ꓟꓲ ꓬꓲ ꓙꓵꓸꓹ ꓠꓲꓹ ꓗꓪ ꓐꓰ ꓙꓲ ꓫꓬ ꓢꓴ ꓕꓲ ꓣꓳ ꓒꓬꓱꓼ ꓡ ꓡꓳ ꓐꓰ ꓐꓯ ꓔ ꓡꓳ꓾ ꓖꓳ ꓡꓰ ꓠꓬꓲ ꓙꓵꓸꓹ ꓠꓲꓹ ꓐꓯ ꓟ ꓮ ꓗꓷꓸ ꓣꓳꓸꓹ ꓚꓵ ꓡꓳ꓾ ꓣꓳ ꓤꓶꓸꓹ ꓗꓪ ꓙꓵꓸꓹ ꓠꓲꓹ ꓐꓯ ꓟ ꓠꓬ ꓣꓳ ꓧꓪ ꓖꓳ ꓓꓱ ꓐꓱ ꓶ ꓟꓲꓽ ꓦꓲꓸꓹ ꓣꓱꓼ ꓞꓸ ꓟ ꓡꓰ ꓐꓰ ꓗꓹ ꓡꓳ= ꓖꓳ ꓡꓰ ꓠꓬꓲ ꓙꓵꓸꓹ ꓠꓲꓹ ꓕꓱ ꓟ ꓔꓯ ꓮ ꓕꓯ ꓟꓲ ꓕꓲꓸꓹ ꓞ ꓠ ꓟ ꓐꓱ ꓶ ꓕꓲ ꓠꓬꓲ ꓡꓲ ꓕꓲ ꓠꓬꓲ ꓢꓯꓼ ꓕꓵꓼ ꓙꓰ ꓡꓯ꓾ ꓪꓴ-ꓢ ꓔꓯ ꓡꓯ ꓫꓵ ꓶꓸꓹ ꓓꓰ ꓡꓯ= ꓬꓲ ꓡꓰ ꓖꓶ ꓡ ꓥꓳ ꓐꓰ ꓐꓯ ꓢꓲ꓾ ꓙꓵꓸꓹ ꓥꓳ ꓐꓯ ꓠꓬ ꓣꓳ ꓤꓶꓸꓹ ꓗꓪ ꓬꓲ ꓬꓰ ꓢꓲ ꓙꓳ ꓙꓳ ꓡꓰ ꓞꓳ ꓙꓳ ꓐ ꓡ ꓥꓳ ꓐꓰ ꓮ ꓙꓵꓹ ꓢꓴ ꓔꓯ ꓢꓯꓼ ꓪ ꓖꓶ ꓠꓲꓹ ꓫꓵꓽ ꓡꓳ=