ꓖ; ꓟ: ꓟꓶꓳ ꓐꓰ ꓮ ꓟ ꓐꓯ ꓔꓬ ꓢꓰꓽ ꓡ?

ꓖ; ꓟ: ꓟꓶꓳ ꓐꓰ ꓮ ꓟ ꓐꓯ ꓔꓬ ꓢꓰꓽ ꓡ?

ꓞꓳ ꓤ ꓮ ꓟꓬꓹ ꓔꓯ ꓙꓳ ꓡꓰ ꓝꓲ_ ꓟ ꓫꓸ ꓪ ꓕꓲꓽ ꓘꓶꓽ ꓠꓬ ꓖꓼ ꓟꓽ ꓟꓶ ꓡꓰ ꓪ ꓐꓯ_ ꓟ ꓕꓱ ꓕꓲꓽ ꓘꓶꓽ ꓟ ꓥ ꓡꓳ= ꓞꓳ ꓡꓱ ꓕꓲ ꓣꓳ ꓠꓬ ꓕꓳ ꓶ ꓢꓳ ꓠꓽ ꓡꓰ ꓢꓲ꓾ ꓬꓲꓸ ꓒꓵꓽ ꓮ ꓟꓬꓹ ꓟꓽ ꓪ_ ꓟ ꓟꓬꓱꓽ ꓬꓰ ꓔꓬ ꓕꓯ ꓕꓱ ꓡꓱ ꓓꓵꓽ ꓙ_ ꓡꓳ꓾ ꓥꓪ ꓕꓳ ꓶ  ꓟꓽ ꓢꓳ ꓠꓽ ꓡꓰ ꓐꓯ ꓠ ꓗꓹ ꓛꓲ ꓛꓲ ꓔꓬ ꓪ ꓓꓴ ꓮ ꓟꓶ ꓠꓽ ꓖꓼ ꓟꓽ ꓟꓶꓳ ꓐꓰ ꓐꓯ ꓡꓳ= ꓐꓹ ꓐ ꓣꓱꓽ ꓢꓴ ꓕꓲ ꓣꓳ ꓥ ꓟꓲ ꓗꓳꓸ ꓡꓳꓹ ꓡ ꓟ ꓕꓲ ꓙꓵꓹ ꓗꓪ ꓦꓲꓸꓹ ꓢꓲ ꓟ ꓐꓰ ꓤ ꓠꓱ ꓐꓴ ꓔꓯ ꓠꓵ ꓠꓲꓹ ꓟꓽ ꓖꓶ ꓪ ꓣꓱꓽ ꓙ ꓟꓽ ꓪ ꓮ ꓟꓶ ꓬꓰ ꓙ ꓠꓲꓹ ꓫꓵ ꓥ ꓟꓲ ꓖꓼ ꓟꓽ ꓟꓶꓳ ꓐꓰ ꓐꓯ ꓔꓬ ꓡꓳ= ꓙꓲꓺ ꓒꓶꓽ ꓮ ꓘꓶꓸ ꓓꓳ_ ꓟ ꓞꓳ ꓤ ꓕꓲ ꓣꓳ ꓔꓯ ꓟꓬꓱꓽ ꓬꓰ ꓖ ꓗꓪ ꓐꓰ ꓖꓼ ꓓꓳ ꓗꓷ ꓢꓴ ꓥ ꓟꓲ ꓙꓲꓺ ꓒꓶꓽ ꓓꓳ_ ꓟ ꓕꓱ ꓟ ꓔꓯ ꓠꓽ ꓗꓷ ꓢꓲ꓾ ꓬꓲ ꓤꓶꓸꓹ ꓔꓯ ꓬꓲ ꓫꓵꓼ ꓫꓬꓹ ꓦꓵꓸꓹ ꓙꓲ_ ꓡꓳ꓾ ꓖꓳ ꓡꓰ ꓐꓯ ꓥ ꓟꓲ ꓖꓼ ꓟꓽ ꓟꓶꓳ ꓐꓰ ꓟꓲ ꓠꓯ ꓗꓪ ꓔꓬ ꓟ ꓞꓳ ꓤ ꓮ ꓙꓵꓽ ꓠꓬ ꓖꓳ ꓡꓰ ꓟꓳ ꓔꓬ ꓡꓳ= ꓣꓳ ꓦꓲꓸꓹ ꓘꓴꓽ ꓡ ꓞꓳ ꓠꓯꓼ ꓗꓪ ꓡꓳꓸ ꓠꓬꓲ ꓠꓬ ꓦꓲꓸꓹ ꓢꓲ ꓒ ꓦꓲꓸꓹ ꓢꓲ ꓟ ꓠꓬ ꓕꓲ ꓣꓳ ꓕꓲ ꓘꓶꓽ ꓐꓯ ꓡꓯꓼ ꓘꓳ ꓕꓯ ꓕꓲ ꓑꓹ ꓤ ꓡꓰ ꓫꓸ ꓪ ꓟꓽ ꓕꓱ ꓡꓯꓼ ꓘꓳ ꓡ ꓥꓳ꓾ ꓬꓲ ꓙꓵꓹ ꓟꓶꓺ ꓫꓵ ꓡ ꓠꓬ ꓠꓲꓹ ꓢꓲꓼ ꓡꓯꓼ ꓘꓳ ꓟ ꓟꓶ ꓡꓰ ꓢꓲ꓾ ꓫꓸ ꓪ ꓔꓯ ꓙꓲ ꓙꓲ ꓕꓱ ꓡꓯ ꓘꓳ ꓡ ꓥꓳ= ꓖꓳ ꓡꓰ ꓠꓲꓹ ꓢꓲꓼ  ꓡꓯꓼ ꓘꓳ_ ꓕꓯ ꓖꓼ ꓟꓽ ꓟꓶꓳ ꓐꓰ ꓓꓵꓽ ꓙ ꓔꓬ ꓠꓬ ꓟꓲ ꓠꓯ ꓗꓪ ꓔꓬ ꓟ ꓦꓲꓸꓹ ꓢꓲ ꓒꓽ ꓐꓰ ꓦꓲꓸꓹ ꓢꓲ ꓟ ꓐꓴ ꓠꓬ  ꓧꓹ ꓡꓯꓼ ꓘꓳ ꓓꓴ ꓡꓰ ꓗꓷ ꓡ ꓥꓳ= ꓠꓲꓹ ꓠꓵ ꓟ ꓮ ꓐ ꓮ ꓟ ꓐꓴ ꓖꓼ ꓟꓽ ꓟꓶꓳ ꓐꓰ ꓐꓯ ꓔꓬ ꓢꓴ ꓠꓬ ꓞꓳ ꓙꓵꓽ ꓥ ꓡꓳ= ꓣꓳ ꓮ ꓫꓵꓽ ꓟꓬꓱꓽ ꓬꓰ ꓔꓬ ꓡ ꓐꓯ ꓥ ꓟꓲ ꓥꓳꓽ ꓡꓰ ꓟ ꓬꓲ ꓙꓵꓹ ꓥ ꓟꓲ ꓙꓳ ꓡꓳ= ꓖꓳ ꓕꓯ ꓖꓼ ꓟꓽ ꓟꓶꓳ ꓐꓰ ꓕ ꓓꓵꓽ ꓙ= ꓠꓴ ꓒꓳꓹ ꓡꓲꓼ ꓡ ꓠꓬ ꓖꓼ ꓟꓶ ꓢꓰꓽ ꓡꓳ= ꓠꓲꓹ ꓠꓵ_ ꓟ ꓮ ꓐ ꓮ ꓟ ꓐꓴ ꓖꓼ ꓟꓽ ꓟꓶꓳ ꓐꓰ ꓐꓯ ꓟ ꓫꓸ ꓪ ꓕꓱ ꓕꓲ ꓘꓶꓽ ꓔꓯ ꓡꓳ ꓩꓴ ꓗꓷ ꓢꓲ꓾ ꓥꓪ ꓢꓯꓼ ꓕꓵꓼ ꓠꓬ ꓖꓼ ꓟꓶ ꓢꓰ_ ꓡꓳ ꓐꓰ ꓓꓵꓽ ꓙ ꓡꓯ=     

Add new comment

1 + 9 =