ꓪꓽ ꓘꓴ_ ꓟ ꓠꓬ ꓙꓵꓻ ꓠꓲꓹ ꓐꓱ ꓶ ꓠꓯꓺ ꓞꓲꓼ ꓥ ꓡꓳ꓾ ꓦ ꓔꓯ ꓢꓯꓼ ꓪ ꓖꓶ_ ꓡꓳ꓾

• ꓪꓽ ꓘꓴ_ ꓟ ꓠꓬ ꓙꓵꓻ ꓠꓲꓹ ꓐꓱ ꓶ ꓠꓯꓺ ꓞꓲꓼ ꓥ ꓡꓳ꓾ ꓦ ꓔꓯ ꓢꓯꓼ ꓪ ꓖꓶ_ ꓡꓳ꓾

10 ꓦ 16 ꓠꓬꓲ ꓠꓽ ꓫꓵ ꓠꓬꓲ Angelus ꓪꓽ ꓘꓴ ꓙꓵꓹ ꓕꓯ ꓔꓲꓺ ꓒ ꓪ ꓔꓲ ꓡꓰ ꓪꓴ-ꓢ ꓐꓰ ꓠꓶꓽ ꓞꓹ ꓢꓴ ꓐꓴ ꓔꓯ ꓠꓲꓹ ꓠꓵ ꓠꓹ ꓟ ꓐꓱ ꓶ ꓪꓽ ꓘꓴ_ ꓟ ꓠꓬ ꓫꓸ ꓔ ꓡꓳ꓾ ꓕꓱ ꓟ ꓠꓬ ꓙꓵꓺ ꓠꓲꓹ ꓠꓯꓺ ꓞꓲꓼ ꓥ ꓡꓳ꓾ ꓦ ꓔꓯ ꓝꓮꓲ ꓢꓯꓼ ꓪ ꓖꓶ_ ꓡꓳ꓾ ꓐꓰ ꓐꓯ ꓔ ꓡꓳ=

ꓶꓼ ꓓꓳ ꓫꓱꓹ ꓓꓳ ꓔꓯ ꓠꓬ ꓖꓳ ꓕꓲ ꓠꓬꓲ ꓢꓲ ꓫꓬ ꓕꓳ ꓶ ꓝꓲꓸ ꓗꓪ ꓐꓰ ꓐꓯ ꓔ ꓡꓳ꓾ “ꓡ- ꓞꓳ-ꓮ-ꓐꓲ ꓡ_ ꓕꓯ ꓟꓲ ꓠꓯ ꓗꓪ ꓙꓵꓻ ꓠꓲꓹ ꓧꓪ ꓟꓶ_ ꓥꓳ ꓪ?” (ꓡꓴ-ꓘ 18ꓽ8) ꓕꓱ ꓢꓲ ꓫꓬ ꓕꓳ ꓶ ꓝꓲꓸ ꓗꓪ ꓠꓬ ꓣꓳ ꓚꓲ ꓛꓬ ꓠ ꓠꓬꓲ ꓓ_ ꓟ ꓚꓱꓹ ꓔꓲꓺ ꓒ ꓪ ꓔꓲ ꓣꓳ ꓔꓯ ꓐꓯ ꓔ ꓟ ꓥꓳ=

ꓠꓲꓹ ꓟ ꓟꓽ ꓢ ꓠꓹ ꓟ ꓚꓱꓹ꓾ ꓟꓯꓼ ꓢꓰꓼ ꓓꓴ ꓟꓬ ꓡ_ ꓟ꓾ ꓫꓸ ꓢꓴ ꓟꓬ ꓡ_ ꓟ꓾ ꓟꓽ ꓪ ꓡꓯꓼ ꓘꓳ ꓟꓽ ꓫꓱꓹ ꓡꓯꓼ ꓘꓳ_ ꓟ ꓚꓱꓹ꓾ ꓟꓲ ꓠꓯ ꓪꓴꓽ ꓟꓴ ꓡ_ ꓟ ꓗꓪ ꓐꓰ ꓢꓷꓸ ꓠꓲꓹ ꓪꓴꓽ ꓟꓴ ꓡ ꓚꓱꓹ ꓔꓯ ꓥ ꓟꓲ ꓬꓲꓸ ꓟꓳ ꓡ ꓟ ꓥꓳ= ꓪꓴ-ꓢ ꓔꓯ ꓟꓲ ꓕꓯ ꓗꓪ ꓟꓽ ꓔꓬ ꓝꓲ_ ꓟ ꓟꓲ ꓠꓯ ꓡ ꓞꓳ ꓔꓯ ꓪꓴ-ꓢ ꓟꓳ_ ꓡ? ꓪꓴ-ꓢ ꓔꓯ ꓟꓲ ꓠꓯ ꓗꓪ ꓔꓬ ꓝꓲ ꓓꓴ ꓬꓰ ꓡꓯ ꓐꓰ ꓔꓲꓺ ꓒ ꓪ ꓔꓲ ꓡꓰ ꓢꓯꓼ ꓖꓶ_ ꓡꓳ=

ꓬꓰ-ꓢꓴ ꓙꓲ-ꓢꓴ ꓠꓬ ꓙꓵꓻ ꓠꓲꓹ ꓔꓯ ꓗꓽ ꓕ_ ꓟ ꓠꓯꓺ ꓞꓲꓼ ꓔꓯ ꓖꓶ_ ꓟ ꓥꓳ= ꓕꓱ ꓟ ꓠꓬ ꓮ ꓫꓵꓽ ꓥ ꓡ? ꓪꓽ ꓘꓴ_ ꓟ ꓚꓱꓹ ꓥ ꓡꓳ= ꓪꓽ ꓘꓴ ꓟ ꓠꓬ ꓙꓵꓻ ꓠꓲꓹ ꓐꓱ ꓶ ꓠꓯꓺ ꓞꓲꓼ ꓓ ꓟ ꓥ ꓡꓳ꓾ ꓦ ꓔꓯ ꓥ ꓟꓲ ꓗꓽ ꓕ ꓖꓶ_ ꓟ ꓥꓳ꓾ ꓐꓰ ꓔꓲꓺ ꓒ ꓪ ꓔꓲ ꓡꓰ ꓐꓯ_ ꓟ ꓥꓳ=

ꓣꓳ ꓙꓵꓻ ꓠꓲꓹ ꓢꓯꓸ ꓔꓬ ꓠꓹ ꓟ ꓐꓱ ꓶ ꓣꓳ ꓠꓬ ꓮ ꓕꓯ ꓥ ꓟꓲ ꓪꓽ ꓘꓴ ꓠꓹ ꓟ ꓥꓳ꓾ ꓕꓱ ꓟ ꓠꓬ ꓣꓳ ꓦ ꓢꓯꓼ ꓪ ꓔꓯ ꓙꓲ ꓙꓲ ꓡꓰ ꓢꓯꓼ ꓙꓳ ꓙꓳ ꓡꓰ ꓢꓯꓸ ꓔꓬ ꓝꓲ_ ꓟ ꓥꓳ ꓐꓰ ꓐꓯ_ ꓟ ꓥꓳ=

ꓣꓳ ꓠꓬ ꓕꓲ ꓠꓬꓲ ꓡꓲ ꓕꓲ ꓠꓬꓲ ꓪꓽ ꓘꓴ ꓠꓹ ꓟ ꓥ ꓡꓳ꓾ ꓮ ꓕꓯ ꓥ ꓟꓲ ꓪꓴ-ꓢ ꓔꓯ ꓡꓯꓼ ꓛꓱ ꓠ ꓔ ꓡꓳ꓾ ꓬꓲꓸ ꓣꓳ ꓠꓯꓼ ꓗꓪ ꓮ ꓕꓯ ꓥ ꓟꓲ ꓔꓬ ꓠꓹ ꓟ ꓐꓱ ꓶ ꓣꓳ ꓠꓲꓹ ꓟ ꓗ ꓘꓶꓽ ꓔꓯ ꓒꓴ ꓖꓶ ꓓꓴ ꓬꓰ ꓡꓯ= ꓣꓳ ꓔꓯ ꓠꓲꓹ ꓠꓵ_ ꓟ꓾ ꓢꓲ ꓡꓲꓹ ꓟ꓾ ꓗꓹ ꓛꓲ_ ꓟ꓾ ꓢꓯꓼ ꓪ꓾ ꓠꓲꓹ ꓟ ꓔꓬ ꓖ ꓔꓯ ꓬꓲ ꓡꓰ ꓢꓯꓼ ꓪ ꓖꓶ ꓢꓲ꓾ ꓙꓵꓻ ꓠꓲꓹ ꓔꓯ ꓕꓶꓻꓡꓰ ꓠꓹ ꓟ ꓥ ꓡꓳ꓾ ꓐꓰ ꓔꓲꓺ ꓒ ꓪ ꓔꓲ ꓡꓰ ꓐꓯ ꓔ ꓡꓳ=

ꓣꓳ ꓧꓪꓸ ꓛꓲ ꓡ_ ꓟ ꓙꓵꓹ ꓗꓪ ꓐꓰ “ ꓪꓴ-ꓢ꓾ꓳ ꓕꓱ ꓕꓲ ꓠꓬꓲ ꓐꓱ ꓶ ꓪꓴ-ꓢ ꓠꓴ ꓔꓯ ꓫꓸ ꓟꓳ ꓡꓳ= ꓕꓱ ꓕꓲ ꓠꓬꓲ ꓔꓯ ꓪꓴ-ꓢ ꓠꓴ ꓐꓱ ꓶ ꓡꓯꓼ ꓛꓱ_ ꓥꓳ ꓐꓰ ꓪꓽ ꓘꓴ꓾ ꓟꓬꓱꓽ ꓬꓰ ꓟꓽ ꓪꓴꓸ ꓔꓴ_ ꓟ ꓙꓵꓹ ꓕꓯ “ꓡꓯ꓾ ꓪꓴ-ꓢ ꓥꓪ ꓔꓯ ꓡꓯ꓾” ꓐꓰ ꓪꓽ ꓘꓴ꓾ “ꓬꓰ-ꓢꓴ꓾ꓳ ꓥꓪ ꓠꓴ ꓔꓯ ꓙꓵꓻ ꓡꓳ꓾ ꓠꓴ ꓔꓯ ꓠꓲꓹ ꓠꓵ ꓡꓳ꓾ ꓐꓰ ꓪꓽ ꓘꓴ ꓐꓰ ꓔꓲꓺ ꓒ ꓪ ꓔꓲ ꓡꓰ ꓪꓽ ꓘꓴ ꓠꓹ ꓟ ꓚꓱꓹ ꓔꓯ ꓟꓸ ꓖꓶ ꓡꓳ=

ꓬꓲꓸ ꓟꓶꓽ ꓗꓪ ꓟꓹ ꓟ ꓟ-ꓡꓲ ꓠꓬ ꓣꓳ ꓪꓽ ꓘꓴ ꓘꓶꓽ ꓔꓯ ꓠ ꓠꓹ ꓖꓶ ꓢꓲ ꓮ ꓕꓯ ꓥ ꓟꓲ ꓪꓽ ꓘꓴ ꓠꓹ ꓟꓔꓯ ꓟꓸ ꓖꓶ ꓝꓲ ꓐꓰ ꓪꓽ ꓘꓴ ꓠꓹ ꓟ ꓔꓯ ꓔꓲꓺ ꓒ ꓪ ꓔꓲ ꓡꓰ ꓢꓯꓼ ꓖꓶ_ ꓡꓳ=