ꓟꓵꓽ ꓘꓳꓼ ꓐꓰ ꓫꓸ ꓕꓱˍ ꓟ

ꓟꓵꓽ ꓘꓳꓼ ꓐꓰ ꓫꓸ ꓕꓱˍ ꓟ
ꓟꓲ ꓠꓯ ꓞꓻ ꓡ ꓟ ꓡꓱ ꓡ ꓟ ꓐꓯˍ ꓟ ꓠꓯꓸꓼ ꓗꓪ ꓠꓬꓲꓸ ꓠꓬꓲ ꓗꓪ ꓚꓳꓸ ꓡꓰ ꓐꓰ ꓬꓲ ꓧꓶꓹ ꓧꓪ ꓢꓲ꓾ ꓙꓲ ꓞꓳ ꓠꓹ ꓟ ꓟꓬꓱꓽ ꓬꓰ ꓠꓹ ꓟ ꓬꓳꓸ ꓚꓵˍ ꓡꓳ꓾ꓐꓯ ꓟ ꓔꓯ ꓣꓳ ꓠ ꓠꓹ ꓓꓴ ꓬꓰ ꓡꓯ= ꓟꓲ ꓠꓯ ꓖꓴ ꓪꓴꓸ ꓕꓲ ꓟꓵꓽ ꓗꓪ ꓔꓬ ꓟ ꓪꓴꓽ ꓡ ꓟꓴ ꓡ ꓢꓴ ꓐꓴ ꓗꓴꓷꓼ ꓗꓪ ꓣꓱꓽˍ ꓟ ꓧꓪꓽ ꓞꓶꓸꓹ ꓣꓱꓽˍ ꓟ ꓔꓯ ꓟ ꓞꓯꓽ ꓞꓯꓽ ꓤ ꓟꓴ ꓓꓴ ꓟꓽ ꓙꓳ ꓕꓱ ꓡꓱ ꓝꓸ ꓢꓲ ꓣꓱꓽˍ ꓥꓳ ꓐꓯ ꓠꓬ ꓟꓲ ꓠꓯ ꓡꓱ ꓡ ꓟ ꓞꓻ ꓡ ꓟ ꓠꓬ ꓟꓬꓽ ꓠꓬꓲ ꓐꓭꓹ ꓠꓬꓲ ꓗ ꓡ ꓢꓲ꓾ ꓟꓲ ꓠꓯ ꓞꓳ ꓤ ꓔꓯ ꓟꓬꓽ ꓠꓬꓲ ꓐꓬ ꓡꓰ ꓓꓴ ꓫꓸ ꓡ ꓓꓴ ꓔꓳꓹ ꓜꓳꓽ ꓡ ꓥꓳ꓾ ꓐꓰ ꓕꓱ ꓡꓱ ꓐꓯ ꓔ ꓡꓳ=  
ꓖꓳ ꓟ ꓠꓬ ꓚꓵ ꓚꓵ ꓒꓬꓱꓼ ꓡ ꓓꓹ ꓟ ꓥ ꓡ? Germany ꓗꓴꓷꓼ ꓗꓪ ꓟ ꓟꓵꓽ ꓘꓳꓼ ꓚꓱꓹ ꓔꓯ ꓟꓳꓸ ꓢꓷꓸ ꓠꓲꓹ ꓙꓳ ꓒ ꓐꓴ ꓡꓰ ꓮ ꓡꓰ ꓐꓯ꓾ ꓐꓯ ꓠꓬ ꓟꓲ ꓠꓯ ꓖꓴ ꓪꓴꓸ ꓕꓲ ꓟꓵꓽ ꓗꓪ ꓟ ꓪꓴꓽ ꓡ ꓟꓴ ꓡ ꓖꓴ ꓢꓴ ꓐꓴ ꓗꓴꓷꓼ ꓐꓴ ꓠꓬ ꓞꓳ ꓤ ꓔꓯ ꓐꓬ ꓡꓰ ꓠ ꓠꓸꓹ ꓡꓰ ꓠ ꓟꓽ ꓗꓷ ꓡꓰ ꓠꓹ ꓟ ꓐꓱ ꓶ ꓧꓪꓽ ꓞꓶꓸꓹ ꓔꓯ ꓧꓶꓸ ꓕꓯ ꓣꓱꓽˍ ꓟ ꓡꓰ ꓟꓽ ꓣꓱꓽ ꓬꓰ ꓐꓹ ꓡꓳ ꓐꓰ ꓕꓱ ꓡꓱ ꓐꓯ ꓡꓳ= ꓕꓱ ꓡꓱ ꓬꓰ ꓐ ꓡꓹ ꓟ ꓠꓬ ꓬꓲ ꓚꓱꓹ ꓮ ꓟꓬꓹ ꓙꓳˍ ꓡꓳ= 
ꓬꓲ ꓚꓱꓹ ꓧꓪꓽ ꓕꓯ ꓠꓬ ꓙꓼ ꓔꓯ ꓢꓲ ꓢꓷꓸ ꓠꓲꓹ ꓟꓬꓽ ꓠꓬꓲ ꓐꓭꓹ ꓠꓬꓲ ꓪꓴꓽ ꓡ ꓟꓴ ꓡ ꓠꓹ ꓟ ꓐꓱ ꓶ ꓥ ꓟꓲ ꓐꓹ ꓡꓳ= ꓕꓱ ꓡꓱ ꓣꓱꓽˍ ꓟ ꓧꓪꓽ ꓞꓶꓸꓹ ꓔꓯ ꓮ ꓘꓶꓸ ꓟ ꓣꓱꓽ ꓠꓹ ꓟ ꓐꓱ ꓶ ꓠꓬ ꓞꓻ ꓢꓯꓼ ꓔꓯ ꓖꓶꓽˍ ꓟ ꓶꓻ ꓤ ꓶꓻ ꓟꓲ ꓕꓱ ꓡꓱ ꓫꓵꓽ ꓔꓯ ꓣꓱꓽ ꓢꓲ ꓠꓬꓲ ꓧꓪꓽ ꓞꓶꓸꓹ ꓔꓯ ꓮ ꓟꓬꓹ ꓟꓽ ꓣꓱꓽ ꓟ ꓕꓱ ꓡꓱ ꓫꓵ ꓥ ꓟꓲ ꓬꓰ ꓐ ꓡꓹ ꓡꓳ= ꓕꓱ ꓡꓱ ꓣꓱꓽˍ ꓟ ꓗꓪ ꓐꓰ ꓦꓲꓸꓹ ꓘꓴꓽ ꓗꓪ ꓮ ꓔꓳꓸ ꓣꓱꓽˍ ꓟ ꓗꓪ ꓐꓰ 100 ꓗꓪ ꓚꓳꓸ 90 ꓔꓯ ꓣꓳ ꓟꓽ ꓣꓱꓽ ꓣꓱꓽ ꓬꓰ ꓐ ꓡꓹ ꓟ ꓬꓲ ꓚꓱꓹ ꓙꓳˍ ꓡꓳ= 
ꓟꓳ-ꓓꓳ ꓙ ꓖꓴ ꓙꓲˍ ꓟ ꓧꓳꓸꓹ ꓛꓬꓼ ꓡꓯꓼ ꓑꓰꓹ ꓡꓳꓽ ꓕꓱ ꓡꓱ ꓫꓵꓽ ꓣꓱꓽˍ ꓟ ꓟꓳ-ꓓꓳ ꓙꓼ ꓔꓯ ꓧꓪꓽ ꓞꓶꓸꓹ ꓮ ꓟꓬꓹ ꓟꓽ ꓣꓱꓽ ꓠ ꓬꓰˍ ꓟ ꓕꓱ ꓡꓱ ꓫꓵꓽ ꓔꓯ ꓬꓰ ꓐ ꓡ ꓕꓯ ꓠꓬ ꓧꓪꓽ ꓞꓶꓸꓹ ꓮ ꓟꓬꓹ ꓟꓽ ꓣꓱꓽ ꓣꓱꓽ ꓕꓱ ꓡꓱ ꓬꓰ ꓐ ꓡ ꓚꓱꓹ ꓙꓳˍ ꓡꓳ= ꓕꓱ ꓡꓱ ꓙꓼ ꓚꓳ ꓡ ꓠ ꓟ ꓐꓱ ꓶ ꓧꓪꓽ ꓞꓶꓸꓹ ꓟꓽ ꓣꓱꓽ ꓣꓱꓽ ꓟꓲꓽ ꓦꓲꓸꓹ ꓢꓯꓼ ꓔꓯ ꓣꓱꓽˍ ꓟ ꓬꓲꓻ ꓙꓬ ꓔꓯ ꓣꓱꓽˍ ꓟ ꓟꓲ ꓞꓻ ꓢꓯꓼ ꓔꓯ ꓣꓱꓽˍ ꓟ ꓕꓱ ꓡꓱ ꓫꓵꓽ ꓔꓯ ꓣꓱꓽ ꓢꓲ ꓠꓬꓲ ꓧꓪꓽ ꓞꓶꓸꓹ ꓣꓱꓽˍ ꓟ ꓔꓯ ꓣꓳ ꓮ ꓟꓬꓹ ꓣꓱꓽˍ ꓟ ꓛꓵ ꓠ ꓬꓰ ꓐ ꓡꓹ ꓡꓳ=
ꓕꓱ ꓡꓱ ꓫꓵꓽ ꓔꓯ ꓣꓱꓽ ꓠꓹ ꓟ ꓐꓱ ꓶ ꓙꓼ ꓢꓷꓸ ꓠꓲꓹ ꓥ ꓟꓲ ꓮ ꓟꓬꓹ ꓙꓳ ꓖꓴ ꓡꓰꓳ= ꓗꓴꓷꓼ ꓙꓵꓽ ꓢꓲꓽ ꓒ ꓐꓴ ꓠꓬ ꓗꓴꓷꓼ ꓶꓻ ꓡꓯꓼ ꓟꓴˍ ꓟ ꓔꓯ ꓟꓽ ꓠ ꓡꓰ ꓠ ꓛꓲ ꓡ ꓟ 50 ꓘꓳꓼ ꓕꓯ Carbon Dioxide ꓔꓯ 100 ꓗꓪ ꓚꓳꓸ 80 ꓗꓪ ꓛꓲ ꓟꓽ ꓔꓳ ꓡꓰ ꓠ ꓬꓰ ꓓꓴ ꓥꓳ꓾ ꓐꓰ ꓕꓱ ꓡꓱ ꓐꓯ ꓡꓳ= ꓙꓼ ꓫꓵꓽ ꓮ ꓟꓬꓹ ꓔꓯ ꓚꓳ ꓐ ꓡ ꓠꓹ ꓟ ꓟꓬꓱꓽ ꓬꓰ ꓓꓴ ꓥꓳ ꓐꓯ ꓟ ꓥ ꓡꓳ=