ꓪꓴ-ꓢ ꓠꓬ ꓐꓲ ꓜꓲꓼ_ ꓟ ꓙꓲ-ꓢꓴ ꓢꓲ ꓤ ꓐꓴ ꓔꓯ ꓣꓱꓽ ꓬꓯꓼ_ ꓟ ꓟꓽ ꓥ=

ꓪꓴ-ꓢ ꓠꓬ ꓐꓲ ꓜꓲꓼ_ ꓟ ꓙꓲ-ꓢꓴ ꓢꓲ ꓤ ꓐꓴ ꓔꓯ ꓣꓱꓽ ꓬꓯꓼ_ ꓟ ꓟꓽ ꓥ=

ꓬꓰ-ꓢꓴ ꓡꓰ ꓬꓲ ꓠꓯꓼ ꓗꓪ ꓓꓵꓽ ꓙ ꓟꓬꓽ_ ꓟ ꓕꓳ-ꓟ ꓔꓯ ꓫꓱꓸ ꓤ ꓟ ꓐꓰ ꓐꓯ ꓖꓶ_ ꓡꓳ= ꓕꓱ ꓐꓯ ꓘꓶꓽ ꓠꓬ ꓐꓲ ꓜꓲꓼ_ ꓟ ꓙꓲ ꓢꓴ ꓢꓲ ꓤ ꓐꓴ ꓔꓯ ꓟꓽ ꓥꓳ ꓡꓳꓸ ꓬꓲ ꓔꓯ ꓧꓪꓹ ꓟ-ꓸ ꓘꓴꓽ_ ꓟ ꓔꓯ ꓥꓳ ꓡꓳꓸ ꓔ ꓟ ꓥꓳ= ꓖꓳ ꓡꓱ ꓥ ꓟꓲ ꓣꓳ ꓚꓲ ꓛꓬ ꓔꓳꓹ ꓜꓳ ꓕꓯ ꓢꓲ ꓙꓵꓸꓹ ꓐꓯ_ ꓟ ꓕꓱ ꓟ ꓠꓬ ꓣꓳ ꓥ ꓟꓲ ꓠꓲꓹ ꓫꓵ_ ꓟ ꓣꓳ ꓓꓵꓽ ꓙ ꓟ ꓣꓳ ꓙꓵꓸꓹ ꓟꓽ ꓐ ꓡ ꓟ ꓔꓯ ꓙꓵꓸꓹ ꓠꓹ ꓟ ꓐꓱ ꓶ ꓟꓸ ꓖꓶ ꓟ ꓡꓰ ꓥ ꓡꓳ ꓐꓰ ꓔꓲꓸꓸ ꓒ ꓪ ꓔꓲ ꓡꓰ Angelus ꓪꓽ ꓘꓴ ꓙꓵꓹ ꓟꓽ ꓛꓲ ꓟꓲ ꓕꓯ St. Peter ꓪꓽ ꓘꓴ ꓦꓲ ꓓ ꓗꓪ ꓐꓰ ꓐꓯ ꓔ ꓡꓳ=

ꓫꓱꓸ ꓤ ꓟ ꓬꓰ-ꓢꓴ ꓠꓽ ꓫꓵꓽ ꓠꓬꓲ ꓥ ꓡꓳ= ꓶꓽ ꓓꓳ ꓫꓱꓸ ꓓꓳ ꓠꓬ ꓬꓰ-ꓢꓴ ꓡꓰ ꓕꓳ-ꓟ ꓠꓯꓼ ꓗꓪ ꓙꓳ_ ꓟ ꓫꓱꓸ ꓤ ꓠꓲꓹ ꓚꓱꓹ ꓥ ꓡꓳ= ꓬꓰ-ꓢꓴ ꓠꓬ ꓬꓲ ꓪ ꓗꓳ ꓡꓳ ꓗꓪ ꓡ ꓕꓯ ꓕꓳ-ꓟ ꓟꓽ ꓔꓬ ꓟ ꓥꓳ= ꓕꓳ-ꓟ ꓠꓬ ꓣꓳ ꓕꓲꓽ ꓣꓳ ꓡꓰ ꓕꓲꓽ ꓣꓳ ꓔꓯ ꓔꓯ ꓟ ꓥꓳ= ꓣꓳ ꓥ ꓟꓲ ꓕꓳ-ꓟ ꓡꓰ ꓐꓰ ꓬꓰ-ꓢꓴ ꓢꓯꓸ ꓬꓲꓼ ꓡ ꓟ-ꓸ ꓬꓲ ꓠꓬ ꓣꓳ ꓐꓰ ꓔꓬ ꓟ-ꓸ ꓣꓳ ꓤꓶꓸꓹ ꓔꓯ ꓙꓵꓽ ꓢꓴ ꓥ ꓟ ꓔꓯ ꓮ ꓡꓰ ꓘꓳꓹ ꓣꓴ ꓠꓹ ꓟ ꓓꓵꓽ ꓙ ꓟꓬꓹ ꓟ ꓥꓳ=

ꓬꓲ ꓔꓬ ꓟ-ꓸ ꓠꓵ ꓠꓲꓹ ꓔꓯ ꓟꓬ ꓠꓬꓲ ꓢꓷꓸ ꓠꓹ ꓟ ꓣꓳ ꓔꓯ ꓟꓽ ꓟꓸ ꓔ ꓡ? ꓐꓰ ꓠ ꓠꓬꓲ ꓓꓴ ꓮ ꓟꓬꓹ ꓙꓳ_ ꓡꓳ= ꓣꓳ ꓠꓬ ꓕꓳ-ꓟ ꓡꓰ ꓐꓰ ꓠꓲꓹ ꓟ ꓘꓴꓽ ꓗꓪ ꓐꓰ ꓓꓵꓽ ꓙ ꓟꓶ ꓓꓴ ꓮ ꓟꓬꓹ ꓙꓳ_ ꓟ ꓥꓳ= ꓕꓱ ꓡꓱ ꓗꓷ ꓟ ꓠꓬ ꓣꓳ ꓠꓬ ꓫꓸ ꓔꓳ ꓓꓴ ꓟꓽ ꓥ= ꓶꓽ ꓓꓳ ꓫꓱꓸ ꓓꓳ ꓗꓪ ꓕꓳ-ꓟ ꓚꓱꓹ ꓗꓪ ꓐꓰ ꓬꓰ-ꓢꓴ ꓠꓬ ꓐꓲ ꓜꓲꓼ_ ꓟ ꓙꓲ-ꓢꓴ ꓢꓲ ꓤ ꓔꓯ ꓧꓪꓹ ꓟ ꓟꓽ ꓥ ꓟ ꓔꓯ ꓟꓸ ꓖꓶ_ ꓡꓳ=

ꓣꓳ ꓚꓲ ꓛꓬ ꓐꓲ ꓜꓲꓼ_ ꓡꓳ-ꓸ ꓝꓴꓲ ꓢꓲ ꓫꓬ ꓡꓳ ꓐꓰ ꓓꓵꓽ ꓙ ꓟꓶ ꓟ ꓙꓲ ꓢꓴ ꓢꓲ ꓤ ꓔꓯ ꓟꓳ ꓠꓬ ꓫꓱꓸ ꓤ_ ꓡꓳ=  ꓮ ꓫꓵꓽ ꓑꓶ ꓓꓴ ꓥ ꓐꓯ ꓠꓬ ꓬꓰ-ꓢꓴ ꓧꓪꓹ ꓢꓴ ꓗꓪ ꓐꓰ ꓬꓲ ꓪ ꓚꓲ ꓛꓬ ꓒꓯ_ ꓟ ꓑꓶ ꓓꓴ ꓥ ꓡꓳ= ꓬꓰ-ꓢꓴ ꓠꓬ ꓬꓲꓠꓯꓼ ꓗꓪ ꓟꓽ ꓓꓵꓽ ꓙ ꓟꓬ ꓟ ꓔꓯ ꓧꓪꓹ ꓟ ꓟꓽ ꓥ= ꓙꓵꓸꓹ ꓠꓲꓹ ꓤꓶꓸꓹ ꓗꓪ ꓥ ꓟꓲ ꓕꓳ-ꓟ ꓡꓰ ꓐꓰ ꓙꓲ_ ꓟ ꓐꓰ ꓟꓽ ꓙꓲ_ ꓟ ꓕꓱ ꓡꓱ ꓙꓳ_ ꓟ ꓥꓳ= ꓢꓯꓼ ꓕꓵꓼ_ ꓟ-ꓸ ꓕꓲꓽ ꓒꓳꓹ ꓗꓪ ꓥ ꓟꓲ ꓢꓯꓼ ꓐ_ ꓟ ꓕꓱ ꓡꓱ ꓙꓳ_ ꓡꓳ=

 ꓶꓽ ꓓꓳ ꓫꓱꓸ ꓓꓳ ꓗꓪ ꓕꓳ-ꓟ ꓡꓰ ꓐꓰ ꓓꓵꓽ ꓙ ꓟꓬ ꓟ ꓕꓱ ꓡꓱ ꓫꓵꓽ ꓔꓳꓹ ꓜꓳ ꓡ ꓠꓬ ꓠꓲꓹ ꓟ ꓔꓱ ꓔꓱ_ ꓐꓰ ꓙꓵꓸꓹ ꓠꓲꓹ ꓔꓯ ꓢꓯꓼ ꓕꓵꓼ ꓠꓹ ꓟ ꓣꓱꓽ ꓬꓯꓼ ꓡꓳ= ꓕꓳ-ꓟ ꓔꓳꓹ ꓜꓳ ꓟ ꓠꓬ ꓝꓴꓲ ꓟꓽ ꓥ= ꓙꓵꓸꓹ ꓠꓲꓹ ꓚꓱꓹ ꓗꓪ ꓔꓳꓹ ꓜꓳ ꓡ_ ꓟ ꓡꓰ ꓥ ꓡꓳ= ꓕꓱ ꓡꓱ ꓔꓳꓹ ꓜꓳ ꓡ ꓟ ꓠꓬ ꓣꓳ ꓔꓯ ꓙꓽ ꓣꓳ_ ꓟ ꓠꓲꓹ ꓟ-ꓸ ꓣꓳ ꓓꓵꓽ ꓙ ꓟ ꓔꓯ ꓔꓱ_ ꓟ ꓚꓱꓹ ꓔꓯ ꓙꓸꓹ ꓫꓱꓽ ꓡꓰ ꓝꓲ_ ꓡꓳ= ꓣꓳ ꓠꓬ ꓠꓱꓸ ꓐꓯꓼ ꓢꓴ ꓡꓰ ꓐꓰ ꓬꓰ ꓙ ꓠꓹ ꓟ ꓣꓱꓽ ꓬꓯꓼ ꓟ ꓥꓳ= ꓪꓴ-ꓢ ꓠꓯꓼ ꓗꓪ ꓶꓽ ꓓꓰꓽ ꓠꓹ ꓟ ꓓꓵꓽ ꓙ ꓡ ꓥꓳ=

ꓠꓲꓹ ꓠꓵ ꓟ ꓬꓲ ꓤ ꓠꓬꓲ ꓤ ꓐꓴ ꓟꓽ ꓐꓲ ꓜꓲꓼ_ ꓟ ꓠꓬ ꓟꓬ ꓠꓬꓲ ꓙꓲ_ ꓡꓳ= ꓖꓳ ꓡꓱ ꓥ ꓟꓲ ꓙꓽ ꓣꓳ_ ꓟ ꓠꓲꓹ ꓟ ꓙꓵꓸꓹ ꓠꓲꓹ ꓐꓰ ꓬꓰ-ꓢꓴ ꓠꓯꓼ ꓗꓪ ꓡ ꓠ ꓔ ꓡꓳ= ꓣꓳ ꓚꓲ ꓛꓬ ꓪꓴꓽ_ ꓟ ꓠꓲꓹ ꓟ ꓙꓳ ꓢꓴ ꓠꓬ ꓶꓽ ꓙꓳ ꓫꓱꓸ ꓙꓳ ꓓꓴ ꓟꓽ ꓙꓳ= ꓓꓽ ꓪꓴꓸ ꓕꓲꓽ ꓧꓪꓹ ꓡ ꓕꓯ ꓕꓳ-ꓟ ꓟꓽ ꓔꓬ ꓟ ꓑꓶ ꓓꓴ ꓠꓬꓲ ꓧꓪꓹ ꓕꓲꓽ ꓧꓪꓹ ꓡ ꓟ ꓥꓳ= ꓬꓲ ꓠꓯꓼ ꓗꓪ ꓓꓵꓽ ꓙ ꓟꓬ ꓓꓴ ꓙꓳ ꓥ ꓟꓲ ꓝꓮꓲ ꓕꓲꓽ ꓧꓪꓹ ꓡ_ ꓟ ꓥꓳ= ꓮ ꓫꓵꓽ ꓑꓶ ꓓꓴ ꓥ ꓐꓯ ꓠꓬ ꓓꓵꓽ ꓙ ꓟꓬ ꓟ ꓔꓯ ꓕꓳ-ꓟ ꓡꓰ ꓐꓰ ꓢꓷꓸ ꓠꓹ ꓟ ꓐꓱ ꓶ ꓥ ꓡꓳ= ꓗꓸ ꓘꓶꓽ ꓔꓯ ꓮ ꓕꓯ ꓥ ꓟꓲ ꓰ’ꓼ ꓡꓳ= ꓣꓳ ꓔꓯ ꓫꓸ ꓔꓳ ꓝꓲ ꓠꓲꓹ ꓟ ꓐꓰ ꓡ_ ꓟ ꓟꓽ ꓥ=

ꓬꓰ-ꓢꓴ ꓠꓬ ꓣꓳ ꓔꓯ ꓬꓲꓸ ꓚꓱꓹ ꓮ ꓟꓬꓹ ꓖꓶ_ ꓟ ꓥ ꓡꓳ= ꓣꓳ ꓔꓯ ꓬꓲꓸ ꓚꓱꓹ ꓕꓲꓽ ꓟ ꓟꓽ ꓥ ꓕꓲꓽ ꓟ ꓮ ꓕꓯ ꓥ ꓟꓲ ꓒꓴ ꓖꓶ_ ꓟ ꓥꓳ= ꓪꓴ-ꓢ ꓠꓬ ꓮ ꓕꓯ ꓥ ꓟꓲ ꓝꓴꓲ ꓖꓽ ꓖꓶ ꓖꓶ_ ꓡꓳ= ꓕꓱ ꓟ ꓗꓪ ꓐꓰ ꓣꓳ ꓥ ꓟꓲ ꓫꓱꓸ ꓤ ꓗꓴꓸ ꓡ ꓟ ꓥ ꓡꓳ= ꓣ-ꓫꓸ ꓡꓰ ꓬꓴ-ꓗ-ꓣꓲꓸ ꓔꓯ ꓟꓯꓼ ꓢꓰꓼ ꓪꓴꓸ ꓔꓴ_ ꓟ (4) ꓦ 24 ꓠꓬꓲ ꓠꓽ ꓫꓵꓽ ꓠꓬꓲ ꓕꓯ ꓠꓬꓲ ꓦ ꓐꓲ ꓡꓰ ꓟ ꓥꓳ=

ꓔꓲꓸꓸ ꓒ ꓪ ꓔꓲ ꓡꓰ ꓮ ꓙꓵꓽ ꓔꓯ ꓠꓲꓹ ꓡꓱ ꓡꓱ ꓐꓰ ꓬꓰ-ꓢꓴ ꓢꓯꓸ ꓬꓲꓼ ꓡꓸꓸꓳ= ꓬꓲ ꓠꓬ ꓚꓵ ꓚꓵ ꓢꓯꓸ ꓬꓲꓼ ꓡꓸꓸꓳ= ꓬꓰ-ꓢꓴ ꓠꓬ ꓙꓲ_ ꓟ ꓠꓲꓹ ꓟ ꓙꓳ ꓢꓴ ꓠꓯꓼ ꓗꓪ ꓥꓳ ꓡꓳꓸ ꓓꓴ ꓔꓯ ꓖꓶ_ ꓡꓳ= ꓟꓶ_ ꓟ ꓠꓲꓹ ꓟ ꓐꓰ ꓟꓯꓼ ꓢꓰꓼ ꓪꓴꓸ ꓔꓴ ꓟ ꓔꓯ ꓢꓲ ꓡꓲꓹ ꓗꓹ ꓛꓲ ꓓꓴ ꓖꓶ ꓝꓲ ꓐꓰ ꓔꓲꓸꓸ ꓒ ꓪ ꓔꓲ ꓡꓰ ꓪꓽ ꓘꓴ ꓙ_ ꓡꓳ=