ꓢꓲꓺꓡꓲ ꓟ (2) ( Dialogue with the Poor)

ꓢꓲꓺ ꓡꓲꓹ ꓐꓯꓹ ꓟ ꓔꓯ ꓬꓲ ꓧꓶꓹ ꓚ ꓢꓲ ꓣꓳꓽ ꓛꓳꓽ ꓠꓬꓲ ꓠꓬ ꓢꓲꓺ ꓡꓲ ꓐꓯꓹ ꓟ ꓑꓰꓮꓚꓰ ꓐꓯꓹ ꓟ ꓠꓬ ꓡꓮꓔꓲꓠ ꓥꓳꓽ ꓗꓪ ꓐꓰ ꓡꓹ ꓟ ꓑꓮꓫ ꓐꓯꓹ ꓟ ꓗꓪ ꓐꓰ ꓫꓶꓸ ꓡꓹ ꓟ ꓥ ꓐꓶ= ꓒꓮꓫ ꓐꓯꓹ ꓟ ꓠꓬ ꓑꓮꓗ꓾ ꓑꓮꓖ꓾ ꓑꓮꓚ꓾  ꓫꓸ ꓪ ꓘꓶꓽ 3 ꓘꓶꓽ ꓗꓪ ꓐꓰ ꓡꓹ ꓟ ꓥˍ ꓡꓳ= ꓬꓲ ꓟꓸ ꓟꓲꓽ ꓠꓬ ꓓꓵꓽ ꓙꓽ ꓞꓰꓹ ꓓꓴ꓾ ꓠꓲꓹ ꓟ ꓒꓳꓹ ꓡꓲꓼ ꓓꓴ꓾ ꓬꓲ ꓪꓴꓹ ꓡꓰ ꓐꓰ ꓝꓮꓲ ꓕꓲꓽ ꓧꓪ ꓗꓷ ꓡꓰ ꓠ ꓢꓯꓼ ꓕꓵꓼ ꓓꓴ꓾ ꓐꓯꓹ ꓟ ꓬꓲ ꓟꓸ ꓟꓲꓽ ꓥ ꓐꓶ= ꓡꓮꓔꓲꓠ ꓥꓳꓽ ꓗꓪ ꓐꓰ ꓑꓮꓫ ꓐꓯꓹ ꓟ ꓫꓸ ꓪ ꓘꓶꓽ ꓠꓬ ꓫꓵꓽ ꓪꓴ ꓢꓲ ꓛꓵꓽ ꓗꓪ ꓐꓰ ꓡꓰ ꓙꓰꓹ ꓟ꓾ ꓫꓵꓽ ꓪꓴ ꓢꓲꓽ ꓛꓵꓽ ꓗꓪ ꓐꓰ ꓡꓲꓼ ꓙꓰ ꓠꓹ ꓐꓱ ꓶꓽ ꓪꓽ ꓡꓰꓹ ꓟ ꓟꓸ ꓟꓲ ꓥ ꓐꓶ= 

ꓕꓱ ꓡꓰ ꓫꓵꓽ ꓪꓴ ꓢꓲ ꓛꓲꓽ ꓗꓪ ꓐꓰ ꓡꓰꓹ ꓙꓰ ꓠꓹ ꓟ ꓪꓽ ꓡꓰꓹ ꓟ ꓐꓯꓹ ꓟ ꓬꓲ ꓟꓸ ꓟꓲꓽ ꓚꓵ ꓠꓬ ꓢꓲꓺ ꓡꓲ ꓐꓰ ꓗꓷ ꓡꓰꓹ ꓟ꓾ ꓗꓹ ꓗꓹ ꓛꓲꓽ ꓛꓲꓽ ꓗꓷ ꓡꓰꓹ ꓟ꓾ ꓑꓶ ꓢꓲꓺ ꓡꓲꓹ ꓗꓷ ꓡꓰꓹ ꓟ꓾ ꓢꓲꓺ ꓡꓲꓹ ꓜꓼ ꓐꓰ ꓪꓴꓽ ꓧꓶ ꓠꓹ ꓟ ꓙꓬ ꓫꓸ ꓟꓽ ꓛꓲ ꓡꓳꓸ ꓙ ꓑꓳꓽ ꓙ ꓔ ꓙ ꓖꓶꓹ ꓟ ꓐꓰ ꓐꓲ ꓞꓹ ꓟ꓾ ꓐꓯꓹ ꓟ ꓬꓲ ꓟꓸ ꓟꓲꓽ ꓥ ꓐꓶ= ꓮ ꓠꓵ ꓕꓯ ꓣꓳ-ꓟ ꓪꓸ ꓔꓲꓸ ꓐꓴ ꓙꓵꓹ ꓟ ꓞꓲꓼ ꓗꓪ ꓠꓬ ꓑꓮꓚꓔꓴꓟ ꓔꓯ ꓢꓲꓺ ꓡꓲ ꓟ ꓐꓱ ꓶꓽ ꓖꓪ ꓚꓱ ꓞꓰꓹ ꓢꓲ ꓞꓳ ꓪꓴꓽ ꓞꓳ ꓔꓲ ꓐꓴ ꓢꓲꓽ ꓒꓽ ꓐꓴ ꓟꓬꓱ ꓐꓳ ꓔꓲ ꓔ ꓟ ꓑꓰꓮꓚꓰ ꓔꓣꓰꓮꓔꓬ ꓐꓰ ꓬꓲ ꓟꓸ ꓟꓲꓽ ꓙꓳꓹ ꓟ ꓔꓯ ꓣꓱꓽꓹ ꓫꓵˍ ꓐꓶ=

 ꓖꓳ ꓟ ꓪꓴꓸ ꓠꓬꓲ ꓠꓲ ꓢꓲꓺ ꓡꓲꓹ ꓟ ꓐꓯꓹ ꓟ ꓠꓬ ꓜꓴ ꓠꓬꓲꓽ ꓜꓴ ꓠꓯꓸꓼ ꓗꓪ ꓕꓲꓽ ꓜꓴ ꓐꓰ ꓕꓲꓽ ꓜꓴ ꓘꓳꓹ ꓣꓴ ꓢꓲ ꓕꓲꓽ ꓜꓴ ꓐꓰ ꓕꓲꓽ ꓜꓴ ꓕꓱ ꓟ ꓠꓬ ꓚꓽ ꓥ꓾ ꓔꓱ ꓥ꓾ ꓘꓳ ꓣꓴ ꓐ ꓡ ꓥ꓾ ꓝꓮꓲ ꓕꓲꓽ ꓧꓪ ꓪꓽ ꓡꓯꓽ ꓘꓳ ꓫꓱꓹ ꓡꓯꓽ ꓘꓳ ꓐ ꓡ ꓥ ꓐꓯꓹ ꓟꓬꓲ ꓟꓸ ꓟꓲꓽ ꓥ ꓐꓶ= ꓦꓲ-ꓐꓱ-ꓣꓴ ꓥꓳꓽ ꓗꓪ ꓠꓬ ꓢꓧꓮꓡꓳꓟ ꓐꓯꓹ ꓟ ꓢꓲꓺ ꓡꓲꓹ ꓟ ꓐꓯꓹ ꓟ ꓬꓲ ꓘꓴꓽ ꓗꓪ ꓠꓬ ꓞꓳ ꓤꓽ ꓕꓲꓽ ꓣꓳ ꓠꓯꓸꓼ ꓗꓪ ꓢꓳꓹ ꓐꓰ ꓟꓽ ꓪꓽ ꓡꓯꓽ ꓘꓳ ꓟꓽ ꓫꓱꓹ ꓡꓯꓽ ꓗꓳꓹ ꓟ ꓮ ꓘꓶꓸ ꓓꓹ ꓟ꓾ ꓮ ꓘꓶꓸ ꓤꓼ ꓘꓹ ꓟ꓾ ꓮ ꓘꓶꓸ ꓠꓱ ꓘꓹ ꓟ ꓕꓱ ꓡꓰꓳ ꓫꓵꓽ ꓢꓯꓼ ꓪꓽ ꓙꓳˍ ꓟ ꓕꓲꓽ ꓡꓽ ꓞꓳ ꓘꓴ ꓗꓪ ꓟꓹ ꓥˍ ꓠꓬ ꓬꓲ ꓜꓴ ꓬꓲ ꓟꓯꓼ ꓗꓪ ꓢꓲꓺ ꓡꓲꓸ ꓐꓰ ꓗꓷ ꓡꓰ ꓝꓲꓹ ꓟ ꓙꓳ ꓢ ꓔꓬ ꓢꓹ ꓟ ꓕꓱ ꓡꓰꓳ ꓫꓵꓽ ꓔꓯ ꓐꓯ ꓠꓲꓹ ꓫꓵꓹ ꓟ ꓥ ꓐꓶ=