ꓞꓲꓼ ꓪꓴꓽ_ ꓟ ꓤꓶꓸꓹ ꓠꓬ ꓬꓰ-ꓢꓴ ꓔꓯ ꓢꓷꓸ ꓙ ꓟꓳ ꓙ ꓠꓹ ꓟ ꓢꓲꓹ ꓪꓰ ꓢꓶꓸ ꓢꓶꓽ ꓓꓱꓼ ꓠꓹ ꓟ ꓙꓵꓹ ꓥ ꓡꓳ=

ꓞꓲꓼ ꓪꓴꓽ_ ꓟ ꓤꓶꓸꓹ ꓠꓬ ꓬꓰ-ꓢꓴ ꓔꓯ ꓢꓷꓸ ꓙ ꓟꓳ ꓙ ꓠꓹ ꓟ ꓢꓲꓹ ꓪꓰ ꓢꓶꓸ ꓢꓶꓽ ꓓꓱꓼ ꓠꓹ ꓟ ꓙꓵꓹ ꓥ ꓡꓳ=

8 ꓦ 10 ꓠꓬꓲ ꓠꓽ ꓢ ꓠꓬꓲ ꓕꓯ ꓢꓲ ꓫꓬ ꓢꓴ ꓒꓳ-ꓡꓳ ꓦꓲ ꓗꓪ ꓘꓴ ꓜꓲꓼ ꓞꓳ ꓐꓴ ꓐꓰ ꓜꓲ ꓡꓯꓼ ꓘꓳ ꓟ ꓙꓵꓹ ꓗꓪ ꓔꓲꓺ ꓒ ꓪ ꓔꓲ ꓝꓣꓮꓠꓚꓲꓢ ꓡꓰ ꓞꓲꓼ ꓪꓴꓽ_ ꓟ ꓤꓶꓻ ꓠꓬ ꓮ ꓘꓶꓸ ꓒꓵꓽ_ ꓟ ꓔꓯ ꓐꓯ ꓔ ꓡꓳ=

ꓢꓲ ꓫꓬ ꓕꓳ ꓶ ꓠꓬ ꓬꓳ-ꓦ 14ꓽ1-3 ꓗꓪ ꓐꓰ ꓥ ꓡꓳ= ꓬꓰ-ꓢꓴ ꓐꓰ ꓬꓲ ꓛꓳ ꓒꓯꓹ ꓐꓴ ꓟꓶꓽ ꓘꓶꓼ ꓜ ꓜ_ ꓕꓯ ꓬꓲ ꓛꓳ ꓒꓯꓹ ꓐꓴ ꓔꓯ ꓠꓲꓹ ꓟ ꓗꓴ ꓖꓶ_ ꓟ ꓚꓱꓹ ꓥ ꓡꓳ=

ꓟꓲ ꓠꓯ ꓡ ꓞꓳ ꓐꓴ ꓞꓲꓼ ꓪꓴꓽ ꓡ ꓟ ꓙꓵꓹ ꓗꓪ ꓫꓸ ꓓꓴ ꓚꓱꓹ ꓔꓳꓹ ꓜꓳ ꓡ ꓟ ꓚꓱꓹ ꓔꓯ ꓧꓪꓸ ꓡꓰ ꓠꓹ ꓟ ꓢꓯꓼ ꓕꓵꓼ ꓙꓵꓹ ꓥ ꓟꓲ ꓬꓲꓸ ꓪ ꓙꓵꓻ ꓠꓲꓹ ꓗꓪ ꓐꓰ ꓶ ꓤ ꓫꓱꓸ ꓤ ꓪ ꓟꓶ_ ꓟ ꓙꓵꓹ ꓥ ꓟꓲ ꓥ ꓡꓳ=

ꓞꓲꓼ ꓪꓴꓽ ꓟ ꓶ ꓤ ꓫꓱꓸ ꓤ

ꓞꓲꓼ ꓪꓴꓽ ꓟ ꓤꓶꓻ ꓠꓬ ꓬꓲꓸ ꓪ ꓙꓻ ꓫꓱꓽ_ ꓟ ꓬꓲ ꓪ ꓔꓳꓹ ꓜꓳ ꓚꓱꓹ ꓮ ꓙꓵꓽ ꓔꓯ ꓞꓳ ꓒꓵꓽ_ ꓟ ꓥ ꓡꓳ= ꓘꓴ ꓜꓲꓼ ꓞꓳ ꓗꓪ ꓐꓰ ꓧꓳꓽ ꓪꓴꓸ ꓢꓴ ꓐꓰ ꓘꓴ ꓜꓲꓼ ꓞꓳ ꓡ ꓞꓳ ꓐꓴ ꓛꓬ ꓥꓳꓽ ꓡꓰ ꓟ ꓕꓱ ꓡꓱ ꓫꓵꓽ ꓬꓲꓸ ꓙꓵꓹ ꓗꓪ ꓥ ꓟꓲ ꓠꓲꓹ ꓟ ꓫꓵꓻ ꓢꓲ꓾ ꓜꓲꓽ ꓠꓲꓹ ꓟ ꓐꓰ ꓡꓳꓸ ꓙ ꓐꓳ ꓙ ꓖꓶ_ ꓟ ꓥꓳ=

ꓣꓳ ꓢꓯꓼ ꓟꓬ ꓠꓬ ꓫꓵꓺ ꓗꓪ ꓐꓰ ꓕꓲ ꓞꓲꓼ ꓕꓲ ꓑ ꓢꓯꓼ ꓟꓬ ꓪ ꓟꓶ ꓠꓹ ꓟ ꓐꓱ ꓶ ꓔꓳꓹ ꓜꓳ ꓡ ꓟ ꓚꓱꓹ ꓟꓸ ꓖꓶ ꓟ ꓑꓶ ꓓꓴ ꓞꓲꓼ ꓪꓴꓽ ꓡ ꓟ ꓠꓬ ꓪꓴ-ꓢ ꓡꓰ ꓖꓶ ꓔ ꓟ ꓶ ꓤ ꓫꓱꓸ ꓤ ꓥ ꓡꓳ꓾ ꓐꓰ ꓐꓯ_ ꓡꓳ= ꓞꓲꓼ ꓪꓴꓽ ꓡ ꓟ ꓠꓬ ꓣꓳ ꓢꓯꓸ ꓔꓬ ꓟ ꓤꓶꓻ ꓔꓯ ꓟꓬ ꓠꓬꓲ ꓢꓷꓸ ꓡ ꓟ ꓥꓳ= ꓣꓳ ꓔꓯ ꓥ ꓟꓲ ꓢꓯꓸ ꓔꓬ ꓟ ꓚꓱꓹ ꓬꓲꓸ ꓙꓵꓹ ꓔꓯ ꓒꓵꓽ ꓠꓹ ꓟ ꓔꓯ ꓢꓷꓸ ꓡꓰ ꓝꓲ_ ꓡꓳ= ꓙꓵꓻ ꓠꓲꓹ ꓗꓪ ꓥ ꓟꓲ ꓢꓯꓼ ꓕꓵꓼ ꓔꓱ ꓔꓱꓹ ꓐꓰ ꓛꓳ ꓠꓹ ꓟ ꓧꓳꓽ ꓪꓴꓸ ꓔ ꓟ ꓥ ꓡꓳ=

ꓞꓲꓼ ꓪꓴꓽ ꓟ ꓤꓶꓻ ꓠꓬ ꓢꓷꓸ ꓙ ꓟꓳ ꓙ ꓠꓹ ꓟ ꓮ ꓘꓶꓸ ꓙꓲ_ ꓟ ꓙꓵꓹ ꓥ ꓡꓳ= ꓬꓰ-ꓢꓴ ꓗꓪ ꓐꓰ ꓙꓵꓻ_ ꓟ ꓙꓵꓻ ꓠꓲꓹ ꓔꓯ ꓬꓲꓸ ꓪ ꓐꓰ ꓠꓶꓽ ꓞꓹ ꓢꓴ ꓐꓴ ꓔꓯ ꓟꓸ ꓖꓶ ꓠꓹ ꓟ ꓢꓷꓸ ꓙ ꓟꓳ ꓙ ꓠꓹ ꓟ ꓬꓲꓸ ꓙꓵꓹ ꓥ ꓡꓳ ꓐꓰ ꓔꓲꓺ ꓒ ꓪ ꓔꓲ ꓡꓰ ꓐꓯ_ ꓡꓳ=