ꓙꓲ_ ꓟ ꓮ ꓣꓳ ꓡꓳꓸ ꓒ ꓪꓴ-ꓢ ꓢꓯꓼ ꓔꓯ ꓠ ꓠꓹ ꓢꓲ ꓬꓲ ꓠꓯꓼ ꓗꓪ ꓛꓳ ꓓꓴ ꓬꓰ ꓡꓯ

ꓙꓲ_ ꓟ ꓮ ꓣꓳ ꓡꓳꓸ ꓒ ꓪꓴ-ꓢ ꓢꓯꓼ ꓔꓯ ꓠ ꓠꓹ ꓢꓲ ꓬꓲ ꓠꓯꓼ ꓗꓪ ꓛꓳ ꓓꓴ ꓬꓰ ꓡꓯ

5 ꓦ 8 ꓠꓬꓲ ꓠꓽ ꓫꓵꓽ ꓠꓬꓲ ꓕꓯ St. Peter ꓪꓽ ꓘꓴ ꓦꓲꓸꓹ ꓓꓽ ꓗꓪ Regina Coeli ꓪꓽ ꓘꓴ ꓙꓵꓹ ꓟꓲ ꓕꓯ ꓪꓴ-ꓢ ꓐꓯ ꓘꓶꓽ ꓟꓸ ꓖꓶ ꓟ ꓙꓵꓹ ꓗꓪ ꓔꓲꓸꓸꓒ ꓪ ꓔꓲ ꓡꓰ ꓙꓲ_ ꓟ ꓮ ꓣꓳ ꓜꓴ-ꓸ ꓪꓴ-ꓢ ꓢꓯꓼ ꓔꓯ ꓠ ꓠꓹ ꓢꓲ ꓬꓲ ꓠꓯꓼ ꓗꓪ ꓛꓳ ꓓꓴ ꓬꓰ ꓡꓯ ꓐꓰ ꓐꓯ ꓔ ꓡꓳ=

ꓪꓴ-ꓢ ꓮ ꓣꓳ ꓜꓴ ꓠꓬ ꓬꓲ ꓢꓯꓼ ꓔꓯ ꓠ ꓠꓹ ꓔ ꓡꓳ= ꓬꓲ ꓔꓯ ꓢꓷꓸ ꓔ ꓡꓳ= ꓬꓲ ꓠꓯꓼ ꓗꓪ ꓛꓳ_ ꓡꓳ ꓐꓰ ꓔꓲꓸꓸ ꓒ ꓪ ꓔꓲ ꓡꓰ ꓐꓯ_ ꓡꓳ= ꓠ ꓠꓹ ꓓꓴ ꓬꓰ ꓡꓯ-ꓸ ꓢꓷꓸ ꓓꓴ ꓬꓰ ꓡꓯ-ꓸ ꓛꓳ ꓓꓴ ꓬꓰ ꓡꓯ-ꓸ ꓕꓱ ꓢ ꓘꓶꓽ ꓠꓬ ꓠꓬꓲꓸ ꓠꓬꓲ ꓪꓴ-ꓢ ꓶꓽ ꓓꓳ ꓫꓱꓸ ꓓꓳ ꓗꓪ ꓮ ꓘꓶꓸ ꓣꓳ ꓚꓵ_ ꓟ ꓐꓯ ꓘꓶꓽ ꓥ ꓡꓳ=

ꓪꓴ-ꓢ ꓠꓬ ꓬꓲ ꓚꓲ ꓛꓬ ꓠ ꓠꓹ ꓔ ꓡꓳ= ꓣꓳ ꓬꓲ ꓠꓯꓼ ꓗꓪ ꓪꓽ ꓘꓴ ꓠꓬ ꓬꓲ ꓠ ꓠꓹ ꓖꓶ_ ꓡꓳ= ꓬꓲ ꓔꓯ ꓙꓵꓸꓹ ꓠꓲꓹ ꓐꓰ ꓘꓴꓽ_ ꓟ ꓥ ꓕ ꓑꓳꓸ ꓬꓲ ꓠ ꓠꓹ ꓖꓶ_ ꓟ ꓥꓳ=

ꓪꓴ-ꓢ ꓠꓬ ꓬꓲ ꓮ ꓣꓳ ꓜꓴ ꓔꓯ ꓢꓷꓸ ꓔ ꓡꓳ=      

ꓬꓰ-ꓢꓴ ꓔꓯ ꓠ ꓠꓹ ꓢꓴ ꓔꓯ ꓠꓬ ꓪꓴ-ꓢ ꓢꓷꓸ ꓔ ꓡꓳ= ꓪꓴ-ꓢ ꓠꓬ ꓣꓳ ꓚꓱꓹ ꓔꓯ ꓮ ꓙꓵꓽ ꓢꓷꓸ ꓔ ꓡꓳ= ꓬꓰ-ꓢꓴ ꓠꓬ ꓠꓶꓽ ꓞꓹ ꓟ-ꓸ ꓙꓵꓸꓹ ꓠꓲꓹ-ꓸ ꓠꓶꓽ ꓞꓹ ꓟ ꓠꓵ ꓠꓲꓹ ꓔꓯ ꓧꓪꓹ ꓟ ꓥꓳ= ꓕꓱ ꓟ ꓠꓬ ꓣꓳ ꓔꓯ ꓢꓷꓸ ꓢꓲ ꓘꓳꓹ ꓣꓴ ꓠꓹ ꓟ ꓥ ꓡꓳ= ꓣꓳ ꓠꓯꓼ ꓗꓪ ꓬꓲ ꓠꓵ ꓠꓲꓹ ꓠꓬ ꓮ ꓕꓯ ꓥ ꓟꓲ ꓙꓳ_ ꓟ ꓥꓳ= ꓮ ꓡꓰ ꓕꓲ ꓣꓳ ꓔꓯ ꓥ ꓟꓲ ꓕꓲꓽ ꓣꓳ ꓕꓵꓼ ꓟꓽ ꓔꓬ ꓝꓲ ꓟ ꓥꓳ= ꓕꓱ ꓟ ꓠꓬ ꓬꓰ-ꓢꓴ ꓬꓲ ꓠꓵ ꓠꓲꓹ ꓥ ꓡꓳ=

“ꓥꓪ ꓠꓬ ꓠꓯ ꓞꓲꓹ ꓟ ꓫꓵꓸꓹ ꓶ ꓥꓳꓽ ꓡꓳ ꓘꓴꓽ ꓗꓪ ꓫꓱꓽ ꓗꓳꓸ ꓙꓰ ꓥ_ ꓟꓲ-ꓸ ꓠꓴ ꓠꓽ ꓥꓪ_ ꓐꓰ ꓔꓬ ꓠꓬꓲ ꓥꓶ_ ꓟ ꓮ ꓫꓵꓽ ꓔꓯ_ ꓟꓲ ꓥꓪ ꓙꓳꓸꓸ ꓟꓽ ꓛꓵ= ꓠꓴ ꓙꓽ ꓥꓳꓽ_ ꓐꓰ ꓠꓴ ꓔꓳꓹ ꓓꓸꓹ ꓡꓰ ꓥꓪ ꓔꓯ ꓠꓲꓹ ꓟ ꓗꓴ ꓖꓶ_ ꓡꓳ=” (ꓟꓴꓽ ꓖꓪ 23ꓽ4)

 ꓪꓴ-ꓢ ꓠꓬ ꓣꓳ ꓫꓸ ꓓꓴ ꓟꓶꓽ ꓓꓴ ꓔꓳꓹ ꓜꓳ_ ꓟ ꓮ ꓙꓵꓽ ꓔꓯ ꓫꓸ ꓙ_ ꓟ ꓥꓳ= ꓖꓳ ꓟ ꓑꓶ ꓓꓴ ꓣ ꓠꓬ ꓪꓴ-ꓢ ꓠꓵ ꓠꓲꓹ ꓔꓯ ꓢꓷꓸ ꓢꓲ ꓘꓳꓹ ꓣꓴ ꓘꓴꓸ ꓠ ꓔ ꓡꓳ= ꓪꓴ-ꓢ ꓔꓯ ꓣꓳ ꓤꓶꓸꓹ ꓗꓪ ꓐꓰ ꓠꓲꓹ ꓟ ꓘꓴ ꓗꓪ ꓔꓬ ꓖꓴ ꓖꓶ ꓠꓬ ꓣꓳ ꓔꓳꓹ ꓜꓳ ꓟ ꓫꓸ ꓓꓴ ꓟꓶ ꓓꓴ ꓮ ꓙꓵꓽ ꓔꓯ ꓬꓲ ꓡꓰ ꓬꓰ ꓙ ꓟ ꓥꓳ= ꓬꓲ ꓡꓰ ꓠꓲꓹ ꓟ ꓫꓵꓸꓸ ꓢꓲ ꓫꓱꓸ ꓤ ꓠꓵ ꓠꓲꓹ ꓐꓰ ꓫꓸ ꓙ_ ꓟ ꓥꓳ= ꓕꓱ ꓟ ꓠꓬ ꓙꓲ_ ꓟ ꓮ ꓣꓳ ꓡꓳꓸ ꓒ ꓥ ꓡꓳ=

ꓙꓲ_ ꓟ ꓮ ꓣꓳ ꓡꓳꓸ ꓒ ꓠꓯꓼ ꓗꓪ ꓛꓳ ꓓꓴ ꓬꓰ ꓡꓯ=

ꓪꓴ-ꓢ ꓠꓯꓼ ꓗꓪ ꓔꓱ ꓔꓱ ꓐꓰ ꓛꓳ ꓢꓴ ꓠꓬ ꓬꓲ ꓙꓸꓹ ꓫꓱꓽ_ ꓟ ꓚꓱꓹ ꓔꓯ ꓬꓲ ꓐꓰ ꓕꓲꓽ ꓪꓼ ꓙꓸꓹ ꓫꓱꓽ_ ꓟ ꓥꓳ= ꓙꓲ_ ꓟ ꓮ ꓣꓳ ꓡꓳꓸ ꓒ ꓠꓬ ꓒꓲꓼ ꓡꓰ ꓟ ꓮ ꓣꓳ ꓤ ꓔꓯ ꓫꓱꓸ ꓤ_ ꓟ ꓠꓲꓹ ꓟ ꓐꓰ ꓧꓪ ꓟꓶ ꓗꓪ ꓛꓲ ꓧꓪꓹ ꓟ ꓥꓳ=

“ꓠꓴ ꓪ ꓗꓪ ꓟ ꓡ ꓞꓳ ꓕꓲ ꓣꓳ ꓠꓬ-ꓸ ꓮ ꓣꓳ ꓕꓲ ꓦꓬ ꓟ ꓙꓳ ꓢꓲ ꓕꓲ ꓟ ꓒꓲꓼ ꓬꓰ ꓠꓬ-ꓸ ꓗꓴ ꓞꓲ ꓗꓴ ꓟ ꓔꓯ ꓡꓲ ꓛꓲ ꓗꓪ ꓗꓶ ꓔ ꓬꓰ ꓢꓲ ꓒꓲꓼ ꓬꓰ ꓟ ꓖꓳ ꓕꓲ ꓟ ꓟꓽ ꓧꓪ ꓟꓶ ꓕ ꓑꓳꓸ ꓧꓪ ꓙꓰ_ ꓡꓳ” ꓡꓴ-ꓘ 15ꓽ4

ꓙꓲ_ ꓟ ꓮ ꓣꓳ ꓡꓳꓸ ꓒ ꓠꓬ ꓫꓸ ꓔꓬ ꓟ-ꓸ ꓶꓽ ꓡꓰ ꓟ ꓮ ꓣꓳꓸ ꓜꓴ ꓠꓯꓼ ꓗꓪ ꓙꓰ ꓢꓲ-ꓸ ꓬꓲ ꓪ ꓐꓰ ꓕꓲꓽ ꓪꓼ ꓬꓲ ꓪ ꓔꓳꓹ ꓜꓳ ꓟ ꓔꓯ ꓙꓬ ꓫꓸ ꓙ ꓟ ꓥꓳ= ꓬꓲ ꓪ ꓔꓯ ꓬꓰ ꓙ ꓚꓬꓴ ꓙ ꓟ ꓥꓳ= ꓔꓲꓸꓸ ꓒ ꓪ ꓔꓲ ꓡꓰ ꓙꓲ_ ꓟ ꓮ ꓣꓳ ꓡꓳꓸ ꓒ ꓠꓽ ꓫꓵꓽ ꓠꓬꓲ ꓕꓯ ꓶꓽ ꓓꓳ ꓫꓱꓸ ꓓꓳ ꓬꓲ ꓟꓶꓽ ꓗꓪ ꓟꓹ ꓟ ꓟ-ꓡꓲ ꓡꓰ ꓣꓳ ꓬꓰ-ꓢꓴ ꓙꓲ-ꓢꓴ ꓐꓯ ꓘꓶꓽ ꓔꓯ ꓟꓬ ꓠꓬꓲ ꓠ ꓠꓹ ꓢꓲ ꓙꓵꓸꓹ ꓠꓲꓹ ꓐꓰ ꓬꓲ ꓠꓯꓼ ꓗꓪ ꓛꓳ ꓠꓹ ꓟ ꓐꓱ ꓶ ꓪꓽ ꓘꓴ ꓙ ꓖꓶ ꓡꓳ=

Add new comment

1 + 0 =