ꓔꓲꓺ ꓒ ꓔꓲ ꓡꓰ ꓗꓴꓷꓼ ꓫꓵꓽ ꓪꓴ ꓑꓶ ꓓꓴ ꓫꓸ ꓓꓴ ꓔꓳꓹ ꓜꓳ ꓔꓬ ꓢꓴ꓾ ꓟꓯꓼ ꓘꓰꓹ ꓑꓬ ꓢꓴ ꓐꓴ ꓐꓱ ꓶ ꓪꓽ ꓘꓴ ꓙ ꓠꓹ ꓟ ꓐꓯ_ ꓟ꓾

ꓔꓲꓺ ꓒ ꓔꓲ ꓡꓰ ꓗꓴꓷꓼ ꓫꓵꓽ ꓪꓴ ꓑꓶ ꓓꓴ ꓫꓸ ꓓꓴ ꓔꓳꓹ ꓜꓳ ꓔꓬ ꓢꓴ꓾ ꓟꓯꓼ ꓘꓰꓹ ꓑꓬ ꓢꓴ ꓐꓴ ꓐꓱ ꓶ ꓪꓽ ꓘꓴ ꓙ ꓠꓹ ꓟ ꓐꓯ_ ꓟ꓾

4 ꓦ 5 ꓠꓬꓲ ꓠꓽ ꓢ ꓠꓬꓲ ꓕꓯ ꓢꓲ ꓫꓬ ꓢꓴ ꓒꓲ-ꓕꓱ ꓪꓽ ꓘꓴ ꓦꓲꓻ ꓓꓽ ꓗꓪ ꓜꓲꓼ ꓡ ꓢꓴ ꓐꓴ ꓔꓯ ꓗꓴꓷꓼ ꓫꓵꓽ ꓪꓴ ꓑꓶ ꓓꓴ ꓫꓸ ꓓꓴ ꓔꓳꓹ ꓜꓳ ꓔꓬ ꓟ꓾ ꓟꓯꓼ ꓘꓰꓹ ꓑꓬ ꓢꓴ ꓐꓴ ꓐꓱ ꓶ ꓪꓽ ꓘꓴ ꓙ ꓠꓹ ꓟ ꓐꓯ ꓗꓷꓳ=

ꓢꓲ ꓫꓬꓹ ꓟ ꓕꓲꓽ ꓠꓽ ꓗꓪ ꓢꓲ ꓒ ꓬꓰ-ꓢꓴ ꓬꓲꓸ ꓠꓵ ꓠꓲꓹ ꓔꓯ ꓓꓵꓽ ꓙ ꓢꓲ꓾ ꓗꓴꓷꓼ ꓢꓰꓼ ꓡꓯ ꓘꓳ ꓢꓲ ꓠꓲꓹ ꓫ ꓟꓬ ꓫ ꓔꓳꓹ ꓜꓳ ꓔꓬ ꓢꓴ ꓐꓰ ꓕꓱ ꓡꓱ ꓒꓬꓱꓼ ꓡꓰ ꓝꓲ ꓢꓴ ꓠꓲꓹ ꓟ ꓔꓯ ꓒꓳꓹ ꓡꓶꓸ ꓠꓹ ꓟ ꓐꓱ ꓶ ꓪꓽ ꓘꓴ ꓙ ꓠꓹ ꓟ ꓐꓯ_ ꓡꓳ=

ꓡꓯ ꓐꓳ ꓔꓶꓸ ꓓꓴ ꓔꓯ ꓠꓬꓲꓸ ꓠꓸ ꓠꓬ ꓟꓹ ꓟ ꓐꓴ ꓔꓯ ꓓꓵꓽ ꓙ_ ꓡꓳ= ꓢꓰꓼ ꓡꓯ ꓘꓳ ꓟ ꓗꓪ ꓫꓵꓻ ꓡꓰ ꓢꓴ ꓐꓴ ꓬꓲꓸ ꓪ ꓟꓹ ꓟ ꓐꓴ ꓠꓯꓼ ꓗꓪ ꓥ ꓡꓳ= ꓬꓲ ꓪ ꓠꓬ ꓫꓵꓻ ꓡꓰ ꓢꓴ ꓐꓴ ꓟꓹ ꓟ ꓥ ꓡꓳ= ꓟꓹ ꓟ ꓐꓴ ꓐꓱ ꓶ ꓪꓽ ꓘꓴ ꓙ ꓡꓯ=

ꓬꓰ-ꓢꓴ ꓢꓯꓸ ꓬꓲꓼ ꓡ ꓑꓮꓲ ꓠꓶꓽ ꓞ ꓡ ꓟ ꓡꓰ ꓐꓰ ꓠꓻ ꓔꓬ ꓢꓴ꓾ ꓫꓸ ꓔꓬ ꓢꓴ꓾ ꓟꓯꓼ ꓘꓰꓹ ꓑꓬ ꓐꓴ ꓔꓯ ꓓꓵꓽ ꓙ ꓢꓲ꓾ ꓬꓰ-ꓢꓴ ꓢꓯꓸ ꓬꓲꓼ ꓡ ꓟ ꓐꓰ ꓕꓲ ꓪꓼ ꓮ ꓙꓵ ꓔꓯ ꓢꓲ ꓡꓲꓹ ꓗꓹ ꓛꓲ_ ꓟ꓾ ꓠꓲꓹ ꓗꓳꓸ ꓟꓬ ꓗꓳꓸ ꓖꓶ ꓠꓹ ꓟ꓾ ꓣꓱꓽ ꓛꓰ ꓡꓯꓼ ꓫꓴꓻ ꓟꓶ ꓠꓹ ꓟ ꓐꓱ ꓶ ꓣꓳ ꓠꓲꓹ ꓟ ꓘꓴꓽ ꓗꓪ ꓐꓰ ꓓꓵꓽ ꓙ ꓔ ꓓꓴ ꓬꓰ ꓡꓯ= ꓪꓴ-ꓢ ꓶꓼ ꓤ ꓫꓱꓸ ꓤ ꓡꓴ ꓖꓶ ꓝꓲ꓾ ꓮ ꓫꓵ ꓘꓷ ꓡꓶꓽ ꓗ ꓕꓸ ꓓꓴ ꓟꓽ ꓙꓳ ꓠꓹ ꓟ ꓡꓳꓸ ꓙ ꓐꓳ ꓙ ꓖꓶ ꓝꓲ ꓐꓰ ꓐꓯ ꓔ ꓡꓳ=

ꓪꓴꓽ ꓟꓴ ꓡ ꓚꓱꓹ ꓐꓰ ꓢꓲ ꓡꓲꓹ ꓗꓹ ꓛꓲ ꓚꓱꓹ ꓐꓱ ꓶ ꓟꓵꓽ ꓗꓳꓸ ꓓꓵ ꓓꓵ ꓡꓳ ꓖꓪ ꓟ ꓦꓬꓼ ꓠꓬꓲ International Day of Sport for Development and Peace (IDSDP) ꓔꓯ ꓕꓲ ꓘꓳꓼ ꓡꓲ ꓕꓲ ꓘꓳꓼ 4 ꓦ 6 ꓠꓬꓲ ꓕꓯ ꓬꓰ_ ꓟ ꓥꓳ= ꓕꓱ ꓟ ꓔꓯ ꓠꓬ ꓢꓷꓸ ꓠꓲꓹ ꓚꓱꓹ꓾ ꓟꓲ ꓠꓯ ꓡ ꓞꓳ ꓞꓳ ꓙꓳ ꓚꓱꓹ ꓪꓴꓽ ꓟꓴ ꓡ ꓚꓱꓹ꓾ ꓧꓪꓽ ꓖꓳ ꓓꓱ ꓔꓬ ꓢ ꓠꓹ ꓟ ꓢꓷꓸ ꓠꓲꓹ ꓚꓱꓹ꓾ ꓟꓲ ꓠꓯ ꓢꓲ ꓡꓲꓹ ꓠꓹ ꓟ ꓚꓱꓹ ꓕꓱ ꓟ ꓔꓯ ꓟꓳꓸ ꓖꓳ ꓓꓱꓽ ꓡꓳ ꓖꓪ ꓟ ꓗꓪ ꓐꓰ ꓬꓰ ꓙ ꓠꓹ ꓟ 2013 ꓘꓳꓼ ꓕꓯ UN General Assembly ꓗꓪ ꓐꓰ ꓬꓲꓸ ꓠꓬꓲ ꓔꓶꓻ ꓔ ꓟ ꓥꓳ=

ꓕꓱ ꓕꓲ ꓘꓳꓼ ꓐꓱ ꓶ ꓬꓲꓸ ꓕꓲ ꓟꓴ ꓠꓬ “Scoring for People and Planet” ꓐꓰ ꓥ ꓢꓲ꓾ ꓪꓴꓽ ꓟꓴ ꓡ ꓚꓱꓹ ꓐꓰ ꓢꓲ ꓡꓲꓹ ꓗꓹ ꓛꓲ ꓟ ꓔꓯ ꓟꓳꓸ ꓙꓲ_ ꓟ ꓕꓲ ꓒꓳꓹ ꓗꓪ ꓐꓰ ꓢꓯꓼ ꓖꓶ_ ꓟ ꓔꓯ ꓟꓸ ꓖꓶ_ ꓡꓳ= ꓕꓱ ꓟ ꓠꓬ ꓟꓲ ꓠꓯ ꓞꓳ ꓤ ꓐꓴ ꓠꓬꓲ ꓤ ꓠꓬꓲ ꓟ ꓠꓵ ꓠꓲꓹ ꓐꓰ ꓕꓲ ꓠꓲꓹ ꓕꓲ ꓪꓼ ꓬꓰ ꓙ ꓔꓳꓹ ꓙ ꓠꓹ ꓟ ꓫꓱꓸ ꓤ ꓟ ꓠꓲꓹ ꓟ ꓙꓳ ꓠꓹ ꓟ ꓐꓱ ꓶ ꓬꓰ ꓙ ꓡ ꓥꓳ ꓐꓰ ꓓꓵꓽ ꓙ ꓟ ꓔꓯ ꓔꓲꓺ ꓒ ꓪ ꓔꓲ ꓡꓰ ꓐꓯ_ ꓡꓳ=