ꓟꓶꓽ ꓛꓲ ꓔꓶꓸ (ꓮꓸ ꓟꓶ) ꓔꓶ ꓚꓱꓹ

ꓟꓶꓽ ꓛꓲ ꓔꓶꓸ ꓐꓯ ꓗꓷ ꓠꓬ ꓣꓳ ꓟꓬ ꓢꓶꓽ ꓗꓪ ꓟꓳˍ ꓟ ꓠꓬ ꓮꓸ ꓡꓴꓽ ꓗꓪ ꓐꓰ ꓣꓴ ꓓꓳ ꓔ ꓟ ꓞ ꓒꓴꓽ ꓒꓴꓽ ꓟ ꓬꓲꓸ ꓟꓴꓽ ꓘꓴꓽ ꓗꓴ ꓕꓴꓽ ꓕꓴꓽ ꓟ ꓔꓯ ꓟꓳˍ ꓥꓳ= ꓦꓲꓻ ꓗꓪ ꓠꓶꓽ ꓧꓪ ꓐꓴ꓾ ꓪꓰ ꓤ ꓐꓴ ꓡˍ ꓕꓯ ꓬꓲꓸ ꓪ ꓐꓴ ꓔꓯ ꓲ’ ꓖꓶꓽ ꓜꓽ ꓓꓴ ꓜꓽ ꓫꓵꓽ ꓜꓽ ꓙꓰꓽ ꓠꓬ ꓟꓵꓽ ꓓꓽ ꓟ ꓗꓪ ꓔꓬ ꓢꓴ ꓐꓴ ꓐꓱ ꓶ ꓒꓴ ꓗꓪ ꓐꓰ ꓮ ꓟꓬꓹ ꓫꓵꓽ ꓪꓴꓻ ꓟꓶ ꓓˍ ꓟꓲ꓾ ꓪ ꓚꓲꓺ ꓪ ꓐꓽ ꓟꓵꓽ ꓗꓪ ꓔꓬ ꓢꓴ ꓐꓱ ꓶ ꓠꓬ ꓮ ꓘꓶꓸ ꓬꓰ ꓫ ꓡꓳ= ꓒꓴ ꓙꓳˍ ꓟꓲ ꓬꓲꓸ ꓫꓵꓽ ꓬꓲ ꓙꓰꓽ ꓮ ꓟꓬꓹ ꓪꓴꓻ ꓟꓶ ꓟꓽ ꓓ= ꓖꓳ ꓡꓱ ꓠꓬꓲ ꓠꓶꓽ ꓧꓪ ꓐꓴ꓾ ꓪꓰ ꓤ ꓐꓴ꓾ ꓤ ꓠꓱ ꓤ ꓐꓴ ꓔꓯ ꓖꓶꓽ ꓜꓽ ꓓꓴ ꓠꓬ ꓪꓳꓽ ꓐꓱ ꓗꓪ ꓔꓶ ꓔ ꓟ ꓗꓪ ꓐꓰ ꓗꓳꓸ ꓙꓰ ꓠꓬ ꓠꓱꓸ ꓐꓯꓼ ꓟꓽ ꓙꓳ ꓠꓬꓲ꓾ ꓬꓲ ꓪ ꓐꓴ ꓔꓯ ꓲ’ ꓖꓶꓽ ꓜˍ ꓟ ꓗꓪ ꓟꓶꓽ ꓛꓲ ꓔꓶꓸ ꓥˍ ꓟꓲ ꓟꓽ ꓙꓳ ꓟꓽ ꓓ ꓟ ꓕꓲꓽ ꓫꓵꓽ ꓥꓳ= ꓣꓳ ꓜꓽ ꓔꓬ ꓟ ꓟꓶꓽ ꓛꓲ ꓔꓶꓸ ꓘꓴꓽ ꓗꓪ iron꓾ calcium꓾ selenium꓾ vitamin B ꓐꓰ vitamin C ꓢꓯꓼ ꓮ ꓟꓬꓹ ꓓꓹ ꓟ ꓥ ꓡꓳ=

ꓟꓶꓽ ꓛꓲ ꓔꓶꓸ ꓜꓲ ꓔꓯ ꓟꓬ-ꓟ ꓗꓴꓷꓼ ꓕꓲ ꓗꓴꓷꓼ ꓡꓱꓸꓼ ꓗꓪ ꓔꓶˍ ꓡꓳ= ꓪꓽ ꓓꓰꓺ ꓟꓵꓽ ꓗꓪ ꓐꓰ ꓪꓽ ꓙꓵꓽ ꓪꓽ ꓐꓽ ꓗꓪˍ ꓟꓲ ꓔꓶ ꓔꓬ ꓡꓳ= ꓖꓳ ꓟ ꓡꓰꓽ ꓟꓽ ꓞꓲ ꓟꓶꓽ ꓛꓲ ꓔꓶ ꓘꓴꓽ ꓗꓪ ꓬꓲꓸ ꓝꓳꓽ ꓮ ꓟꓬꓹ ꓙꓳˍ ꓡꓳ= ꓬꓲꓸ ꓛꓵꓺ ꓠꓬ ꓬꓲꓸ ꓒꓴ ꓒꓴ ꓝꓳꓽ꓾ ꓬꓲꓸ ꓫꓵꓽ ꓫꓵꓽ ꓝꓳꓽ ꓐꓰ ꓬꓲꓸ ꓧꓪꓼ ꓧꓪꓼ ꓝꓳꓽ ꓐꓯ ꓢꓲ ꓙꓳˍ ꓟ ꓥꓳ=

ꓟꓲꓺ ꓛꓬ ꓮ ꓘꓶꓸ ꓟꓽ ꓗꓳꓹ ꓟ ꓗꓪ ꓮ ꓘꓶꓸ ꓔꓶꓻ ꓪꓴꓽ ꓡ ꓢˍ ꓡꓳ= ꓘꓪꓺ ꓟꓽ ꓫꓸ ꓟ ꓗꓪ ꓮ ꓟꓬꓹ ꓔꓶ ꓒꓬꓱꓼ ꓡ ꓟ ꓬꓲꓸ ꓛꓵꓺ ꓕꓲ ꓝꓳꓽ ꓥꓳ= ꓟꓲꓺ ꓛꓬ ꓮ ꓘꓶꓸ ꓗꓳꓹ ꓟ꓾ ꓟꓽ ꓠꓴꓽ ꓟ ꓗꓪ ꓔꓶ ꓔ ꓠꓬ ꓬꓲ ꓛꓵꓺ ꓗꓳꓹ ꓢꓲ ꓟꓽ ꓪꓴꓽ ꓡ꓾ ꓬꓲ ꓛꓵꓺˍ ꓟꓲ ꓟꓽ ꓐꓲ= ꓟꓶꓽ ꓦ ꓮ ꓘꓶꓸ ꓟꓬꓽˍ ꓟ ꓗꓪˍ ꓟꓲ ꓔꓶ ꓒꓬꓱꓼ ꓡ ꓫꓸ ꓡꓳ=

ꓟꓶꓽ ꓛꓲ ꓔꓶꓸ ꓜꓲ ꓔꓶˍ ꓕꓯ ꓬꓲ ꓚꓺ ꓣꓴ ꓢꓲ ꓔꓶ ꓠꓯꓹ ꓥ= ꓬꓲꓸ ꓛꓵꓺ ꓮ ꓘꓶꓸ ꓓꓲˍ ꓟ ꓬꓲ ꓜꓲ ꓬꓲ ꓚꓺ ꓔꓯ ꓣꓴ ꓢꓲ ꓔꓶˍ ꓠꓬ ꓪ ꓙꓲꓻ ꓓꓲ ꓡˍ ꓥꓳ= ꓬꓲ ꓚꓺ ꓓꓶ ꓔ ꓟ ꓔꓶˍ ꓕꓯ ꓔꓱ ꓔꓱꓹꓼˍ ꓟꓲ ꓔꓶ ꓓ ꓢꓲ꓾ ꓐꓹ ꓗꓸ ꓗꓸ ꓫꓵˍ ꓟꓲ ꓔꓶ ꓓꓹ ꓡꓳ= ꓖꓳ ꓡꓱ ꓥ ꓟꓲ ꓬꓲ ꓚꓺ ꓔꓯ ꓔꓱ ꓔꓱꓹꓼ ꓗꓸ ꓔꓶˍ ꓠꓬ ꓬꓲ ꓛꓵꓺ ꓮ ꓟꓬꓹ ꓟꓽ ꓓꓲꓺ ꓡ꓾ ꓐꓹ ꓗꓸ ꓗꓸ ꓫꓵ ꓔꓶˍ ꓠꓬ ꓬꓲ ꓛꓵꓺ ꓮ ꓟꓬꓹ ꓓꓲꓺ ꓡˍ ꓥꓳ=  ꓔꓶ ꓓꓴ ꓐꓱ ꓶ ꓬꓲ ꓚꓺ ꓣꓴˍ ꓕꓯ ꓬꓲꓸ ꓝꓲꓸ (4) ꓝꓲꓸ ꓙꓳˍ ꓠ ꓓꓶ ꓢꓲ ꓔꓶ ꓠ ꓔ ꓡꓳ= ꓬꓲ ꓚꓺ ꓕꓲ ꓚꓺ ꓠꓬꓲꓽ ꓗꓴꓸ ꓚꓸꓼ ꓗꓪ 1’ ꓛꓲꓺ ꓗꓶꓹ ꓶꓽ ꓠ ꓔ ꓡꓳ= 1’ ꓕꓯꓽ ꓢꓲ ꓶꓽ ꓙꓰˍ ꓠꓬ ꓬꓲꓸ ꓛꓵꓺ ꓮ ꓟꓬꓹ ꓟꓽ ꓓꓲꓺ =

ꓟꓶꓽ ꓛꓲ ꓔꓶꓸ ꓔꓯ ꓥꓪꓽ ꓦ꓾ ꓛꓳꓼ ꓦ ꓕꓯ ꓔꓶ ꓪꓴꓸ ꓔꓴˍ ꓡꓳ= ꓠꓯꓼ ꓠꓯꓼ ꓔꓶ ꓔ ꓠꓬ ꓠꓯꓼ ꓠꓯꓼ ꓓꓲꓺ ꓡ ꓢꓲ꓾ ꓠꓱꓸ ꓐꓯꓼ ꓢꓴ ꓕꓯꓽ ꓢꓲ ꓠꓯꓼ ꓠꓯꓼ ꓟꓰꓹ ꓠꓬ ꓬꓲꓸ ꓒꓵꓽ ꓮ ꓟꓬꓹ ꓪˍ ꓥꓳ=

ꓬꓲ ꓜꓲ ꓔꓶ ꓓꓴ ꓬꓲ ꓟꓲ ꓔꓯ ꓮ ꓠꓯꓸ ꓠꓯꓸ ꓘꓪꓺ ꓢꓲ ꓔꓶ ꓠ ꓔ ꓥ= ꓟꓲ ꓛꓬ ꓠꓯꓸꓼ ꓗꓪ ꓬꓲꓸ ꓛꓵꓺ ꓓꓲˍ ꓟ ꓪꓴꓸ ꓠꓬꓲ ꓮ ꓠꓯꓸ ꓠꓯꓸ ꓟꓽ ꓘꓪꓺ ꓖꓶ ꓔ ꓠꓬ ꓬꓲ ꓛꓵꓺ ꓪꓴꓽ ꓡ ꓟꓽ ꓘꓴ= ꓪ ꓙꓵꓽ ꓟꓵꓽ ꓗꓪ ꓠꓬ ꓬꓲꓸ ꓟꓲꓺ ꓘꓪˍ ꓕꓯ ꓧꓶꓽ ꓫꓵꓽ ꓫꓵꓽ ꓟꓳꓼ ꓐꓴ ꓔꓯ ꓬꓲ ꓟꓲꓺ ꓗꓪ ꓘꓪꓺ ꓧꓳꓽ ꓗꓷˍ ꓡꓳ= ꓧꓶꓽ ꓫꓵꓽ ꓫꓵꓽ ꓟꓳꓼ ꓠꓬ ꓩꓲꓸ ꓛꓲ ꓐꓱ ꓶ ꓥꓳ= ꓝꓮꓲ ꓦ ꓐ ꓪꓰꓻ ꓗꓳꓸ ꓜꓲ ꓔꓯˍ ꓟꓲ ꓩꓲꓸ ꓛꓲ ꓐꓱ ꓶ ꓣꓱꓽˍ ꓡꓳ= ꓧꓶꓽ ꓫꓵꓽ ꓫꓵꓽ ꓟꓳꓼ ꓐꓰ ꓦ ꓐ ꓪꓰꓻ ꓗꓳꓸ ꓜꓲ ꓟꓽ ꓙꓳ ꓖꓴ ꓗꓪ ꓮꓸ ꓪꓯꓼ ꓛꓲꓽ꓾ ꓮꓸ ꓠꓬꓲꓽ ꓛꓲꓽ ꓧꓳꓽ ꓢꓲ ꓔꓶ ꓐ ꓡˍ ꓡꓳ=

ꓟꓶꓽ ꓦ ꓦ ꓝꓲ ꓕꓯ ꓔꓶ ꓔ ꓠꓬ ꓬꓲꓻ ꓙꓬ ꓧꓳꓽ ꓖꓶ ꓟꓽ ꓛꓵ꓾ ꓙꓬꓻ ꓝꓲ ꓐꓰ ꓛꓺ ꓝꓲ ꓕꓯ ꓔꓶ ꓔ ꓠꓽ (4) ꓠꓬꓲ ꓐꓰ (9) ꓠꓬꓲ ꓘꓴꓽ ꓗꓪ ꓬꓲꓻ ꓙꓬ ꓕꓲꓽ ꓧꓪꓹ ꓕꓲꓽ ꓧꓪꓹ ꓧꓳꓽ ꓖꓶ ꓠꓯꓹ ꓟ ꓥꓳ= ꓝꓮꓲ ꓠꓬ ꓟꓵꓽ ꓘꓳꓼ ꓔꓯ ꓡꓳꓸ ꓢꓲ (10) ꓠꓬꓲ ꓗꓪ ꓕꓲ ꓧꓪꓹ ꓬꓲꓻ ꓙꓬ ꓧꓳꓽ ꓖꓶ ꓠ ꓔ ꓡꓳ=

ꓬꓲ ꓛꓵꓺ ꓫˍ ꓕꓯ ꓬꓲꓸ ꓛꓵꓺ ꓮ ꓘꓶꓸ ꓪꓴꓽ ꓓꓰ ꓡˍ ꓕꓯ ꓫ ꓠꓯꓹ ꓥ= (5) ꓦ (6) ꓦ ꓕꓯ ꓔꓶ ꓔ ꓟ ꓬꓲ ꓜꓲ ꓔꓯ (10) ꓦ ꓕꓯ ꓬꓲꓸ ꓛꓵꓺ ꓟꓰꓹ ꓫ ꓓ ꓡꓺꓳ= ꓪꓴꓽˍ ꓟ ꓬꓲꓸ ꓛꓵꓺ ꓐꓴ ꓔꓯ ꓟꓰꓹ ꓣꓴ ꓗꓷ ꓢꓲ ꓬꓲꓸ ꓛꓵꓺ ꓤꓽ ꓤꓽ ꓔꓯ ꓗꓸ ꓔꓶ ꓗꓷ ꓠꓬ (3) ꓦ ꓛꓲꓺ ꓕꓯ ꓝꓮꓲ ꓕꓲ ꓧꓪꓹ ꓟꓶꓽ ꓛꓲ ꓔꓶꓸ ꓛꓵꓺ ꓟꓰꓹ ꓫ ꓐ ꓡˍ ꓡꓳ=

ꓕꓱ ꓟ ꓠꓬ ꓟꓴ-ꓖꓴ ꓡꓳ ꓒꓱ ꓗꓪ ꓚꓳꓸ ꓟꓶꓽ ꓛꓲ ꓔꓶꓸ ꓟꓲꓺ ꓬꓰ ꓜꓽ ꓢꓴ ꓕꓲ ꓣꓳ ꓡꓰꓽ ꓐꓯ ꓟꓸ ꓖꓶ ꓔ ꓟ ꓟꓶꓽ ꓛꓲ ꓔꓶꓸ ꓔꓶꓻ ꓚꓱꓹ ꓥ ꓡꓳ=