ꓟꓴ ꓗꓪ ꓗꓴꓷꓼ ꓠꓬ ꓣꓳ ꓔꓬ ꓦꓲꓻ ꓥ ꓡꓳ꓾

ꓟꓴ ꓗꓪ ꓗꓴꓷꓼ ꓠꓬ ꓣꓳ ꓔꓬ ꓦꓲꓻ ꓥ ꓡꓳ꓾

ꓢꓲ- ꓫꓬ ꓕꓳ ꓶ ꓶꓼ ꓓꓳꓽ ꓫꓱꓸ ꓓꓳꓽ ꓗꓪ ꓬꓰ-ꓢꓴ ꓟꓽ ꓫꓵ ꓟꓲ ꓕꓯ ꓗꓪ ꓬꓲ ꓛꓳ ꓒꓯ ꓐꓴ ꓔꓯ ꓬꓲꓸ ꓚꓱꓹ ꓧꓳꓽ ꓟꓳꓸ ꓖꓶ_ ꓟ꓾ ꓠꓲꓹ ꓟ ꓗꓴ ꓖꓶ_ ꓟ ꓡꓰ ꓐꓰ ꓣꓳ ꓔꓯ ꓥ ꓟꓲ ꓣꓳ ꓙꓰ ꓠꓹ ꓟ ꓚꓱꓹ꓾ ꓮ ꓗꓪ ꓙꓰ ꓠꓹ ꓟ? ꓮ ꓡꓰ ꓐꓰ ꓙꓰ ꓠꓹ ꓟ ꓟꓸ ꓖꓶ_ ꓡꓳ꓾ ꓐꓰ ꓔꓲꓺ ꓒ ꓪ ꓔꓲ ꓡꓰ ꓡꓳꓹ ꓬꓰ ꓟ ꓕꓲ ꓠꓽ ꓟ ꓠꓽ ꓫꓵ ꓠꓬꓲ ꓕꓯ ꓐꓯ ꓔ ꓡꓳ=

ꓬꓰ-ꓢꓴ ꓡꓰ ꓬꓲ ꓛꓳ ꓒꓯꓹ ꓐꓴ ꓟꓬꓱꓽ ꓬꓰ ꓡꓳꓹ ꓬꓰ ꓟ ꓔꓯ ꓬꓲꓸ ꓢꓷꓸ_ ꓠꓬꓲ ꓬꓲ ꓛꓳ ꓒꓯꓹ ꓐꓴ ꓐꓱ ꓶ ꓔꓬ ꓖ ꓙ ꓖꓶ ꓖꓶ_ ꓟ ꓐꓰ ꓬꓲ ꓪ ꓠꓬ ꓬꓰ-ꓢꓴ ꓔꓬ ꓟ ꓠꓯꓼ ꓗꓪ ꓮ ꓕꓯ ꓥ ꓟꓲ ꓔꓬ ꓟꓶ ꓡꓰ_ ꓥꓳ= ꓟꓴ ꓗꓪ ꓗꓴꓷꓼ ꓐꓹ ꓐ ꓔꓬ ꓦꓲꓻ ꓗꓪ ꓠꓬ ꓣꓳ ꓕꓲ ꓣꓳ ꓡꓲ ꓕꓲ ꓣꓳ ꓐꓱ ꓶ ꓔꓬ ꓔꓶꓸ ꓙꓳ_ꓡꓳ꓾ ꓬꓲ ꓠꓬ ꓣꓳ ꓔꓯ ꓠꓲꓹ ꓡꓱ ꓡꓱ ꓐꓰ ꓘꓳꓹ ꓣꓴ ꓔꓬ ꓡꓳ꓾ ꓠꓴ ꓪ ꓐꓱ ꓶ ꓔꓬ ꓖ ꓙ ꓖꓶ ꓖꓶ ꓔ ꓬꓰ_ ꓥꓳ ꓐꓰ ꓔꓲꓺ ꓒ ꓪ ꓔꓲ ꓡꓰ ꓐꓯ ꓔ ꓡꓳ=

ꓬꓰ-ꓢꓴ ꓠꓬ ꓣꓳ ꓐꓰ ꓧꓹ ꓙꓰ ꓠꓹ ꓟ ꓟꓽ ꓓꓵꓽ ꓙ꓾ ꓬꓲꓸ ꓟꓶ ꓕꓲ ꓠꓬꓲ ꓗꓪ ꓪꓴ-ꓢ ꓐꓰ ꓜꓲ ꓠꓹ ꓟ ꓐꓱ ꓶ ꓬꓲ ꓡꓰ ꓧꓳꓽ ꓟꓳꓸ ꓖꓶ_ ꓡꓳ= ꓮ ꓘꓶꓸ ꓣꓳꓸ ꓚꓵ_ ꓠ ꓠꓬꓲ ꓘꓶꓽ ꓕꓱ ꓟ ꓔꓯ ꓓꓵꓽ ꓙ ꓠꓹ ꓟ꓾ ꓣꓳ ꓮ ꓗꓪ ꓙꓰ ꓠꓯꓹ ꓡ? ꓮ ꓡꓰ ꓐꓰ ꓙ ꓫꓱ ꓔꓬ ꓡ? ꓮ ꓫꓵ ꓐꓱ ꓶ ꓢꓯꓸ ꓔꓬ ꓡ? ꓕꓱ ꓠ ꓠꓬꓲ ꓘꓶꓽ ꓟꓽ ꓙꓳ ꓢꓯꓸ ꓔꓬ ꓠꓬ ꓙꓲ ꓖꓴ ꓟꓽ ꓙꓳ= ꓣꓳ ꓔꓬ ꓦꓲꓻ ꓠꓬ ꓟꓴ ꓗꓪ ꓗꓴꓷꓼ ꓥ ꓡꓳ=

ꓠꓱꓸ ꓐꓯꓼ ꓕꓲ ꓘꓶꓽ ꓠꓬ ꓖꓳ ꓗꓪ ꓣꓳ ꓮ ꓡꓰ ꓐꓰ ꓙꓰ ꓠ ꓗ ꓡ? ꓐꓰ ꓥ ꓡꓳ꓾ ꓣꓳ ꓠꓯꓼ ꓗꓪ ꓫꓸ ꓓꓴ ꓔꓳꓹ ꓜꓳ ꓡ ꓕꓯ ꓟꓽ ꓙꓲ_ ꓟ ꓣꓳ ꓔꓯ ꓧꓪꓸ ꓡꓰ_ ꓕꓯ ꓮ ꓡꓰ ꓬꓰ ꓠꓹ ꓟ꓾ ꓮ ꓡꓰ ꓕꓲ ꓚꓱꓹ ꓗꓪ ꓙꓰ ꓠꓹ ꓟ ꓓꓵꓽ ꓙ ꓠꓬꓲ ꓠ ꓔ ꓡꓳ= ꓬꓰ-ꓢꓴ ꓠꓬ ꓕꓲ ꓞꓲꓼ ꓕꓲ ꓑ ꓟ ꓢꓯꓼ ꓟꓬ ꓟꓶ ꓠꓹ ꓟ ꓐꓱ ꓶ ꓬꓲ ꓚꓲ ꓛꓬ ꓔꓱ_ ꓟ ꓚꓱꓹ꓾ ꓪꓴ-ꓢ ꓐꓯ ꓘꓶꓽ ꓗꓪ ꓐꓰ ꓡꓰ ꓢꓯꓸ ꓔꓬ ꓟ ꓥꓳ=

ꓮ ꓟꓶ ꓒꓬꓱꓼ ꓔꓬ ꓟ ꓔꓯ ꓡꓰ ꓟꓽ ꓥꓳ ꓡꓳꓸ꓾ ꓟꓴ ꓗꓪ ꓗꓴꓷꓼ ꓔꓯ ꓠꓬꓲꓸ ꓠ꓾ ꓬꓲꓸ ꓟꓶ ꓕꓲ ꓠꓬꓲ ꓕꓯ ꓕꓲ ꓞꓲꓼ ꓕꓲ ꓑ ꓢꓯꓼ ꓟꓬ ꓟꓶ ꓠꓹ ꓟ꓾ ꓪꓴ-ꓢ ꓐꓰ ꓜꓲ ꓡꓯꓼ ꓘꓳ ꓠꓹ ꓟ ꓐꓱ ꓶ ꓣꓳ ꓔꓶꓻ ꓙꓱꓼ ꓐꓰ ꓙ ꓫꓱ ꓠꓹ ꓟ ꓔꓲꓺ ꓒ ꓪ ꓔꓲ ꓢꓯꓼ ꓖꓶ ꓔ ꓡꓳ=