Pa Htein Ngo ꓢꓲꓹ ꓪꓰ ꓔꓶ ꓚꓱꓹ

ꓧꓪꓸ ꓧꓪꓸꓼ ꓾

ꓠꓬꓲꓸ ꓠꓬꓲ ꓔꓶ ꓫꓵꓽ ꓔꓶ ꓙꓰꓽ ꓔꓶˍ ꓟ ꓙꓵꓹ ꓗꓪ ꓠꓬ꓾ Pan Htein Ngo ꓢꓲꓹ ꓪꓰ ꓔꓶ ꓚꓱꓹ ꓔꓯ ꓟꓳꓸ ꓾ ꓠ ꓠꓹ ꓓꓴ ꓬꓰ ꓡꓯ=

ꓮ ꓟꓶ ꓟꓶꓽ ꓦ ꓦ ꓝꓲꓸ ꓕꓯ ꓣꓳꓽ ꓮ ꓟꓬꓹ ꓟꓳ ꓪ ꓓꓹ ꓟ ꓢꓲꓹ ꓪꓰ ꓕꓲꓽ ꓫꓵꓽ ꓥꓳ= ꓬꓲꓸ ꓒꓵꓽ ꓮ ꓟꓬꓹ ꓟꓽ ꓖꓴ꓾ ꓟꓶ ꓤ ꓣꓱꓽ ꓠꓸ ꓟ ꓢꓲꓹ ꓪꓰ ꓕꓲꓽ ꓫꓵꓽ ꓥ ꓢꓲ꓾ ꓮꓽ ꓟˍ ꓟꓲ ꓢꓷꓸ ꓔ ꓟ ꓢꓲꓹ ꓪꓰ ꓥ ꓡꓳ=

Pan Htein Ngo ꓢꓲꓹ ꓪꓰ ꓬꓲꓸ ꓒꓬꓱꓽ ꓠꓬ ꓠꓲꓹ ꓛꓵꓼ ꓗꓹ ꓢꓲ ꓬꓲꓸ ꓐꓵꓼ ꓢꓯꓼ ꓟꓽ ꓙꓳ ꓐꓯꓸ ꓥˍ ꓟꓲ꓾ ꓡꓳꓸ ꓗꓷ ꓠꓬ ꓠꓲꓹ ꓟ ꓢ ꓓꓴ ꓙꓳˍ ꓟ ꓢꓲꓹ ꓪꓰ ꓥ ꓡꓳ=

ꓢꓲꓹ ꓪꓰ ꓠꓬ ꓮ ꓡꓲ ꓗꓪ ꓓꓹ ꓟꓲ ꓐꓲꓻˍ ꓡꓳ꓾ ꓪꓽ ꓘꓴ ꓦꓲꓻ ꓾ ꓜꓲꓼ ꓖꓴ ꓾ ꓦꓲꓻ ꓘꓴꓽ ꓾ ꓑꓮꓲꓽ ꓕꓲ ꓫꓵꓽ ꓫꓵꓽ ꓗꓪˍ ꓟꓲ ꓗꓷ ꓙꓲˍ ꓟ ꓢꓲꓹ ꓪꓰ ꓥ ꓡꓳ=

Pan Htein Ngo ꓢꓲꓹ ꓪꓰ ꓔꓶ ꓚꓱꓹ ꓔꓯ ꓟꓳꓸ꓾ Agriculture Technology Page ꓗꓪ ꓐꓳ ꓔ ꓟ ꓔꓯ ꓾ ꓣꓦꓮ ꓔꓯ ꓠ ꓠꓹ ꓢꓴ ꓐꓴ ꓐꓱ ꓶ ꓐꓯ ꓟꓸ ꓖꓶ ꓩꓴ ꓡˍ ꓥꓳ=

Pan Htein Ngo ꓢꓲꓹ ꓪꓰ ꓔꓯ ꓙꓬꓻ ꓟꓵꓽ ꓗꓪ ꓟꓬꓽ ꓠꓬꓲ ꓔꓶˍ ꓐꓯꓸ ꓥˍ ꓟꓲ ꓾ ꓠꓬꓲꓸ ꓠꓬꓲꓸ ꓟ ꓦꓬꓼ ꓠꓬꓲ ꓗꓪ ꓠꓬ ꓛꓺ ꓟꓵꓽ ꓗꓪˍ ꓟꓲ ꓔꓶ ꓡꓻ ꓳ= ꓮ ꓘꓶꓸ ꓛˍ ꓟ ꓟꓵꓽ ꓗꓪ ꓠꓬ꓾ ꓶꓻ ꓥꓳꓽ ꓟꓶ ꓠ ꓬꓰ ꓢꓲ ꓔꓶ ꓐ ꓡꓹ ꓡꓳ=

Pan Htein Ngo ꓢꓲꓹ ꓪꓰ ꓠꓬ ꓬꓲ ꓙꓬ ꓢꓯꓼ ꓮ ꓟꓬꓹ ꓠꓵꓹ ꓟ ꓢꓲꓹ ꓪꓰ ꓥ ꓢꓲ꓾ ꓧꓶꓽ ꓚꓲꓺ ꓙꓳˍ ꓟ ꓗꓪ ꓔꓶˍ ꓟ ꓥ ꓡꓳ=

Pan Htein Ngo ꓢꓲꓹ ꓪꓰ ꓘꓴꓽ ꓗꓪ ꓠꓬ 3 ꓫꓵꓽ ꓙꓳˍ ꓡꓳ=

Pan Htein Ngo ꓢꓲꓹ ꓪꓰ ꓔꓶˍ ꓟ ꓗꓪ ꓠꓬ꓾ ꓬꓲꓸ ꓜꓲ ꓔꓯ ꓓꓶꓺ ꓢꓲ ꓔꓶˍ ꓟ ꓐꓰ ꓬꓲꓸ ꓚꓰꓺ ꓣꓴ ꓢꓲ ꓔꓶˍ ꓟ (ꓥ ꓠꓬ) ꓬꓲꓸ ꓛꓵꓺ ꓔꓶˍ ꓟ ꓐꓯ ꓢꓲ ꓠꓬꓲꓽ ꓫꓵꓽ ꓙꓳˍ ꓡꓳ=

ꓔꓶ ꓓꓴ ꓐꓱ ꓶ ꓙ ꓖꓶˍ ꓕꓯ꓾ ꓓꓽ ꓪꓴꓸ ꓠꓬ ꓟꓲꓺ ꓛꓬꓺ(ꓟꓲ ꓠꓯ) ꓔꓯ ꓘꓪꓺ ꓫꓴ ꓖꓶ ꓠ ꓗꓹ ꓡꓳ= ꓘꓪꓺ ꓓꓳ ꓡꓰ ꓠꓬ ꓾ ꓘꓪꓺ ꓔ ꓟ ꓕꓯꓽ ꓢꓲ ꓗꓪ ꓢꓲꓹ-ꓒꓬꓽ ꓙꓴꓺ ꓾ ꓟꓳꓼ ꓙꓴꓺ ꓐꓴ ꓔꓯ ꓛꓴꓺ ꓖꓶ ꓠ ꓗꓹ ꓡꓳ= ꓛꓴꓺ ꓓꓳ ꓡꓰ ꓠꓬ ꓮꓸ ꓠꓬꓲꓽ ꓛꓰꓽ ꓧꓳꓽ ꓖꓶ ꓠ ꓔ ꓡꓳ=

ꓖꓳ ꓡꓰ ꓙ ꓖꓶ ꓗꓷ ꓠꓬ꓾ ꓢꓲꓹ ꓪꓰ ꓜꓲ (ꓥ ꓠꓬ) ꓬꓲꓸ ꓛꓵꓺ ꓔꓯ ꓕꓲ ꓜꓲ ꓡꓰ ꓕꓲ ꓜꓲ ꓠꓬꓲꓽ ꓗꓴꓸ ꓚꓸꓼ ꓗꓪ 3’ ꓛꓲꓺ ꓗꓷꓹ ꓶꓽ ꓢꓲ ꓔꓶ ꓠꓯꓹ ꓡꓳ= ꓔꓶ ꓗꓷ ꓗꓸ ꓠꓯꓸ ꓕꓲꓽ ꓘꓳꓼ ꓛꓲꓺ ꓡ ꓠꓬ ꓬꓲꓸ ꓪꓰ ꓶꓼ ꓫ ꓓ ꓡꓻ ꓳ=

ꓬꓲꓸ ꓜꓲ ꓔꓯ ꓟꓶꓽ ꓦ ꓬꓲ ꓪꓴꓸ ꓦ ꓡꓹ ꓕꓯ ꓔꓶ ꓔ ꓠꓬ꓾ ꓝꓮꓲ ꓕꓲ ꓘꓳꓼ ꓛꓺ ꓝꓲ ꓖꓴ ꓡꓰ ꓢꓲ ꓟꓶꓽ ꓦ ꓦ ꓝꓲꓸ ꓟꓽ ꓛꓲ ꓡ ꓢꓰꓽ ꓕꓯ ꓬꓲꓸ ꓪꓰ ꓶꓼ ꓓ꓾ ꓧꓼ ꓓˍ ꓡꓳ=ꓬꓲꓸ ꓛꓵꓺ ꓔꓯ ꓠꓽ ꓦ ꓒꓴꓺ ꓕꓲꓽ ꓦ ꓐꓰ ꓠꓬꓲꓽ ꓦ ꓕꓯ ꓔꓶ ꓐ ꓡ ꓢꓲ꓾ ꓟꓶꓽ  ꓦ ꓦ ꓝꓲ ꓕꓯ ꓶꓼ ꓐ ꓡꓹ ꓡꓳ=

Pan Htein Ngo ꓢꓲꓹ ꓪꓰ ꓠꓬ 10 ꓦ ꓕꓯ ꓬꓲꓸ ꓪꓰ ꓪꓰˍ ꓟ ꓠꓽ ꓗꓷ ꓢꓲ꓾ 12 ꓦ ꓗꓪ ꓠꓬ ꓬꓲꓸ ꓜꓲˍ ꓟꓲ ꓠꓽ ꓗꓷˍ ꓡꓳ=

3 ꓦ ꓐꓰ 3 ꓦ ꓗꓳꓸ ꓗꓷ ꓠꓬ꓾ Pan Htein Ngo ꓢꓲꓹ ꓪꓰ ꓟꓲ ꓗꓪ ꓓꓹ ꓟ ꓢꓲꓹ ꓪꓰ ꓜꓲ ꓔꓯ ꓓꓶꓺ ꓗꓷ ꓢꓲ꓾ ꓢꓲꓹ ꓪꓰ ꓟꓲ ꓕꓯ ꓢꓲ ꓗꓪ ꓛꓴꓺ ꓗꓷ ꓢꓲ ꓠꓬꓲ꓾ ꓮ ꓠꓬꓲꓽ ꓛꓰꓽ ꓧꓳꓽ ꓗꓷ ꓢꓲ꓾ ꓕꓲꓽ ꓠꓬꓲ ꓡꓰ ꓕꓲꓽ ꓠꓬꓲ ꓬꓲꓻ ꓙꓬ ꓧꓳꓽ ꓖꓶˍ ꓠꓬ꓾ ꓬꓲꓸ ꓪꓰ ꓠꓯꓼ ꓠꓯꓼ ꓪꓰ ꓡˍ ꓡꓳ=

Pan Htein Ngo ꓢꓲꓹ ꓪꓰ ꓟꓲ ꓔꓯ 3 ꓘꓳꓼ ꓗꓪ ꓛꓲꓺ ꓔꓶ ꓢꓲ꓾ 3 ꓘꓳꓼ ꓙꓳ ꓡˍ ꓕꓯ ꓠꓬ꓾ ꓬꓲꓸ ꓛꓵꓺ ꓟꓰꓹ ꓢꓲ ꓬꓲꓸ ꓫꓵꓼ ꓔꓶ ꓠ ꓗꓹ ꓡꓳ=

ꓟꓬꓽ ꓠꓬꓲ ꓠꓬ ꓢꓲꓹ ꓪꓰ ꓟꓲ ꓗꓪ ꓬꓲꓸ ꓚꓰꓺ ꓐꓰ ꓬꓲꓸ ꓜꓲ ꓛꓵꓽ ꓠꓻ ꓒꓬꓱꓼ ꓡ ꓗꓲˍ ꓡꓳ= ꓐꓶꓽ ꓓꓲꓻˍ ꓟꓲ ꓓꓯˍ ꓡꓳ= ꓬꓲꓸ ꓚꓰꓺ꓾ ꓬꓲꓸ ꓜꓲ ꓛꓵꓽˍ ꓟ ꓠꓬ ꓬꓲꓸ ꓫꓵꓸ ꓗꓪ ꓐꓰ ꓐꓹ ꓟ ꓠꓻ ꓥ ꓡꓳ= ꓬꓲꓸ ꓜꓲ ꓠꓻ ꓒꓬꓱꓼ ꓡ ꓠꓬ ꓢꓲꓹ ꓪꓰ ꓟꓲ ꓕꓲ ꓟ ꓡꓱꓸꓼ ꓠꓷꓼ ꓡꓰ ꓢꓲ꓾ ꓮ ꓙꓵꓽ ꓐꓬ ꓡꓰ ꓾ ꓛꓵꓽ ꓡꓰˍ ꓟ ꓪꓴꓸ ꓠꓬꓲ ꓢꓲꓹ ꓪꓰ ꓟꓽ ꓔꓶ ꓢꓰꓽ ꓕꓯ ꓡꓰ ꓜꓳꓽ ꓜꓳꓽ ꓡꓳꓸ ꓠꓬꓲ ꓢꓲ ꓔꓶ ꓠ ꓗꓹ ꓡꓳ=