ꓦ ꓕꓲ ꓒꓳꓹ ꓢꓰꓼ ꓔꓳꓹ ꓟ ꓗꓪ ꓧꓪꓸ ꓡꓰ ꓠꓹ ꓟ ꓐꓱ ꓶ ꓪꓴ-ꓢ ꓶꓼ ꓤ ꓫꓱꓸ ꓤ ꓠꓬ ꓮ ꓕꓯ ꓟꓲ ꓬꓰ ꓙ ꓔꓳꓹ ꓙ ꓡꓳ꓾

ꓦ ꓕꓲ ꓒꓳꓹ ꓢꓰꓼ ꓔꓳꓹ ꓟ ꓗꓪ ꓧꓪꓸ ꓡꓰ ꓠꓹ ꓟ ꓐꓱ ꓶ ꓪꓴ-ꓢ ꓶꓼ ꓤ ꓫꓱꓸ ꓤ ꓠꓬ ꓮ ꓕꓯ ꓟꓲ ꓬꓰ ꓙ ꓔꓳꓹ ꓙ ꓡꓳ꓾

ꓔꓲꓺ ꓒ ꓪ ꓔꓲ ꓕꓲ ꓠꓽ ꓡꓲ ꓕꓲ ꓠꓽ ꓘꓴ ꓜꓲꓼ ꓞꓳ ꓪꓽ ꓘꓴ ꓜꓲꓼ ꓡ ꓢꓴ ꓐꓴ ꓐꓰ ꓜꓲ ꓡꓯ ꓘꓳ ꓟ ꓙꓵꓹ ꓗꓪ ꓙꓲ_ ꓟ ꓐꓰ ꓟꓽ ꓙꓲ_ ꓟ ꓚꓱꓹ (vices and virtues) ꓔꓯ ꓟꓳꓸ ꓐꓯ ꓡꓳꓹ ꓬꓰ ꓟ ꓥꓳ= ꓝꓮꓲ ꓣꓳ ꓤꓶꓻ ꓗꓪ ꓔꓳꓹ ꓜꓳ ꓡ ꓟ ꓦ ꓕꓲ ꓒꓳꓹ ꓘꓶ ꓡꓶꓽ ꓓꓴ ꓫꓸ ꓓꓴ ꓔꓯ ꓶꓼ ꓤ ꓫꓱꓸ ꓤ ꓟꓶ_ ꓟ ꓙꓵꓹ ꓐꓰ ꓒꓳꓹ ꓡꓶꓸ ꓠꓹ ꓟ ꓐꓱ ꓶ ꓙꓵꓽ ꓪ ꓣꓳ ꓔꓯ ꓖꓶ ꓔ ꓡꓳ꓾ ꓐꓰ ꓐꓯ ꓔ ꓡꓳ=

ꓔꓲꓺ ꓒ ꓪ ꓔꓲ ꓡꓰ ꓡꓳꓹ ꓬꓰ ꓟ ꓠꓽ ꓢ ꓠꓬꓲ ꓘꓴ ꓜꓲꓼ ꓞꓳ ꓪꓽ ꓘꓴ ꓜꓲꓼ ꓡ ꓢꓴ ꓐꓴ ꓐꓰ ꓜꓲ ꓡꓯ ꓘꓳ ꓟ ꓙꓵꓹ ꓗꓪ ꓣꓳ ꓦ ꓕꓲ ꓒꓳꓹ ꓔꓳꓹ ꓡꓯ ꓘꓳ ꓓꓴ (spiritual combat) ꓔꓯ ꓟꓳꓸ ꓙꓲ_ ꓟ ꓐꓰ ꓟꓽ ꓙꓲ_ ꓟ (vices and virtues) ꓔꓯ ꓬꓲꓸ ꓕꓲ ꓟꓴ ꓕꓲ ꓟ ꓐꓰ ꓢꓯꓼ ꓖꓶ ꓐꓯ ꓡꓳꓹ ꓬꓰ ꓟ ꓥꓳ=

ꓣꓳ ꓙꓲ ꓢꓴ ꓢꓲ ꓤ ꓤꓶꓻ ꓗꓪ ꓠꓬ ꓮ ꓕꓯ ꓟꓲ “ꓫꓸ ꓓꓴ ꓟꓷꓼ ꓓꓴ ꓟꓽ ꓙꓳ ꓟ ꓤꓶꓻ” ꓐꓰ ꓟꓽ ꓙꓳ꓾ ꓖꓳ ꓟ ꓑꓶ ꓓꓴ ꓮ ꓕꓯ ꓟꓲ ꓢꓯꓼ ꓕꓵꓼ ꓢꓲ ꓢꓯꓸ ꓔꓬ ꓙꓻ ꓫꓱꓽ ꓠ ꓔ ꓟ꓾ (continuous combat) ꓚꓱꓹ ꓐꓯ ꓡꓳꓹ ꓬꓰ ꓟ ꓥꓳ= ꓣꓳ ꓘꓴ ꓜꓲꓼ ꓞꓳ ꓓꓵꓽ ꓠꓹ ꓟ ꓐꓱ ꓶ ꓖꓳ ꓓꓱ ꓔꓲꓹ ꓟ ꓗꓪ ꓐꓰ ꓙꓲ ꓢꓴ ꓢꓲ ꓤ ꓗꓷ ꓡꓰ ꓥ ꓟꓲ ꓣꓳ ꓤꓶꓻ ꓗꓪ ꓫꓸ ꓓꓴ ꓟꓷꓼ ꓓꓴ ꓟꓽ ꓔꓳꓹ ꓜꓳ ꓡ ꓟ꓾ ꓟꓽ ꓙꓳ ꓡꓳ ꓫꓵ ꓟꓽ ꓥ ꓟ ꓔꓯ ꓢꓷꓸ ꓡꓰ ꓝꓲ ꓟ ꓥꓳ= “ꓣꓳ ꓢꓯꓸ ꓔꓬ ꓟ ꓟꓲ ꓠꓯ ꓤꓶꓻ ꓕꓱ ꓟ ꓗꓪ ꓡ ꓞꓳ ꓮ ꓙꓵ ꓠꓬ ꓫꓸ ꓓꓴ ꓟꓷꓼ ꓓꓴ ꓗꓪ ꓐꓰ ꓡꓲꓹ ꓙꓰ ꓠꓹ ꓟ ꓐꓱ ꓶ ꓢꓯꓼ ꓕꓵꓼ ꓢꓯꓸ ꓔꓬ ꓠꓹ ꓟ ꓥ ꓡꓳ꓾” ꓐꓰ ꓢꓯꓼ ꓖꓶ ꓡꓳ=

ꓔꓲꓺ ꓒ ꓪ ꓔꓲ ꓡꓰ “ꓚꓲ ꓛꓬ ꓝꓴꓲ ꓔꓯ ꓚꓲ ꓛꓬ ꓫꓬ ꓡꓰ ꓝꓲ_ ꓟ” ꓙꓲ ꓢꓴ ꓢꓲ ꓤ ꓐꓴ ꓠꓬ ꓙꓲ_ ꓟ ꓐꓰ ꓟꓽ ꓙꓲ_ ꓟ ꓔꓯ  ꓟꓽ ꓢꓷꓸ ꓡꓰ ꓢꓴ ꓥꓳ ꓐꓰ ꓐꓯ ꓔ ꓡꓳ= “ꓣꓳ ꓮ ꓙꓵ ꓠꓬ ꓝꓴꓲ ꓑꓶ ꓓꓴ ꓫꓸ ꓠꓬꓲ ꓤ ꓢꓴ ꓡꓰ ꓥ ꓟ ꓡꓰ ꓐꓰ ꓝꓮꓲ ꓒꓳꓹ ꓡꓶꓸ ꓠꓹ ꓟ ꓣꓱꓽ ꓬꓯꓼ ꓢꓴ ꓡꓰ ꓥ ꓟ ꓔꓯ ꓓꓵꓽ ꓙ ꓢꓷꓸ ꓠꓹ ꓟ ꓐꓱ ꓶ ꓪꓴ-ꓢ ꓗꓪ ꓐꓰ ꓶꓼ ꓤ ꓫꓱꓸ ꓤ ꓶꓽ ꓓꓰꓽ ꓠꓹ ꓟ ꓥꓳ= ꓝꓮꓲ ꓬꓲ ꓫꓱꓸ ꓤ ꓠꓵ ꓠꓲꓹ ꓪꓴꓽ_ ꓟ ꓠꓬ ꓣꓳ ꓝꓴꓲ ꓮ ꓙꓵ ꓕꓯ ꓢꓲ ꓟꓬꓹ ꓟ ꓔꓯ ꓮ ꓕꓯ ꓟꓲ ꓓꓵꓽ ꓙ ꓠꓹ ꓟ ꓔꓯ” ꓐꓯ ꓔ ꓡꓳ=

ꓢꓲ ꓒꓽ ꓬꓰ-ꓢꓴ ꓖꓳ ꓓꓱꓽ ꓔꓲꓹ ꓟ ꓡꓰ ꓐꓰ ꓣꓳ ꓥ ꓟꓲ ꓪꓴ-ꓢ ꓫꓱꓸ ꓤ ꓠꓵ ꓠꓲꓹ ꓔꓯ ꓟꓽ ꓙꓳꓺ ꓙꓳꓺ ꓖꓳ ꓓꓱꓽ ꓔꓲꓹ ꓠꓹ ꓟ ꓔꓯ ꓐꓯ ꓖꓶ ꓗꓷ ꓟ ꓥꓳ= ꓬꓰ-ꓢꓴ ꓖꓳ ꓓꓱꓽ ꓔꓲꓹ ꓓꓳ ꓗꓸ ꓠꓯꓸ ꓢ-ꓓꓯ ꓡꓰ ꓫꓵꓽ ꓠꓬꓲ ꓠꓹ ꓟ ꓢꓲ ꓒꓽ ꓬꓰ-ꓢꓴ ꓔꓯ ꓡꓲ ꓛꓲ ꓗꓪ ꓧꓳꓽ ꓔꓯꓹ ꓟꓶ ꓗꓷ ꓟ ꓥꓳ= ꓖꓳ ꓟ ꓑꓶ ꓓꓴ ꓔꓲꓺ ꓒ ꓪ ꓔꓲ ꓡꓰ ꓣꓳ ꓥ ꓟꓲ ꓬꓲ ꓔꓳꓹ ꓜꓳ ꓗꓷ ꓟ ꓢ-ꓓꓯ ꓘꓶ ꓡꓶꓽ ꓓꓴ ꓡꓰ ꓐꓰ ꓣꓳ ꓝꓮꓲ ꓔꓳꓹ ꓜꓳ ꓡ ꓥꓳ ꓐꓰ ꓕꓱ ꓟ ꓐꓱ ꓶ ꓙꓻ ꓖꓶ ꓠꓹ ꓟ ꓥ ꓡꓳ= “ ꓝꓮꓲ ꓤꓶꓻ ꓐꓯ_ ꓟ ꓠꓬ ꓦꓶ_ ꓟ ꓔꓯ ꓔꓳꓹ ꓐ ꓡ ꓠꓹ ꓟ꓾ ꓢꓯꓼ ꓕꓵꓼ ꓠ ꓔ ꓟ꓾ ꓙ ꓖꓴ ꓧꓹ ꓙꓰ ꓟ꓾ ꓓꓵꓽ ꓙ ꓟꓽ ꓫꓱꓹ ꓟ꓾ ꓟꓽ ꓟꓳ_ ꓟ ꓘꓶ ꓡꓶꓽ ꓓꓴ ꓐꓰ ꓤꓶꓻ ꓐꓰ ꓟꓽ ꓫꓱꓹ ꓟ ꓢꓯꓼ ꓐꓰ ꓫꓬꓹ ꓔ ꓟ꓾” ꓔꓯ ꓐꓯ ꓗꓷ ꓟ ꓥꓳ=

ꓔꓲꓺ ꓒ ꓪ ꓔꓲ ꓡꓰ ꓣꓳ ꓙꓲ ꓢꓴ ꓢꓲ ꓤ ꓐꓴ ꓔꓯ ꓟꓽ ꓫꓱꓸ_ ꓟ ꓮꓸ ꓓꓲꓽ ꓦꓶ_ ꓟ ꓗꓪ ꓐꓰ ꓙꓻ ꓫꓱꓽ ꓠꓹ ꓟ ꓘꓴ ꓔ ꓡꓳ꓾ “ꓘꓶꓽ ꓘꓹ ꓟ ꓠꓲꓹ ꓟ ꓠꓬ ꓙꓻ ꓣꓳꓺ ꓟ ꓔꓯ ꓔꓳ_ ꓟ ꓥꓳ꓾ ꓛꓴꓽ ꓙꓳ ꓟ ꓠꓬ ꓬꓰ ꓙ ꓔꓳꓹ ꓙ ꓟ ꓔꓯ ꓔꓳ_ ꓟ ꓥꓳ= ꓠꓲꓹ ꓫ ꓟꓬ ꓫ ꓟ ꓠꓬ ꓔꓱꓹ ꓟ ꓗꓹ ꓛꓲ ꓟ ꓦꓻ ꓐꓰ ꓔꓳꓹ ꓟ ꓥꓳ= ꓠꓲꓹ ꓟ ꓩꓴ ꓟ ꓠꓬ ꓫꓱꓸ ꓤ ꓠꓲꓹ ꓔꓯ ꓫꓴꓸ ꓡꓰ ꓐꓬ ꓡꓰ ꓝꓲ_ ꓡꓳ=

ꓣꓳ ꓢꓯꓸ ꓔꓬ ꓙꓻ ꓫꓱꓽ_ ꓟ ꓚꓱꓹ ꓗꓪ (vices and virtue) ꓔꓯ ꓝꓮꓲ ꓓꓵꓽ ꓙ ꓔꓱꓹ ꓕ ꓟ ꓠꓬ꓾ ꓣꓳ ꓠꓬ ꓙꓲ_ ꓟ ꓐꓰ ꓟꓽ ꓙꓲ_ ꓟ ꓠꓬꓲꓽ ꓗꓳꓸ ꓚꓸ ꓟꓽ ꓟꓳ_ ꓟ ꓛꓲ ꓚꓻ ꓔꓯ ꓗꓳꓸ ꓗꓷ ꓐ ꓡ ꓠꓹ ꓟ ꓚꓱꓹ ꓔꓯ ꓐꓯ ꓔ ꓡꓳ= ꓣꓳ ꓠꓬ ꓟꓲ ꓠꓯ ꓞꓳ ꓤ ꓥ ꓟ ꓑꓶ ꓓꓴ ꓠꓱꓸ ꓐꓯꓼ ꓚꓰꓼ ꓔ ꓟ ꓡꓰ ꓐꓰ ꓟꓽ ꓫꓱꓹ ꓟ ꓐꓰ ꓣꓳ ꓠꓬ ꓚꓲ ꓛꓬ ꓔꓱꓹ ꓚꓲ ꓛꓬ ꓓꓵꓽ ꓙ ꓔꓱꓹ ꓕ ꓗꓴꓸ ꓢꓴ ꓥ ꓟ ꓑꓶ ꓓꓴ ꓣꓳ ꓠꓲꓹ ꓟ ꓔꓯ ꓪꓴ-ꓢ ꓠꓯꓼ ꓗꓪ ꓒꓴ ꓔ ꓢꓲ꓾ ꓢꓲ ꓫꓬꓹ ꓟ ꓚꓱꓹ ꓗꓪ ꓐꓰ ꓙꓻ ꓫꓱꓽ ꓐ ꓡ ꓠꓹ ꓟ ꓐꓱ ꓶ ꓢꓯꓼ ꓖꓶ ꓔ ꓡꓳ=

ꓔꓲꓺ ꓒ ꓪ ꓔꓲ ꓡꓰ ꓬꓲꓸ ꓟꓶꓽ ꓗꓪ ꓐꓰ ꓣꓳ ꓦ ꓢꓰꓼ ꓔꓳꓹ ꓟ ꓚꓱꓹ ꓗꓪ ꓣꓳ ꓤꓶꓻ ꓗꓪ ꓙꓲ_ ꓟ ꓦ ꓢꓯꓼ ꓡꓰ ꓖꓶ_ ꓟ ꓪꓴ-ꓢ ꓶꓼ ꓤ ꓫꓱꓸ ꓤ ꓔꓯ ꓘꓳꓹ ꓣꓴ ꓐ ꓡ ꓟ ꓡꓰ ꓐꓰ ꓟꓽ ꓙꓲ_ ꓟ ꓔꓯ ꓥ ꓟꓲ ꓝꓮꓲ ꓒꓳꓹ ꓡꓶꓸ ꓢꓲ꓾ ꓙꓻ ꓫꓱꓽ ꓐ ꓡ ꓠꓹ ꓟ ꓢꓯꓼ ꓖꓶ ꓔ ꓡꓳ=