ꓗꓴꓷꓼ ꓫꓵꓽ ꓪꓴ ꓟꓽ ꓙꓲ_ ꓟ ꓙꓵꓹ ꓗꓪ Kazakhstan ꓗꓪ ꓶꓼ ꓓꓳ ꓫꓱꓸ ꓓꓳ ꓙꓰ ꓚꓳ ꓬꓰ ꓟ ꓠꓬ ꓢꓲ ꓡꓲꓹ ꓗꓹ ꓛꓲ ꓓꓴ ꓪ ꓟꓶ ꓠꓹ ꓟ ꓐꓱ ꓶ ꓥ ꓡꓳ=

• ꓗꓴꓷꓼ ꓫꓵꓽ ꓪꓴ ꓟꓽ ꓙꓲ_ ꓟ ꓙꓵꓹ ꓗꓪ Kazakhstan ꓗꓪ ꓶꓼ ꓓꓳ ꓫꓱꓸ ꓓꓳ ꓙꓰ ꓚꓳ ꓬꓰ ꓟ ꓠꓬ ꓢꓲ ꓡꓲꓹ ꓗꓹ ꓛꓲ ꓓꓴ ꓪ ꓟꓶ ꓠꓹ ꓟ ꓐꓱ ꓶ ꓥ ꓡꓳ=

9 ꓦ 21 ꓠꓬꓲ ꓠꓽ ꓢ ꓠꓬꓲ ꓕꓯ ꓔꓲꓺ ꓒ ꓪ ꓔꓲ ꓘꓴ ꓜꓲꓼ ꓞꓳ ꓡ ꓞꓳ ꓐꓴ ꓐꓰ ꓜꓲ ꓡꓯꓼ ꓘꓳ_ ꓟ ꓙꓵꓹ 38 ꓧꓪꓹ ꓟ Apostolic Journey ꓠꓬ ꓢꓲ ꓡꓲꓹ ꓗꓹ ꓛꓲ ꓠꓹ ꓟ꓾ ꓑꓳꓺ ꓡ ꓛꓴꓸ ꓔꓯ ꓡꓳ ꓩꓴ ꓗꓷ ꓠꓹ ꓟ ꓚꓱꓹ ꓐꓯ ꓟꓸ ꓔ ꓡꓳ=

ꓪꓴꓽ_ ꓟ ꓡꓳ ꓒꓱ ꓗꓪ ꓗ-ꓕꓳ-ꓡꓲꓗ ꓘꓴ ꓜꓲꓼ ꓞꓳ ꓠꓬ ꓮ ꓟꓬꓹ ꓟꓽ ꓔꓬ꓾ ꓕꓱ ꓡꓱ ꓫꓵꓽ ꓪꓴ ꓗꓪ ꓥ ꓟꓲ ꓔꓱ_ ꓟ ꓙꓵꓻ ꓠꓲꓹ ꓐꓰ ꓢꓯꓸ ꓔꓬ ꓠꓬ ꓘꓴ ꓜꓲꓼ ꓞꓳ ꓢ-ꓢꓶ-ꓠ ꓟꓬꓱꓽ ꓗꓪ ꓙꓲ_ ꓟ ꓢꓲꓹ ꓪꓰ ꓢꓶꓸ ꓢꓶꓽ ꓓꓱꓼ ꓡ ꓟ ꓥꓳ= ꓞꓹ ꓐꓳ꓾ ꓠꓬꓲ ꓟꓳ ꓓꓴ ꓠꓬ ꓪꓴ-ꓢ ꓡꓰ ꓬꓲꓸ ꓚꓰ ꓥ ꓡꓳ꓾  ꓟꓲ ꓠꓯ ꓡ ꓞꓳ ꓐꓴ ꓗꓪ ꓐꓰ ꓟꓽ ꓥ꓾ ꓣꓳꓸ_ ꓡꓳ ꓐꓰ ꓓꓵꓽ ꓙ_ ꓟ ꓣꓱꓽ ꓛꓰ ꓠꓬ  ꓪꓴ-ꓢ ꓗꓪ ꓐꓰ ꓣꓱꓽ ꓛꓰ ꓖꓶ ꓡ_ ꓟ ꓥꓳ ꓐꓰ ꓔꓲꓺ ꓒ ꓪ ꓔꓲ ꓡꓰ ꓐꓯ_ ꓡꓳ=

Kazakhstan ꓗꓪ ꓠꓬ Muslim 70% ꓔꓬ ꓢꓲ꓾ ꓙꓲ-ꓢꓴ ꓢꓲ ꓤ ꓠꓬ 25% ꓔꓬ ꓢꓲ꓾ ꓖꓳ ꓗꓪ ꓐꓰ ꓟꓬ ꓠꓬꓲ ꓔꓬ ꓟ ꓠꓬ  Russian Orthodox ꓐꓴ ꓥ ꓡꓳ꓾ ꓗ-ꓕꓳ-ꓡꓲꓗ ꓠꓬ 1% ꓡꓰ ꓔꓬ ꓟ ꓥꓳ=

ꓮ ꓘꓶꓸ ꓟꓽ ꓟꓬ ꓟ ꓘꓴ ꓜꓲꓼ ꓞꓳ ꓥ ꓥ ꓟꓲ ꓮ ꓕꓯ ꓥ ꓟꓲ ꓗꓸ ꓘꓶꓽ ꓒꓴ ꓢꓲ ꓙꓻ ꓫꓱꓽ_ ꓟ ꓮꓸ ꓣꓳ ꓤ ꓥ ꓡꓳ= ꓗꓸ ꓘꓶꓽ ꓑꓲꓸ ꓢꓲ ꓔꓬ ꓟ ꓮꓸ ꓣꓳ ꓤ ꓟꓽ ꓥ꓾ ꓢꓲ-ꓫꓬ-ꓟ-ꓦ ꓡꓰ ꓧꓳꓽ ꓪꓴꓸ ꓔ ꓟ ꓬꓲ ꓡꓰ ꓬꓰ ꓙ_ ꓟ ꓗꓪ ꓐꓰ ꓙꓻ ꓫꓱꓽ_ ꓟ ꓥꓳ꓾ ꓐꓰ ꓢꓯꓼ ꓖꓶ_ ꓟ ꓥꓳ= ꓙꓵꓻ ꓠꓲꓹ ꓑꓶ ꓓꓴ ꓫꓸ ꓜꓲꓽ ꓢꓲ ꓫꓵꓻ ꓡꓰ ꓢꓴ ꓢꓲ ꓫꓬ ꓢꓴ ꓐꓴ ꓮ ꓙꓵ ꓔꓯ ꓓꓵꓽ ꓙ_ ꓟ ꓚꓱꓹ ꓬꓲ ꓪ ꓔꓯ ꓫꓸ ꓟꓳ_ ꓟ ꓚꓱꓹ ꓬꓰ-ꓢꓴ ꓡꓯꓼ ꓐꓳ ꓔꓶꓸ ꓓꓴ ꓠꓬ ꓣꓳ ꓐꓱ ꓶ ꓠꓲꓹ ꓟ ꓪꓴ ꓦꓶ ꓠꓽ ꓔꓶꓸ ꓥ ꓟ ꓔꓯ ꓔꓲꓺ ꓒ ꓪ ꓔꓲ ꓐꓯ ꓔ ꓡꓳ= Kazakhstan ꓗꓪ ꓐꓰ ꓔꓲꓺ ꓒ ꓓꓽ ꓐꓴ ꓔꓯ ꓥ ꓟꓲ ꓫꓸ ꓟꓳ_ ꓟ ꓚꓱꓹ ꓐꓯ ꓔ ꓡꓳ=

Kazakhstan ꓗꓴꓷꓼ ꓠꓬ nuclear ꓡ ꓛꓴꓸ ꓫꓬꓹ ꓠꓹ ꓟ ꓐꓱ ꓶ ꓢꓯꓼ ꓟꓽ ꓖꓶ_ ꓟ ꓗꓴꓷꓼ ꓥ ꓟ ꓚꓱꓹ꓾ ꓬꓲ ꓪ ꓟꓵꓽ ꓟꓬ ꓠꓬꓲ ꓙꓲ ꓠꓹ ꓟ ꓟꓬ ꓠꓬꓲ ꓐꓲ ꓠꓹ ꓟ policies ꓙꓳ ꓢꓲ꓾ ꓙꓻ ꓫꓱꓽ_ ꓟ꓾ ꓣꓱꓽ _ ꓟ ꓗꓴꓷꓼ ꓥ ꓟ ꓔꓯ ꓥ ꓟꓲ ꓢꓷꓸ ꓪ ꓡꓳ=