ꓚꓳꓦꓲꓓ ꓠꓸꓸꓫꓵꓽ ꓐꓰ ꓫꓬ_ꓟ ꓟꓲꓽ ꓦ ꓢꓯꓼ

ꓚꓳꓦꓲꓓ 19 ꓠꓸꓹ ꓫꓵꓽ ꓐꓰ ꓦꓬꓼ ꓠꓬꓲ ꓟꓶꓽ ꓘꓳꓼ

ꓠꓬꓲꓸ ꓠꓬꓲ  ꓟ ꓤꓶꓸꓹ ꓦꓬꓼ ꓠꓬꓲ ꓗꓪ ꓠꓸꓸꓫꓵꓽ ꓠꓸꓸꓙꓵꓽ ꓮꓽ ꓟꓬꓸ ꓔꓳꓼ ꓜꓳꓽ ꓡ ꓔꓬ ꓡꓳ-ꓸ ꓮꓸ ꓫꓵꓽ ꓪꓴꓸ ꓠꓬꓲ ꓒꓬꓱꓼ ꓡ ꓔꓬ ꓡꓽ? ꓮꓽ ꓙꓵꓽ ꓢꓴ ꓠꓲꓹ ꓟ ꓘꓴꓽ ꓗꓪ ꓓꓵꓽ ꓙ ꓔꓬ ꓐꓭ ꓥꓳ-ꓸ

ꓟꓬꓲꓹ ꓠꓬꓲ ꓣꓳꓽ ꓟꓵꓽ ꓣꓳ: ꓗꓴꓷꓼ ꓘꓴꓽ ꓗꓪ ꓥꓼ_ꓟꓲ Covid 19 ꓠꓸꓸ ꓫꓵꓽ ꓔꓳꓼ ꓜꓳꓽ ꓢꓴ ꓮꓽ ꓟꓬꓸ ꓙꓳ ꓡ ꓔꓬ ꓡꓳ-ꓸ    ꓠꓸꓹ ꓫꓵꓽ ꓕꓱ  ꓟ ꓠꓬ ꓮꓽ ꓘꓶꓸ ꓚꓵꓸ ꓢ_ꓟ ꓠꓸꓹ ꓫꓵꓽ ꓠꓸꓸ ꓐꓶꓽ ꓓꓲ ꓕꓲꓽ ꓟ ꓥ ꓡꓳ-ꓸ ꓝꓮꓲ  ꓟ ꓞꓲ ꓠꓸꓸ ꓫꓵꓽ ꓕꓱ ꓟ ꓠꓬ ꓡꓽ ꓞꓳ ꓐꓲ ꓞꓼ ꓟ ꓡꓳꓸꓸ ꓒꓱ ꓗꓪ ꓟꓬꓽ ꓠꓬꓲ ꓚꓵꓸ ꓢ ꓢꓲꓼ ꓠꓬꓲꓹ ꓠꓬꓲ ꓚꓵꓸ ꓔꓬ ꓢꓴ (20000) ꓣꓳ ꓟꓽ ꓞꓲ ꓡꓰ_ꓟ ꓡꓰꓽ ꓐꓰ ꓫꓵꓸꓸ ꓢꓴ ꓥꓼ_ꓟꓲ 200 ꓚꓳꓸꓸ ꓡꓳꓸꓸ ꓗꓪ ꓛꓵ ꓡꓰꓳ=

ꓢꓷꓸ ꓠꓲꓹ ꓙꓳ ꓒꓽ ꓢꓳꓼ ꓒꓽ ꓐꓴ ꓡꓰ ꓢꓳꓼ ꓔꓸ ꓟ ꓠꓬ ꓠꓸꓸ ꓫꓵꓽ ꓕꓱ ꓟ ꓠꓬ ꓡꓽ ꓞꓳ ꓟꓬꓽ ꓡꓰ ꓟ ꓐꓰ ꓚꓳꓸꓸ ꓡꓳ ꓗꓪ ꓟ ꓟꓲꓽ ꓦꓲ ꓢꓯꓼ ꓟꓽ ꓢꓲꓽ ꓫꓬ ꓡꓰ_ꓟ  ꓪꓴꓸ ꓠꓬꓲ ꓪꓽ ꓜꓲ ꓚꓵꓸ ꓔꓸ ꓥꓳ ꓐꓰ ꓐꓯꓼ ꓡꓳ-ꓸ ꓠꓸꓸ ꓫꓵꓽ ꓟꓬꓽ ꓠꓬꓲ ꓚꓵꓸ ꓢꓼ ꓟ ꓟꓵꓽ ꓗꓴꓷꓼ ꓔꓯꓸ ꓡꓳꓸ ꓠꓬꓲ ꓠꓬ ꓐꓰꓙꓲꓮꓠꓖꓹ ꓠꓰꓪ ꓓꓰꓡꓧꓲ ꓡꓳ ꓒꓱ ꓓꓽ ꓟ ꓗꓪ ꓟꓬꓽ ꓠꓬꓲ ꓚꓵꓸ ꓔꓬ ꓡꓳ-ꓸ ꓬꓲꓸ ꓪ ꓠꓯꓼ ꓗꓪ ꓢꓲꓽ ꓫꓬ ꓟ ꓟꓲꓽ ꓦꓲꓸꓸ ꓢꓯꓼ ꓟꓽ ꓡꓳꓼ ꓬꓰ_ꓟ ꓐꓶꓸ ꓓꓴ ꓙꓼ ꓫꓵꓽ ꓙꓼ ꓙꓵꓽ ꓗꓪ ꓐꓰ ꓟꓴꓽ ꓘꓴꓽ ꓢꓯꓼ ꓮꓽ ꓟꓬꓸ ꓓꓳ ꓔꓸ ꓟ ꓪꓴꓹ ꓠꓬꓲ ꓪ ꓜꓲ ꓦꓶ ꓡꓰ_ꓟ ꓥ ꓡꓳ-ꓸ

ꓐꓯ ꓠꓲꓹ ꓫꓵꓼ ꓟ ꓠꓬ ꓡꓽ ꓞꓳ ꓐꓲ ꓞꓼ ꓟ ꓟꓵꓽ ꓗꓴꓷꓼ ꓡꓳ ꓒꓱ ꓗꓪ ꓠꓬ ꓟꓲꓽ ꓦꓲ ꓢꓯꓼ ꓢꓲꓽ ꓫꓬ ꓚꓱꓼ ꓟꓽ ꓙꓳ ꓡꓰ_ ꓟ ꓪꓴꓸ ꓠꓬꓲ  ꓠꓸꓸꓫꓵꓽ ꓠꓸꓸꓙꓵꓽ ꓥ ꓕ ꓑꓳ ꓠꓬ ꓪ ꓜꓲ ꓚꓵꓸ ꓢ ꓔꓸ ꓟ ꓥꓳ ꓐꓯ ꓔꓸ ꓡꓳ-ꓸ

ꓖꓳ ꓟ ꓪꓴꓸ ꓠꓬꓲ ꓠꓬꓲꓹ ꓠꓬꓲ ꓠꓸꓸꓫꓵꓽ ꓓꓽ ꓣꓳꓽ ꓠꓯꓼ ꓗꓪ ꓟꓽ ꓚꓵꓸ ꓛꓵ ꓡ ꓠꓼ ꓟ ꓐꓱ ꓶꓽ ꓣꓳꓽ ꓚꓳ ꓡꓳ ꓗꓪ ꓟ ꓟꓲꓽ ꓦꓲ ꓢꓯꓼ ꓢꓲꓽ ꓢꓲꓽ ꓫꓬ ꓫꓬ ꓐꓰ ꓗꓷ ꓡꓰ ꓠꓼ ꓟ ꓠꓬ ꓣꓳꓽ ꓣꓱꓽ ꓔꓬ_ꓟ ꓣꓱꓽ ꓫꓵꓽ ꓥ ꓕ ꓑꓳꓸ ꓔꓯꓸ ꓤ ꓟꓳ ꓢꓲꓸ ꓚꓳ ꓡꓳ ꓗꓪ ꓟ-ꓸ ꓣꓳꓽ ꓛꓵꓼ ꓔꓬ_ꓟ ꓟꓲꓽ ꓦꓲ ꓢꓯꓼ ꓔꓯꓸ ꓢꓲꓽ ꓢꓲꓽ ꓫꓬ ꓫꓬ ꓣꓱꓽ ꓪ ꓠꓼ ꓟ ꓐꓱ ꓶ ꓐ ꓡꓼ ꓟ ꓕꓲꓽ ꓒꓳꓸ ꓗꓪ ꓐꓰ ꓢꓯꓼ ꓕꓵꓼ ꓓꓴ ꓬꓰ ꓡꓯ=