ꓢꓯꓼ ꓕꓵꓼ_ ꓟ ꓞꓳ ꓡꓱ ꓤ ꓐꓴ ꓗꓷ ꓠꓹ ꓟ ꓔꓲꓺ ꓒ ꓪ ꓔꓲ ꓡꓰ ꓢꓯꓼ ꓖꓶ_ ꓡꓳ꓾

ꓢꓯꓼ ꓕꓵꓼ_ ꓟ ꓞꓳ ꓡꓱ ꓤ ꓐꓴ ꓗꓷ ꓠꓹ ꓟ ꓔꓲꓺ ꓒ ꓪ ꓔꓲ ꓡꓰ ꓢꓯꓼ ꓖꓶ_ ꓡꓳ꓾

ꓟꓽ ꓐꓴ ꓐꓴ ꓢꓯꓼ ꓕꓵꓼ_ ꓟ ꓞꓳ ꓡꓱ ꓤ ꓐꓴ ꓐꓰ ꓬꓰ-ꓢꓴ ꓙꓲ ꓢꓴ ꓡꓰ ꓠꓴ ꓪ ꓔꓯ ꓠꓲꓹ ꓡꓶꓽ ꓙꓳ_ ꓡꓳ꓾ ꓐꓰ ꓔꓲꓺ ꓒ ꓪ ꓔꓲ ꓡꓰ ꓧꓴꓠꓖꓮꓣꓬ ꓞꓳ ꓡꓱ ꓤ ꓐꓴ ꓔꓯ ꓢꓯꓼ ꓖꓶ_ ꓡꓳ=

 2023 ꓘꓳꓼ 4 ꓦ 29 ꓠꓬꓲ꓾ ꓧꓴꓠꓖꓮꓣꓬ ꓗꓴꓷꓼ Budapest’s ꓜꓲꓼ ꓓꓴ ꓦꓲꓻ ꓗꓪ ꓜꓲꓼ ꓡ ꓢꓴ ꓞꓳ ꓡꓱ ꓤ ꓕꓲ ꓟꓶꓽ ꓕꓲ ꓔꓴ ꓣꓳ ꓛꓲ ꓔꓯ ꓟꓽ ꓐꓴ ꓐꓴ ꓢꓯꓼ ꓕꓵꓼ ꓢꓯꓸ ꓔꓬ ꓟ ꓞꓳ ꓡꓱ ꓤ ꓐꓴ ꓗꓷ ꓠꓹ ꓟ ꓔꓲꓺ ꓒ ꓪ ꓔꓲ ꓡꓰ ꓢꓯꓼ ꓖꓶ_ ꓡꓳ= ꓢꓲ ꓒ ꓬꓰ-ꓢꓴ ꓠꓬ ꓞꓳ ꓡꓱ ꓤ ꓐꓴ ꓔꓯ ꓢꓯꓸ ꓔꓬ꓾ ꓢꓯꓼ ꓕꓵꓼ ꓢꓲ ꓟꓬꓱꓽ ꓙꓵꓽ ꓪ ꓔꓯ ꓣꓴ ꓗꓴꓸ ꓢꓴ ꓒꓬꓱꓼ ꓠꓹ ꓟ ꓠꓲꓹ ꓡꓶꓽ ꓙꓳ_ ꓡꓳ= ꓑꓶꓸ ꓑꓶꓸ ꓡꓰ ꓢꓯꓼ ꓕꓵꓼ ꓢꓴ ꓡꓰ ꓧꓪꓸ ꓡꓰ ꓟ ꓔꓯ ꓟꓶ ꓡ ꓥꓳ=

ꓢꓲ ꓒ ꓬꓰ-ꓢꓴ ꓠꓬ ꓞꓳ ꓡꓱ ꓤ ꓐꓴ ꓔꓯ ꓪꓴꓽ ꓓꓰ ꓡꓰ_ ꓟ꓾ ꓟꓬꓱꓺ ꓓꓳꓽ ꓙꓳ_ ꓟ ꓔꓯ ꓬꓰ ꓝꓲ ꓠꓲꓹ ꓫꓵ_ ꓟ ꓥꓳ= ꓞꓳ ꓡꓱ ꓤ ꓐꓴ ꓬꓲꓸ ꓪ ꓓꓵꓽ ꓙ ꓥꓳ ꓡꓳꓸ ꓔ ꓟ ꓔꓯ ꓮ ꓕꓯ ꓥ ꓟꓲ ꓟꓽ ꓘꓷ ꓡꓶꓽ ꓟ ꓔꓯ ꓐꓯ ꓔ ꓡꓳ= ꓣꓳ ꓤꓶꓻ ꓗꓪ ꓧꓪꓸ ꓡꓰ ꓠꓹ ꓟ ꓐꓱ ꓶ ꓠꓬꓲꓽ ꓚꓱꓹ ꓣꓱꓽ ꓬꓯꓼ ꓡꓳ= ꓕꓲ ꓚꓱꓹ ꓠꓬ ꓣꓳ ꓔꓶꓻ ꓙꓱꓼ ꓔꓯ ꓮ ꓟꓴꓸ ꓟꓴ ꓙꓳ ꓢꓲ꓾ ꓣꓳ ꓐ ꓡ ꓕ ꓑꓳ ꓢꓯꓼ ꓕꓵꓼ ꓠꓹ ꓟ꓾ ꓠꓱꓸ ꓐꓯꓼ ꓢꓴ ꓔꓯ ꓠꓬꓲꓸ ꓞꓹ ꓟ꓾ ꓟꓽ ꓔꓱ_ ꓟ ꓚꓱꓹ ꓗꓪ ꓐꓰ ꓟꓽ ꓥ꓾ ꓔꓱ ꓔꓱꓹ ꓐꓰ ꓢꓯꓼ ꓕꓵꓼ ꓟ ꓚꓱꓹ ꓗꓪ ꓐꓰ ꓪ ꓟ ꓥ ꓡꓳ=

ꓠꓬꓲꓽ ꓚꓱꓹ ꓕꓲ ꓚꓱꓹ ꓠꓬ ꓣꓳ ꓠꓯꓼ ꓗꓪ ꓬꓲꓸ ꓚꓱꓹ ꓧꓳꓽ ꓟꓳꓸ ꓖꓶ_ ꓟ ꓢꓲ ꓒ ꓬꓰ-ꓢꓴ ꓐꓰ ꓕꓲ ꓪ ꓙ ꓫꓱꓽ ꓠꓹ ꓟ ꓥ ꓡꓳ= ꓬꓰ-ꓢꓴ ꓠꓬ ꓣꓳ ꓔꓯ ꓢꓯꓼ ꓖꓶ ꓔꓬ ꓡꓳ= ꓙꓵꓻ ꓔꓬ ꓡꓳ= ꓬꓰ-ꓢꓴ ꓡꓰ ꓧꓳꓽ ꓪꓴꓸ ꓟ ꓚꓱꓹ ꓗꓪ ꓐꓰ ꓘꓴ ꓜꓲꓼ ꓞꓳ ꓘꓴꓽ ꓗꓪ ꓗꓴꓷꓼ ꓘꓴꓽ ꓗꓪ ꓣꓳ ꓕꓲ ꓣꓳ ꓡꓰ ꓧꓹ ꓙꓰ ꓢꓲ ꓟꓽ ꓥ꓾ ꓡ ꓞꓳ ꓮ ꓟꓬꓹ ꓐꓰ ꓕꓲ ꓪ ꓙꓻ ꓫꓱꓽ ꓠꓹ ꓟ ꓐꓱ ꓶ ꓞꓳ ꓡꓱ ꓤ ꓐꓴ ꓔꓯ ꓢꓯꓼ ꓖꓶ_ ꓡꓳ=

ꓢꓲ ꓡꓲꓹ ꓟ ꓢꓯꓼ ꓪ ꓔꓯ ꓞꓳ ꓡꓱ ꓤ ꓐꓴ ꓧꓪ ꓟꓳ ꓠꓹ ꓟ꓾ ꓟꓰꓓꓲꓮ ꓣꓱꓽ_ ꓟ꓾ ꓑꓧꓳꓠꓰ ꓣꓱꓽ ꓠꓬ ꓜꓲ_ ꓟ ꓔꓯ ꓣꓳ ꓙ ꓜꓲꓼ ꓣꓱꓽ ꓗꓴꓸ ꓠꓹ ꓟ ꓐꓱ ꓶ ꓮ ꓘꓶꓸ ꓬꓮꓳ ꓚꓲ_ ꓟ ꓔꓲꓺ ꓒ ꓪ ꓔꓲ ꓡꓰ ꓐꓯ ꓡꓳ= ꓢꓲ ꓡꓲꓹ ꓟ ꓠꓬ ꓪꓽ ꓘꓴ_ ꓟ ꓗꓸ ꓘꓶꓽ ꓔꓯ ꓒꓴ ꓖꓶ_ꓡꓳ= ꓕꓲ ꓠꓬꓲ ꓡꓲ ꓕꓲ ꓠꓬꓲ ꓒꓬꓱꓼ ꓔꓬ ꓟ ꓓꓳꓽ ꓔꓯ ꓬꓲꓸ ꓙꓵꓹ ꓟꓽ ꓞꓰ ꓢꓷꓸ ꓠꓹ ꓟ ꓐꓱ ꓶ ꓣꓱꓽ_ ꓟ ꓮ ꓟꓶ ꓕꓲ ꓞꓲꓼ ꓗꓪ ꓢꓲ ꓡꓲꓹ ꓟ ꓐꓰ ꓠꓲꓹ ꓟ ꓢꓯꓼ ꓪ ꓔꓯ ꓢꓯꓼ ꓪ ꓖꓶ ꓠꓹ ꓟ ꓣꓱꓽ ꓬꓯꓼ ꓟ ꓑꓶ ꓓꓴ ꓟꓰꓓꓲꓮ꓾ ꓑꓧꓳꓠꓰ ꓔꓯ ꓬꓲꓸ ꓙꓵꓹ ꓙꓳ ꓙꓳ ꓡꓰ ꓣꓱꓽ ꓠꓹ ꓟ ꓢꓷꓸ ꓠꓹ ꓟ ꓢꓯꓼ ꓖꓶ_ ꓡꓳ=

ꓢꓲ ꓒ ꓬꓰ-ꓢꓴ ꓠꓬ ꓞꓳ ꓤ ꓥꓪꓽ ꓔꓴ ꓣꓳ ꓔꓯ ꓖꓶ ꓜ ꓟ ꓥꓪꓸ ꓠꓬꓲꓽ ꓟ ꓐꓰ ꓑ ꓑ ꓥꓪꓽ ꓑꓬ ꓔꓯ ꓶꓼ ꓥꓳꓽ ꓙꓱ ꓟ ꓢꓲ ꓫꓬ ꓕꓳ ꓶ ꓝꓲꓸ ꓗꓪ ꓐꓰ ꓔꓱꓹ ꓕ ꓢꓲ꓾ ꓙꓵꓻ ꓠꓲꓹ ꓠꓬ ꓔꓱ_ ꓟ ꓙꓵꓻ ꓟ ꓗꓪ ꓐꓰ ꓠꓲꓹ ꓡꓱ ꓡꓱ ꓐꓰ ꓡꓯꓼ ꓙꓱ_ ꓟ꓾ ꓖꓶ_ ꓟ ꓗꓪ ꓐꓰ ꓣꓳ ꓝꓮꓲ ꓶ ꓤ ꓫꓱꓸ ꓤ ꓟꓬ ꓡ ꓟ ꓡꓰ ꓐꓰ ꓠꓲꓹ ꓡꓱ ꓟ ꓠꓬ ꓙꓳꓺ ꓠꓲꓹ ꓔꓯ ꓧꓪꓸ ꓡꓰ ꓝꓲ_ ꓡꓳ= ꓑ ꓑ ꓥꓪꓽ ꓑꓬ ꓣꓱꓽ ꓔ ꓟ ꓞꓳ ꓡꓱ ꓤ ꓡꓰ ꓐꓰ ꓬꓰ-ꓢꓴ ꓡꓯꓽ ꓒꓯꓹ ꓗꓪ ꓣꓳ ꓙꓳ_ ꓟ ꓮ ꓙꓵ ꓔꓯ ꓡꓯꓼ ꓙꓱ ꓗꓴꓸ ꓠꓹ ꓟ ꓣꓳ ꓢꓳ ꓠ ꓔ ꓡꓳ ꓐꓰ ꓐꓯ ꓔ ꓡꓳ=