ꓢꓲ-ꓫꓬ ꓟ-ꓦ ꓠꓬ ꓙꓳꓺ ꓠꓲꓹ ꓮ ꓙꓵꓽ ꓗꓪ ꓐꓰ ꓡꓲꓹ ꓙꓰ ꓝꓲ_ ꓡꓳ꓾

ꓢꓲ-ꓫꓬ ꓟ-ꓦ ꓠꓬ ꓙꓳꓺ ꓠꓲꓹ ꓮ ꓙꓵꓽ ꓗꓪ ꓐꓰ ꓡꓲꓹ ꓙꓰ ꓝꓲ_ ꓡꓳ꓾

ꓢꓲ ꓒ ꓬꓰ-ꓢꓴ ꓠꓬ ꓬꓲ ꓛꓳꓽ ꓒꓯꓹ ꓐꓴ ꓔꓯ ꓙꓳꓺ ꓟ꓾ ꓠꓲꓹ ꓫ ꓟꓬ ꓫ ꓓꓴ ꓗꓪ ꓐꓰ ꓡꓲꓹ ꓙꓰ ꓠꓹ ꓟ ꓠꓲꓹ ꓡꓶꓽ ꓙꓳ_ ꓟ ꓑꓶ ꓓꓴ ꓙꓰ ꓢꓲ꓾ ꓪꓴ-ꓢ ꓶꓼ ꓓꓳꓽ ꓫꓱꓸ ꓓꓳꓽ ꓔꓯ ꓢꓷꓸ ꓙ ꓟꓳ ꓙ ꓝꓲ ꓟ ꓥꓳ=

ꓶꓼ ꓓꓳꓽ ꓫꓱꓸ ꓓꓳꓽ ꓬꓳ-ꓦ ꓕꓳ ꓶ ꓗꓪ ꓝꓲ ꓓꓴ ꓐꓴ ꓠꓬ ꓙꓳꓺ ꓟ ꓑꓶ ꓓꓴ ꓠꓲꓹ ꓟ ꓗꓸ ꓘꓶꓽ ꓔꓯ ꓚꓵꓸ ꓔ ꓟ ꓔꓯ ꓡꓳꓸ ꓟꓳ ꓪ ꓡꓳ= ꓢꓲ ꓒ ꓬꓰ-ꓢꓴ ꓡꓯꓼ ꓐꓳ ꓔꓶꓸ ꓓꓴ ꓕꓯ ꓢꓲ꓾ ꓫꓵꓻ ꓟ ꓔꓯ ꓬꓲ ꓪ ꓓꓵꓽ ꓙ ꓟꓶ ꓡꓰ ꓢꓲ꓾ ꓬꓲ ꓪ ꓥꓳ ꓡꓳꓸ ꓓꓴ ꓟꓶꓽ ꓡꓰ ꓟ ꓑꓶ ꓓꓴ ꓬꓲ ꓪ ꓚꓲꓸ ꓛꓬ ꓠꓲꓹ ꓟ ꓗꓸ ꓘꓶ ꓚꓵꓸ ꓢꓲ ꓔꓬ ꓟ ꓥꓳ=

ꓣꓳ ꓥ ꓟꓲ ꓮ ꓟꓬ ꓧꓪꓹ ꓛꓲ ꓣꓳ ꓠꓲꓹ ꓟ ꓗꓸ ꓘꓶꓽ ꓚꓵꓸ ꓢꓲ ꓔꓬ ꓡ? ꓫꓸ ꓓꓴ ꓟꓷꓼ ꓓꓴ ꓟꓽ ꓥ ꓠꓬ ꓣꓳ ꓠꓯꓼ ꓗꓪ ꓢ-ꓓꓯ ꓟꓽ ꓙꓲ_ ꓟ ꓘꓷ ꓡꓶꓽ ꓡ ꓟ ꓑꓶ ꓓꓴ ꓣꓳ ꓟꓲ ꓕꓯ ꓗꓪ ꓙ ꓫꓱꓽ ꓠꓹ ꓟ ꓢꓯꓼ ꓟꓽ ꓙꓳ꓾ ꓥꓳ ꓡꓳꓸ ꓓꓴ ꓟꓶꓽ ꓡꓰ ꓡ ꓥꓳ= ꓮ ꓘꓶꓸ ꓫ ꓔ ꓟ ꓙꓵꓹ ꓗꓪ ꓙꓳꓺ ꓠꓲꓹ ꓔꓯ ꓧꓪꓸ ꓡꓰ ꓝꓲ_ ꓟ ꓠꓬ ꓣꓳ ꓚꓲꓸ ꓛꓬ ꓠꓲꓹ ꓟ ꓗꓸ ꓘꓶꓽ ꓚꓵꓸ ꓢꓲ ꓔꓬ ꓟ ꓥꓳ= ꓕꓱ ꓟ ꓠꓬ ꓔꓬ ꓦꓲꓻ ꓕꓲ ꓦꓲꓻ ꓗꓸ ꓘꓶꓽ ꓚꓵꓸ ꓢꓲ ꓔꓬ ꓠꓬ ꓙꓻ ꓡꓯꓽ ꓘꓳ ꓠꓹ ꓟ ꓫꓸ ꓔ ꓟ ꓡꓰ ꓐꓰ ꓠꓲꓹ ꓟ ꓗꓸ ꓘꓶꓽ ꓚꓵꓸ ꓢꓲ ꓔꓬ ꓥ ꓟꓲ ꓕꓱ ꓡꓱ ꓥ ꓡꓳ=

ꓙꓳꓺ ꓟ꓾ ꓥꓳꓽ ꓡꓰ ꓟ ꓔꓯ ꓣꓳ ꓠꓲꓹ ꓟ ꓗꓪ ꓬꓲꓸ ꓔꓶꓸ ꓖꓶ ꓕꓯ ꓣꓳ ꓔꓯ ꓝꓴꓲ ꓖꓶ ꓡ ꓐꓰ ꓣꓳ ꓔꓯ ꓠꓲꓹ ꓦꓶꓻ ꓡ ꓐꓰ ꓓꓵꓽ ꓙ ꓢꓲ꓾ ꓪꓴ-ꓢ ꓔꓯ ꓙꓳꓺ ꓟ ꓥ ꓟꓲ ꓙꓳ ꓥꓳ= ꓙꓳꓺ ꓟ ꓑꓶ ꓓꓴ ꓠꓲꓹ ꓟ ꓗꓸ ꓘꓶꓽ ꓐꓲꓸ ꓔ ꓟ ꓙꓳ ꓐꓭ ꓥꓳ꓾ ꓖꓳ ꓡꓱ ꓥ ꓟꓲ ꓪꓴ-ꓢ ꓠꓬ ꓕꓱ ꓡꓱ ꓣꓳ ꓔꓯ ꓠꓲꓹ ꓟ ꓦꓶꓻ ꓟ ꓟꓽ ꓙꓳ= ꓢꓯꓸ ꓬꓯꓼ ꓡ ꓟ ꓪꓴ-ꓢ ꓡꓰ ꓢꓲ-ꓫꓬ-ꓟ-ꓦ ꓗꓪ ꓐꓰ ꓪꓴ-ꓢ ꓶꓼ ꓓꓳꓽ ꓫꓱꓸ ꓓꓳꓽ ꓠꓬꓲ ꓟꓳ ꓓꓴ ꓖꓶ_ ꓡꓳ= ꓣꓳ ꓔꓯ ꓙꓳꓺ ꓠꓲꓹ ꓗꓪ ꓐꓰ ꓡꓲꓹ ꓙꓰ ꓡꓰ ꓝꓲ_ ꓡꓳ꓾ ꓐꓰ ꓔꓲꓺ ꓒ ꓪ ꓔꓲ ꓡꓰ ꓢꓯꓼ ꓖꓶ_ ꓡꓳ=

ꓢꓲ-ꓫꓬ-ꓟ-ꓦ ꓡꓰ ꓣꓳ ꓔꓯ ꓪꓴ-ꓢ ꓐꓰ ꓠꓶꓽ ꓞꓹ ꓠꓹ ꓟ ꓬꓰ ꓖꓶ ꓡꓳ= ꓬꓲ ꓠꓵ ꓠꓲꓹ ꓠꓬ ꓙꓳꓺ ꓠꓲꓹ ꓔꓯ ꓟꓶꓽ ꓡꓰ ꓝꓲ_ ꓟ꓾ ꓠꓬꓲ ꓟꓳ ꓓꓴ ꓖꓶ_ ꓟ꓾ ꓠꓲꓹ ꓗꓳ ꓟꓬ ꓗꓳ ꓖꓶ_ ꓡꓳ= ꓣꓳ ꓮ ꓙꓵꓽ ꓢꓴ ꓐꓱ ꓶ꓾ ꓘꓴ ꓜꓲꓼ ꓞꓳ ꓐꓱ ꓶ꓾ ꓕꓲ ꓟꓲ ꓠꓯ ꓡꓱꓼ ꓐꓱ ꓶ꓾ ꓢꓲ-ꓫꓬ-ꓟ-ꓦ ꓬꓯꓼ ꓡ ꓟ ꓑꓮꓲ ꓦꓬꓼ ꓠꓬꓲ ꓠꓬ ꓣꓳ ꓠꓯꓼ ꓗꓪ ꓔꓳꓹ ꓜꓳ ꓡ ꓟ ꓙꓳꓺ ꓓꓴ ꓮ ꓙꓵꓽ ꓔꓯ ꓟꓶꓽ ꓡꓰ ꓝꓲ_ ꓡꓳ꓾ ꓐꓰ ꓔꓲꓺ ꓒ ꓪ ꓔꓲ ꓡꓰ ꓢꓯꓼ ꓖꓶ_ ꓡꓳ=