ꓡꓯ ꓒꓯꓹ ꓙꓴ ꓡꓰ ꓢꓴ ꓔꓯ ꓫꓬꓹ ꓓꓻ ꓡꓰˍ ꓟ

ꓡꓴ-ꓘ 6ꓽ6-11

ꓠꓽ ꓦꓬꓼ ꓠꓬꓲ ꓠꓱꓸ ꓐꓯꓼ ꓕꓲ ꓠꓬꓲ ꓗꓪ꓾ ꓬꓰ-ꓢꓴ ꓠꓬ ꓢꓲꓽ ꓫꓬ ꓦꓲ ꓗꓪ ꓓꓵ ꓡꓰ ꓢꓲ ꓟꓸ ꓟꓲꓽ ꓟꓸ ꓖꓶ ꓔꓬ ꓕꓯ꓾ ꓖꓳ ꓗꓪ ꓡꓯꓼ ꓙ ꓐꓽ ꓙꓴꓺ ꓡꓰ ꓢꓴ ꓕꓲ ꓣꓳ ꓔꓬ ꓡꓳ꓿ ꓙꓵ ꓗ ꓟꓸ ꓒ ꓐꓴˍ ꓐꓰ ꓒ-ꓡꓲ-ꓢꓷ ꓐꓴ ꓠꓬ ꓬꓲ ꓔꓯ ꓓꓰꓺ ꓖꓴ ꓧꓪ ꓠꓲꓹ ꓫꓵ ꓠꓬꓲ꓾ ꓠꓽ ꓦꓬꓼ ꓠꓬꓲ ꓗꓪ ꓬꓲ ꓠꓻ ꓫꓬꓹ ꓖꓶ ꓟꓽ ꓫꓬꓹ ꓖꓶ ꓐꓰ ꓬꓲ ꓜꓶꓻ ꓡꓳꓸ ꓠꓬꓲ ꓔꓬ ꓡꓳ꓿ ꓬꓰ-ꓢꓴ ꓠꓬ ꓬꓲ ꓪꓽ ꓓꓵꓽ ꓙ ꓔꓬ ꓟ ꓔꓯ ꓢꓷꓸˍ ꓠꓬꓲ꓾ ꓡꓯꓼ ꓒꓯꓹ ꓙꓴꓺ ꓡꓰ ꓢꓴ ꓔꓯ꓾ ꓔꓴ ꓢꓲ ꓮꓽ ꓙꓵ ꓟꓲꓽ ꓙꓬꓽ ꓢꓲ ꓗꓪ ꓡꓯ꓾ ꓐꓯˍ ꓕꓯ꓾ ꓬꓲ ꓡ ꓢꓲ ꓦꓰꓼ ꓡ ꓡꓳ꓿

ꓬꓰ-ꓢꓴ ꓠꓬ ꓬꓲ ꓪꓽ ꓔꓯ꓾ ꓠꓴ ꓪꓽ ꓔꓯ ꓥꓪ ꓕꓲ ꓘꓶꓽ ꓠ ꓠꓬꓲˍ ꓠꓬꓲ꓾ ꓠꓽ ꓦꓬꓼ ꓠꓬꓲ ꓗꓪ꓾ ꓙꓲˍ ꓟ ꓐꓰ ꓟꓽ ꓙꓲ ꓟ꓾ ꓢꓯꓼ ꓟꓬ ꓚꓬꓴˍ ꓟ ꓐꓰ ꓢꓯꓼ ꓟꓬ ꓔꓯ ꓐꓬꓺ ꓡꓰ ꓝꓲˍ ꓟ꓾ ꓮ ꓡꓲ ꓕꓲ ꓫꓵꓽ ꓟ ꓬꓰ ꓓꓻ ꓡ?꓾ ꓐꓯˍ ꓡꓳ꓿ ꓖꓳ ꓡꓱ ꓢꓲ ꓬꓲ ꓠꓬ ꓚꓳꓺ ꓡꓳ ꓐꓰ ꓬꓲ ꓪꓽ ꓮꓽ ꓙꓵ ꓔꓯ ꓡꓳꓸ ꓠꓬꓲ ꓢꓲ꓾ ꓡꓯꓼ ꓒꓯꓹ ꓙꓴꓺ ꓡꓰ ꓢꓴ ꓖꓳ ꓕꓲ ꓣꓳ ꓔꓯ꓾ ꓠꓴ ꓡꓯꓼ ꓒꓯꓹ ꓛꓱ ꓓꓳ ꓡꓯ꓾ ꓐꓯ ꓖꓶˍ ꓡꓳ꓿ ꓖꓳ ꓕꓯ ꓬꓲ ꓡꓯꓼ ꓒꓯꓹ ꓛꓱꓺ ꓓꓳ ꓡ ꓠꓬ ꓓꓻ ꓡꓰꓳ꓿ ꓬꓲ ꓪꓽ ꓠꓽ ꓮꓽ ꓘꓶꓸ ꓠꓲꓹ ꓟ ꓦꓶꓻ ꓢꓲ꓾ ꓬꓰ-ꓢꓴ ꓔꓯ ꓮ ꓡꓲ ꓬꓰ ꓠꓯꓹ ꓟ ꓖꓪ ꓙꓱ ꓡꓯꓽ ꓘꓳˍ ꓡꓳ꓿

ꓟꓲ ꓠꓯ ꓞꓳ ꓤ ꓮ ꓙꓵꓽ ꓚꓲꓸ ꓛꓬ ꓓꓵꓽ ꓙ ꓫꓪꓸ ꓔˍ ꓟ ꓙꓳˍ ꓡꓳ= ꓕꓲ ꓐꓱ ꓠꓬ ꓬꓲ ꓚꓲꓸ ꓛꓬ ꓮ ꓫꓵꓽ ꓬꓰ ꓠꓯꓹˍ ꓡ ꓐꓯ ꓟ ꓔꓯ ꓛꓳꓽ ꓤ ꓛꓳꓽ ꓒꓯꓹ ꓐꓴ ꓔꓬ ꓗꓪ ꓐꓰ ꓚꓴꓽ ꓬꓲꓹ ꓓꓰꓽˍ ꓡꓳ꓾ ꓖꓪ ꓙꓱˍ ꓡꓳ= ꓖꓳ ꓡꓱ ꓖꓪ ꓙꓱ ꓢꓲ ꓠꓬꓲ ꓚꓲꓸ ꓛꓬ ꓓꓵꓽ ꓙ ꓔˍ ꓟ ꓬꓰˍ ꓠꓬ ꓪ ꓜꓲ ꓙꓲꓻˍ ꓡꓳ= ꓕꓲ ꓙꓰꓽ ꓔꓯ ꓬꓰ ꓠꓯꓹ ꓡ꓾ ꓟꓽ ꓬꓰ ꓠꓯꓹˍ ꓡ ꓐꓯˍ ꓟ ꓔꓯ ꓣꓳ ꓢꓷꓸ ꓡꓰˍ ꓥꓳ= ꓝꓮꓲ ꓕꓲ ꓐꓱ ꓠꓬ ꓚꓲꓸ ꓛꓬ ꓬꓰˍ ꓐꓰ ꓙꓽ ꓖꓶ ꓔ ꓟ ꓔꓯ ꓠꓱꓸ ꓐꓯ ꓢꓴ ꓔꓯ ꓟꓽ ꓢꓷꓸ ꓡꓰ ꓝꓲ= ꓠꓲꓹ ꓟ ꓘꓴꓽ ꓗꓪ ꓡꓰꓽ ꓫ ꓔ ꓡꓳ= ꓕꓲ ꓖ ꓕꓲ ꓧꓪ ꓠꓱꓸ ꓐꓯ ꓢꓴ ꓔꓯ ꓟꓽ ꓖꓪ ꓙꓱ ꓙꓱ ꓠꓲꓹ ꓟ ꓗꓪ ꓓꓵꓽ ꓙ ꓔ ꓟ ꓡꓰ ꓬꓰˍ ꓠꓬ ꓬꓰ ꓥꓳꓽ ꓡꓰ ꓬꓰ ꓚꓳꓼ ꓡꓰ ꓟ ꓙꓳ ꓡ ꓗꓴꓸˍ ꓡꓳ=

ꓠꓬꓲꓸ ꓠꓬꓲ ꓟ ꓢꓲꓽ ꓫꓬ ꓕꓳꓽ ꓶ ꓥ ꓟ ꓡꓴ-ꓘ 6ꓽ8 ꓗꓪ “ꓢꓲ ꓒ ꓬꓰ-ꓢꓴ ꓠꓬ ꓬꓲ ꓪ ꓓꓵꓽ ꓙ ꓔꓬ ꓟ ꓔꓯ ꓢꓷꓸˍ ꓡꓳ” ꓐꓰ ꓐꓯ ꓔ ꓡꓳ= ꓒ-ꓡꓲ-ꓢꓷ ꓐꓴ꓾ ꓙꓵꓽ ꓗ ꓟꓸ ꓒ ꓐꓴ ꓠꓬ ꓠꓽ ꓦꓬꓼ ꓠꓬꓲ ꓗꓪ ꓬꓰ-ꓢꓴ ꓮ ꓫꓵꓽ ꓬꓰ ꓟꓳꓸ ꓖꓶˍ ꓡ ꓐꓰ ꓡꓳꓸ ꓠꓬꓹ ꓔꓬ ꓖꓴˍ ꓡꓳ= ꓬꓰ-ꓢꓴ ꓔꓯ ꓝꓴꓲꓸ ꓧꓪ ꓠꓹ ꓟ ꓬꓲ ꓪ ꓠꓲꓹ ꓟ ꓗꓪ ꓮ ꓕꓯ ꓟꓲ ꓓꓵꓽ ꓙ ꓔꓬ ꓡꓳ= ꓖꓳ ꓡꓱ ꓠꓬꓲ ꓢꓲ ꓒ ꓬꓰ-ꓢꓴ ꓥˍ ꓟꓲ ꓬꓲ ꓪ ꓠꓲꓹ ꓟ ꓟꓽ ꓙꓲꓻ ꓟ ꓔꓯ ꓢꓷꓸˍ ꓠꓬꓲ꓾ ꓠꓽ ꓦꓬꓼ ꓠꓬꓲ ꓗꓪ ꓠꓻ ꓫꓬꓹ ꓖꓶˍ ꓡꓳ=

ꓣꓳ ꓐꓴ ꓠꓬ ꓣꓳꓽ ꓬꓰ ꓟꓽ ꓐ ꓡ ꓟ ꓔꓯ ꓠꓱꓸ ꓐꓯ ꓢꓴ ꓕꓲ ꓣꓳ ꓣꓳ ꓬꓰ ꓐ ꓡˍ ꓕꓯ ꓬꓲ ꓐꓱ ꓶ ꓗꓹ ꓛꓲ ꓙ ꓠ ꓗꓹ ꓡꓳ= ꓬꓲ ꓐꓱ ꓶ ꓠꓲꓹ ꓒꓴ ꓠ ꓗꓹ ꓡꓳ= ꓬꓲ ꓔꓯ ꓦꓯꓸ ꓠꓲꓹ ꓙꓵꓽˍ ꓟ ꓠꓲꓹ ꓟ ꓡꓰ꓾ ꓟꓬ ꓔꓳꓹ ꓟ ꓠꓲꓹ ꓟ ꓡꓰ ꓟꓽ ꓙꓲꓻ ꓟ ꓬꓰ ꓟꓽ ꓓꓻ= ꓝꓮꓲ ꓠꓽ ꓦꓬꓼ ꓠꓬꓲˍ ꓡꓰꓽ ꓟꓽ ꓞꓲ꓾ 7 ꓠꓬꓲ ꓡꓱꓸꓼ ꓕꓲ ꓠꓽ ꓡꓱꓸꓼ꓾ ꓙꓲꓻˍ ꓟ ꓔꓯ ꓬꓰ ꓠꓯꓹ ꓡꓳ ꓐꓯ ꓟ ꓔꓯ ꓢꓲ ꓒ ꓬꓰ-ꓢꓴ ꓡꓰ ꓟꓸ ꓖꓶ ꓔꓬ ꓡꓳ=

ꓠꓽ ꓦꓬꓼ ꓠꓬꓲ ꓕꓲ ꓠꓬꓲ ꓗꓪ ꓡꓰꓽ ꓕꓲ ꓠꓬꓲ ꓡꓱꓸꓼ ꓪꓽ ꓡꓰꓽ ꓘꓴ ꓔꓬ ꓢꓲ꓾ ꓣꓱꓽ ꓞꓹ ꓔꓬ ꓢꓴ ꓐꓴ ꓔꓯ ꓟꓽ ꓬꓰ ꓙ ꓠꓬ ꓖꓳ ꓟ ꓔꓯ ꓪꓴ-ꓢ ꓟꓽ ꓠꓲꓹ ꓒꓴ ꓟ ꓥ ꓡꓳ= ꓙꓲꓻˍ ꓟ ꓟꓬꓱꓽ ꓬꓰ ꓠꓹ ꓟ ꓐꓱ ꓶ ꓬꓲ ꓦꓬꓼ ꓠꓬꓲ ꓟꓽ ꓐꓱ ꓔ= ꓮ ꓡꓲ ꓕꓲ ꓠꓬꓲ ꓗꓪ ꓙꓲꓻˍ ꓟ ꓟꓬꓽ ꓠꓬꓲ ꓬꓰ ꓠꓯꓹˍ ꓡꓳ꓾ ꓐꓯˍ ꓟˍ ꓟꓲ ꓟꓽ ꓙꓳ= 7 ꓠꓬꓲ ꓡꓱꓸꓼ꓾ ꓕꓲ ꓠꓽ ꓡꓱꓸꓼ ꓠꓬ ꓙꓲꓻˍ ꓟ ꓔꓯ ꓡꓰꓽ ꓬꓰ ꓠꓹ ꓟ ꓢꓲ ꓒ ꓬꓰ-ꓢꓴ ꓡꓰ ꓠꓬꓲꓸ ꓠꓬꓲ ꓟ ꓢꓲꓽ ꓫꓬ ꓕꓳꓽ ꓶ ꓗꓪ ꓐꓰ ꓣꓳ ꓐꓴ ꓔꓯ ꓟꓸ ꓖꓶ ꓡ ꓔꓬ ꓟ ꓥ ꓡꓳ=