ꓣꓳ ꓢꓯꓸ ꓔꓬ ꓟ ꓠꓬꓲꓸ ꓠꓬꓲ ꓦꓬꓼ ꓠꓬꓲ ꓗꓪ ꓪꓴ-ꓢ ꓔꓯ ꓪꓽ ꓘꓴ_ ꓟ ꓗꓪ ꓐꓰ ꓟꓳ ꓪ ꓓ_ ꓡꓳ=

ꓣꓳ ꓢꓯꓸ ꓔꓬ ꓟ ꓠꓬꓲꓸ ꓠꓬꓲ ꓦꓬꓼ ꓠꓬꓲ ꓗꓪ ꓪꓴ-ꓢ ꓔꓯ ꓪꓽ ꓘꓴ_ ꓟ ꓗꓪ ꓐꓰ ꓟꓳ ꓪ ꓓ_ ꓡꓳ=

                ꓙꓲ-ꓢꓴ ꓢꓲ ꓤ ꓐꓴ ꓪꓽ ꓘꓴ_ ꓟ ꓗꓪ ꓐꓰ ꓔꓲ-ꓒ ꓪ ꓔꓲ ꓝꓣꓮꓠꓚꓲꓢ ꓡꓰ ꓕꓲꓽ ꓠꓬꓲ ꓡꓲ ꓕꓲꓽ ꓠꓬꓲ ꓒꓬꓱꓼ ꓔꓬ ꓟ ꓗꓪ ꓣꓳ ꓠꓬ ꓮ ꓫꓵꓽ ꓑꓶꓸ ꓓꓴ ꓪꓽ ꓘꓴ ꓠ ꓔ ꓡ? ꓮ ꓡꓲ ꓪꓽ ꓘꓴ ꓠ ꓔꓸ ꓟ ꓔꓯ ꓐꓯ_ ꓡꓳ= ꓕꓱ ꓕꓲꓽ ꓫꓵꓽ ꓠꓽ ꓗꓪ ꓠꓬ ꓔꓲ-ꓒ ꓪ ꓔꓲ ꓡꓰ ꓪꓽ ꓘꓴ ꓘꓶꓽ ꓠꓬ ꓣꓳ ꓕꓲꓽ ꓠꓬꓲ ꓡꓲ ꓕꓲꓽ ꓠꓬꓲ ꓬꓰ ꓔꓬ ꓟ ꓟꓬꓱꓽ ꓥ ꓟ ꓔꓯ ꓐꓯ ꓟꓸ ꓖꓶ_ ꓡꓳ= ꓮ ꓙꓵꓽ ꓠꓬ ꓪꓽ ꓘꓴ_ ꓟ ꓗꓪ ꓐꓰ ꓪꓴ-ꓢ ꓐꓰ ꓫꓸ ꓕꓱ ꓡꓰ ꓘꓳ ꓠꓹ ꓟ ꓥꓳ= ꓪꓽ ꓘꓴ_ ꓟ ꓠꓬ ꓣꓳ ꓤꓶꓸꓹ ꓗꓪ ꓮ ꓔꓳꓸ ꓡꓰ ꓐꓰ ꓮ ꓕꓯ ꓥ ꓟꓲ ꓢꓯꓸ ꓔꓬ ꓢꓲ-ꓸ ꓫꓸ ꓪ ꓐꓰ ꓟꓽ ꓟꓸ ꓖꓶ ꓥ ꓟꓲ ꓠꓲꓹ ꓟ ꓗꓪ ꓐꓰ ꓟꓸ ꓔ ꓟ ꓥꓳ= ꓙꓲ-ꓢꓴ ꓢꓲ ꓤ ꓐꓴ ꓪꓽ ꓘꓴ_ ꓟ ꓠꓬ ꓞꓳ ꓤ ꓠꓲꓹ ꓟ ꓗꓪ ꓟꓽ ꓟꓳ ꓪ_ ꓟ ꓥꓳ ꓡꓳꓸ ꓓꓴ ꓔꓯ ꓖꓶ_ ꓟ ꓥꓳ=ꓣꓳ ꓤꓶꓸꓹ ꓗꓪ ꓬꓰ ꓔꓬ ꓟ ꓟꓬꓱꓽ ꓮ ꓙꓵꓽ ꓠꓬ ꓪꓴ-ꓢ ꓠꓵ ꓠꓲꓹ ꓗꓪ ꓐꓰ ꓙꓵꓹ ꓟ ꓒꓬꓱꓼ ꓡ_ ꓥꓳ=

ꓠꓬꓲꓸ ꓠꓬꓲ ꓦꓬꓼ ꓠꓬꓲ ꓗꓪ ꓪꓽ ꓘꓴ ꓠꓹ ꓟ

                ꓕꓱ ꓚꓱꓹ ꓗꓪ ꓐꓰ ꓔꓲ-ꓒ ꓪ ꓔꓲ ꓝꓣꓮꓠꓚꓲꓢ ꓡꓰ ꓗ-ꓔꓳ-ꓡꓲ ꓪꓴ-ꓢ ꓟꓸ ꓟꓲꓽ ꓗꓪ ꓐꓰ “ ꓣꓳ ꓠꓬ ꓪꓴ-ꓢ ꓶꓼ ꓓꓳꓽ ꓫꓱꓹ ꓓꓳꓽ ꓟꓸ ꓟꓲꓽ ꓔꓯ ꓠ ꓠꓹ ꓢꓲ-ꓸ ꓢꓯꓸ ꓬꓲꓼ ꓡ_ ꓟ ꓬꓲꓸ ꓠꓯꓸ_ ꓟ ꓚꓱꓹ ꓔꓯ ꓕꓲꓽ ꓠꓲꓹ ꓕꓲꓽ ꓪꓼ ꓪꓽ ꓘꓴ_ ꓟ ꓔꓯ ꓢꓳ ꓣꓴ_ ꓟ ꓥꓳ= ꓖꓳ ꓡꓱ ꓥ ꓟꓲ ꓢꓲ-ꓫꓬ-ꓟ-ꓦ ꓠꓬ ꓣꓳ ꓐꓰ ꓔꓬ ꓢꓲ-ꓸ ꓪꓽ ꓘꓴ_ ꓟ ꓔꓯ ꓣꓳ ꓠꓲꓹ ꓟ ꓘꓴꓽ ꓗꓪ ꓐꓰ ꓓꓳ ꓡ_ ꓡꓳ= “ꓬꓲ ꓙꓵꓸꓹ ꓠꓬ ꓪꓴ-ꓢ ꓡꓯ ꓒꓯꓹ ꓗꓪ ꓥꓳ= ꓡꓳꓸ ꓬꓲ_ ꓟ ꓟꓽ ꓥ-ꓸ ꓡ ꓠꓹ ꓟ ꓥ ꓟꓲ ꓟꓽ ꓥ-ꓸ ꓖꓳ ꓡꓱ ꓥ ꓟꓲ ꓮ ꓟꓶ ꓦꓬꓼ ꓠꓬꓲ ꓗꓪ ꓐꓰ ꓪꓴ-ꓢ ꓔꓯ ꓟꓳ ꓪ ꓓ ꓡꓳ= ꓕꓲꓽ ꓐꓱ ꓠꓬ ꓠꓬꓲꓸ ꓠꓬꓲ ꓮ ꓟꓶ ꓒꓬꓱꓼ ꓔꓬ ꓟ ꓔꓯ ꓟꓽ ꓘꓳꓹ ꓣꓴ-ꓸ ꓡ ꓠꓹ ꓟ ꓦꓬꓼ ꓠꓬꓲ ꓔꓯ ꓥꓳ ꓡꓳꓸ ꓔ ꓟ ꓥꓳ= ꓬꓲ ꓪ ꓠꓬ ꓓꓵꓽ ꓙ ꓟꓶ_ ꓟ ꓗꓪ ꓔꓬ ꓢꓲ-ꓸ ꓠꓬꓲꓸ ꓠꓬꓲ ꓒꓬꓱꓼ ꓔꓬ ꓟ ꓮ ꓡꓲ ꓢꓯꓸ ꓔꓬ ꓠꓹ ꓟ ꓔꓯ ꓟꓽ ꓢꓷꓸ=

ꓪꓽ ꓘꓴ_ ꓟ ꓠꓬ ꓣꓳ ꓔꓯ ꓒꓳꓹ ꓖꓶ_ ꓥꓳ=

ꓔꓲ-ꓒ ꓪ ꓔꓲ ꓡꓰ ꓪꓽ ꓘꓴ_ ꓟ ꓠꓬ ꓠꓬꓲꓸ ꓠꓬꓲ ꓣꓳ ꓠꓯꓼ ꓗꓪ ꓶꓼ ꓤ ꓫꓱꓹ ꓤ ꓐꓰ ꓢꓯꓸ ꓔꓬ ꓠꓹ ꓟ ꓒꓳꓹ ꓖꓶ_ ꓡꓳ= ꓪꓽ ꓘꓴ_ ꓟ ꓠꓬ ꓥꓶ ꓟ ꓠꓲꓹ ꓟ ꓔꓯ ꓟꓶꓽ ꓡꓰ ꓝꓲ ꓢꓲ-ꓸ ꓠꓵ ꓠꓲꓹ ꓙꓳ ꓡꓰ ꓝꓲ_ ꓟ ꓡꓰ ꓟꓽ ꓞꓲ-ꓸ ꓗꓹ ꓛꓲ ꓠꓲꓹ ꓐꓰ ꓠꓱꓸ ꓐꓯꓼ ꓢꓴ ꓔꓯ ꓝꓴꓲ ꓖꓽ ꓖꓶ ꓠꓹ ꓟ ꓐꓱ ꓶ ꓢꓯꓼ ꓪ ꓙꓳ ꓡꓰ ꓝꓲ_ ꓟ ꓥꓳ=ꓶꓼ ꓤ ꓫꓱꓹ ꓤ ꓠꓬ ꓣꓳ ꓠꓯꓼ ꓗꓪ ꓢꓯꓸ ꓔꓬ ꓢꓲ-ꓸ ꓔꓳꓸ ꓜꓳ ꓡ ꓠꓹ ꓟ ꓫꓸ ꓓꓴ ꓔꓯ ꓟꓽ ꓟꓳ ꓡꓰ ꓪꓴ-ꓢ ꓔꓯ ꓟꓳ ꓪ ꓠꓹ ꓟ ꓐꓱ ꓶ ꓪꓴ-ꓢ ꓗꓪ ꓐꓰ ꓡ_ ꓟ ꓶ ꓓꓰꓽ_ ꓟ ꓥꓳ-ꓸ ꓐꓰ ꓢꓷꓸ ꓡꓰ ꓝꓲ_ ꓡꓳ= ꓪꓴ-ꓢ ꓐꓰ ꓙ ꓫꓱꓸꓸ ꓔꓬ ꓢꓴ ꓕꓲꓽ ꓣꓳ ꓠꓬ ꓟꓬ ꓠꓬꓲ ꓗꓹ ꓛꓲ ꓢꓲ ꓡꓲꓸ ꓟ ꓔꓯ ꓟꓶ_ ꓥꓳ=

ꓮꓽ ꓟ ꓐꓱ ꓶ ꓪꓽ ꓘꓴ ꓠ ꓔ ꓡ?

                ꓔꓲ-ꓒ ꓪ ꓔꓲ ꓝꓣꓮꓠꓚꓲꓢ ꓡꓰ ꓣꓳ ꓪꓽ ꓘꓴ ꓕꓯ ꓣꓳ ꓠꓲꓹ ꓠꓵ ꓢꓴ ꓐꓱ ꓶ ꓡꓰ ꓟꓽ ꓞꓲ-ꓸ ꓮ ꓙꓵꓽ ꓢꓴ ꓐꓱ ꓶ ꓣꓳ ꓟꓽ ꓢꓷꓸ ꓔ ꓢꓴ ꓐꓱ ꓶ ꓥ ꓟꓲ ꓮ ꓕꓯ ꓟꓲ ꓪꓽ ꓘꓴ ꓖꓶ ꓠꓹ ꓟ ꓙꓲ-ꓢꓴ ꓢꓲ ꓤ ꓐꓴ ꓔꓯ ꓢꓯꓼ ꓖꓶ_ ꓡꓳ= “ ꓢꓲ ꓫꓬ ꓕꓳ ꓶ ꓗꓪ ꓣꓳ ꓔꓯ ꓐꓯ_ ꓟ ꓡꓰ ꓐꓰ ꓛꓴꓽ ꓙꓳ ꓢꓴ ꓐꓱ ꓶ ꓥ ꓟꓲ ꓪꓽ ꓘꓴ ꓖꓶ ꓠ ꓔ ꓡꓳ= ꓔꓲ-ꓒ ꓪ ꓔꓲ ꓡꓰ ꓕꓲ ꓣꓳ ꓕꓵꓸꓼ ꓔꓬ ꓢꓲ-ꓸ ꓥꓳ ꓡꓳꓸ ꓓꓴ ꓟꓽ ꓙꓳ ꓠꓲꓹ ꓟ ꓒꓬ ꓡꓰ ꓢꓴ-ꓸ ꓬꓲ ꓪ ꓐꓱ ꓶ ꓪꓽ ꓘꓴ ꓖꓶ ꓠꓹ ꓟ ꓐꓯ_ ꓡꓳ= ꓬꓰ-ꓢꓴ ꓠꓬ ꓮꓸ ꓣꓳ ꓡꓳꓸ ꓒꓽ ꓟꓽ ꓔꓬ ꓟ ꓮꓸ ꓣꓳ ꓜꓴ ꓡꓰ ꓐꓰ ꓠꓲꓹ ꓟ ꓫꓸ ꓔꓬ ꓢꓴ ꓙ ꓖꓴ ꓟꓶꓸꓸ ꓔꓬ ꓢꓴ ꓔꓯ ꓫꓱꓸ ꓤ ꓟ ꓐꓰ ꓛꓳꓽ ꓔꓬ ꓡꓳ= ꓫꓱꓸ ꓤ_ ꓟ ꓠꓬ ꓬꓰ-ꓢꓴ ꓧꓳ ꓟꓳꓸ ꓚꓱꓹ ꓥꓳ ꓐꓰ ꓔꓲ-ꓒ ꓪ ꓔꓲ ꓡꓰ ꓐꓯ_ ꓡꓳ=

ꓣꓳ ꓠꓬ ꓪꓴ-ꓢ ꓠꓵ ꓠꓲꓹ ꓔꓯ ꓟꓶꓸꓹ ꓡꓰ ꓢꓴ ꓝꓴꓲ ꓙꓳ ꓢꓴ ꓡꓽ ꓞꓳ ꓥ ꓡꓳ=

                ꓪꓽ ꓘꓴ_ ꓟ ꓠꓬ ꓣꓳ ꓠꓱꓸ ꓐꓯꓼ ꓡꓽ ꓞꓳ ꓔꓯ ꓝꓴꓲ ꓟꓳ_ ꓟ ꓗꓪ ꓐꓰ ꓠꓲꓹ ꓠꓵ ꓘꓴꓸ ꓠꓹ ꓟ ꓬꓰ ꓙ_ ꓡꓳ= ꓬꓰ-ꓢꓴ ꓠꓬ ꓕꓱ ꓡꓱ ꓬꓰ_ ꓟ ꓥꓳ= ꓟꓲ ꓠꓯ ꓔꓯ ꓐꓯ ꓟꓴ ꓘꓶꓽ ꓠꓹ ꓟ ꓗꓪ ꓐꓰ ꓚꓬꓴ ꓙ ꓟ ꓥꓳ= ꓣꓳ ꓠꓲꓹ ꓟ ꓗꓸ ꓘꓶꓽ ꓔꓯ ꓒꓴ ꓢꓲ-ꓸ ꓠꓱꓸ ꓐꓯꓼ ꓔꓯ ꓝꓴꓲ ꓖꓽ ꓖꓶ ꓢꓲ-ꓸ ꓫꓱꓸ ꓤ_ ꓟ ꓠꓲꓹ ꓟ ꓙꓳ ꓠꓹ ꓟ ꓔꓯ ꓢꓯꓼ ꓖꓶ_ ꓡꓳ=

https://bit.ly/3qzbUBU