ꓡꓳꓹ ꓬꓰ ꓟ ꓙꓵꓹ ꓓꓲ ꓢ ꓢꓯꓼ ꓕꓵꓼ ꓓꓴ ꓬꓰ ꓡꓯ꓾

Thursday, March 02, 2023

2 ꓦ 19 ꓠꓬꓲ ꓠ ꓦꓬꓼ ꓠꓬꓲ ꓕꓯ ꓔꓲꓺ ꓒ ꓪ ꓔꓲ ꓡꓰ ꓡꓳꓹ ꓬꓰ ꓟ ꓙꓵꓹ ꓓꓲ ꓢ ꓢꓯꓼ ꓕꓵꓼ ꓓꓴ ꓬꓰ ꓡꓯ꓾ ꓐꓰ ꓙꓲ-ꓢꓴ ꓢꓲ ꓤ ꓐꓴ ꓔꓯ ꓢꓯꓽ ꓖꓶ_ ꓡꓳ= ꓝꓴꓲ ꓙꓳ ꓢꓴ ꓣꓳ ꓐꓱ ꓶ ꓬꓰ-ꓢꓴ ꓡꓰ ꓫꓵꓻ ꓙ ꓗꓷ ꓟ ꓔꓯ ꓘꓳꓹ ꓣꓴ ꓢꓲ꓾ ꓬꓰ-ꓢꓴ ꓠꓲꓹ ꓠꓵ ꓟ ꓡꓰ ꓐꓰ ꓣꓳ ꓠꓲꓹ ꓠꓵ ꓟꓽ ꓐ ꓡ_ ꓟ ꓖꓶ ꓟꓽ ꓐ ꓡ ꓠꓹ ꓟ ꓚꓱꓹ ꓔꓯ ꓐꓯ ꓔ ꓡꓳ= ꓢꓲ ꓫꓬ ꓕꓳ ꓶ ꓔꓯ ꓠꓬ ꓖꓳ ꓕꓲ ꓠꓬꓲ ꓶ ꓓꓳꓽ ꓫꓱꓸ ꓓꓳꓽ ꓟ-ꓕꓲ ꓕꓳ ꓶ ꓗꓪ ꓐꓰ ꓔꓱꓹ ꓕ ꓖꓶ_ ꓡꓳ= ꓠꓶꓽ ꓞꓹ ꓢꓴ ꓔꓯ ꓠꓲꓹ ꓠꓵ ꓠꓹ ꓟ ꓐꓰ ꓛꓴꓽ ꓙꓳ ꓢꓴ ꓔꓯ ꓠꓲꓹ ꓠꓵ ꓠꓹ ꓟ ꓚꓱꓹ ꓥ ꓡꓳ=

ꓣꓳ ꓔꓯ ꓠꓲꓹ ꓠꓵ ꓔꓬ ꓢꓴ ꓔꓯ ꓝꓮꓲ ꓟꓽ ꓠꓲꓹ ꓠꓵ_ ꓟ ꓠꓬ ꓮ ꓡꓲ ꓕꓲ ꓣꓳ ꓥ ꓟꓲ ꓡꓳꓹ ꓬꓰ ꓟ ꓙꓵꓹ ꓗꓪ ꓬꓰ ꓔꓬ ꓢꓴ ꓡꓰ ꓔꓳꓹ ꓜꓳ ꓢꓴ ꓡꓰ ꓥꓳ= ꓡꓳꓹ ꓬꓰ ꓟ ꓙꓵꓹ ꓗꓪ ꓐꓰ ꓟꓬ ꓠꓬꓲ ꓙꓲ_ ꓟ ꓔꓯ ꓢꓯꓼ ꓕꓵꓼ ꓠ ꓔ ꓡꓳ= ꓡꓳꓹ ꓬꓰ ꓟ ꓙꓵꓹ ꓗꓪ ꓮ ꓫꓵꓽ ꓬꓰ ꓡꓳꓹ ꓬꓰ_ ꓡ? ꓠꓬꓲꓸ ꓠꓬꓲ ꓣꓳ ꓚꓵ ꓚꓵ ꓓꓵꓽ ꓙ ꓠꓬꓲ ꓓꓴ ꓬꓰ ꓡꓯ꓾ ꓡꓳꓹ ꓬꓰ ꓟ ꓙꓵꓹ ꓓꓲ ꓢ ꓟꓬ ꓠꓬꓲ ꓙꓲ_ ꓟ ꓔꓯ ꓬꓰ ꓠꓹ ꓟ ꓚꓱꓹ ꓥ ꓡꓳ=

ꓪꓴ-ꓢ ꓠꓬ ꓮ ꓕꓯ ꓥ ꓟꓲ ꓮ ꓡꓰ ꓕꓲ ꓣꓳ ꓔꓯ ꓥ ꓟꓲ ꓕꓲ ꓪ ꓠꓲꓹ ꓠꓵ_ ꓟ ꓥꓳ= ꓬꓲ ꓠꓵ ꓠꓲꓹ ꓔꓯ ꓘꓳꓹ ꓣꓴ ꓢꓲ꓾ ꓣꓳ ꓥ ꓟꓲ ꓕꓲ ꓣꓳ ꓛꓳ ꓕꓲ ꓣꓳ ꓠꓵ ꓠꓲꓹ ꓐꓰ ꓠꓲꓹ ꓠꓵ ꓡꓯꓼ ꓘꓳ ꓠꓹ ꓟ ꓥꓳ= ꓟꓬ ꓠꓬꓲ ꓛꓴꓽ ꓙꓳ ꓢꓴ ꓔꓯ ꓥ ꓟꓲ ꓠꓲꓹ ꓠꓵ ꓐ ꓡ ꓠꓹ ꓟ ꓢꓯꓼ ꓕꓵꓼ ꓢꓲ꓾ ꓪꓴ-ꓢ ꓠꓵ ꓠꓲꓹ ꓐꓰ ꓙꓻ ꓫꓱꓽ ꓠꓹ ꓟ ꓥꓳ= ꓪꓴ-ꓢ ꓠꓬ ꓣꓳ ꓔꓯ ꓬꓲ ꓟꓶꓽ ꓡꓳꓹ ꓬꓰ ꓗꓪ ꓛꓲ ꓕꓲ ꓞꓲ ꓕꓲ ꓑ ꓠꓲꓹ ꓠꓵ_ ꓟ ꓥꓳ= ꓣꓳ ꓠꓬ ꓬꓲ ꓠꓲꓹ ꓠꓵ_ ꓟ ꓡꓰ ꓐꓰ ꓠꓲꓹ ꓠꓵ ꓟꓽ ꓐ ꓡ꓾ ꓣꓳ ꓙꓻ ꓫꓱꓽ ꓥꓳꓽ ꓡꓰ ꓥ ꓟꓲ ꓝꓴꓲ ꓬꓰ ꓚꓬ ꓡꓰ ꓥ ꓟꓲ ꓪꓴ-ꓢ ꓠꓬ ꓣꓳ ꓔꓯ ꓔꓱ ꓔꓱ_ ꓐꓰ ꓠꓲꓹ ꓠꓵ ꓔꓬ ꓟ ꓥꓳ=

ꓣꓳ ꓔꓯ ꓠꓲꓹ ꓠꓵ_ ꓟ ꓬꓰ-ꓢꓴ ꓠꓬ ꓣꓳ ꓝꓴꓲ ꓐꓱ ꓶ ꓡꓯꓼ ꓐꓳ ꓔꓶꓸ ꓓꓴ ꓟꓯ ꓢꓲ꓾ ꓫꓸ ꓙꓵꓻ ꓟꓷꓼ ꓙꓵꓻ ꓢꓲ꓾ ꓫꓵꓻ ꓙ ꓗꓷ ꓟ ꓥꓳ= ꓣꓳ ꓬꓲ ꓔꓯ ꓝꓮꓲ ꓟꓽ ꓠꓲꓹ ꓠꓵ꓾ ꓝꓴꓲ ꓒꓳꓹ ꓡꓶꓸ ꓓꓴ ꓟꓽ ꓙꓳ ꓠꓬ ꓬꓰ-ꓢꓴ ꓠꓲꓹ ꓠꓵ_ ꓟ ꓔꓯ ꓣꓳ ꓚꓲ ꓛꓬ ꓖꓳ ꓓꓱ ꓗꓪ ꓐꓰ ꓟꓽ ꓘꓳꓹ ꓣꓴ ꓟ ꓑꓲꓸ ꓔ ꓟ ꓥ ꓡꓳ= ꓪꓴ-ꓢ ꓣꓳ ꓔꓯ ꓠꓲꓹ ꓠꓵ_ ꓟ ꓠꓬ ꓵ ꓖꓴ ꓟꓽ ꓓ ꓕꓲ ꓞꓲꓼ ꓕꓲ ꓑ ꓟ ꓶꓽ ꓤ ꓫꓱꓸ ꓤ ꓥ ꓡꓳ= ꓣꓳ ꓥ ꓟꓲ ꓬꓲ ꓡꓰ ꓐꓰ ꓠꓶꓽ ꓛꓳ ꓕꓲ ꓛꓳ ꓔꓯ ꓥ ꓟꓲ꓾ ꓣꓳꓺ ꓢꓴ ꓔꓯ ꓥ ꓟꓲ ꓛꓴꓽ ꓙꓳ ꓢꓴ ꓔꓯ ꓥ ꓟꓲ ꓠꓲꓹ ꓠꓵ ꓓꓴ ꓬꓰ ꓡꓯ=

ꓟꓹ ꓟ ꓟ-ꓡꓲ ꓠꓬ ꓪꓴ-ꓢ ꓡꓰ ꓬꓲ ꓔꓯ ꓖꓶ ꓡ_ ꓟ ꓙꓵꓽ ꓪ ꓟꓬꓱꓽ ꓮ ꓙꓵ ꓔꓯ ꓘꓳꓹ ꓣꓴ_ ꓟ ꓥꓳ= ꓬꓲ ꓔꓯ ꓔꓯ ꓢꓳ ꓢꓲ ꓪꓴ-ꓢ ꓡꓰ ꓖꓶ ꓡ_ ꓟ ꓚꓱꓹ ꓮ ꓙꓵ ꓔꓯ ꓘꓳꓹ ꓣꓴ ꓢꓲ ꓟꓹ ꓟ ꓟ-ꓡꓲ ꓡꓰ ꓐꓰ ꓢꓯꓸ ꓔꓬ ꓓꓴ ꓬꓰ ꓡꓯ= ꓕꓱ ꓡꓱ ꓢꓯꓸ ꓔꓬ ꓪ ꓠꓹ ꓟ ꓐꓱ ꓶ ꓟꓹ ꓟ ꓟ-ꓡꓲ ꓗꓪ ꓐꓰ ꓶꓽ ꓤ ꓫꓱꓸ ꓤ ꓶ ꓓꓰꓽ ꓓꓴ ꓬꓰ ꓡꓯ꓾ ꓐꓰ ꓔꓲꓺ ꓒ ꓪ ꓔꓲ ꓡꓰ ꓜꓲꓼ ꓡ ꓢꓴ ꓘꓴ ꓜꓲꓼ ꓞꓳ ꓮꓸ ꓣꓳ ꓤ ꓐꓴ ꓔꓯ ꓢꓯꓼ ꓖꓶ ꓔ ꓟ ꓥꓳ=