ꓠꓬꓲ ꓤ ꓠꓬꓲ ꓟ ꓠꓵ ꓠꓲꓹ ꓐꓰ ꓮ ꓕꓯ ꓥ ꓟꓲ ꓙꓻ ꓫꓱꓽ ꓠꓹ ꓟ꓾

ꓠꓬꓲ ꓤ ꓠꓬꓲ ꓟ ꓠꓵ ꓠꓲꓹ ꓐꓰ ꓮ ꓕꓯ ꓥ ꓟꓲ ꓙꓻ ꓫꓱꓽ

ꓟꓲ ꓠꓯ ꓠꓬ ꓬꓲ ꓚꓲ ꓛꓬ ꓦꓬꓼ ꓠꓬꓲ ꓖꓴ ꓡꓰ ꓟ ꓟꓽ ꓥ꓾ ꓣꓳ ꓕꓲ ꓠꓬꓲ ꓡꓲ ꓕꓲ ꓠꓬꓲ ꓢꓯꓸ ꓔꓬ ꓟ ꓙꓵꓹ ꓗꓪ ꓕꓲ ꓪ ꓙꓻ ꓫꓱꓽ ꓢꓲ꓾ ꓙ ꓜꓲꓼ ꓠꓹ ꓟ ꓡꓰ ꓥꓳ ꓐꓰ ꓔꓲꓺ ꓒ ꓪ ꓔꓲ ꓡꓰ 3 ꓦ 25 ꓠꓬꓲ ꓠꓽ ꓛꓳꓼ ꓠꓬꓲ ꓕꓯ ꓲ-ꓔ-ꓡꓲ ꓗꓴꓷꓼ Milan Archdiocese, Rho ꓡꓳ ꓒꓱ Pope Paul VI Hall ꓗꓪ ꓐꓰ ꓪꓽ ꓘꓴ ꓜꓲꓼ ꓡ ꓢꓴ 2000 ꓣꓳ ꓛꓲ ꓐꓴ ꓔꓯ ꓐꓯ ꓖꓶ ꓔ ꓟ ꓥꓳ=

ꓠꓬꓲ ꓤ ꓠꓬꓲ ꓟ ꓠꓵ ꓠꓲꓹ ꓐꓰ ꓙꓻ ꓫꓱꓽ ꓠꓹ ꓟ ꓮ ꓘꓶꓸ ꓣꓱꓽ ꓬꓯꓼ_ ꓡꓳ꓾ ꓕꓱ ꓡꓱ ꓠꓬꓲ ꓤ ꓠꓬꓲ ꓟ ꓐꓰ ꓙꓻ ꓫꓱꓽ ꓠꓬ ꓟꓬ ꓠꓬꓲ ꓞꓳ ꓤ ꓐꓴ ꓔꓯ ꓗꓹ ꓛꓲ ꓡꓰ ꓝꓲ_ ꓟ ꓑꓶ ꓓꓴ ꓥ ꓡꓳ=

ꓔꓲꓺ ꓒ ꓪ ꓔꓲ ꓡꓰ ꓲ-ꓔ-ꓡꓲ ꓘꓴ ꓜꓲꓼ ꓞꓳ ꓟꓬꓱꓽ ꓟꓯ ꓢꓴ ꓐꓴ ꓔꓯ ꓟꓽ ꓪ ꓟ ꓬꓲ ꓫꓵ ꓬꓲ ꓙꓰ ꓗꓸ ꓠꓯꓸ ꓢꓲ ꓗꓪ ꓐꓰ ꓡꓯꓼ ꓫꓴꓸꓸ ꓐꓴ ꓕꓱ ꓡꓱ ꓫꓵ ꓔꓯ ꓕꓲ ꓠꓲꓹ ꓕꓲ ꓪ ꓫꓬꓹ ꓑꓱꓺ ꓖꓶ ꓠꓹ ꓟ ꓐꓰ ꓘꓴ ꓜꓲꓼ ꓞꓳ ꓗꓪ ꓟ ꓪ ꓠꓬꓲ ꓡꓳꓹ ꓬꓰ ꓟ ꓬꓲ ꓚꓱꓹ ꓥ ꓡꓳ ꓐꓰ ꓟꓸ ꓟꓲꓽ ꓚꓺ ꓟꓸ ꓖꓶ ꓡꓳ=

ꓘꓴ ꓜꓲꓼ ꓞꓳ ꓠꓬ ꓙꓲ ꓢꓴ ꓢꓲ ꓤ ꓮ ꓟꓬꓹ ꓐꓰ ꓫꓬꓹ ꓔꓶꓻ ꓔ ꓟ ꓖꓳ ꓓꓱ ꓕꓲ ꓟ ꓥ ꓟ ꓡꓰ ꓐꓰ ꓬꓰ-ꓢꓴ ꓙꓲ ꓢꓴ ꓫꓱꓸ ꓤ ꓟ ꓠꓲꓹ ꓟ ꓐꓰ ꓣꓳ ꓕꓲ ꓣꓳ ꓡꓲ ꓕꓲ ꓣꓳ ꓠꓬ ꓙꓻ ꓡꓯ ꓘꓳ꓾ ꓬꓰ ꓙ ꓡꓯ ꓘꓳ ꓠꓹ ꓟ ꓥꓳ= ꓕꓱ ꓡꓱ ꓟꓽ ꓥ ꓠꓬ ꓘꓴ ꓜꓲꓼ ꓞꓳ ꓠꓬ ꓮ ꓘꓶꓸ ꓛꓲ ꓡꓳꓸ ꓟꓽ ꓐꓲ ꓟ ꓥ ꓡꓳ=

ꓘꓴ ꓜꓲꓼ ꓞꓳ ꓠꓬ ꓣꓱꓽ ꓛꓰ ꓐꓲ ꓞꓹ ꓟ ꓬꓲꓸ ꓔꓶꓸ꓾ ꓠꓵ ꓠꓲꓹ ꓐꓲ ꓞꓹ ꓟ ꓬꓲꓸ ꓔꓶꓸ ꓥ ꓡꓳ= ꓝꓮꓲ ꓟꓽ ꓞꓲ ꓙꓲ_ ꓟ ꓕꓲꓽ ꓒꓳꓹ ꓗꓪ ꓐꓰ ꓙꓻ ꓡꓯ ꓘꓳ ꓟ ꓬꓲꓸ ꓔꓶꓸ ꓥ ꓡꓳ ꓐꓰ ꓐꓯ ꓔ ꓡꓳ=

ꓔꓲꓺ ꓒ ꓪ ꓔꓲ ꓡꓰ ꓠꓵ ꓠꓲꓹ ꓐꓯ ꓟ ꓠꓬ꓾ ꓚꓳ ꓡꓳ ꓡꓳ ꓟꓬ ꓠꓬꓲ ꓪꓴꓽ ꓓꓲ ꓡꓰ ꓠꓹ ꓟ ꓥ ꓡꓳ꓾ ꓙꓵꓻ ꓠꓲꓹ ꓐꓰ ꓘꓳꓹ ꓣꓴ ꓠꓹ ꓟ ꓔꓯ ꓕꓲ ꓠꓲꓹ ꓕꓲ ꓪꓼ ꓫꓬꓹ ꓔꓶꓻ ꓠꓹ ꓟ꓾ ꓕꓲ ꓪ ꓙꓻ ꓫꓱꓽ ꓠꓹ ꓟ ꓐꓰ ꓟꓽ ꓫꓱꓹ ꓡꓯ ꓘꓳ ꓟ ꓚꓱꓹ ꓓꓲ ꓢ꓾ ꓪ_ ꓟ ꓚꓱꓹ ꓔꓯ ꓟꓬ ꓠꓬꓲ ꓙ ꓜꓲꓼ ꓢꓲ ꓧꓪ ꓢꓲ ꓙꓻ ꓫꓱꓽ ꓠꓹ ꓟ ꓥꓳ=

ꓔꓲꓺ ꓒ ꓐꓴ ꓔꓯ ꓢꓯꓼ ꓖꓶ ꓟ꓾ ꓡ ꓞꓳ ꓐꓴ ꓫꓸ ꓕꓱ ꓠꓹ ꓟ꓾ ꓘꓴ ꓠꓹ ꓟ ꓮ ꓕꓯ ꓥ ꓟꓲ ꓟꓽ ꓪꓴꓽ ꓧꓶꓻ꓾ ꓖꓳ ꓟ ꓑꓶ ꓓꓴ ꓗꓸ ꓘꓶꓽ ꓔꓯ ꓮ ꓕꓯ ꓥ ꓟꓲ ꓒꓴ ꓖꓶ ꓠꓹ ꓟ ꓥꓳ꓾ ꓕꓱ ꓡꓱ ꓗꓸ ꓘꓶꓽ ꓒꓲꓼ꓾ ꓗꓸ ꓘꓶꓽ ꓒꓴ ꓢꓲ꓾ ꓗꓹ ꓗꓹ ꓛꓲ ꓛꓲ ꓐꓰ ꓘꓳꓹ ꓣꓴ ꓠꓹ ꓟ꓾ ꓕꓱ ꓬꓲ ꓚꓱꓹ ꓐꓰ ꓔꓲꓺ ꓒ ꓐꓴ ꓘꓴ ꓜꓲꓼ ꓞꓳ ꓐꓴ ꓔꓯ ꓠꓬꓲꓸ ꓠꓸ ꓟ ꓚꓱꓹ ꓥ ꓡꓳ꓾ ꓐꓰ ꓢꓯꓼ ꓖꓶ_ ꓡꓳ=

ꓘꓴ ꓜꓲꓼ ꓞꓳ ꓗꓳꓸ ꓡꓳ ꓗꓪ “ꓛꓴꓽ ꓙꓳ ꓢꓴ” ꓡꓰ ꓐꓰ ꓟꓽ ꓙꓲ ꓟꓽ ꓜꓳ ꓟ ꓫꓸ ꓕꓱ ꓘꓶꓽ ꓔꓯ ꓤ ꓟꓳ ꓠꓹ ꓟ꓾ ꓕꓱ ꓟ ꓠꓬ ꓘꓴ ꓜꓲꓼ ꓞꓳ ꓘꓴꓽ꓾ ꓕꓲ ꓦꓲꓻ ꓡ ꓞꓳ ꓐꓰ  ꓮ ꓟꓬꓹ ꓫꓵ ꓔꓯ ꓐꓬ ꓡꓰ ꓝꓲ_ ꓟ ꓠꓻ ꓫꓵ ꓡꓰ ꓐꓰ ꓥꓳ=

ꓞꓳ ꓡꓱ ꓤ ꓐꓴ ꓗꓪ ꓐꓰ ꓞꓲꓼ ꓪꓴꓽ ꓢꓴ ꓐꓴ ꓐꓰ ꓫꓸ ꓕꓱ ꓠꓹ ꓟ꓾ ꓡꓲꓽ ꓒꓰꓼ ꓔꓯ ꓟꓽ ꓟꓶ ꓡꓰ ꓠꓹ ꓟ꓾ ꓖꓳ ꓕꓯ ꓢꓲ ꓬꓲ ꓪ ꓢꓯꓼ ꓪ ꓪ ꓡ ꓥꓳ꓾ ꓐꓰ ꓢꓯꓼ ꓖꓶ ꓪ ꓖꓶ ꓡꓳ=