ꓡꓲ ꓒꓰꓼ ꓐꓰ ꓫꓸ ꓕꓱˍ ꓟ(Dialogue with Culture)

ꓕꓱ ꓕꓲ ꓫꓵꓽ ꓠꓽ ꓠꓬ ꓬꓴ-ꓔ ꓡꓲꓽ ꓒꓰꓼ ꓠꓯꓸꓼ ꓗꓪ ꓕꓲ ꓠꓬꓲ ꓡꓰ ꓕꓲ ꓠꓬꓲ ꓜꓽ ꓔꓬ ꓟ ꓜꓽ ꓪꓳꓽ ꓡꓳ ꓪꓳꓽ ꓥ ꓟ ꓑ ꓑ ꓐꓰ ꓛꓱꓼ ꓡꓱꓼ ꓙꓵ ꓔꓯ ꓢꓲꓺ ꓒ ꓬꓰ-ꓢꓴ ꓬꓲ ꓫꓵꓽ ꓬꓲ ꓧꓪꓽ ꓚꓵ ꓚꓵ ꓒꓬꓱꓼ ꓡꓰ ꓝꓲˍ ꓟ ꓚꓰꓼ ꓔ ꓟ ꓚꓱꓹ ꓔꓯ ꓟꓳꓸ ꓣꓳ ꓠ ꓠꓹ ꓓꓴ ꓬꓰ ꓡꓯ= ꓬꓳ-ꓦ 6ꓽ47-51 “ꓥꓪ ꓠꓬ ꓟꓴꓽ ꓗꓪ ꓗꓪ ꓐꓰ ꓬꓯꓼ ꓡˍ ꓟ ꓢꓯꓼ ꓟꓬ ꓑ ꓑ ꓥ ꓡꓳ= ꓑ ꓑ ꓕꓱ ꓟ ꓔꓯ ꓜꓽ ꓢꓴ ꓠꓬ ꓫꓵꓻˍ ꓟ ꓗꓪ ꓐꓰ ꓡꓲꓹ ꓙꓰ ꓐ ꓡˍ ꓥꓳ= ꓮ ꓕꓯ ꓥˍ ꓟꓲ ꓢꓯꓸ ꓔꓬ ꓥꓳ” ꓐꓰ ꓢꓲꓺ ꓒ ꓬꓰ-ꓢꓴ ꓡꓰ ꓕꓰ ꓡꓰ ꓐꓯ ꓔ ꓟ ꓙꓳˍ ꓡꓳ=

ꓖꓳ ꓟ ꓡꓰ ꓐꓰ ꓕꓲ ꓡꓰꓹ ꓟ-ꓕꓲ 26ꓽ1-27 ꓗꓪ ꓪꓴ-ꓢ ꓔꓯ ꓫꓸ ꓟꓳ ꓖꓶ ꓓꓳ ꓗꓸ ꓠꓯ꓾ ꓑ ꓑ ꓔꓯ ꓣꓴ ꓢꓲ ꓦꓶꓹ ꓢꓲ ꓠꓬꓲ꓾ ꓕꓱ ꓟ ꓠꓬ ꓥꓪ ꓧꓪꓽ ꓖꓳ ꓓꓱꓽ ꓥ ꓡꓳ꓾ ꓐꓰ ꓕꓱ ꓡꓱ ꓐꓯ ꓔ ꓡꓳ= ꓖꓳ ꓟ ꓡꓰ ꓐꓰ ꓡꓴ ꓗꓶꓸ ꓔꓯ ꓣꓴ ꓢꓲ ꓪꓴ-ꓢ ꓔꓯ ꓫꓸ ꓟꓳ ꓐꓯ ꓓꓳ ꓡꓰ ꓠꓬ꓾ ꓡꓴ ꓗꓶꓸ ꓕꓱ ꓟ ꓠꓬ ꓠꓴ ꓪ ꓝꓴꓲꓸ ꓥꓸ ꓦ ꓟꓶ ꓠꓹ ꓟ ꓥꓪ ꓫꓵꓽ ꓡꓰ ꓬꓰ ꓔ ꓟ ꓘꓶꓽ ꓫꓵꓽ ꓫꓵꓼ ꓥ ꓡꓳ꓾ ꓐꓰ ꓕꓰ ꓡꓰ ꓐꓯˍ ꓡꓳ=

ꓕꓱ ꓕꓲ ꓘꓴ ꓗꓪ ꓢꓲꓺ ꓒ ꓬꓰ-ꓢꓴ ꓦꓲ ꓘꓳꓼ ꓑꓮꓲꓽ ꓗꓳꓸ ꓙꓰˍ ꓟ ꓑꓮꓲꓽ ꓟꓶꓼ ꓘꓶꓽ ꓗꓪ ꓕꓱ ꓡꓱ ꓐꓯˍ ꓟ ꓥ ꓡꓳ= ꓕꓱ ꓟ ꓠꓬ ꓬꓲ-ꓢꓷ-ꓡꓰ ꓡ ꓞꓳ ꓐꓴ ꓕꓲ ꓦꓲ ꓡꓰ ꓕꓲ ꓦꓲ ꓬꓰ ꓠ ꓔ ꓟ ꓑꓮꓲꓽ ꓕꓲ ꓟ ꓥ ꓪ= ꓖꓳ ꓡꓱ ꓬꓰˍ ꓕꓯ ꓬꓲ-ꓢꓷ-ꓡꓰ ꓡ ꓞꓳ ꓐꓴ ꓠꓬ ꓬꓲ-ꓙꓲ ꓟꓵꓽ ꓗꓪ ꓐꓰ ꓪꓴ-ꓢ ꓡꓰ ꓮ’ ꓡꓰ ꓓꓴ ꓓꓽ ꓟ ꓗꓪ ꓐꓰ ꓚꓬꓴꓸ ꓙ ꓡˍ ꓟ ꓔꓯ ꓚꓲꓸ ꓟꓶ ꓠꓹ ꓟ꓾ ꓬꓲ-ꓢꓷ-ꓡꓰ ꓡ ꓞꓳ ꓐꓴ ꓬꓲ-ꓙꓲ ꓟꓵꓽ ꓗꓪ ꓐꓰ ꓟꓽ ꓡꓲꓹ ꓙꓰˍ ꓢꓰꓽ ꓧꓶꓸ ꓕꓯ ꓟꓶꓼ ꓘꓶꓽ ꓗꓪ ꓮ ꓣꓳ ꓮ ꓛꓵꓼ ꓔꓯ ꓢꓰꓼ ꓢꓲ ꓠꓬꓲ ꓙꓵꓽ ꓧꓶꓽ ꓟꓽ ꓗꓷ ꓟ ꓧꓪꓽ ꓔꓯ ꓜꓽˍ ꓟ ꓔꓯ ꓓꓵꓽ ꓙꓽ ꓛꓲꓺ ꓠꓹ ꓟ ꓐꓱ ꓶ ꓥ ꓡꓳ=

ꓖꓳ ꓡꓱ ꓢꓲ ꓠꓬꓲ ꓕꓱ ꓡꓱ ꓓꓵꓽ ꓙꓽˍ ꓟ ꓑꓮꓲꓽ ꓬꓰˍ ꓕꓯ ꓑ ꓑ ꓖꓳ ꓟ ꓠꓬ ꓙꓵꓽ ꓧꓶꓽ ꓟꓽ ꓗꓷ ꓟ꓾ ꓛꓱꓼ ꓡꓱꓼ ꓙꓵ ꓖꓳ ꓟ ꓠꓬ ꓮ ꓟꓶ ꓕꓲ ꓞꓲꓼ ꓗꓪ ꓐꓯˍ ꓟ ꓗꓳ-ꓫꓬ ꓐꓯˍ ꓟ꓾ ꓗꓳ-ꓫꓬ ꓐꓯˍ ꓟ ꓠꓬ ꓪꓴ-ꓢ ꓙꓵꓽ ꓗ ꓢꓲꓽ ꓫꓬ ꓕꓳꓽ ꓶ ꓗꓪ ꓜꓽ ꓟꓽ ꓓ ꓐꓯˍ ꓟ ꓟꓽ ꓐ ꓟ ꓔꓯ ꓐꓯ ꓠꓲꓹ ꓫꓵˍ ꓟ ꓥ ꓪ= ꓖꓳ ꓟ ꓛꓱꓼ ꓡꓱꓼ ꓙꓵ ꓠꓬ ꓮ ꓟꓶ ꓕꓲ ꓞꓲꓼ ꓗꓪ ꓙꓵꓻ ꓒꓶꓽ ꓢꓯꓼ 11-15 ꓠꓬꓲꓽ ꓗꓴꓸ ꓝꓸꓼ ꓗꓪ ꓬꓲꓸ ꓢꓯꓼ ꓙꓳˍ ꓟ ꓛꓱꓼ ꓡꓱꓼ ꓙꓵ ꓔꓯ ꓓꓳ ꓠ ꓔ ꓡꓳ=

ꓖꓳ ꓟ ꓔꓯ ꓔꓲꓺ ꓒ ꓐꓴ ꓡꓰ ꓕꓱ ꓟ ꓠꓬ ꓓꓳ ꓓꓹ ꓥ ꓐꓰ ꓐꓯ ꓡˍ ꓕꓯ ꓢꓲ ꓠꓬꓲ ꓕꓱ ꓟ ꓔꓯ ꓓꓳ ꓓꓹ ꓟ ꓒꓬꓱꓼ ꓡ ꓓꓴ ꓥ ꓪ= ꓖꓳ ꓟ ꓔꓯ ꓗꓳ-ꓫꓬ ꓬꓰ ꓓꓳꓻ ꓡꓰ ꓟ ꓜꓽ ꓫꓵꓽ ꓓꓳ ꓫꓵꓽ ꓐꓰ ꓕꓰ ꓡꓰ ꓐꓯˍ ꓟ ꓥ ꓪ=

ꓖꓳ ꓡꓱ ꓢꓲ ꓠꓬꓲ ꓖꓳ ꓕꓲ ꓟꓶꓼ ꓘꓶꓽ ꓗꓪ ꓢꓲꓺ ꓒ ꓬꓰ-ꓢꓴ ꓐꓰ ꓝꓲ ꓓꓴ ꓐꓴ ꓥˍ ꓟꓲ ꓜꓽ ꓫꓵꓽ ꓓꓳꓻ ꓫꓵꓽ ꓔꓯ ꓕꓱ ꓡꓰ ꓜꓽˍ ꓟ ꓥ ꓪ= ꓬꓲ ꓪ ꓜꓽˍ ꓟ ꓠꓯꓸꓼ ꓗꓪ ꓙꓵꓽ ꓧꓶꓽ ꓟꓽ ꓗꓷ ꓟ ꓮ ꓣꓳ ꓮ ꓛꓵꓼ ꓧꓪꓽ ꓐ ꓐꓷˍ ꓥꓳ= ꓖꓳ ꓡꓱ ꓥˍ ꓟꓲ ꓕꓱ ꓗꓪ ꓟꓽ ꓓ ꓠꓬ ꓑ ꓑ ꓐꓰ ꓛꓱꓼ ꓡꓱꓼ ꓙꓵ ꓥ ꓟ ꓔꓯ ꓡꓳꓸ ꓟꓳꓻ ꓪ ꓓꓹ ꓡꓳ=

ꓢꓲꓺ ꓒ ꓬꓰ-ꓢꓴ ꓠꓬ ꓑ ꓑ ꓔꓯ ꓣꓴ ꓢꓲ ꓕꓱ ꓟ ꓠꓬ ꓥꓪ ꓧꓪꓽ ꓥꓪ ꓖꓳ ꓓꓱꓽ ꓐꓯˍ ꓟ ꓔꓯ ꓡꓳꓸ ꓟꓳꓻ ꓪ ꓓꓹ ꓡꓳ= ꓖꓳ ꓟ ꓡꓰ ꓐꓰ ꓕꓲ ꓡꓰꓹ ꓡꓴ ꓗꓶꓸ ꓔꓯ ꓣꓴ ꓢꓲ ꓠꓬꓲ ꓛꓱꓼ ꓡꓱꓼ ꓙꓵ ꓖꓳ ꓟ ꓔꓯ ꓥˍ ꓟꓲ ꓠꓴ ꓪ ꓝꓴꓲꓸ ꓥꓸ ꓦ ꓟꓶ ꓠꓹ ꓟ ꓥꓪ ꓫꓵꓽ ꓥ ꓡꓳ꓾ ꓐꓰ ꓢꓲꓺ ꓒ ꓬꓰ-ꓢꓴ ꓡꓰ ꓕꓱ ꓡꓰ ꓐꓯˍ ꓟ ꓔꓯ ꓡꓳꓸ ꓟꓳꓻ ꓪ ꓓꓹ ꓡꓳ=

ꓕꓱ ꓟ ꓠꓬ ꓢꓲꓺ ꓒ ꓬꓰ-ꓢꓴ ꓡꓰ ꓔꓶ ꓔ ꓟ ꓑ ꓑ ꓐꓰ ꓛꓱꓼ ꓡꓱꓼ ꓙꓵ ꓔꓯ ꓬꓲ ꓫꓵꓽ ꓬꓲ ꓧꓪꓽ ꓒꓬꓱꓼ ꓝꓲˍ ꓟ ꓥ ꓪ= ꓮ ꓡꓲꓳ ꓐꓯˍ ꓠꓬ ꓬꓲ ꓡꓰ ꓐꓯ ꓔ ꓟ ꓠꓬ ꓬꓲ ꓠꓬ ꓟꓴ ꓗꓪ ꓗꓪ ꓐꓰ ꓬꓯꓼ ꓡ ꓟ ꓢꓯꓼ ꓟꓬ ꓑ ꓑ ꓥ ꓡꓳ= ꓑ ꓑ ꓕꓱ ꓟ ꓔꓯ ꓜꓽ ꓢꓴ ꓓꓳꓻ ꓢꓴ ꓠꓬ ꓬꓲ ꓫꓵꓽ ꓬꓲ ꓧꓪꓽ ꓔꓯ ꓜꓽ ꓢꓴ ꓓꓳꓻ ꓢꓴ ꓠꓬ ꓕꓲ ꓞꓲꓼ ꓕꓲ ꓑ ꓢꓯꓼ ꓟꓬ ꓟꓶˍ ꓥꓳ꓾ ꓐꓯ ꓔ ꓟ ꓡꓰ ꓕꓲ ꓡꓰꓹ ꓬꓲ ꓙꓽ ꓖꓶꓽ ꓔ ꓟ ꓥ ꓪ=

ꓖꓳ ꓟ ꓑꓶꓸ ꓓꓴ ꓠꓬꓲꓸ ꓠꓬꓲ ꓘꓴ ꓜꓲꓼ ꓞꓳ ꓠꓬ ꓑ ꓑ ꓐꓰ ꓛꓱꓼ ꓡꓱꓼ ꓙꓵ ꓔꓯ ꓢꓲꓺ ꓒ ꓬꓰ-ꓢꓴ ꓬꓲ ꓫꓵꓽ ꓬꓲ ꓧꓪꓽ ꓒꓬꓱꓼ ꓡˍ ꓟ ꓥ ꓡꓳ꓾ ꓐꓰ ꓙꓵꓻ ꓔꓬ ꓡꓳ= ꓖꓳ ꓟ ꓡꓰ ꓐꓰ ꓕꓲ ꓡꓰꓹ ꓝꓲ ꓓꓴ ꓐꓴ ꓔꓯ ꓡꓰꓽ ꓘꓴ ꓢꓲ ꓠꓬꓲ ꓢꓲꓺ ꓒ ꓬꓰ-ꓢꓴ ꓠꓬ ꓕꓰ ꓡꓰ ꓬꓰˍ ꓟ ꓥ ꓟ ꓪꓴꓸ ꓠꓬꓲ ꓝꓲ ꓓꓴ ꓐꓴ ꓔꓯ ꓖꓳ ꓕꓲ ꓟꓶꓼ ꓘꓶꓽ ꓗꓪ ꓖꓳ ꓡꓱ ꓬꓰ ꓠꓹ ꓟ ꓙꓵꓽ ꓪ ꓖꓶꓽ ꓔ ꓡꓳ=

ꓕꓱ ꓟ ꓔꓯ ꓬꓴ-ꓔ ꓙꓵꓻ ꓠꓲꓹˍ ꓡꓰ ꓐꓰ ꓔꓲꓺ ꓒ ꓟꓬꓱꓽ ꓐꓬꓱꓽ ꓘꓶꓽ ꓔꓯ ꓖꓶˍ ꓟ ꓐꓰ ꓕꓱ ꓡꓱ ꓐꓯˍ ꓟ ꓥ ꓪ= ꓖꓳ ꓡꓱ ꓠꓬꓲ ꓝꓲ ꓓꓴ ꓐꓴ ꓙꓵꓽ ꓪ ꓗꓪ ꓐꓰ ꓬꓯꓼ ꓡˍ ꓟ ꓔꓲꓺ ꓒ ꓐꓴ ꓡꓰ ꓑ ꓑ ꓔꓯ ꓣꓴ ꓢꓲ ꓢꓲꓺ ꓒ ꓬꓰ-ꓢꓴ ꓐꓯˍ ꓟ ꓡꓰ ꓕꓲ ꓡꓰꓹ “ꓕꓱ ꓟ ꓠꓬ ꓥꓪ ꓧꓪꓽ ꓥ ꓡꓳ꓾ ꓥꓪ ꓖꓳ ꓓꓱꓽ ꓥ ꓡꓳ” ꓛꓱꓼ ꓡꓱꓼ ꓙꓵ ꓔꓯ ꓥˍ ꓟꓲ “ꓕꓱ ꓟ ꓠꓬ ꓠꓴ ꓪ ꓝꓴꓲꓸ ꓥꓸ ꓦ ꓟꓶ ꓠꓹ ꓟ ꓥꓪ ꓫꓵꓽ ꓥ ꓡꓳ” ꓐꓯˍ ꓠꓬ ꓬꓲꓸ ꓧꓪꓽ ꓒꓬꓱꓼ ꓡˍ ꓟ ꓥ ꓡꓳ꓾ ꓐꓰ ꓕꓰ ꓡꓰ ꓙꓵꓻ ꓔꓬ ꓟ ꓥ ꓪ=

ꓖꓳ ꓟ ꓑꓶꓸ ꓓꓴ ꓢꓲꓺ ꓒ ꓬꓰ-ꓢꓴ ꓠꓬ ꓬꓴ-ꓔ ꓡ ꓞꓳ ꓐꓴ ꓕꓲ ꓠꓬꓲ ꓡꓰ ꓕꓲ ꓠꓬꓲ ꓜꓽ ꓔꓬ ꓟ ꓟꓽ ꓓ ꓬꓳꓸ ꓚꓵˍ ꓟ ꓜꓽ ꓫꓵꓽ ꓕꓱ ꓟ ꓠꓬꓲꓽ ꓫꓵꓽ ꓔꓯ ꓬꓲ ꓫꓵꓽ ꓬꓲ ꓧꓪꓽ ꓕꓰ ꓡꓰ ꓒꓬꓱꓼ ꓡ ꓝꓲˍ ꓟ ꓥ ꓪ= ꓖꓳ ꓟ ꓠꓬ ꓕꓲ ꓠꓬꓲ ꓡꓰ ꓕꓲ ꓠꓬꓲ ꓜꓽ ꓢꓲ ꓢꓯꓸ ꓔꓬ ꓟ ꓪꓴꓸ ꓠꓬꓲ ꓬꓲꓸ ꓧꓪꓽ ꓬꓲ ꓫꓵꓽ ꓠꓬ ꓢꓯꓼ ꓟꓬ ꓥ ꓡꓳ꓾ ꓐꓯˍ ꓟ ꓬꓲ ꓔꓯꓺ ꓥꓳꓽ ꓥ ꓡꓳ=

ꓢꓲꓺ ꓒ ꓬꓰ-ꓢꓴ ꓠꓬ ꓣꓳꓽ ꓟꓲ ꓠꓯ ꓞꓳ ꓤ ꓔꓯ ꓕꓲ ꓞꓲꓼ ꓕꓲ ꓑ ꓢꓯꓼ ꓟꓬ ꓗꓷ ꓡꓰ ꓠꓹ ꓟ ꓣꓱꓽ ꓛꓰꓽ ꓖꓶ ꓠꓹ ꓟ ꓐꓱ ꓶ ꓡꓲꓽ ꓒꓰꓼ ꓜꓽ ꓫꓵꓽ ꓔꓯ ꓬꓲ ꓫꓵꓽ ꓬꓲ ꓧꓪꓽ ꓒꓬꓱꓼ ꓡ ꓝꓲˍ ꓟ ꓥ ꓪ= ꓧꓪꓽ ꓖꓳ ꓓꓱꓽ ꓢꓯꓸ ꓔꓬ ꓠꓹ ꓟ ꓐꓱ ꓶ ꓑ ꓑ ꓐꓰ ꓛꓱꓼ ꓡꓱꓼ ꓙꓵ ꓔꓯ ꓬꓲ-ꓢꓷ-ꓡꓰ ꓡ ꓞꓳ ꓐꓴ ꓠꓬ ꓕꓲ ꓠꓬꓲ ꓡꓰ ꓕꓲ ꓠꓬꓲ ꓜꓽ ꓔꓬ ꓟ ꓡꓰ ꓐꓰ ꓕꓲ ꓡꓰꓹ ꓕꓲ ꓞꓲꓼ ꓕꓲ ꓑ ꓢꓯꓼ ꓟꓬ ꓟꓶ ꓠꓹ ꓟ ꓐꓱ ꓶ ꓢꓲꓺ ꓒ ꓬꓰ-ꓢꓴ ꓬꓲ ꓫꓵꓽ ꓬꓲ ꓧꓪꓽ ꓔꓯ ꓥˍ ꓟꓲ ꓣꓳ ꓜꓽ ꓠꓹ ꓓꓳꓻ ꓠꓹ ꓟ ꓟꓸ ꓖꓶ ꓡˍ ꓟ ꓥ ꓪ=

ꓚꓵ ꓚꓵ ꓐꓯˍ ꓠꓬ ꓢꓲꓺ ꓒ ꓬꓰ-ꓢꓴ ꓠꓬ ꓡꓲ-ꓢꓴ ꓠꓯꓸꓼ ꓗꓪ ꓒꓬꓱꓽ ꓟꓳꓻˍ ꓠꓬ ꓢꓲꓺ ꓒ ꓬꓰ-ꓢꓴ ꓠꓬ ꓡꓲ-ꓢꓴ ꓡꓲꓽ ꓒꓰꓼ ꓜꓽ ꓫꓵꓽ ꓥ ꓟ ꓜꓻ ꓗꓪ ꓐꓰ ꓫꓬꓹ ꓔ ꓟ ꓑ ꓑ ꓔꓯ꓾ ꓖꓳ ꓟ ꓡꓰꓽ ꓟꓽ ꓞꓲꓺ ꓜꓻ ꓗꓪ ꓐꓰ ꓚꓬꓸ ꓔ ꓟ ꓙꓵ ꓒꓶꓽ ꓔꓯ ꓬꓲ ꓠꓬ ꓬꓲ ꓫꓵꓽ ꓬꓲ ꓧꓪꓽ ꓬꓰ ꓡ ꓟꓽ ꓢꓷꓸ= ꓮ ꓡꓲꓳ ꓐꓯˍ ꓠꓬ ꓢꓲꓺ ꓒ ꓬꓰ-ꓢꓴ ꓠꓬ ꓡꓲꓽ ꓒꓰꓼ ꓔꓯ ꓮ ꓕꓯ ꓥˍ ꓟꓲ ꓬꓲ ꓚꓬꓴꓸ ꓙˍ ꓟ ꓠꓯꓸꓼ ꓗꓪ ꓣꓱꓽˍ ꓟ ꓑꓶꓸ ꓓꓴ ꓥ ꓡꓳ=