ꓪꓴ-ꓢ ꓔꓱꓹ ꓚꓵ_ ꓟ ꓠꓵ ꓠꓲꓹ

ꓪꓴ-ꓢ ꓔꓱꓹ ꓚꓵ_ ꓟ ꓠꓵ ꓠꓲꓹ

ꓔꓲꓺ ꓒ ꓪ ꓔꓲ ꓡꓰ ꓛꓱꓼ ꓡꓱꓼ ꓐꓱ ꓢꓲ ꓒꓽ ꓔꓯ ꓥꓳꓽ ꓗꓪ ꓐꓰ ꓔꓱꓹ ꓕ ꓢꓲ ꓪꓴ-ꓢ ꓠꓵ ꓠꓲꓹ ꓠꓬ ꓣꓳ ꓟꓲ ꓠꓯ ꓞꓳ ꓤ ꓓꓵꓽ ꓙ_ ꓟ ꓘꓳꓹ ꓣꓴ_ ꓟ ꓓꓲ ꓢ ꓪꓴꓽ_ ꓟ ꓔꓯ ꓣꓳ ꓢꓷꓸ ꓠꓹ ꓟ ꓐꓱ ꓶ ꓢꓯꓼ ꓖꓶ ꓔ ꓟ ꓥꓳ꓾ ꓔꓲꓺ ꓒ ꓪ ꓔꓲ ꓡꓰ ꓢꓔꓸ ꓑꓰꓔꓰꓣ ꓪꓽ ꓘꓴ ꓦꓲꓻ ꓓꓽ ꓗꓪ 9 ꓦ 24 ꓠꓬꓲ ꓕꓯ ꓪꓽ ꓘꓴ ꓜꓲꓼ ꓡ ꓢꓴ ꓐꓴ ꓔꓯ ꓪꓴ-ꓢ ꓠꓵ ꓠꓲꓹ ꓪꓴꓽ_ ꓟ ꓚꓱꓹ ꓗꓪ ꓐꓰ ꓢꓯꓼ ꓖꓶ_ ꓡꓳ꓾

ꓪꓴ-ꓢ ꓶꓼ ꓓꓳꓽ ꓫꓱꓸ ꓓꓳꓽ ꓗꓪ ꓛꓱꓼ ꓡꓱꓼ ꓐꓱ ꓢꓲ ꓒꓽ ꓠꓬ ꓟꓬꓱꓽ ꓬꓰ ꓠꓹ ꓟ ꓐꓱ ꓶ ꓪꓽ ꓤ ꓧꓪ_ ꓟ ꓗꓪ ꓠꓯꓼ ꓠꓯꓼ ꓗꓪ ꓐꓰ ꓟꓬꓱꓽ ꓬꓰ ꓢꓴ ꓥ ꓟꓲ ꓟꓳꓼ ꓡꓳ ꓗꓪ ꓐꓰ ꓟꓬꓱꓽ ꓬꓰ ꓢꓴ ꓥ ꓟꓲ ꓮ ꓡꓲ ꓕꓲ ꓣꓳ ꓟꓲ ꓪꓽ ꓒꓵꓽ ꓕꓲ ꓪꓽ ꓡꓰ ꓖꓶ_ ꓕꓯ ꓬꓲꓸ ꓪꓴꓸ ꓗꓪ ꓐꓰ ꓟꓬꓱꓽ ꓬꓰ ꓢꓴ ꓠꓬ ꓱ’ꓽ ꓠꓱꓽ ꓟ ꓔꓯ ꓡꓳꓸ ꓟꓳ ꓪ ꓡꓳ= ꓕꓱ ꓟ ꓔꓯ ꓔꓲꓺ ꓒ ꓪ ꓔꓲ ꓡꓰ ꓟꓲ ꓠꓯ ꓚꓱꓹ ꓗꓪ ꓐꓰ ꓟꓽ ꓠꓬꓲꓸ ꓠꓸ꓾ ꓪꓴ-ꓢ ꓠꓬ ꓣꓳ ꓮ ꓙꓵ ꓔꓯ ꓕꓲ ꓪꓽ ꓡꓰ ꓥ ꓟ ꓚꓱꓹ ꓔꓯ ꓐꓯ_ ꓟ ꓥꓳ꓾

ꓕꓱ ꓛꓱꓼ ꓡꓱꓼ ꓐꓱ ꓢꓲ ꓒꓽ ꓚꓱꓹ ꓔꓯ ꓡꓳꓸ ꓠꓬꓲ ꓕꓯ ꓟꓽ ꓔꓱꓹ ꓚꓵ ꓐꓰ ꓡꓳꓸ ꓟꓳ ꓪ ꓡꓳ꓾ ꓔꓲꓺ ꓒ ꓪ ꓔꓲ ꓡꓰ ꓣꓳ ꓔꓯ ꓖꓶ_ ꓟ ꓬꓲꓸ ꓒꓵꓽ ꓔꓯ ꓡꓰ ꓠꓬꓲꓸ ꓠꓸ ꓟꓽ ꓓ꓾ ꓪꓴ-ꓢ ꓣꓳ ꓔꓯ ꓖꓶ ꓔ ꓟ ꓔꓱꓹ ꓚꓵ_ ꓟ ꓔꓯ ꓓꓵꓽ ꓙ ꓠ ꓔ ꓡꓳ꓾ ꓝꓮꓲ ꓬꓲ ꓠꓬ ꓣꓳ ꓮ ꓟꓬ ꓬꓰ ꓘꓴ_ ꓟ ꓔꓯ ꓟꓽ ꓠꓬꓲꓸ ꓠꓸ꓾ ꓣꓳ ꓔꓯ ꓬꓲ ꓤ ꓠꓱ ꓡꓰ ꓐꓰ ꓮ ꓙꓵ ꓔꓯ ꓔꓱꓹ ꓔꓱꓹ ꓐꓰ ꓠꓲꓹ ꓠꓵ ꓡꓳ꓾ ꓐꓰ ꓐꓯ ꓔ ꓡꓳ꓾

ꓔꓲꓺ ꓒ ꓪ ꓔꓲ ꓡꓰ ꓕꓱ ꓛꓱꓼ ꓡꓱꓼ ꓐꓱ ꓢꓲ ꓒꓽ ꓔꓯ ꓟꓳꓸ ꓪꓴ-ꓢ ꓠꓬ ꓣꓳ ꓔꓯ ꓮ ꓕꓯ ꓥ ꓟꓲ ꓘꓴ_ ꓟ ꓡꓰ ꓐꓰ ꓠꓵ ꓠꓲꓹ ꓪꓴꓽ_ ꓟ ꓚꓱꓹ ꓠꓬꓲꓽ ꓚꓱꓹ ꓐꓰ ꓟꓸ ꓖꓶ_ ꓡꓳ= ꓬꓲꓸ ꓪꓴꓸ ꓗꓪ ꓐꓰ ꓪꓴ-ꓢ ꓠꓬ ꓣꓳ ꓔꓯ ꓮ ꓕꓯ ꓟꓲ ꓘꓴ_ ꓟ ꓚꓱꓹ ꓔꓲꓺ ꓒ ꓪ ꓔꓲ ꓡꓰ ꓐꓯ ꓔ ꓡꓳ= ꓛꓱꓼ ꓡꓱꓼ ꓐꓱ ꓢꓲ ꓒꓽ ꓠꓬ ꓕꓲ ꓘꓳꓼ ꓡꓱꓼ ꓟꓬꓱꓽ ꓬꓰ ꓠꓹ ꓟ ꓟꓬꓱꓽ ꓬꓰ ꓢꓴ ꓧꓪ_ ꓟ ꓡꓰ ꓐꓰ ꓪꓴ-ꓢ ꓥ ꓟꓲ ꓣꓳ ꓔꓯ ꓠꓲꓹ ꓟ ꓟꓽ ꓐꓬ ꓡꓰ ꓮ ꓕꓯ ꓟꓲ ꓧꓪ ꓔꓬ ꓟ ꓚꓱꓹ ꓔꓯ ꓐꓯ ꓟꓳꓸ ꓖꓶ_ ꓡꓳ=

ꓪꓴ-ꓢ ꓠꓬ ꓣꓳ ꓬꓲꓸ ꓠꓯꓼ ꓗꓪ ꓡ ꓠꓹ ꓟ ꓢꓯꓼ ꓕꓵꓼ ꓟ ꓔꓯ ꓟꓽ ꓡꓳꓸ ꓔꓬ ꓟ ꓚꓱꓹ ꓐꓰ ꓬꓲ ꓣꓳ ꓔꓯ ꓟꓽ ꓧꓪ_ ꓢꓲ ꓕꓯ ꓣꓳ ꓙꓻ ꓜꓲꓼ ꓢꓷꓸ ꓠꓲꓹ ꓔꓯ ꓟꓽ ꓚꓬꓹ ꓟ ꓔꓯ ꓔꓲꓺ ꓒ ꓪ ꓔꓲ ꓡꓰ ꓐꓯ ꓖꓶ ꓡꓳ= ꓪꓴ-ꓢ ꓠꓬ ꓣꓳ ꓬꓲ ꓠꓯꓼ ꓗꓪ ꓙꓰ ꓠꓹ ꓟ ꓟꓶꓻ ꓫꓵꓻ ꓥ ꓟꓲ ꓮ ꓕꓯ ꓟꓲ ꓬꓲ ꓠꓲꓹ ꓟ ꓟꓽ ꓐꓬ ꓡꓰ ꓡꓳꓸ ꓔꓬ ꓟ ꓥꓳ꓾ ꓕꓱ ꓟ ꓗꓪ ꓐꓰ ꓟꓬ ꓠꓬꓲ ꓬꓲ ꓣꓳ ꓔꓯ ꓠꓲꓹ ꓠꓵ ꓟ ꓑꓶ ꓓꓴ ꓢꓲ ꓒꓽ ꓬꓰ-ꓢꓴ ꓔꓯ ꓬꓲꓸ ꓠꓵ ꓠꓲꓹ ꓟꓸ ꓖꓶ ꓠꓹ ꓟ ꓐꓱ ꓶ ꓣꓳ ꓠꓯꓼ ꓗꓪ ꓬꓯꓼ ꓡ ꓝꓲ_ ꓟ ꓥꓳ= ꓪꓴ-ꓢ ꓠꓬ ꓣꓳ ꓔꓯ ꓕꓲ ꓠꓬꓲ ꓡꓲ ꓕꓲ ꓠꓬꓲ꓾ ꓮ ꓕꓯ ꓟꓲ ꓣꓳ ꓔꓯ ꓧꓪ ꓔꓬ ꓟ ꓥꓳ꓾ ꓣꓳ ꓞꓲꓼ ꓪꓴ ꓡꓰ ꓥ ꓟꓲ ꓬꓲ ꓧꓪ ꓢꓲ꓾ ꓘꓴ ꓔꓬ ꓟ ꓥꓳ꓾

ꓔꓲꓺ ꓒ ꓪ ꓔꓲ ꓡꓰ ꓪꓴ-ꓢ ꓣꓳ ꓔꓯ ꓵꓺ ꓖꓴ ꓟꓽ ꓓ ꓟ ꓠꓵ ꓠꓲꓹ ꓐꓰ ꓣꓳ ꓟꓲ ꓠꓯ ꓞꓳ ꓤ ꓐꓴ ꓠꓯꓼ ꓗꓪ ꓖꓶ ꓔ ꓟ ꓐꓯ ꓘꓶꓽ  ꓙꓵꓽ ꓪ ꓔꓯ ꓮ ꓕꓯ ꓟꓲ ꓐꓯ ꓟꓸ ꓖꓶ_ ꓡꓳ= ꓬꓲ ꓠꓲꓹ ꓟ ꓗꓪ ꓐꓰ ꓣꓳ ꓐꓱ ꓶ ꓔꓬ ꓔꓶꓸ ꓔꓯ ꓮ ꓕꓯ ꓟꓲ ꓬꓲꓸ ꓙꓵꓹ ꓜꓰ ꓡꓰ ꓫꓵ ꓟꓽ ꓙꓳ꓾ ꓐꓰ ꓣꓳ ꓔꓯ ꓧꓪ ꓔꓬ ꓟ ꓡꓳꓸ ꓔꓬ ꓟ ꓥ ꓡꓳ꓾

ꓠꓬꓲꓽ ꓟ ꓕꓲ ꓟ ꓠꓬ ꓔꓲꓺ ꓒ ꓪ ꓔꓲ ꓡꓰ ꓣꓳ ꓟꓲ ꓠꓯ ꓞꓳ ꓤ ꓕꓲ ꓣꓳ ꓡꓰ ꓕꓲ ꓣꓳ ꓢꓷꓸ ꓔ ꓟ ꓙꓻ ꓡꓯꓼ ꓘ_ ꓟ ꓓꓲ ꓢ ꓟꓬ ꓠꓬꓲ ꓢꓷꓸ ꓔ ꓟ ꓪꓴ-ꓢ ꓥ ꓟ ꓚꓱꓹ ꓐꓯ ꓡꓳꓹ ꓬꓰ ꓟ ꓥꓳ꓾ ꓬꓲꓸ ꓟꓶ ꓗꓪ ꓐꓰ ꓟꓬꓱꓽ ꓬꓰ ꓡ ꓢꓴ ꓔꓯ ꓥ ꓟꓲ ꓬꓲꓸ ꓪꓴꓸ ꓗꓪ ꓐꓰ ꓟꓬꓱꓽ ꓬꓰ ꓢꓴ ꓐꓰ ꓕꓲ ꓪꓽ ꓪꓽ ꓒꓵꓽ ꓖꓶ_ ꓟ ꓥꓳ꓾ ꓕꓱ ꓟ ꓠꓬ ꓪꓴ-ꓢ ꓔꓱꓹ ꓚꓵ_ ꓟ ꓚꓱꓹ ꓔꓯ ꓐꓯ ꓟꓳꓸ ꓖꓶ_ ꓡꓳ= ꓣꓳ ꓟꓲ ꓠꓯ ꓞꓳ ꓤ ꓠꓬ ꓟꓲ ꓠꓯ ꓞꓳ ꓤ ꓠꓲꓹ ꓟ ꓔꓯ ꓡꓰ ꓛꓳꓽ ꓢꓲ꓾ ꓔꓱꓹ ꓚꓵ_ ꓟ ꓚꓱꓹ ꓔꓯ ꓠꓬꓲꓸ ꓠꓸ ꓔꓬ ꓟ ꓥꓳ꓾ ꓪꓴ-ꓢ ꓠꓬ ꓣꓳ ꓧꓪꓸ ꓡꓰ ꓚꓱꓹ꓾ ꓬꓰ ꓐ ꓡ ꓟ ꓚꓱꓹ ꓞꓳꓸ ꓡꓰ ꓚꓱꓹ ꓔꓯ ꓡꓳꓸ ꓠꓬꓲ ꓢꓲ꓾ ꓔꓯꓻ ꓟ ꓟꓽ ꓥ꓾ ꓮ ꓙꓵ ꓔꓯ ꓕꓲ ꓪꓽ ꓡꓰ ꓔꓱꓹ ꓚꓵ_ ꓟ ꓥꓳ꓾ ꓪꓴ-ꓢ ꓣꓳ ꓔꓯ ꓬꓲꓸ ꓤ ꓠꓱ ꓤ ꓥ ꓟ ꓑꓶ ꓓꓴ ꓵꓻ ꓖꓴ ꓟꓽ ꓓ ꓟ ꓠꓵ ꓠꓲꓹ ꓐꓰ ꓠꓲꓹ ꓠꓵ_ ꓟ ꓥꓳ ꓐꓰ ꓔꓲꓺ ꓒ ꓪ ꓔꓲ ꓡꓰ ꓐꓯ ꓖꓶ_ ꓡꓳ=

 ꓕꓱ ꓚꓱꓹ ꓗꓪ ꓐꓰ ꓔꓲꓺ ꓒ ꓪ ꓔꓲ ꓡꓰ ꓙꓲ ꓢꓴ ꓢꓲ ꓤ ꓐꓴ ꓔꓯ (profound challenge) ꓬꓰ ꓠꓹ ꓟ ꓐꓯ ꓔ ꓡꓳ꓾ ꓣꓳ ꓪꓴ-ꓢ ꓬꓲꓸ ꓵꓺ ꓖꓴ ꓟꓽ ꓓ ꓪꓴ_ ꓟ ꓠꓵ ꓠꓲꓹ ꓐꓰ ꓬꓲ ꓶꓼ ꓤ ꓫꓱꓸ ꓤ ꓗꓪ ꓐꓰ ꓣꓳ ꓚꓲꓸ ꓛꓬ ꓟꓬꓱꓽ ꓬꓰ ꓚꓱꓹ ꓗꓪ ꓟꓬ ꓠꓬꓲ ꓟꓽ ꓣꓱꓽ ꓠꓹ ꓟ ꓐꓯ ꓗꓷꓳ= ꓪꓴ-ꓢ ꓠꓬ ꓣꓳ ꓮ ꓙꓵ ꓔꓯ ꓕꓲ ꓪꓽ ꓠꓲꓹ ꓠꓵ ꓟ ꓔꓯ ꓓꓵꓽ ꓙ ꓡꓰ ꓝꓲ_ ꓟ ꓥꓳ꓾ ꓥꓪ ꓠꓬ ꓬꓲ ꓓꓲ ꓢ ꓐꓯ ꓟ ꓠꓲꓹ ꓟ ꓟꓽ ꓙꓳ ꓮ ꓙꓵ ꓔꓯ ꓠꓵ ꓠꓲꓹ ꓐꓰ  ꓠꓬꓲ ꓙ ꓠꓹ ꓟ ꓐꓱ ꓶ ꓘꓴ ꓜꓲꓼ ꓞꓳ ꓔꓯ ꓢꓯꓼ ꓖꓶ ꓔ ꓡꓳ= ꓣꓳ ꓙꓻ ꓫꓱ_ ꓟ ꓚꓱꓹ ꓗꓪ ꓕꓲ ꓣꓳ ꓐꓰ ꓕꓲ ꓣꓳ ꓔꓱꓹ ꓚꓵ_ ꓟ ꓚꓱꓹ ꓔꓯ ꓔꓯꓺ ꓡꓯꓼ ꓘꓳ_ ꓟ ꓗꓪ ꓐꓰ ꓡꓲꓹ ꓙꓰ ꓪ ꓡꓰ ꓠꓹ ꓟ ꓐꓰ ꓢꓲ ꓒꓽ ꓬꓰ-ꓢꓴ ꓡꓰ ꓟꓸ ꓖꓶ ꓡ ꓟ ꓢꓴ ꓔꓯ ꓫꓱꓸ ꓤ ꓠꓲꓹ ꓐꓰ ꓬꓰ ꓙ ꓟ꓾ ꓠꓲꓹ ꓟ ꓗꓳꓸ ꓖꓶ_ ꓟ꓾ ꓛꓬ ꓢꓴ ꓔꓯ ꓖꓽ ꓖꓶ ꓐ ꓡ ꓠꓹ ꓟ ꓠꓲꓹ ꓟ ꓔꓯ ꓛꓳ ꓠꓹ ꓟ ꓐꓱ ꓶ ꓐꓯ ꓖꓶ ꓟ ꓥꓳ꓾